“జూన్ 9-15: ‘నేను ఎల్లప్పుడు విశ్వాసులతో ఉన్నాను’: సిద్ధాంతము మరియు నిబంధనలు 60– 63,” రండి, నన్ను అనుసరించండి—గృహము మరియు సంఘము కొరకు: సిద్ధాంతము మరియు నిబంధనలు 2025 (2025)
“సిద్ధాంతము మరియు నిబంధనలు 60–63,” రండి, నన్ను అనుసరించండి—గృహము మరియు సంఘము కొరకు: 2025
Campfire on the Missouri [మిస్సోరిలో చలిమంట] నుండి వివరణ, బ్రయన్ మార్క్ టేలర్ చేత
జూన్ 9–15: “నేను ఎల్లప్పుడు విశ్వాసులతో ఉన్నాను”
సిద్ధాంతము మరియు నిబంధనలు 60–63
1831, ఆగష్టు ప్రారంభంలో, జోసెఫ్ స్మిత్ మరియు సంఘము యొక్క ఇతర పెద్దలు “సీయోను పట్టణము”ను (సిద్ధాంతము మరియు నిబంధనలు 59:3) సందర్శించిన తర్వాత కర్ట్లాండ్కు తిరిగి రావడానికి సిద్ధమవుతున్నారు. వారి ప్రయాణంలో సువార్త ప్రకటించాలని ప్రభువు వారిని కోరారు (సిద్ధాంతము మరియు నిబంధనలు 52:10 చూడండి) మరియు వారిలో కొద్దిమంది శ్రద్ధగా చేసారు. కానీ ఇతరులు సంకోచించారు. “వారు మనుష్యునికి భయపడి నేను వారికి ఇచ్చియున్న తలాంతును దాచిపెట్టుదురు” (సిద్ధాంతము మరియు నిబంధనలు 60:2) అని ప్రభువు చెప్పారు. ఈ పెద్దలు ఎలా భావించారో మనలో చాలామందికి తెలుసు. మనం సువార్తను ప్రేమించినప్పటికీ, భయం మరియు సందేహం దానిని పంచుకోవడం నుండి మనల్ని ఆపవచ్చు. కానీ ప్రభువు కరుణామయుడు. ఆయన “నరుని బలహీనతను, [మనకు] ఏవిధముగా సహాయము చేయవలెనో యెరిగియున్నాడు” (సిద్ధాంతము మరియు నిబంధనలు 62:1). ప్రారంభ సువార్తికులకు ఇచ్చిన ఈ బయల్పాటులన్నిటిలో, మన భయాలను, లోపాలను జయించడానికి మనకు సహాయపడగల అభయాలు విస్తరించబడియున్నాయి: “నేను మిమ్ములను పరిశుద్ధులుగా చేయుటకు శక్తి కలిగియున్నాను.” “సర్వశరీరులు నా వశములోనున్నారు.” “నేను ఎల్లప్పుడు విశ్వాసులతో ఉన్నాను.” “ఎవడైతే విశ్వాసముగానుండి సహించునో, వాడు లోకమును జయించును.” (సిద్ధాంతము మరియు నిబంధనలు 60:7; 61:6; 62:9; 63:47.)
గృహములో మరియు సంఘములో నేర్చుకోవడానికి ఉపాయములు
సిద్ధాంతము మరియు నిబంధనలు 60; 62
నేను యేసు క్రీస్తు పట్ల నా ప్రేమను, సాక్ష్యాన్ని పంచుకోగలను.
సువార్తను గురించి మీ సాక్ష్యము ఏవిధంగా దేవుని నుండి ఒక “ప్రతిభ” లేదా నిధి వలె ఉన్నది? కొన్నిసార్లు ఏ విధాలుగా మనం “[మన] ప్రతిభను దాచిపెడతాము”? (సిద్ధాంతము మరియు నిబంధనలు 60:2; మత్తయి 25:14–30 కూడా చూడండి).
60 మరియు 62వ ప్రకరణములలో, ప్రభువు నుండి ఎటువంటి ప్రోత్సాహకరమైన సందేశాలను మీరు కనుగొంటారు? సువార్తను పంచుకోవడంలో మీ నమ్మకాన్ని ఈ సందేశాలు ఎలా వృద్ధిచేస్తాయి? మీరు ఈ ప్రశ్నలను ధ్యానిస్తున్నప్పుడు, “I Want to Be a Missionary Now” (Children’s Songbook, 168) పాట యొక్క పదాలను పాడడాన్ని లేదా చదవడాన్ని పరిగణించండి. సువార్తను పంచుకొనుట గురించి ఈ పిల్లల పాట నుండి మీరు ఏమి నేర్చుకుంటారు?
క్రీస్తుపై విశ్వాసాన్ని నేను బహిరంగంగా పంచుకోగలను.
సిద్ధాంతము మరియు నిబంధనలు 60:2–4; 61:1–2, 20, 36–38; 62:1, 6
లేఖనాలు యేసు క్రీస్తును గూర్చి బోధిస్తాయి.
ఆయన తన సువార్తికులకు ఉపదేశించినప్పుడు, ప్రభువు తన గురించి ముఖ్యమైన సత్యాలను బయల్పరిచారు. ఈ సత్యాల కొరకు సిద్ధాంతము మరియు నిబంధనలు 60:2–4; 61:1–2, 20, 36–38; 62:1, 6 చూడండి. మీరు కనుగొన్న రక్షకుని పాత్రలు మరియు లక్షణాలను లేఖనములలోని ఏ వృత్తాంతాలు వివరిస్తాయి? (ఉదాహరణకు, యోహాను 8:1–11; ఈథర్ 2:14–15 చూడండి).
నా నిర్ణయాలు “వివేకమును, ఆత్మ నిర్దేశమును” సమతుల్యం చేయాలి.
నిత్య సత్యాలు మరియు సూత్రాల గురించి ప్రభువు దిశానిర్దేశం చేస్తారు, అయితే ఈ సూత్రాలపై ఎలా పనిచేయాలనే నిర్దిష్ట వివరాలను నిర్ణయించడానికి ఆయన తరచుగా దానిని మనకు వదిలివేస్తారు. సిద్ధాంతము మరియు నిబంధనలు 62లో ఈ సూత్రము వివరించబడినట్లు మీరెట్లు చూస్తారు? (సిద్ధాంతము మరియు నిబంధనలు 60:5; 61:22 కూడా చూడండి). మీ జీవితంలో ఈ సూత్రాన్ని మీరెట్లు చూసారు? ఏమి చేయాలో దేవుడు ఖచ్చితంగా చెప్పాలని ఆశించకుండా మనం కొన్ని నిర్ణయాలు తీసుకోవడం ఎందుకు మంచిది?
ఈథర్ 2:18–25; సిద్ధాంతము మరియు నిబంధనలు 58:27–28 కూడా చూడండి.
సిద్ధాంతము మరియు నిబంధనలు 63:7–12
సూచకక్రియలు విశ్వాసం మరియు దేవుని చిత్తం ద్వారా వస్తాయి.
ఈ నమూనా చివరలో, ఎజ్రా బూత్ను బాగా ఆకట్టుకున్న ఒక అద్భుతం యొక్క దృష్టాంతం ఉంది: ఎల్సా జాన్సన్ చేయి అద్భుతంగా నయం చేయబడింది. అది చూసిన తర్వాత, ఎజ్రా ఆతృతగా బాప్తిస్మం తీసుకున్నాడు. అయినప్పటికీ, కేవలం కొద్ది నెలల్లోనే ఎజ్రా తన విశ్వాసాన్ని కోల్పోయి, ప్రవక్తను విమర్శించేవాడిగా మారాడు. అతడు చూసిన అద్భుతాన్ని బట్టి ఇది ఎలా సాధ్యము?
మీరు సిద్ధాంతము మరియు నిబంధనలు 63:7–12 చదువుతున్నప్పుడు, దీనిని ధ్యానించండి. సూచకక్రియలు మరియు విశ్వాసం గురించి ఏ సత్యాలను మీరు నేర్చుకుంటారు?
మత్తయి 16:1–4; యోహాను 12:37; మోర్మన్ 9:10–21; ఈథర్ 12:12, 18 కూడా చూడండి.
సిద్ధాంతము మరియు నిబంధనలు 63:16
నా ఆలోచనలు మరియు చర్యలలో నేను పవిత్రంగా ఉండగలను.
సిద్ధాంతము మరియు నిబంధనలు 63:16లో, రక్షకుడు క్రొత్త నిబంధనలో తాను బోధించిన దానిని పునరుద్ఘాటించారు—పవిత్రత యొక్క చట్టం మన చర్యలను మాత్రమే కాకుండా మన ఆలోచనలను కూడా నియంత్రించాలి (మత్తయి 5:27–28 చూడండి). మీరు సిద్ధాంతము మరియు నిబంధనలు 63:16 చదువుతున్నప్పుడు, కామపు ఆలోచనల గురించి రక్షకుడు ఇచ్చే హెచ్చరికలను వ్రాయండి. మీరు ప్రతి హెచ్చరికకు విరుద్ధంగా కూడా ధ్యానించవచ్చు. ఉదాహరణకు, భయానికి వ్యతిరేకమైన కొన్ని పదాలు లేదా వాక్యభాగాలేవి? పవిత్రమైన ఆలోచనలు మరియు చర్యల నుండి ఏ ఇతర దీవెనలు వస్తాయి?
చాలామంది జనులు ఆలోచన మరియు చర్య యొక్క పవిత్రత గురించి ప్రభువు ప్రమాణాలు పాత పద్ధతిలో ఉన్నట్లుగా లేదా అణచివేసేవిగా కూడా భావిస్తారు. దేవుని పిల్లలందరూ ఈ చట్టాన్ని జీవించడానికి ప్రయత్నిస్తున్నట్లయితే అది ఏ తేడాను కలిగిస్తుంది? మీరు ఎలాంటి నిరీక్షణ సందేశాలను కనుగొంటారు?
మన ఆలోచనలు మరియు చర్యలలో పవిత్రంగా ఉండడం వల్ల కలిగే దీవెనలు మనకు తెలిసినప్పటికీ, దానర్థం అది సులభం అని కాదు. రక్షకుని యొక్క పవిత్రత ప్రమాణాన్ని పాటించడాన్ని ఏది కష్టతరం చేస్తుందో మరియు దానిని ఏది సులభతరం చేస్తుందో ఆలోచించడానికి మీకు కొంత సమయం పట్టవచ్చు. మీరు అయోగ్యమైన ఆలోచనలతో శోధించబడినప్పుడు ఏమి చేయాలనే దాని గురించి ఇతరులతో మీరు ఏ చిట్కాలను పంచుకోవచ్చు?
ఒకరికొకరు మద్దతు ఇవ్వండి. సంఘ సమావేశాలు మరియు తరగతులలో కలుసుకోవడం యొక్క గొప్ప దీవెనలలో ఒకటి, రక్షకుడిని అనుసరించే మన ప్రయత్నాలలో తోటి పరిశుద్ధుల నుండి మద్దతు పొందే అవకాశం. మనలో చాలామంది ఇలాంటి సవాళ్ళను ఎదుర్కొంటారు మరియు మన సాధారణ అనుభవాలు గొప్ప బలం కావచ్చు. మీకు సవాళ్ళు ఉన్నాయని అంగీకరించడానికి భయపడకండి. దేవుని చట్టాలను జీవించడంలో మరియు శోధనను అధిగమించడంలో మీకు సహాయపడే వాటిని ఒకరితో ఒకరు పంచుకోండి.
సిద్ధాంతము మరియు నిబంధనలు 121:45 కూడా చూడండి.AddressingPornography.ChurchofJesusChrist.org
Standards: Sexual Purity and Modesty - True Confidence
సిద్ధాంతము మరియు నిబంధనలు 63:58–64
పవిత్రమైన విషయాలను భక్తితో చూడాలి.
సిద్ధాంతము మరియు నిబంధనలు 63: 58–64 లోని సూత్రాలు ప్రభువు నామాన్ని వ్యర్థంగా తీసుకోవడాన్ని మించినవి. ఏ ఇతర పవిత్రమైన విషయాలు “పైనుండి” లేదా దేవుని నుండి వస్తాయి? మీరు ఈ విషయాల గురించి “జాగ్రత్తగా” మాట్లాడడం అంటే ఏమిటి?
మరిన్ని ఉపాయముల కోసం, లియహోనా మరియు యౌవనుల బలము కొరకు పత్రికల యొక్క ఈ నెల సంచికలను చూడండి.
పిల్లలకు బోధించడానికి ఉపాయములు
సిద్ధాంతము మరియు నిబంధనలు 60:4; 61:1–2, 36; 62:1
లేఖనాలు యేసు క్రీస్తును గూర్చి బోధిస్తాయి.
-
రక్షకుని గురించి సిద్ధాంతము మరియు నిబంధనలు 60:62లో కనుగొనబడే వ్యాఖ్యానాలలో కొన్నింటిని బహుశా మీరు చిన్న కాగితపు ముక్కలపై వ్రాయవచ్చు. అప్పుడు మీ పిల్లలు ఈ వ్యాఖ్యానాలను, ఈ లక్షణాలను రుజువు చేసే యేసు యొక్క భూసంబంధమైన పరిచర్యలోని చిత్రాలతో సరిపోల్చగలరు. నేడు ఆయన తననుతాను మనకెలా చూపుకుంటారు?
For This Purpose [ఈ ఉద్దేశము నిమిత్తము] నుండి వివరణ, యాంగ్సుంగ్ కిమ్ చేత
సిద్ధాంతము మరియు నిబంధనలు 60:7; 61:1–2; 62:1
నేను పశ్చాత్తాపపడితే ప్రభువు నన్ను క్షమిస్తారు.
-
మీరు సిద్ధాంతము మరియు నిబంధనలు 60:7; 61:2ను మీ పిల్లలతో కలిసి చదువుతున్నప్పుడు, ఈ వచనాలలో ఉమ్మడిగా ఉన్న పదాలను కనుగొనడంలో వారికి సహాయం చేయండి. ఈ బయల్పాటులు జోసెఫ్ స్మిత్ మరియు ఇతర సంఘ నాయకులకు ఇవ్వబడ్డాయని వారికి గుర్తు చేయండి. వారు ఏమి తెలుసుకోవాలని ప్రభువు కోరుతున్నారు? మనం తప్పులు చేసినప్పుడు రక్షకుడు మన గురించి ఎలా భావిస్తారు మరియు పశ్చాత్తాపపడడం అంటే ఏమిటి అనే దాని గురించి కూడా మీరు మాట్లాడవచ్చు. సిద్ధాంతము మరియు నిబంధనలు 62:1 ప్రకారం, మనం శోధించబడినప్పుడు యేసు ఎలా సహాయపడగలరు?
సిద్ధాంతము మరియు నిబంధనలు 62:3, 9
నేను ఆయన సువార్తను పంచుకోవాలని యేసు క్రీస్తు కోరుతున్నారు.
-
యేసు క్రీస్తు మరియు ఆయన సంఘము గురించి మీకు నచ్చినదేమిటి అని ఎవరైనా వారిని అడిగితే వారు ఏమి చెబుతారని మీరు మీ పిల్లలను అడగవచ్చు. సువార్తను పంచుకోవడం గురించి కలిసి ఒక పాట పాడడం వారికి ఉపాయాలనివ్వగలదు. తర్వాత మీరు సిద్ధాంతము మరియు నిబంధనలు 62:3ని చదువవచ్చు మరియు మనము మన సాక్ష్యాలను పంచుకున్నప్పుడు ఏమి జరుగుతుందో వినమని మీ పిల్లలను అడగవచ్చు. మనం బలహీనంగా భావించినట్లయితే, 9వ వచనములోని వాగ్దానం ఎలా సహాయపడగలదు?
సిద్ధాంతము మరియు నిబంధనలు 63:64
నేను భక్తితో ఉండగలను.
-
సిద్ధాంతము మరియు నిబంధనలు 63:64ను పరిచయం చేయడానికి, మీరు భక్తితో కూడిన గౌరవం గురించి మీ పిల్లలతో కలిసి ఒక పాట పాడవచ్చు. అప్పుడు మీరు పరలోక తండ్రి మరియు యేసు క్రీస్తు పట్ల భక్తిని చూపించడానికి వివిధ మార్గాల గురించి మాట్లాడవచ్చు.
-
మీ పిల్లలకు ఇష్టమైన బొమ్మ, పుస్తకం లేదా దుప్పటి వంటి ప్రత్యేకమైన వస్తువు గురించి వారితో మాట్లాడడం ద్వారా గౌరవం అంటే ఏమిటో అర్థం చేసుకోవడానికి మీరు వారికి సహాయం చేయవచ్చు. వారికి ప్రత్యేకమైన వాటిని ఎలా చూసుకుంటారో మరియు రక్షిస్తారో వారిని అడగండి. తర్వాత మీరు కలిసి సిద్ధాంతము మరియు నిబంధనలు 63:64 చదువవచ్చు. పరలోక తండ్రికి ఏ విషయాలు ప్రత్యేకమైనవి—లేదా పవిత్రమైనవి? (ఉదాహరణకు, 61వ వచనము మరియు ఈ వారపు ప్రోత్సాహ కార్యక్రమ పేజీ చూడండి). మనం వీటిని ఎలా ఆదరించాలి—మన మాటలతో మరియు మన చర్యలతో?
మరిన్ని ఉపాయముల కోసం, ఫ్రెండ్ పత్రిక యొక్క ఈ నెల సంచికను చూడండి.