“7–13 Julae: ‘Praes blong Olgeta Bae I Bigwan, mo Glori blong Olgeta Bae I No Save Finis’: Doktrin mo Ol Kavenan 76,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 76,” Kam Folem Mi—Blong Hom mo Jos: 2025
Ples blong Haed, i kam long Shaelynn Abel
7–13 Julae: “Praes blong Olgeta Bae I Bigwan, mo Glori blong Olgeta Bae I No Save Finis”
Doktrin mo Ol Kavenan 76
“?Wanem bae i hapen long mi afta we mi ded?” Kolosap evriwan oli askem kwestin ia long sam fom o narafala wei. Blong plante handred yia, plante kastom blong Ol Kristin Man, we oli stap dipen long ol tijing blong Baebol, oli bin stap tij abaot heven mo hel, abaot paradaes blong olgeta we oli stret mo gud, mo trabol tingting blong ol man nogud. ?Be i posibol se ful famli blong ol man, i tru se oli save seraot wetem fos? Long Febwari 1832, Josef Smit mo Sidni Rigdon, tufala i stap tingting se, sapos i gat moa blong save abaot topik ia (luk long Doktrin mo Ol Kavenan 76, seksen heding).
Yes, I gat. Taem we Josef mo Sidni i stap tingting hevi long ol samting ia, Lod i “tajem ae blong andastaning blong [tufala] mo oli bin open” (ves 19). Tufala i kasem wan revelesen we i naes tumas, we i bigwan tumas, we i klia tumas we i mekem se Ol Sent oli singaotem long simpol toktok se “Visen.” Hem i mekem ol windo blong heven oli open bigwan, mo i givim long ol pikinini blong God wan maen we i longfala abaot taem we i no save finis. Visen ia, i bin talemaot se heven i hae moa, i bigwan moa, mo i tekem moa samting bitim wanem we ol pipol oli bin stap tingting long hem bifo. God i gat moa sore mo stret bitim wanem we yumi save andastanem. Mo ol pikinini blong God oli gat wan fiuja ples we i no save finis, we i gat moa glori bitim wanem we yumi save stap tingting long hem.
Luk long Saints, 1:147–50; “The Vision,” long Revelations in Context, 148–54.
Ol aedia blong Stap Lanem Samting long Hom mo long Jos
Fasin blong sevem man i kam tru long Jisas Kraes, Pikinini blong God.
Seksen 76 i talemaot ol impoten trutok abaot ples we i no save finis, we bae yumi kasem long en, be i no komplit blong talem se revelesen ia i abaot ol tri kingdom blong glori o iven abaot plan ia nomo blong sevem man. Hemia we i moa stret, seksen 76 hem i abaot Jisas Kraes, we i mekem plan ia blong God blong sevem yumi mo glori we i no save finis, i posibol. Taem yu ridim, bae yu save lukaotem ol toktok o ol sentens we oli tokbaot rilesensip bitwin Jisas Kraes mo ol pipol we bae oli kasem ol defren kingdom blong glori. Maet wan graf olsem hemia bae i save helpem yu blong raetemdaon wanem we yu faenem.
|
Kingdom blong glori |
Rilesensip wetem Jisas Kraes |
Ol blesing we i no save finis |
|---|---|---|
Kingdom blong glori Selestial (ol ves 50–70, 92–96) | Rilesensip wetem Jisas Kraes
| Ol blesing we i no save finis
|
Kingdom blong glori Terestrial (ol ves 71–79, 97) | Rilesensip wetem Jisas Kraes | Ol blesing we i no save finis |
Kingdom blong glori Telestial (ol ves 81–90, 98–106, 109–12) | Rilesensip wetem Jisas Kraes | Ol blesing we i no save finis |
?Wanem nao yu filim insperesen blong mekem blong mekem rilesensip blong yu wetem Sevya i kam moa strong?
Taem we Wilfod Wudrof i ridim visen ia, hem i talem, “Mi filim blong lavem Lod moa bitim mi eva mekem long laef blong mi bifo” (luk long “Voices of the Restoation: Testimonies of ‘the Vision’”). ?Wanem nao yu lanem abaot Jisas Kraes aot long ol ves 1–5, 20–24, 39–43, 107–8 we i mekem yu blong lavem Hem moa?
Luk tu long 1 Pita 3:18–19; 4:6; Dallin H. Oaks, “?Wanem Nao Sevya I Bin Mekem blong Yumi?,” Liahona, Mei 2021, 75–77; “Mi Sapraes Tumas,” Hym, namba 22.
Lukluk nomo long Papa long Heven, Jisas Kraes mo doktrin blong Tufala. Aot long evri samting we yumi save lanem insaed long ol skripja, ol trutok we oli moa impoten oli helpem yumi blong bildim fet long Papa long Heven mo Jisas Kraes, sakem sin, mekem mo kipim ol kavenan wetem Tufala, mo kasem Tabu Spirit. Nomata se bae i gud tumas blong wantem komperem o skelem ol fasin o aksen blong ol pipol we bae oli kam insaed long ol defren kingdom blong glori, hem i moa impoten blong lukluk nomo long Papa long Heven mo Sevya. Evri samting we Tufala i mekem blong mekem yumi rere from glori ia bae i tanem yumi i go from Tufala.
Insaed long rum ia, Josef Smit i luk visen we oli raetemdaon insaed long Doktrin mo Ol Kavenan 76.
Doktrin mo Ol Kavenan 76:5–10, 114–18
Mi save andastanem tingting blong God “tru long paoa blong Tabu Spirit.”
I no evri memba blong Jos we oli isi blong akseptem revelesen ia long seksen 76, from i tijim se kolosap evri wan bae oli sef mo kasem samfala digri blong glori. Eksampol, Brigham Yang i bin talem: “Ol kastom blong mi oli we, taem Visen ia i kam long mi long fas taem, hem i agensem mo i no go nating wetem fasfala edukesen blong mi. Mi talem, Wet smol. Mi no bin sakemaot; be mi no save andastanem.” Hem i eksplenem se hem i mas “tingting mo prea, mas rid mo tingting, kasem taem we, miwan, mi kam blong save mo mi andastanem fulwan” (long “The Vision,” long Revelations in Context, 150). ?Wanem nao yu lanem aot long eksperiens blong hem we i save helpem yu taem God i soemaot ol samting we oli defren long wanem we yu andastanem naoia? ?Wanem nao yu lanem abaot God long Doktrin mo Ol Kavenan 76:5–10, 114–18? ?Wanem nao ol ves ia oli tijim abaot olsem wanem yu save andastanem “gudfala glad blong tingting blong [God]”? (ves 7).
Doktrin mo Ol Kavenan 76:39–44, 50–70
Fasin blong kam olsem wan god hem i hae fom blong fasin ia blong sevem man.
Doktrin mo Ol Kavenan 76:39–44 i tokbaot evri samting abaot fasin ia blong sevem man. Ol ves 50–70 i tokbaot fasin blong kam olsem wan god, wan stret wei blong fasin ia blong sevem man. ?Olsem wanem nao bae yu eksplenem wanem we i defren bitwin fasin ia blong sevem man mo fasin blong kam olsem wan god? ?Wanem nao i rol blong Sevya long tufala tugeta? ?Wanem nao yu fanem insaed long ol ves ia we i givim insperesen long yu blong lukaotem fasin blong kam olsem wan god?
Luk tu long Jon 3:16–17; Doktrin mo Ol Kavenan 132:20–25.
Doktrin mo Ol Kavenan 76:50–70, 92–95
Papa blong mi long Heven i wantem mi blong kasem laef we i no save finis insaed long selestial kingdom.
?Yu bin eva tingting—o wari—abaot sapos bae yu save kam wan kaen man o woman ia we bae kasem selestial glori, olsem we oli tokbaot long Doktrin mo Ol Kavenan 76:50–70, 92–95? From se hem i impoten blong save wanem God i wantem long yumi, tingting tu blong stap lukluk long ol ves ia abaot wanem we God i bin mekem blong yumi—mo i stap mekem—blong helpem yumi blong kam olsem Hem. ?From wanem yu ting se ol hadwok blong yu oli impoten long Hem?
?Olsem wanem nao visen ia blong selestial glori i jenisim wei we yu wantem laef long evri dei laef blong yu?
Luk tu long Moses 1:39; J. Devn Conish, “Am I Good Enough? Will I Make It?,” Liahona, Novemba 2016, 32–34
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Yumi evriwan, yumi ol pikinini blong God.
-
Blong helpem ol pikinini blong yu blong andastanem tabu paoa blong olgeta, yu save soem long olgeta ol pikja blong ol pikinini wetem ol papa mo mama blong olgeta. Afta, yu save ridim Doktrin mo Ol Kavenan 76:24 mo serem wetem yufala wanwan, from wanem yufala i glad blong save se yumi evriwan i ol pikinini “boe mo gel God.”
-
Mo tu, yufala i save singsing tugeta “Mi Pikinini blong God” (Children’s Songbook, 58) mo invaetem ol pikinini blong yu blong poenem olgetawan, taem oli singsing long toktok ia “I.” Afta, singsing long singsing ia bakegen, riplesem toktok ia “Mi” wetem “yu” taem yu poen i go long wan narawan.
Doktrin mo Ol Kavenan 76:5, 41–42, 69
Jisas Kraes Hem I Sevya blong Mi.
-
Tingting blong mekem wan drama wetem ol pikinini blong yu abaot wan pat ia se wan i askem se, “Wanem nao Jisas Kraes i bin mekem blong mi?” Yu mo ol pikinini blong yu i save lukaotem sam gudfala ansa long ol ves 5, 41–42, o 69 long seksen 76. Mo tu, yufala save singsing “He Sent His Son,” Children’s Songbook, 34–35. ?Olsem wanem yumi save talem tangkyu long Sevya long wanem Hem i bin mekem blong yumi?
Wan smol pat blong pikja ia Yufala I No Blokem Ol Pikinini Ya, i kam long J. Kirk Richards
!Papa long Heven i wantem mi blong gobak blong stap laef wetem Hem blong oltaem.
-
Yu mo ol pikinini blong yu i save rid o wajem wan pat o evriwan long “Japta 26: Ol Trifala Kingdom blong Heven” (long Ol Doktrin mo Ol Kavenan Stori, 97–103, o vidio we i go wetem long Gospel Laebri) mo serem wetem yufala wanwan wanem yufala i laekem abaot visen we Josef Smit i bin kasem. Askem ol pikinini blong yu blong serem tingting blong olgeta mo ol filing blong olgeta abaot, wanem bae oli filim blong stap laef wetem Papa long Heven insaed long selestial kingdom.
4:7Chapter 26: The Three Kingdoms of Heaven: 16•February 1832
-
Mo tu, yufala save ridim Doktrin mo Ol Kavenan 76:62 mo invaetem ol pikinini blong yu blong droem ol pikja blong olgetawan wetem Papa long Heven mo Jisas Kraes insaed long selestial kingdom (luk long aktiviti pejblong wik ia).
Doktrin mo Ol Kavenan 76:12, 15–19, 114–16
Blong stap stadi ol skripja, i save helpem mi “andastanem ol samting we oli blong God.”
-
Yu save askem ol pikinini blong yu blong ridim ol ves 15–19 blong faenemaot wanem nao Josef Smit mo Sidni Rigdon, tufala i stap mekem taem we tufala i luk visen ia long Doktrin mo Ol Kavenan 76. Talem long ol pikinini blong yu abaot wan taem we yu kasem insperesen taem yu stap ridim ol skripja, mo askem ol pikinini blong yu sapos olgeta tu oli bin gat ol semmak eksperiens olsem.
Blong kasem moa aedia, luk long magasin blong Fren long manis ia.