“Ayɛwoho 21–27: Bea a ‘Wɔama Hɔ Dodow No Wɔbɛgye Dodow Efi Hɔ’: Nkyerɛkyerɛ na Ahyɛmudzi 81–83,’: Bra, Bɛka Mo Do—Dze ma Fie na Asɔr: Nkyerɛkyerɛ na Ahyɛmudzi 2025 (2025)
“Nkyerɛkyerɛ na Ahyɛmudzi 81–83,” Bra, Bɛka Mo Do—Dze Ma Fie na Asɔr: 2025
Christ na Aberantsɛ Ɔhwɛfo Ɔdzefo no n’afã bi, Heinrich Hofmann yɛɛ nsaano mfonyin no
Ayɛwoho 21–27: Bea a “Wɔama Hɔ Dodow No Wɔbɛgye Dodow Efi Hɔ”
Nkyerɛkyerɛ na Ahyɛmudzi 81–83
Ebɔw 1832 mu no, Ewuradze frɛɛ Jesse Gause dɛ ɔmbɛyɛ Joseph Smith no ɔpamfo wɔ Asɔfodzi a Ɔkrɔn mu (a sesei wɔfrɛ no President a Odzi Kan na N’Apamfo kuw no). Nkyerɛkyerɛ na Ahyɛmudzi 81 yɛ nyikyerɛ dze ma Nuabanyin Gause fa no ɔfrɛ fofor no ho. Naaso Jesse Gause annsom nokwar mu, ntsi wɔfrɛɛ Frederick G. Williams ma ɔbɛhyɛɛ n’ananmu. Nuabanyin Williams ne dzin bɛhyɛɛ Nuabanyin Gause ne dzin ananmu wɔ nyikyerɛ no mu.
Dɛm no yɛ dɛ adze ketseketse bi, naaso nna ɔkyerɛ nokwar tsitsir bi: nyikyerɛ dodow a ɔwɔ Nkyerɛkyerɛ na Ahyɛmudzi mu no wɔdze maa nkorɔfo tsitsir, mbom yebotum aber nyina ahwehwɛ akwanhorow a yɛdze bedzi dwuma ama hɛnho (hwɛ 1 Nephi 19:23). Sɛ yɛkenkan Ewuradze n’afotu ma Frederick G. Williams dɛ “[ɔ]ma nkotodwe a wɔagow no mu nyɛ dzen” no a, yebotum adwendwen nkorɔfo a yebotum ahyɛ hɔn dzen ho (Nkyerɛkyerɛ na Ahyɛmudzi 81:5). Sɛ yɛkenkan Ewuradze ne frɛ a ɔdze maa United Firm mba dɛ “hom ndua dɛm ahyɛmu yi do nkã hɔnho mbɔ mu” a yebotum adwendwen hɛnara hɛn ahyɛmudzi ho. Na yebotum akenkan N’anohoba dɛ, “Emi … hom kyekyer me sɛ hom yɛ dza mekã,’’ tse dɛ ma Ɔrekasa kyerɛ hɛn (NKyerɛkyerɛ na Ahyɛmudzi 82:10, 15). Yebotum ayɛ iyi osiandɛ, dɛ mbrɛ Ewuradze paa mu kãe no, “Dza mekã kyerɛ kor no mekã kyerɛ hom nyina’’ (nyiyimu 5).
Hwɛ “Newel K. Whitney and the United Firm,” “Jesse Gause: Counselor to the Prophet,” wɔ Revelations in Context, 142–47, 155–57 mu.
Adwenkyerɛ horow ma Adzesũa wɔ Fie na wɔ Asɔr
Nkyerɛkyerɛ na Ahyɛmudzi 81: 4–5, 82: 18–19
“Ebɛyɛ adzepa kɛsenara dze ama wo mfɛfonom adasamba.”
Nsɛnsin beberee a ɔwɔ Nkyerɛkyerɛ na Ahyɛmudzi 81–83 mu no, Ewuradze frɛ hɛn dɛ yɛmboa nkorɔfo a wohia na woetwa hɛn ho ehyia. Hwɛ dɛ esensan nsɛnsin no ho sɛ ihu a. Nkasaho papaapa no dodow mfatoho no mu kor wɔ Nkyerɛkyerɛ na Ahyɛmudzi 81:4–5. Nsɛmbisa bi nye yi a ɔbɔboa wo ma adwendwen nyiyimu yinom ho:
-
Ebɛn akwanhorow na nyimpa botum ayɛ “mberɛw”? “[I]boa” hɔn n’asekyerɛ nye dɛn? Dabɛn na binom hɔn Christsu som aboa me mber a meyɛɛ mberɛw?
-
Ebɛnadze na obotum ama nyimpa bi ne nsa da mfatoho “[a]sensɛn famu”? Mibesi dɛn botum “[a]ma dɛm nsa no do wɔ sor”?
-
“Kotodwe a wɔagow’ n’asekyerɛ botum ayɛ ebɛnadze? Wosi dɛn hyɛ no dzen?
Agyenkwa no si dɛn yɛ iyinom ma wo?
Bia irusũa nyiyimu yi akaa wo obi a ibotum “aboa no, “amaa no do wɔ sor,” anaa “ahyɛ no dzen.” Ebɛnadze na ebɛyɛ dze asom dɛm nyimpa no?
Ebɛnadze bio na isũa fa som ma binom ho wɔ Nkyerɛkyerɛ na Ahyɛmudzi 82:18–19? Ibotum asan ahwɛ video no “Teachings of Thomas S. Monson: Rescuing Those in Need” (Gospel Library). Bishop Monson ne ward mba sii dɛn yɛɛ dza nyiyimu yinom kyerɛkyerɛ ho fasusu?
Teachings of Thomas S. Monson: Rescuing Those in Need
San hwɛ Jacob 2:17–19; Mosiah 18:8–9; “Works of God” (video), ChurchofJesusChrist.org.
Works of God
Carl Heinrich Bloch (1834–1890), Christ Healing the Sick at Bethesda, 1883, oil on canvas, 100 ¾ x 125 ½ inches. Brigham Young University Museum of Art, dze fotow a Jack R. and Mary Lois Wheatley dze mae no tɔe, 2001.
Agyenkwa no ama me dodow na ɔhwehwɛ dodow fi mo hɔ.
Erekenkan nyiyimu yi botum ekenyan wo ma ahwehwɛ dza Nyankopɔn dze ama wo mu—honandua na sunsum mu nhyira ebien no. Kae iyi ber a ekenkan nyiyimu 82 ne nkaa no. Ebɛnadze na etse nkã dɛ Nyankopɔn hia wɔ wo hɔ?
San hwɛ “Because I Have Been Given Much,” Asɔr Ndwom, nkanee 219.
Nkyerɛkyerɛ na Ahyɛmudzi 82:8–10
Mbrasɛm no dzi Nyankpɔn no dɔ ma me ho dase.
Sɛ ɔwo anaa obi a inyim no ebooboo siantsir a Ewuradze dze mbrasɛm pii ma ho a, Nkyerɛkyerɛ na Ahyɛmudzi 82: 8– 10 botum aboa. Ebɛn nhumu fi nyiyimu yinom mu na obotum aboa wo ma akyerɛkyerɛ mu akyerɛ obi siantsir a esan mu yi dɛ ibedzi Ewuradze ne mbrasɛm do? Ebɛnadze na ibotum dze atoto mbrasɛm no ho a obotum aboa? Ibotum ehu nhumu a ɔkekã ho wɔ Nkyerɛkyerɛ na Ahyɛmudzi 1:37–38; 130:20–21 na video “Blessed and Happy Are Those Who Keep the Commandments of God” no mu (Gospel Library). Ebɛn sũahu horow na wɔakyerɛkyerɛ wo ma ihu mbrasɛm no dɛ ɔyɛ nhyira?
Blessed and Happy Are Those Who Keep the Commandments of God
Dwendwen mbrasɛm no mu bi a Nyankopɔn dze ama wo no ho. Ebɛnadze na mbrasɛm yinom akyerɛkyerɛɛ wo fa Ɔno na Ne pɛ ho? (hwɛ nyiyimu 8). Irisie mbrasɛm no esi dɛn enya nsunsuando wɔ w’abrabɔ do?
Ebɛnadze na isũa fa Ewuradze ho fi nyiyimu 10? Edwendwen ho dɛ “[ebɛ]kyekyer]’’ Ewuradze n’asekyerɛ nye dɛn? (san hwɛ nyiyimu 15).
Ewuradze esi dɛn esie N’anohoba horow no wɔ w’abrabɔ mu? Ebɛn asɛm na ibotum akã akyerɛ obi a onnya nkenyan dɛ obesie mbrasɛm no osiandɛ wonnyaa nhyira a hɔn enyi da ho kwan no? Ana ihu nhumu biara a ɔbɔboa wɔ Elder D. Todd Christofferson n’asɛm “Our Relationship with God” mu? (Liahona, Esusow Aketseaba, 2022, 78–80).
San hwɛ Nsɛntsir na Nsɛmbisa, “Mbrasɛm,” Gospel Library.
Nkyerɛkyerɛ na Ahyɛmudzi 82:10
Ewuradze hyira hɛn wɔ Ɔnoara N’akwanhorow nwanwa mu.
Akyerɛbaa Virginia H. Pearce a nkaano ɔkã Wiadze mfɛndzanan Young Women Presidency ho, kãa ɔbaa bi a nna ɔhaw dodoodow wɔ ne mba a nna wɔreyɛ nsanmuyi horow a ɔnntsen ho asɛm. No suro mu no, ɔyɛɛ dza obotum adwendwen ho biara dze hwehwɛɛ Ewuradze ne nhyira wɔ hɔn afã. Dza ɔkã enyimia mpaabɔ ho no, ɔdze temple nkɔree ahokekã botae bi sii n’enyiwa do na ɔtsee nkã pefee dɛ Ewuradze beyi n’afɔrbɔ tsitsir yi ano ber a ɔsesa ne mba no hɔn akoma. Ɔbaa no bɔɔ amandzɛɛ dɛ:
“Temple nkɔree na daa daa mpaabɔ mfe du ekyir no, ɔyɛ me awerɛhow dɛ mebɛkã dɛ me mba hɔn nsanmuyi horow no nsesae. …
“Naaso emi masesa. Meyɛ ɔbaa soronko. … Meyɛ ayamuyie. Ayamuhyehye ahyɛ me mã. Nokwar mu ara mubotum ayɛ beberee na minnyi suro, ahopeper, afɔdzi, sombobɔ, na akomatu biara. M’egyaa me mber nhyehyɛɛ mu na mutum tweɔn Ewuradze. Na metaa hu Ewuradze no tum a ɔda edzi. Ɔdze adɔyɛ mbɔbɔrhu, nsɛm nketsenketse brɛ me a ɔkyerɛ no dɔ ma emi na me mba. M’enyidadodze horow asesa. Mbom m’enyi da kwan dɛ me mba bɛsesa no, m’enyi da daa daa adɔyɛ mbɔbɔrhu yinom do na mo wɔ enyi sɔ ma hɔn. …
“Ɔasesa me mpaabɔ. Me kyerɛ ɔdɔ beberee na m’enyisɔ ayɛ mbordo. … Ewuradze dzi dwuma wɔ akwanhorow nwanwa mu, na nokwar ara asomdwee a ɔbor ntseasee nyina do ahyɛ me mã” (wɔ “Prayer: A Small and Simple Thing,” At the Pulpit [2017], 288–89).
“Wɔbɔhwɛ ekunafo na ngyankaba’’.
Ebɔbira 1832 mu no, dɛ mbrɛ Ewuradze kyerɛkyerɛɛ no, Joseph Smith tuu kwan bɛyɛ akwansin 800 dze kɛseraa Ahotseweefo no a nna wɔaboa ano wɔ Missouri no (hwɛ Nkyerɛkyerɛ na Ahyɛmudzi 78:9). Ber a nna ɔwɔ hɔ no, ɔkɔɔr sɔn bi mu a nna ekunafo beberee wɔ na nna hɔn nko retsetse hɔn mba. Nna Phebe Peck na Anna Rogers kã hɔn ho a, nna Nkɔnkɔnhyɛnyi no nyim hɔn ankasa. Afe 1830 mu wɔ Missouri no, nna ɔman ne mbra no tseew ekunafo hɔn ndzinoa do wɔ hɔn kunnom a woewuwu hɔn egyapadze ho. Ebɛnadze na isũa fi ɔfã 83 fa mbrɛ Nyankopɔn n’atsenka wɔ ekunafo na ngyanka ho tse? Ana inyim obi a ɔwɔ gyinabew yi mu a obenya mfaso efi wo dɔ anaa nhwɛe mu a? Ebɛn akwanhorow mu na ibotum nye ekunafo, ngyanka, na enãnom esigyafo, na nkaafo a wɔwɔ hia akyɛ dza ewɔ?
San hwɛ Isaiah 1:17; James 1:27.
Epɛ adwenkyerɛ horow bi aka ho a, hwɛ bosoom yi Liahona na For the Strength of Youth [Ma Mbabun enya Ahoɔdzen] dawurbɔ krataa mu.
Adwenkyerɛ horow ma Erekyerɛkyerɛ Mbofra
Mubotum abɔ mpaa ama Nyankopɔn “[wɔ] m’ano na wɔ [m’]akoma mu.’’
-
Ber a enye wo mbofra kenkan Nkyerɛkyerɛ na Ahyɛmudzi 81:3 no, boa hɔn ma wɔndwendwen “bagua mu’’ na “kokoa mu’’ mbea bi a wobotum abɔ mpaa ho. Ibotum so nye hɔn etsie anaa wɔatow asɔr ndwom fa mpaabɔ ho, tse dɛ “Secret Prayer” (Asɔr Ndwom, nkanee 144). Hom nye homho nkyɛ biribi fi asɔr ndwom no mu a ɔkyerɛkyerɛ nokwar bi a ohia fa mpaabɔ ho. Hom botum asan akasa afa yɛnye Ɔsor Egya rekasa obu mu ara ho.
-
Ebɛhyɛ wo mbofra nkuran ma wɔabɔ mpaa wɔ hɔn akoma mu no, ibotum ama hɔn nkrataa akoma na aserɛ hɔn ma wɔadorɔw anaa wɔakyerɛw biribi a wɔpɛ dɛ wɔbɔ ho mpaa ma Ɔsor Egya. Gye dase dɛ Ɔsor Egya nyim dza yɛrodwendwen na nkã a yɛtse na Obotum atse hɛn mpaa mpo sɛ yemmbue hɛn ano nnkã a. Ibotum nye hɔn akyɛ mber bi a ebɔɔ mpaa wɔ w’akoma mu na Ɔsor Egya tsiei wo ho sũahu.
Ewuradze pɛ dɛ moboa nkorɔfo a wɔwɔ hia mu no.
-
Enye wo mbofra no ndorɔw anan na nkotodwe ho mfonyin, na bisa wo mbofra no ma wɔnhwehwɛ nyimpadua n’afã yinom wɔ Nkyerɛkyerɛ na Ahyɛmudzi 81:5. Ebɛnadze na Ewuradze reserɛ hɛn dɛ yɛnyɛ no wɔ nyiyimu yi mu? Hom botum nye homho akyɛ akwanhorow a nkorɔfo ahyɛ hom dzen mber a hom tsee nkã dɛ hom ayɛ “mbrɛw’’ anaa “bɛtɛɛ.’’ Video “Pass It On’’ no (ChurchofJesusChrist.org) botum ama wo mbofra adwenkyerɛ horow fa mbrɛ wosi som binom ho. Hom botum asan atow ndwom a ɔfa som ho, tse dɛ “Have I Done Any Good?’’ (Hymns, nkanee 223). Hwɛ dɛ ebɔboa wo mbofra no ma wɔayɛ nhyehyɛɛ a annyɛ koraa no wɔbɔboa nyimpa kor a ɔwɔ hia mu dapɛn yi.
2:18Pass It On
-
Ibotum asan dze mfonyin anaa video edzi dwuma akã Jesus Christ a ɔrosom binom ho asɛm tsĩabaa (hwɛ mfonyin a ɔwɔ nhyehyɛɛ yi mu; Gospel Art Book, nkanee 41, 42, 46, 47, 55; anaa Bible Videos no mu nsɛm kor wɔ Gospel Library). Yebesi dɛn botum edzi Agyenkwa ne fasusu a Ɔdze roboa binom no do?
Yɛbotum ahwɛ binom dɛ mbrɛ Agyenkwa No yɛe no.
Boa wo mbofra ma hɔnara wonya hɔn nkenyan. Erekyerɛkyerɛ n’asekyerɛ bor erekyɛ nokwar ara—n’asekyerɛ eroboa nkorɔfo binom ma wɔayɛ hɔnho adzesũafo. Kyɛn dɛ erekã akyerɛ wo mbofra ara mbrɛ wobesi botum asom binom no, mfatoho, hyɛ hɔn nkuran ma wɔnhwehwɛ Ewuradze n’akwankyerɛ mfa nhu nyia a wobotum aboa no.
Nkyerɛkyerɛ na Ahyɛmudzi 82:10
Egya a Ɔwɔ Sor bɔ nhyira ho anohoba ber a meper dɛ me betsie No.
-
Ɔwo na wo mbofra botum ahwɛ Nkyerɛkyerɛ na Ahyɛmudzi 82:8–10 mu dze enya nyiano ama nsɛmbisa no “Ebɛnadze ntsi na Ɔsor Egya ma hɛn mbrasɛm?” Ibotum aboa wo mbofra ma wɔadwendwen Ne mbrasɛm ho mfatoho (hwɛ, mfatoho, Exodus 20:4–17; Matthew 22:37–39; Nkyerɛkyerɛ na Ahyɛmudzi 89:5–17). Obotum aboa sɛ ɔwo na wo mbofra hwehwɛ anaa wɔdorɔw mfonyin dɛ ngyinahɔmadze ma hɔn mu bi a. Ɔsor Egya Ne mbrasɛm no si dɛn kyerɛ No dɔ ma hɛn?
-
Bia agordzi a ɔnnyɛ dzen botum aboa wo mbofra ma woehu Nyankopɔn ne mbrasɛm dɛ nhyira na nnyɛ adzesoadze. Nyimpa kor botum ama nkyerɛkyerɛ dze aboa nyimpa bi so, a wɔakyekyer n’enyiwa, ma ɔayɛ biribi tse dɛ paano a wɔdze biribi ahyɛ ne finimfin anaa ɔadorɔw mfonyin bi. Dwendwen biribi a ɔyɛ serew na wotum yɛ ho. Nkyii kã mbrɛ Nyankopɔn ne mbrasɛm tse dɛ nkyerɛkyerɛ a ɔwɔ agordzi mu yi no ho asɛm.
Epɛ adwenkyerɛ horow bi aka ho a, hwɛ bosoom yi Nyɛnko dawurbɔ krataa mu.