Nsanananmu ne Ndze horow: “Enyido-Adzehu no’’ no ho Dasegye horow

Wilford Woodruff bɔdɔɔm Asɔr no wɔ Mumu 1833, bɛyɛ mfe ebien ekyir a Joseph Smith na Sidney Rigdon nyaa nyikyerɛ a wɔkyerɛɛw no wɔ Nkyerɛkyerɛ na Ahyɛmudzi 76. Nna ɔtse New York dɛm mber no na osũaa “Enyido-Adzehu’’ no ho asɛm fi asɛmpasomafo a wɔrosom wɔ apaamu hɔ no hɔ. Mfe pii ekyir no, ɔkãai ne nkenyan wɔ nyikyerɛ yi ho asɛm:

“Wɔkyerɛkyerɛɛ me fi me mbafober mu dɛ Ɔsor kor na Hɛl kor na ɔwɔ hɔ, na wɔkãa kyerɛɛ me dɛ emumuyɛfo no nyina wɔ asotwe kor na atseneneefo no wɔ enyimnyam kor. …

“… Mber a mekenkaan enyido-adzehu no … , ɔtserɛɛw m’adwen mu na ɔmaa me dɛwdzi kɛsenara, ɔyɛɛ me dɛ Nyankopɔn no a oyii fapem no kyerɛɛ dasanyi no yɛ nyansafo, pɛrpɛr na nokwarfo, nna ɔwɔ suban papa na adwen papa na nyimdzee papa paa no, metsee nkã dɛ No dɔ, n’ehumbɔbɔr, pɛrpɛrdzi na atsɛmbu dzi mu, na metsee nkã dɛ mondɔ Ewuradze yie kyɛn ma nkyɛ meyɛ wɔ m’abrabɔ mu.’’

“Enyido-Adzehu no’ [yɛ] nyikyerɛ a ɔma kan yie, nokwar yie, na fapem yie kyɛn nyikyerɛ biara a ɔwɔ buukuu bi a yɛakenkan da mu. Ɔma hɛn ntseasee pefee wɔ hɛn ndɛ gyinabew ho, bea a yefi bae, siantsir a yɛwɔ ha, na beebi a yɛrokɔ ho. Dasanyi biara nam dɛm nyikyerɛ no do botum ehu dza ne kyɛfa na ne gyinabew bɛyɛ.’’

“Ansaana mobohu Joseph no mekãa dɛ ne panyinyɛ, anaa mbrɛ osi nnyinii mmfa moho; nna ne hwɛbea mmfa moho—sɛ ne tsinhwi yɛ etsia anaa ɔwar; ɔbarimba a ɔdze dɛm nyikyerɛ no puee no [enyido-adzehu a ɔakyerɛw no wɔ ɔfã 76] yɛ Nyankopɔn no nkɔnhyɛnyi. Mankasa muhunii.’’

Mber a Phebe Peck tsee dɛ Joseph na Sidney kyerekyerɛ “Enyido-Adzehu’’ ho asɛm no, nna ɔtse Missouri na ɔyɛ enã sigyanyi a ɔretsetse mba beenum. Enyido-Adzehu no yɛɛ no ahomka na okenyaan no ma ɔkyerɛɛw dza odzi do no dɛ ɔnye n’ebusua nkaafo no bɛkyɛ dza oesũa:

“Ewuradze riyi ɔsor Ahenman no mu esumasɛm akyerɛ ne Mba. … Joseph Smith na Sidney Rigdon bɛseraa hɛn fefɛw ber a oetwa mu no, na yɛyɛɛ nhyiamu a nna ɔyɛ enyigye pii ber a nna wɔwɔ ha, na yenyaa esumasɛm pii a wobuee do kyerɛɛ hɛn, a wɔmaa me awerɛhyɛmu kɛsenara. Nna yetum hu Nyankopɔn a osian adasa mu a orisiesie asomdwee tsenabew ama ne mba. Na hɔn a wɔnnkɛgye asɛmpa ne mãhyɛ no na woenngyina dɛ nsordaafo a wɔyɛ ndam wɔ Christ n’edwuma mu no nnkotum atsena Egya na Ɔba no hɔn enyim. Mbom bea bi wɔ hɔ a woesiesie ama hɔn a wɔnnkɛgye no, mbom bea a n’enyimnyam suar koraa kyɛn dɛ wɔbɛtsena Celestial Ahenman no mu. Merennkã bi nnka ndzɛmba yinom ho nnkyɛn dza woetsintsim na wɔdze rokɔ wiadze no. Na bia hom benya kwan dɛ hom ankasa bɛkenkan, na sɛ hom yɛ a, mowɔ enyidado dɛ hom dze ahwɛyie na mpaabɔ akoma bɛkenkan, osiandɛ ɔfata dɛ wohu ndzɛmba yinom. Na mepɛ dɛ hom bɔhwehwɛ mu, osiandɛ ɔno na ɔma hɛn enyigye wɔ wiadze yi nye dza ɔbɛba no mu.’’