Ol Voes blong Restoresen: Ol Testemoni blong “Visen”

Wilfod Wudrof i bin joenem Jos long Disemba 1833, kolosap tu yia afta we Josef Smit mo Sidni Rigdon i kasem visen ia we oli raetemdaon long Doktrin mo Ol Kavenan 76. Hem i bin stap laef long Niu Yok long tetaem ia, mo i bin lanem abaot “Visen” tru long ol misinari we oli stap givim seves long eria ia. Sam yia afta, hem i bin tokbaot ol filing mo tingting blong hem long saed blong revelesen ia.

“Stat long taem we mi smol i kam, oli bin tijim mi se i gat wan Heven mo i gat wan Hel, mo oli talem se evri nogud man, oli gat wan panismen, mo olgeta we oli stret mo gud, oli gat wan glori. …

“… Taem mi ridim visen … i givim laet long maen blong mi, mo i givim mi bigfala glad; long mi, i luk se God we i bin soemaot prinsipol ia long man, i bin waes, i stret gud mo i bin tru, i bin gat tugeta, ol moa gud fasin mo gud tingting mo save; mi bin filim se Hem i stap tru, tugeta, wetem lav, sore, jastis mo jajmen, mo mi bin filim blong lavem Lod moa bitim bifo long laef blong mi.”

“Visen ia i wan revelesen we i givim moa laet, moa trutok mo moa prinsipol bitim eni revelesen we i gat i stap long eni nara buk we yumi eva ridim. Hem i talemaot klia blong yumi andastanem situesen blong yumi naoia, se yumi kam wea, mo from wanem yumi stap ia, mo weaples yumi stap go long hem. Eni man i save se, tru long revelesen ia wanem nao i pat o situesen blong hem.”

“Bifo mi luk Josef, mi talem se mi no kea se hem i olfala hamas, o yangfala hamas; mi no kea se fes blong hem i olsem wanem—se hea blong hem i longwan o i sot; man ia we i givim revelesen ia [visen we oli raetemdaon insaed blong seksen 76] i wan profet blong God. Mi bin save hemia miwan.”

Taem we Phebe Peck i bin harem Josef mo Sidni i bin stap tijim “visen” ia, hem i bin stap long Misuri mo i bin stap lukaotem faef pikinini olsem wan singgel mama. Visen i tajem hem bigwan mo i givim insperesen long hem mekem se hem i bin raetem hemia blong serem wanem hem i bin lanem wetem ol nara memba blong famli blong hem.

“Lod i bin stap talemaot ol sikret blong Kingdom blong heven long ol pikinini blong Hem. … Josef Smit mo Sidni Rigdon, tufala i mekem wan visit long mifala long las spring, mo mifala i bin gat plante miting we i gat glad taem oli bin stap ia, mo mifala i bin gat plante sikret we i bin open long lukluk blong mifala, we i givim mi pis long hat. Mifala i save luk se God bae i kamdaon blong stap mekem rere ol naesfala haos blong pis blong ol pikinini blong Hem. Mo huia we bae i no akseptem gospel we i fulwan mo no stanap olsem ol strong soldia long wok ia blong Kraes, bae oli no save stap long ples we Papa mo Pikinini i stap long hem. Be i gat wan ples we oli mekem i rere blong olgeta we oli no kasem gospel, be hem i wan ples we glori blong hem i smol nomo; i no olsem we bae yu stap long Selestial kingdom. Bae mi no traem blong talem moa long saed blong ol samting ia from se naoia, oli stap printim olgeta mo oli stap go aot nao long wol. Maet bae yu gat wan janis blong stap ridim yuwan, mo sapos yu gat wan janis olsem, mi hop se bae yu lukaotgud blong ridim, mo gat wan prea long hat, from se i gud blong luksave olgeta samting ia. Mo mi wantem tumas se bae yu lukluk gud long olgeta, from se i wanem we i givim hapines long yumi long wol ia mo long wol we i stap kam.”