Nkyerɛkyerɛ na Ahyɛmudzi 77–80

Ber a Joseph Smith na Sidney Rigdon yɛɛ edwuma dzendzen wɔ Bible ne nkenyan nkyerɛasee ho no, nna wɔwɔ nsɛmbisa fa Nyikyerɛ nwoma no ho, dɛ mbrɛ nkorɔfo pii wɔ no. Na dɛ mbrɛ nna Joseph nyim yie no, mber a ohia nyansa no, otum bisa Nyankopɔn. Nhumu a onyae no wɔ Nkyerɛkyerɛ na Ahyɛmudzi 77. Ber a ekenkan ɔfã yi no, hwɛ dɛ ebɛkyerɛw wo nhumu wɔ Nyikyerɛ nwoma etsir a ohia tsitsir a ɔwɔ mu no. Ebɛnadze na isũa fi w’adzesũa mu fa irinya nyikyerɛ ho?

Wɔkyekyeer United Firm no dɛ ɔmbɔhwɛ Asɔr no ne nkrataa tsintsimii na edwuma nsɛm do wɔ Ohio na Missouri. Nna ɔyɛ Joseph Smith, Newel K. Whitney, na Asɔr baanodzifo binom a wɔkãa hɔn mboa bɔɔ mu ma nsa akã Asɔr a orinyin no ne honandua mu ehiadze. Awerɛhow mu ara, United Firm no kɛdzee kaw na woguu no wɔ afe 1834 mu mber a nna wonntum nntua kaw.

San hwɛ “Newel K. Whitney and the United Firm,” wɔ Revelations in Context, 142–47 mu; Church History Topics, “United Firm (‘United Order’),” Gospel Library.

Ewuradze kãa kyerɛɛ Joseph Smith na Asɔr baanodzifo nkaafo no dɛ wɔrohwɛ adzekorabea na nkrataa ntsitsimii do no bɔboa “dza hom dze esi hom enyi do ho no, a hom agye atõ mu no’’ (Nkyerɛkyerɛ na Ahyɛmudzi 78:4). Ebɛnadze na ebɛkã dɛ ɔyɛ “dza [o]si enyi do’’ wɔ Agyenkwa N’Asɔr ho? Dwendwen iyi ho ber a ekenkan Nkyerɛkyerɛ na Ahyɛmudzi 78:1–7. Ebɛn akwanhorow binom mu na ibotum aboa epia dɛm botae no kan—wɔ ɔwoara w’ebusua mu so?

San hwɛ General Handbook, 1.2.

Edwendwen ho a ebɛnadze ntsi na ɔtɔfabi a Ewuradze frɛ N’akadofo “mbofra nkakraba’’? (Nkyerɛkyerɛ na Ahyɛmudzi 78:17). Mber bɛn na atse nkã dɛ abofra kakraba, bia osian biribi ho a innyae “nntsee ase’’ anaa “innkotum asɔw’’ ntsi? (nyiyimu 17–18). Ebɛnadze na ihu no wɔ nyiyimu yinom mu a obotum aboa wo ma “w’enyi agye’’ (nyiyimu 18) wɔ mber a ɔtsetse dɛm mu? Hwɛ dɛ ebɔhwehwɛ wankasa wo mfonyin mber a nna eyɛ abofra, na dwendwen mbrɛ esi enyin sunsum mu ofi hɔ no. Anaa dwendwen biribi ho a nna ɔyɛ dzen ma wo mber a nna nnyɛɛ panyin na ɔyɛ mberɛw ma wo sesei. Ebɛn akwanhorow mu na Ɔsor Egya da ho pɛ dɛ eyɛ tse dɛ abofra? (hwɛ Mosiah 3:19). Orisi dɛn “[dzi] wo kan’’?

Ebɛyɛ ahoboa esũa Nkyerɛkyerɛ na Ahyɛmudzi 78:19 no, ibotum akyerɛw ndzɛmba papa a wɔato wo ndɛ no nkorkor. Nkyii kyerɛw ndzɛmba a ɔnnyɛ tse dɛ nhyira ma wo nkorkor. Dwendwen dza akyerɛw no nkorkor yinom ho ber a ekenkan Nkyerɛkyerɛ na Ahyɛmudzi 78:19. Ebɛn mfaso na ɔdze ba w’abrabɔ mu sɛ edze ndaase gye “ndzɛmba nyinara’’ a—mpo ndzɛmba a ɔyɛ dɛ ɔnnyɛ nhyira a?

Ibosũa yie afa mbrɛ enyisɔ ma Nyankopɔn botum esi enya nhyɛdo wɔ w’abrabɔ do no, hwehwɛ kyerɛwsɛm yinom mu na kyerɛw nokwar a ihu no nkorkor: Ndwom 107:8–9; Luke 17:11–19; Philippifo 4:6–7; Mosiah 2:19–24; Alma 34:38; 37:37; Nkyerɛkyerɛ na Ahyɛmudzi 46:32; 59:7, 15–21.

Hwɛ dɛ ebɔhwehwɛ President Dieter F. Uchtdorf n’asɛm “Grateful in Any Circumstances” mu (Liahona, Esusow Aketseaba 2014, 70–77) fa nya afotu wɔ mbrɛ ibesi bɛkyerɛ ndaase ho. Ibotum ahwehwɛ afotu a ɔnye no sɛ wɔ video mu “President Russell M. Nelson on the Healing Power of Gratitude” (Gospel Library). Erekyerɛ enyisɔ si dɛn nya nsunsuando wɔ ɔwo nye Jesus Christ nkitahodzi mu?

11:38

San hwɛ “Count Your Blessings,” Asɔr Ndwom, nkanee 241; Topics and Questions, “Gratitude,” Gospel Library.

Ɔfa Nkyerɛkyerɛ na Ahyɛmudzi 80 ho no, Elder David A. Bednar kyerɛkyerɛɛ dɛ, “Bia a adesũadze no kor a Agyenkwa no rekyerɛkyerɛ hɛn wɔ nyikyerɛ yi mu nye dɛ dwumadzi bi dɛ yɛ edwuma wɔ bea tsitsir bi yɛ adzetsitsir na ohia naaso ɔnnsom bo nkyɛn ɔfrɛ dɛ kɛyɛ ewduma’’ (“Called to the Work,” Liahona, Esusow Aketseaba 2017, 68). Ebɛn sũahu na wɔaboa wo ma esũa dɛ Elder Bednar ne nsɛm yɛ nokwar? Ebɛn adzesũadze na ɔkekã ho a ibotum ehu no wɔ Nkyerɛkyerɛ na Ahyɛmudzi 79–80 a obotum aboa obi a oenya ɔfrɛ seseiara?

• Ber a ɔwo na wo mbofra bɔ mu kenkan Nkyerɛkyerɛ na Ahyɛmudzi 77:2 no, wobotum ahwɛ mboa hɔn mfonyin, a mbowaba na nnoma kã ho. Wo mbofra botum atsen nsa wɔ mfonyin no do sɛ ekenkan nsɛmfua “mbowa,’’ “ndzɛmba a wɔwea,’’ na “wimu ntumbowa’’ a. Wɔnye hɔn ho nkyɛ mbrɛ Nyankopɔn n’abɔdze si boa wo ma itse No dɔ nkã.

• Ebɔboa wo mbofra ma wɔadwendwen hɔn asɛdze ho wɔ Ewuradze n’edwuma mu no, hwɛ dɛ enye hɔn kenkan Nkyerɛkyerɛ na Ahyɛmudzi 78:4 dze ahwehwɛ “dza hom dze esi hom enyi do’’ a “yɛgyee too mu’’ (yɛgyee too mu anaa yesanmu yii dɛ yɛbɔboa) mber a wonumaa hɛn no. Boa hɔn ma wɔnhwɛ kyerɛwsɛm nsɛnsin tse dɛ iyinom mfa nya nyiano: Mosiah 18:8–10; Nkyerɛkyerɛ na Ahyɛmudzi 20:37; Moses 1:39. Wo mbofra botum ayɛ ɔyɛkyerɛ agordzi dze akyerɛ mbrɛ wobesi botum aboa Ewuradze n’edwuma. Mfatoho, “wɔbɔsoa kor biara n’adzesoa’’ anaa “yɛbɛfa Jesus Christ ne dzin ato [hɛn] do’’ no tse dɛn? Iyi si dɛn boa “dza hom dze esi hom enyi do’’ wɔ Christ ho?

• Ebɛkyerɛkyerɛ dza “hom bɛyɛ kor wɔ asaase ndzɛmba ho’’ (nyiyimu 6 n’ase kyerɛ no, ibotum ama wo mbofra no mfonyin a ɔfa nkorɔfo a wɔwɔ hia mu ho (ɔkɔm dze hɔn, woepira, anaa awɔw dze hɔn) na ndzɛmba a obotum aboa (tse dɛ edziban, kur tam, anaa kuntu). Nkyii wo mbofra botum dze mfonyin no atoto ndzɛmba no ho. Ebɛnadze na yebotum akyɛ dze aboa nkorɔfo a wɔwɔ hia mu no?

• Ibenya nkyerɛmu nsɛm bi ama ɔfã 78 no, enye wo mbofra no nkenkan nsɛntɔw a ɔhyehyɛ mfonyin ebien no a odzi kan n’ase no wɔ “Chapter 28: The Prophet Joseph Goes to Missouri Again” (wɔ Doctrine and Covenants Stories, 108 mu, anaa video a ɔnye no kɔ do wɔ Gospel Library mu). Nkyii wo mbofra botum epetuw dɛ wɔroboa obi ma oesi dan, akyɛ edziban, anaa ɔasom wɔ kwan bi so mu.

  

  2:39

• Ɔbɛyɛ enyigye dɛ wo mbofra no bɛkasa afa dza ebɛyɛ baanodzinyi n’ase kyerɛ ho na nkyii wobedzi dwumadzi bi kan. Wɔabɔ mu akenkan Nkyerɛkyerɛ na Ahyɛmudzi 78:18 ekyir no, wobotum wɔapɛnsampɛnsa mber a yehia Jesus Christ ma oedzi hɛn kan mu. Hwɛ dɛ hom bɔtow ndwom bi tse dɛ “I Will Walk with Jesus” (Gospel Library).

• Enye wo mbofra nkenkan Nkyerɛkyerɛ na Ahyɛmudzi 78:19 ma wɔnhwehwɛ dza Ewuradze dze abɔ hɔn a wɔkyerɛ ndaase anohoba no. Boa wo mbofra ma wɔntse dza “mbɔho ɔha’’ n’ase kyerɛ ber a edze adze ketseketse bi rekyerɛ hɔn na nkyii dɛm adze noara ne 100. Bia wobotum adorɔw ndzɛmba a wɔdze ndaase enya efi Nyankopɔn hɔ ho mfonyin.