Nkyerɛkyerɛ na Ahyɛmudzi 84

Sɛ edwendwen kasafua asɔfodzi ho a, ebɛnadze na ɔba adwen mu? Nyankopɔn n’asɔfodzi tum no esi dɛn enya nhyɛdo wɔ w’abrabɔ mu?

Adwendwen nsɛmbisa yinom ho ekyir no, ibotum esũa Nkyerɛkyerɛ na Ahyɛmudzi 84:17–32, a erohwehwɛ dza Nyankopɔn pɛ dɛ ihu fa N’asɔfodzi tum no ho. Hwɛ mbrɛ ibesi botum dze nyiyimu yinom dze akã asɔfodzi na ne botae horow ho asɛm akyerɛ obi.

Adze kor a ibohu nye dɛ ɔnam asɔfodzi ayɛdze horow do no “nyamesu mu tum no da edzi” (hwɛ nyiyimu 19–21). Bia ibotum akyerɛw asɔfodzi ayɛdze horow a edze woho ahyɛmu no nkorkor (dza wɔakyerɛw no nkorkor wɔ General Handbook, 18.1, 18.2mu no, botum aboa). Ayɛdze horow yinom—na ahyɛmudzi horow a wɔbata ho no—esi dɛn dze Nyankopɔn no tum no aba w’abrabɔ mu? Sɛ wɔnnka ho a w’abrabɔ no bɛyɛ dɛn?

President Russell M. Nelson kyerɛkyerɛɛ dɛ, “Ɔbaa biara na barimba biara a ɔnye Nyame edzi ahyɛmu na osie dɛm ahyɛmu no, na ɔdze noho hyɛ asɔfodzi ayɛdze emudzi mu no, wɔ kwan tɔɔtsen wɔ Nyankopɔn no tum no ho’’ (“Spiritual Treasures,” Liahona, Ɔberɛfɛw 2019, 77). Hwɛ dɛ irusũa President Nelson n’asɛm no, a erohwehwɛ akwanhorow a ibotum “atwe Agyenkwa no tum no aba [w’]abrabɔ mu.’’

San hwɛ Nkyerɛkyerɛ na Ahyɛmudzi 25:10, 13, 15; 121:34–37, 41–46; Topics and Questions, “Priesthood,” “Joseph Smith’s Teachings about Priesthood, Temples, and Women,” Gospel Library; General Handbook, 3.6, Gospel Library.

Asɔfodzi nsewdzi na ahyɛmudzi no (hwɛ Nkyerɛkyerɛ na Ahyɛmudzi 84:31–44) wɔ nyɛe tsitsir ma Ɔsor Egya ne mbambanyin a wɔhyɛ hɔn wɔ asɔfodzi ɔfese mu, naaso anohoba nhyira pii a wɔwɔ nyiyimu yinom mu no wɔ hɔ ma Nyankopɔn ne mba nyinara. Anohoba horow yinom yɛ ebɛnadze, na ebɛnadze na Nyankopɔn se hɛn dɛ yɛnyɛ mfa ngye?

Elder Paul B. Pieper kyerɛkyerɛɛ dɛ: “Ɔyɛ enyikã dɛ wɔ asɔfodzi nsewdzi na ahyɛmudzi mu no [hwɛ Nkyerɛkyerɛ na Ahyɛmudzi 84:31–44], Ewuradze dze nyɛe nya na gye dzi dwuma. Ɔmmfa nyɛe hyɛ sɔfo nndzi dwuma. Temple mu na mbanyin na mbaa—bɔ mu—nya na wɔgye Aaron na Melchizedek Asɔfodzi horow ebien no ne nhyira na tum’’ (“Revealed Realities of Mortality,” Ensign, Sanda 2016, 21).

Sɛ ekenkan Nkyerɛkyerɛ na Ahyɛmudzi 84:31–44, a ibotum adwendwen dza “nya’’ na “gye” asɔfodzi no n’ase kyerɛ ma wo ho. Osi dɛn na iyi yɛ soronko fi wɔrehyɛ wo wɔ asɔfodzi ɔfese mu ho? Ebɛnadze bio so na Ewuradze to nsa frɛ wo dɛ gye wɔ nyiyimu yinom mu? Irisi dɛn reyɛ dɛm?

Ebɛnadze na ihu a okenyan wo ma eyɛ nokwafo wɔ eregye Agyenkwa, N’Egya, No nkowaa, na N’asɔfodzi tum no?

San hwɛ Nkyerɛkyerɛ na Ahyɛmudzi 121: 36–466.

Ebɛn nokwar na ihu wɔ Nkyerɛkyerɛ na Ahyɛmudzi 84:43–61 mu a ɔboa wo ma etse siantsir a ihia daa daa dɛ isũa Nyankopɔn n’asɛm ase? Hyɛ ebirabɔ a ɔda kan na sum ntamu wɔ nyiyimu yinom mu; “[iri]dzi onnyiewiei nkwa nsɛm no do enyiberdo’’ esi dɛn dze kan, nokwar, na “Jesus Christ no Sunsum’’ aba w’abrabɔ mu? (nyiyimu 43, 45).

San hwɛ 2 Nephi 32:3.

Ber a ekekenkan nyiyimu yinom no, ibotum ahwehwɛ akwanhorow a Ewuradze kãa dɛ Ɔbɔboa No nkowaa no. Anohoba horow yinom besi dɛn botum afa edwuma a Ɔase wo dɛ yɛ no ho? Mfatoho, anohoba horow a ɔwɔ nyiyimu 88 mu no esi dɛn ahyɛ mã wɔ w’abrabɔ mu?

Ebɛnadze na esũa fi nyiyimu yinom mu fa mbrɛ Nyankopɔn si yɛ N’edwuma ho? Ebɛn afotu na nhyira na ihu? Ibotum asan adwendwen mbrɛ esi “enya ntowdo wɔ ɔdwe nyina mu’’ ho osiandɛ enye obi a ɔwɔ “Sunsum a ɔyɛ dzen,’’ a nkorɔfo a wɔwɔ w’ebusua mu kã ho somee.

• Ama aaboa wo mbofra ma wɔatse dza ayɛdze yɛ ase no, hwɛ dɛ enye hɔn bɔhwɛ asɔfodzi ayɛdze horow beberee, tse dɛ Gospel Art Book [Asɛmpa Nsaano Mfonyin], nkanee 103–8, anaa dapɛn yi ne dwumadzi krataafa. Bisa hɔn ma wɔnkã dza orisi wɔ mfonyin kor biara mu. Nkyii wobotum abɔ mu akenkan Nkyerɛkyerɛ na Ahyɛmudzi 84: 19–22. Ebɛnadze ntsi na Ɔsor Egya pɛ dɛ yegye ayɛdze horow yinom? Kã kyerɛ wo mbofra no mbrɛ esi atse Nyankopɔn no tum nkã osian ayɛdze horow a agye na ahyɛmudzi a ayɛ no ntsi. (San hwɛ “Priesthood Power, Authority, and Keys” wɔ appendix A or appendix B.)

• Wɔabɔ mu akenkan Nkyerɛkyerɛ na Ahyɛmudzi 84:77 ekyir no, bisa wo mbofra no fa ereyɛ nyɛnko n’asekyerɛ ho asɛm. Ibotum akã anyɛnkofo apapa enya hɔn hɔnho asɛm. Jesus si dɛn kyerɛ hɛn dɛ Ɔpɛ dɛ yɛyɛ N’anyɛnkofo? Yebesi dɛn botum akyerɛ dɛ yɛpɛ dɛm so? Ndwom bi tse dɛ “I’m Trying to Be like Jesus” (Children’s Songbook, 78–79) botum aboa nkɔmbɔdzi yi.

• Wo mbofra hɔn enyi botum agye dɛ wɔbɛtse mbrɛ asɛmpasomafo sii boaa wo, w’ebusua, anaa w’ewuakɔr ma wɔgyee asɛmpa no ho asɛm. Nkyii ibotum akenkan anohoba tsitsir bi a Ewuradze bɔe maa asɛmpasomafo ho asɛm wɔ Nkyerɛkyerɛ na Ahyɛmudzi 84:88. Bbia wo mbofra botum adwendwen ndzeyɛe a ɔnye nyiyimu yi kɔ ho. Hwɛ dɛ ebɛkyɛ mber bi a nna erosom Ewuradze na etsee nkã dɛ Ɔnye wo wɔ hɔ ho asɛm, dɛ mbrɛ ɔakã ho asɛm wɔ nyiyimu 88. Ibotum asan aboa wo mbofra ma wɔadwendwen akwanhorow a wobotum ayɛ asɛmpasomafo seseiara. Gye dase dɛ Ɔsor Egya boa hɛn ma yehu dza yɛbɛkã sɛ yɛnye binom kã Jesus Christ ho asɛm a.