“EyeSilimela 2–8: ‘Uxhinele Ukuzinikela kwiNjongo Elungileyo’: IMfundiso neMinqophiso 58–59,” Yizani, Nindilandele—EyeKhaya neBandla: IMfundiso neMinqophiso 2025 (2025)
“IMfundiso neMinqophiso 58–59,” Yizani, Nindilandele—EyeKhaya neBandla: 2025
Independence, Missouri, 1831, ngu-Al Rounds
EyeSilimela 2–8: “Uxhinele Ukuzinikela kwiNjongo Elungileyo”
IMfundiso neMinqophiso 58–59
Xa abadala beBandla baqala ukubona indawo yeSixeko seZiyon—Independence, eMissouri—yayingeyonto ababeyilindele. Abanye babecinga ukuba babeyakufumana oluchumileyo, olukhutheleyo uluntu eluneqela elomeleleyo lwabaNgcwele. Endaweni yoko, bafumana indawo eyayinabemi abambalwa nabaqeleleneyo, inqongophele impucuko ngohlobo ababeyiqhele ngayo kwaye igcwaliswe yimida erhabaxa yabahlali endaweni yabaNgcwele. Kwabonakala nje ukuba iNkosi yayingabaceli nje ukuba baze eZiyon—Yona yayifuna bayakhe iZiyon.
Xa ulindelo lwethu lungafani nenyani, singakhumbula oko iNkosi yakuxelela abaNgcwele ngo-1831: “Aninako ukuqaphela ngamehlo enu endalo, okwa kaloku nje, icebo loThixo wenu … nozuko oluya kulandela emva kwenkxwaleko enkulu” (IMfundiso neMinqophiso 58:3). Ewe, ubomi buzele imbandezelo, kona nobubi, kodwa singazisa “ubulungisa obungakumbi; kuba amandla [akuthi]” (imiqolo 27–28).
Bona kananjalo Saints,, 1:127–33.
Iingcebiso zokuFunda eKhaya naseBandleni.
IMfundiso neMinqophiso 58:1–5; 59:23
“Kuba emva kwenkxwaleko enkulu kuza iintsikelelo.”
AbaNgcwele babenethemba lokuba ngexesha lobomi babo, iJackson County yayinokuhluma ibe yiZiyon, indawo apho bonke abaNgcwele banokuhlanganisana khona. Nangona kunjalo, ixesha labo eJackson County lalizele yinkxwaleko. Kwiminyaka embalwa, banyanzeleka ukuba bemke kwaye “balindele inkululeko yeZiyon ixesha elincinane” (IMfundiso neMinqophiso 105:9).
Ufunda ntoni ngenkxwaleko okanye imingeni kumazwi eNkosi kuyo IMfundiso neMinqophiso 58:1–5? Kutheni ucinga ukuba ezinye iintsikelelo ziza kuphela emveni kwenkxwaleko? Zeziphi iintsikelelo ozifumeneyo emveni kwenkxwaleko?
Yintoni oyifunda evela kuyo IMfundiso Neminqophiso 59: 23 ekuzisela ithemba?
IMfundiso neMinqophiso 58:26–29
Mna “ndingazisa ubulungisa obungakumbi” “ngokwentando [yam] ekhululekileyo.”
Njengenxalenye yofundo lwakho lwale miqolo, unokwenza uluhlu lwezinto ezithile “oxhinele ukuzinikela” kuzo. Ingaba zonke “[zii]njongo e[zi]lungileyo”? Cingisisa ngoko unokukwenza ukuze “[uzise] ubulungisa obungakumbi”—uze ucinge ngokuzibekela iinjongo zokuzenza.
Kutheni ucinga ukuba iNkosi ifuna wena wenze “izinto ezininzi ngokwentando [yakho] ekhululekileyo”? Besiyakuba yintoni isiphumo ukuba wena “uyanyanzelwa kwizinto zonke”? Yintoni u 2 Nifayi 2:27 ayongeza ekuqondeni kwakho lo mgaqo?
IMfundiso neMinqophiso 58:42–43
INkosi iyandixolela njengoko ndiguquka.
Isithembiso seNkosi kuyo IMfundiso neMinqophiso 58:42 sokuxolela ngokupheleleyo abo baguqukayo siyakhuthaza, nangona kananjalo siphakamisa eminye imibuzo: Kuthetha ukuthini ukuguquka? Ndazi njani mna ukuba ndiguqukile? Ngethamsanqa, iNkosi yaqhubeka, “Ngoko ke ninokwazi…” (umqolo 43).
Nantsi eminye imibuzo eyongezelelweyo abantu ngamanye amaxesha abanayo malunga nenguquko. Ukufundisa ntoni uMoya njengoko ufunda izixhobo ezicetyiswayo ezinikiweyo ngezantsi?
Ukuvuma izono zam kundinceda njani ukuba ndiguquke? Bona Indumiso 32:1–5; Imizekeliso 28:13; Mozaya 27:34–37; Alma 39:12–13.
Ndizama ukushiya izono zam, kodwa ndihlala ndizenza iimpazamo. Ngaba inguquko yam isasebenza?
Daily Restoration
Ndinokuqiniseka njani ukuba uMsindisi undixolele?
Yayingubani uPolly Knight?
UPolly Knight nomyeni wakhe, uJoseph Knight Omkhulu, babengamanye amakholwa okuqala kubizo lwesiprofeto sikaJoseph Smith. UPolly noJoseph banikela ngenkxaso ebalulekileyo kumProfeti kumsebenzi wenguqulelo yeNcwadi kaMormoni. Usapho lakwaKnight lwashiya iColesville, New York, ukuzihlanganisa kunye nabaNgcwele e-Ohio kwaye emveni koko bayalelwa ukuba bahambe baye eJackson County, eMissouri. Njengoko babehamba, impilo kaPolly yaqalisa ukucutheka, kodwa wayezimisele ukubona iZiyon ngaphambili kokuba asweleke. Yena wayesele eseMissouri iintsuku ezimbalwa kuphela ngelixa esweleka (bona Saints, 1:127–28, 132–33). IMfundiso neMinqophiso 59 yafunyanwa ngomhla wokusweleka kwakhe, kwaye imiqolo 1 no 2 inokubhekisela kuye ngqo.
IMfundiso neMinqophiso 59:4–19
Imithetho yintsikelelo.
Ucinga ukuba kuthetha ntoni uku “thweswa … ngemiyalelo ”? (umqolo 4). Cingisisa ngendlela iNkosi ekusikelela ngayo njengoko uzama ukuthobela umthetho ngamnye kuyo imiqolo 5–19.
Yabelana ngezinto ozifundayo. Kwiimeko ezininzi, iingqiqo zomoya ozifumanayo njengokuba ufunda izibhalo zinokulomeleza ukholo losapho lwakho, izihlobo, namalungu ewadi. Yabelana nabo ngamava akho, iimvakalelo, nobungqina bukaYesu Krestu.
IMfundiso neMinqophiso 59:9–19
ISabatha yiMini yeNkosi.
Emveni kokuthembisa ukusikelela abaNgcwele abaseZiyon “ngemiyalelo engembalwa”, iNkosi yanikezela ugxininiso olukhulu kumthemtho omnye ngokwenene: umthetho wokubeka owaKhe “umhla ongcwele” (IMfundiso neMinqophiso 59:4, 9). Njengoko ufunda IMfundiso neMinqophiso 59:9–19, cingisisa ngokuba kutheni ukuzukisa iSabatha kwakubalulekile kwaba baNgcwele njengoko babefuna ukwakha iZiyon. Kutheni ibalulekile kuwe?
Ungacingisisa kananjalo ukuba uyawusebenzisa umhla wesabatha ngendlela iNkosi eyayinqwenela ngayo? Ukugcina umhla weSabatha ungcwele kundinceda njani ndihlale “[ndi]ngenachaphaza ehlabathini”? (umqolo 9). Yintoni endingayenza ukunikela “imithandazo yam koseNyangweni”? (umqolo 10).
Unokuqaphela ukuba iNkosi isebenzisa amagama afana nala “vuyo”, “ukuvuya”, “ulonwabo”, kunye “ubumnandi” ukufundisa ngomhla weSabatha. Yintoni eyenza isabatha ivuyise kuwe? Unokumcacisela njani umntu isizathu sokuba ukhethe ukuhlonela imini yeNkosi?
Bona kananjalo Genesis 2:2–3; Isaya 58:13–14; Russell M. Nelson, “The Sabbath Is a Delight,” Liyahona, UCanzibe 2015, 129–32.
Ngezimvo ezingakumbi, bona ukhutsho lwale nyanga lweencwadi Liyahona nako Okwenzelwe Ukomeleza uLutsha.
Iingcebiso zokuFundisa Abantwana
IMfundiso neMinqophiso 58:26–28
UBawo waseZulwini undinike amandla okukhetha.
-
Ukufunda kunye IMfundiso neMinqophiso 58:26–28 kungakunika wena nabantwana bakho ithuba lokuthetha ngamandla uBawo waseZulwini asiphe wona ukuba sikhethe ukwenza okulungileyo. Ninokuxelelana ngokhetho olwahlukeneyo enilwenzileyo nokuba kwenzeke ntoni ngenxa yoko. Mhlawumbi abantwana bakho bangathanda ukuzoba umfanekiso wamava abo.
-
Ungabhala ukhetho kwelinye icala lephepha nesiphumo kwelinye kwaye usebenzise eli phepha ukubonisa ukuba ukhetho lwethu neziphumo zalo azinakwahlulwa. Mhlawumbi abantwana bakho banokudwelisa izinto ezimbalwa onokukhetha kuzo kwaye bathethe ngeziphumo ezivela kulo. Emva koko ningafunda kunye IMfundiso neMinqophiso 58:27–28 kwaye nithethe ngokhetho oluzisa “ ubulungisa obungakumbi” okanye iziphumo ezilungileyo. UBawo waseZulwini “usivuza” njani okanye usisikelela njani njengokuba sizama ukwenza okulungileyo? (umqolo 28).
IMfundiso NemiNqophiso 59:7, 18–21
“Uze uyibulele iNkosi uThixo wakho ezintweni zonke.”
-
Cingisisa ngokufunda le miqolo ngelixa wena nabantwana bakho nihambahamba okanye nijonga imifanekiso yendalo, niqaphela izinto “[e]zikholisa iliso … nokonwabisa intliziyo” (umqolo 18). Okanye usenokumema abantwana bakho ukuba bazobe imifanekiso yezinto abanombulelo ngazo kwaye ubayeke bakuxelele ngemifanekiso yabo. Sinokuwubonisa njani umbulelo wethu ngezi zinto?
INkosi idale izinto ezininzi ezintle ukusizisela uvuyo.
IMfundiso neMinqophiso 59:9–12
ISabatha yiMini yeNkosi.
-
Singenza ntoni ngeCawe ukunqula iNkosi kwaye sifumane uvuyo? Nceda abantwana bakho bafumane iimbono kuyo IMfundiso neMinqophiso 59:9–12 nakulo iphepha lomsebenzi wale veki. Mhlawumbi kananjalo banokufumana imifanekiso okanye izinto ezimele izinto esizenzayo ngeSabatha (ezifana nemifanekiso yomthendeleko kolu lwandlalo). Ezi zinto zisinceda njani ukuba sizive sisondele kuBawo waseZulwini noYesu Krestu?
Ngezimvo ezingakumbi, bona ukhutsho lwale nyanga lwencwadi Umhlobo.