“14–20 Julae: ‘Bambae Mi Lidim Yufala I Go’: Doktrin mo Ol Kavenan 77–80,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 77–80,” Kam Folem Mi—Blong Hom mo Jos: 2025
Stap Gobak Hom, i kam long Yongsung Kim
14–20 Julae: “Bambae Mi Lidim Yufala I Go”
Doktrin mo Ol Kavenan 77–80
Taem Jos Ia blong Jisas Kraes i bin kambak, i no tu yia yet, be namba blong ol memba i kasem 2000, mo i stap go long plante ples kwiktaem. Long Maj 1832, Josef Smit i mit wetem ol nara lida blong Jos blong “tokbaot ol wok blong Jos”: nid ia blong pablisim ol revelesen, pem graon blong kam tugeta long hem, mo kea long olgeta we oli pua (luk long Doktrin mo Ol Kavenan 78, seksen heding). Blong mitim ol nid ia, Lod i bin singaotem wan smol namba blong ol lida blong Jos blong mekemap Yunaet Kampani, wan grup we bae i joenem ol hadwok blong olgeta blong “pusum wok blong Lod i go” (ves 4) long ol eria ia. Be iven long ol administretiv wok olsem, Lod i bin stap lukluk nomo long ol samting we oli blong taem we i no save finis. Long en, stamba tingting blong printing wan stoa blong printim buk, o wan stanemap wan stoahaos—olsem eni nara samting long kingdom blong God— hem i blong rere ol pikinini blong Hem blong kasem “wan ples long selestial wol” mo “ol rij samting blong taem we i no save finis” (ol ves 7, 18). Mo sapos ol blesing ia oli had blong andastanem naoia, long medel blong ol bisi samting blong evri dei laef, Hem i talem kwaet nomo long yumi, “yufala i stap glad, from we bambae mi lidim yufala i go” (ves 18).
Ol aedia blong Lanem Samting long Hom mo long Jos
God i givim save long ol pipol we oli lukaotem.
Taem we Josef Smit mo Sidni Rigdon tufala i wok long translesen wetem insperesen blong Baebol, tufala i bin gat kwestin abaot buk blong Revelesen, olsem we plante pipol oli gat. Mo from we Josef i save gud, taem hem i no gat waes tingting, hem i save askem long God. Ol niu tingting we i kam long hem i stap long Doktrin mo Ol Kavenan 77. Taem yu stap ridim seksen ia, tingting hevi blong raetemdaon ol niu tingting insaed long ol stret japta insaed long buk blong Revelesen. ?Wanem nao yu lanem aot long stadi blong yu abaot stap kasem revelesen?
Translesen blong Baebol, i kam long Liz Lemon Swindle
?Wanem nao i Yunaet Kampani?
Oli bin stanemap Yunaet Kampani (United Firm) blong lukaotem ol printing mo bisnis afea blong Jos long Ohaeo mo Misuri. Insaed long hem i gat Josef Smit, Newel K. Witni, mo ol nara Jos lida we oli bin putum tugeta ol risos blong olgeta blong save kavremap ol nid blong Jos blong gro. Sore nomo, Yunaet Kampani i foldaon long kaon mo i brokdaon long 1834 taem oli nomo save pemaot ol kaon.
Luk tu long “Newel K. Whitney and the United Firm,” long Revelations in Context, 142–47; Church History Topics, “United Firm (‘United Order’),” Gospel Laebri.
Mi save help blong “mekem wok ia i go,” blong Kraes mo Jos blong Hem.
Lod i bin talem long Josef Smit mo ol nara lida blong Jos se blong lukaotem wan stoahaos mo wan ples blong printim ol samting bae i helpem blong “mekem wok ia i go, we yufala i putum yufala long hem” (Doktrin mo Ol Kavenan 78:4 ?Wanem nao yu save talem se hem i “wok ia” blong Jos blong Sevya? Tingting hevi long hemia taem yu stap ridim Doktrin mo Ol Kavenan 78:1–7 ?Wanem sam long ol defdefren wei yu save helpem blong mekem wok ia i go—mo putum tu long famli blong yu?
Luk tu long Jeneral Hanbuk, 1.2.
Doktrin mo Ol Kavenan 78:17–18
Lod bae i lidim mi i go.
?From wanem yu ting se samtaem Lod i stap singaotem ol man we oli folem Hem se, “ol smol pikinini”? (Doktrin mo Ol Kavenan 78:17). ?Wetaem nao yu filim olsem wan smol pikinini, maet, from se, “yufala i no andastanem yet” o “no save tekem evri samting naoia”? (ol ves 17–18). ?Wanem nao yufala i faenem insaed long ol ves ia we i save helpem yufala blong “stap glad” (ves 18) long ol taem olsem? Tingting blong faenem wan pikja blong yu taem we yu bin wan pikinini, mo tingting hevi long olsem wanem yu bin gro long saed blong spirit afta long taem ia. O tingting long wan samting we i bin had long yu blong mekem taem yu yang be naoia i moa isi. ?Long wanem wei nao Papa long Heven i wantem yu blong stap olsem wan pikinini yet? (luk long Mosaea 3:19). ?Olsem wanem nao Hem i “[stap lidim] yu i go”?
mi save kasem evri samting wetem fasin blong talem tangkyu.
Blong rere blong stadi long Doktrin mo Ol Kavenan 78:19, yu save mekem lis blong ol gudfala samting we oli bin hapen long yu tedei. Afta, mekem lis blong ol samting we i luk olsem se oli blesing long yu. Tingting hevi long tufala lis ia mo ridim Doktrin mo Ol Kavenan 78:19. ?Wanem bae i defren long laef blong yu sapos yu kasem “evri samting” wetem fasin blong talem tangkyu—iven ol samting we i luk olsem oli no ol blesing?
Blong lanem moa abaot olsem wanem fasin blong talem tangkyu i save jenisim laef blong yu, gotru long ol skripja ia mo mekem wan lis blong ol samting we yu faenem: Sam 107:8–9; Luke 17:11–19; Filipae 4:6–7; Mosaea 2:19–24; Alma 34:38; 37:37; Doktrin mo Ol Kavenan 46:32; 59:7, 15–21.
Tingting blong stap lukaotem mesej blong Presiden Dieter F. Uchtdorf “Grateful in Any Circumstances” (Liahona, Mei 2014, 70–77) blong kasem ol kaonsel abaot olsem wanem blong stap talem tangkyu. Yu save lukaotem ol semmak kaonsel long vidio “Presiden Russell M. Nelson long Healing Power of Gratitude” (Gospel Laebri). ?Olsem wanem nao fasin blong talem tangkyu i save jenisim rilesensip blong yu wetem Jisas Kraes?
President Russell M. Nelson on the Healing Power of Gratitude
Lukaotem mo serem. Sapos oli givim asaenmen long yu blong tij, lukaotem ol wei blong helpem ol pipol blong lukaotem ol skripja o ol toktok blong ol profet—olgetawan o long ol smosmol grup—mo serem wanem we oli lanem. Eksampol, long aktiviti ia, yu save givim long wanwan man o woman o wan grup, wan pat blong mesej blong Presiden Uchtdorf mo askem olgeta blong serem wan toktok o wan sentens we oli filim se i talem sot wanem we hem i tijim.
Luk tu long “Count Your Blessings,” Hym, namba 241; Topics and Questions, “Gratitude,” Gospel Laebri.
Singaot ia blong go wok blong God i moa impoten bitim ples we bae mi go wok long hem.
Folem Doktrin mo Ol Kavenan 80, Elda David A. Bednar i bin tijim, “Ating wan long ol lesen we Sevya i stap tijim yumi long revelesen ia i we, wan wok we oli givim blong wok long wan spesel ples i wan nid, mo i impoten, be i no impoten olsem singaot ia blong givim seves” (“God I Singaotem Yu long Wok,” Liahona, Mei 2017, 68) ?Wanem nao ol eksperiens we i bin helpem yu blong lanem se ol toktok blong Bedna oli tru? Wanem sam moa lesen we yu save faenem long Doktrin mo Ol Kavenan 79–80 we i save helpem wan man we i jes kasem wan niu koling?
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
God i bin krietem evri samting long wol ia.
-
Taem yu mo ol pikinini blong yu i ridim Doktrin mo Ol Kavenan 77:2 tugeta, maet bae yufala i save lukluk long ol pikja blong ol animol, we i tekem tu, ol smosmol bebet mo pijin. Ol pikinini blong yu oli save poen i go long ol pikja taem yu ridim ol toktok ia “bigfala animol,” “animol we oli stap wokbaot long graon,” mo “ol pijin; long ea.” Serem wetem yufala wanwan, olsem wanem ol kriesen blong God i helpem yufala blong filim lav blong Hem.
God i krietem evri animol long wol.
Mi save help blong “mekem wok ia blong [Jisas Kraes] i go.”
-
Blong helpem ol pikinini blong yu blong tingbaot ol pat blong wok blong olgeta insaed long wok blong Lod, tingting blong rid wetem olgeta long Doktrin mo Ol Kavenan 78:4 blong poenemaot “wok ia” we Hem i “putum yufala long hem,” (akseptem o jusum blong sapotem) taem we yumi bin kasem baptaes. Helpem olgeta blong lukluk insaed long ol pat blong skripja olsem olgeta ia blong gat sam posibol ansa: Mosaea 18:8–10; Doktrin mo Ol Kavenan 20:37; Moses 1:39. Ol pikinini blong yu oli save glad blong mekem wan drama blong olsem wanem oli save help wetem wok blong Lod. Eksampol. ?Hem i olsem wanem blong “mas stap givgivhan long yufala long ol trabol blong yufala” o “tekem long [yumiwan] nem blong Kraes”? ?Olsem wanem nao hemia i “blong mekem wok ia i go,” blong Kraes?
Mi save serem ol samting we mi gat wetem ol narafalawan.
-
Blong tijim se i minim blong stap “semmak long ol samting blong wol ia,” (ves 6), yu save givim ol pikja blong ol pipol we oli stap long nid (hanggri, kasem kil, o kolkol) long ol pikinini blong yu mo ol samting we bae i help blong (olsem, kaekae, wan bandej o wan blangket). Afta, ol pikinini blong yu oli save majem ol pikja wetem ol samting ia. ?Wanem nao yumi save serem blong helpem ol pipol we oli stap long nid?
-
Blong tekem sam bakgraon blong seksen 78, rid wetem ol pikinini blong ol sentens anda long fas tufala pikja blong “Japta 28: Profet Josef I Go long Misuri Bakegen” (long Ol Doktrin mo Kavenan Stori, 108, o vidio we i go wetem long Gospel Laebri). Afta, ol pikinini blong yu oli save priten se oli stap helpem wan man blong bildim wan haos, stap serem kaekae, o stap givim seves long wan narafala wei.
2:39Chapter 28: The Prophet Joseph Goes to Missouri Again: March–May 1832
Jisas Kraes bae i lidim mi i go.
-
Bae i wan gudtaem blong ol pikinini blong yu oli tokbaot wanem i minim blong stap wan lida mo afta, lidim wan aktiviti. Afta we yufala i rid tugeta long Doktrin mo Ol Kavenan 78:18, yufala save toktok raon long ol taem we yumi nidim Jisas blong lidim yumi. Tingting blong singsing wan singsing olsem“I Will Walk with Jesus” (Gospel Laebri).
Mi save kasem “evri samting wetem fasin blong talem tangkyu.”
-
Rid wetem ol pikinini blong Doktrin mo Ol Kavenan 78:19 blong faenemaot wanem ol promes we Lod bae i givim long ol pipol we oli stap talem tangkyu. Helpem ol pikinini blong andastanem wanem “wan handred taem” i minim taem yu stap soem wan smol samting, mo afta, 100 moa blong semmak samting ia. Maet oli save droem ol pikja blong ol samting we oli bin kasem long God “wetem fasin blong talem tangkyu.”
Blong kasem moa aedia, luk long magasin blong Fren long manis ia.