సిద్ధాంతము మరియు నిబంధనలు 41–44

1831 ప్రారంభం నాటికి, పరిశుద్ధులు ఒహైయోలో సమకూడడం ప్రారంభించారు. అక్కడ బయల్పరుస్తానని ప్రభువు వాగ్దానం చేసిన చట్టాన్ని పొందడానికి వారు ఆతృతగా ఉన్నారు (సిద్ధాంతము మరియు నిబంధనలు 38:32 చూడండి). కానీ ముందుగా, ఆయన చట్టాన్ని పొందడానికి ఆయన శిష్యులు ఎలా సిద్ధపడాలో ప్రభువు బోధించారు. దేవుని చట్టాన్ని పొందడంలో పరిశుద్దులకు సహాయపడిన ఏ సూత్రాలను సిద్ధాంతము మరియు నిబంధనలు 41:1–6లో మీరు కనుగొంటారు? ఆయన నుండి ఉపదేశాన్ని పొందడానికి ఈ సూత్రాలు మీకెలా సహాయపడవచ్చు?

సిద్ధాంతము మరియు నిబంధనలు 42:1–72లో కనుగొనబడే బయల్పాటును ప్రవక్త పొందిన అతి ముఖ్యమైన బయల్పాటులలో ఒకటిగా పరిశుద్ధులు పరిగణించారు. ప్రచురించబడిన మొదటి బయల్పాటులలో ఇది ఒకటి. చాలా సంవత్సరాలు, పరిశుద్ధులు దీనిని “చట్టం” అని పిలిచారు. ప్రకరణము‌లో ప్రభువు యొక్క ఆజ్ఞలు లేదా చట్టాలు అన్నీ లేనప్పటికీ, క్రొత్తగా పునఃస్థాపించబడిన సంఘానికి ఈ సూత్రాలు ఎందుకు ముఖ్యమైనవి అని ఆలోచించడం విలువైనదే. నేడు అవి మనకు ఎందుకు ముఖ్యమైనవి?

42వ ప్రకరణము చాలా పెద్దగా ఉన్నందున, మీరు ఈ క్రింది వాటి వంటి చిన్న భాగాలలో దానిని అధ్యయనం చేయవచ్చు. ప్రతీ దానిలో బోధించిన సూత్రాలను గుర్తించండి మరియు ఈ చట్టాలు ఆయన జనులపట్ల ప్రభువుకు గల ప్రేమకు ఎలా సంకేతంగా ఉన్నాయో పరిశీలించండి.

• 4–9, 11–17, 56–58 వచనములు

• 18–29 వచనములు

• 30–31 వచనములు

• 40–42 వచనములు

• 43–52 వచనములు

దేవుడు మనకు చట్టాలు మరియు ఆజ్ఞలు ఎందుకు ఇస్తారు? ఆజ్ఞలను తెలుసుకోవడం మరియు అనుసరించడం ద్వారా మీరు ఏయే మార్గాల్లో దీవించబడ్డారు?

42వ ప్రకరణములో బయల్పరచబడిన చట్టములో భాగంగా, ప్రాచీనకాలంలో క్రీస్తు యొక్క అనుచరుల వలె “వారి మధ్య బీదవారెవరు లేకుండా” (మోషే 7:18) ఎలా “అంతయు సమిష్టిగా” (అపొస్తలుల కార్యములు 2:44; 4 నీఫై 1:3) వారు కలిగియుండగలరోనని ప్రభువు తన పరిశుద్ధులకు బోధించారు. సమర్పణ చట్టమును పరిశుద్ధులు ఎలా జీవించారనే దాని గురించి సిద్ధాంతము మరియు నిబంధనలు 42:30-42 నుండి మీరేమి నేర్చుకుంటారు? (సమర్పించడం అంటే ఏదైనా ఒక పవిత్ర ప్రయోజనం కోసం పక్కన పెట్టడం అని అర్థం.)

ఈ రోజు మనకు “అంతయు సమిష్టిగా” లేనప్పటికీ, దేవాలయాలలో కడవరి దిన పరిశుద్ధులు సమర్పణ చట్టాన్ని జీవించడానికి నిబంధన చేస్తారు. దేవుడు మీకు ఇచ్చిన దానిని అవసరంలో ఉన్న జనులను దీవించడానికి మీరు ఎలా సమర్పించగలరు?

షారన్ యుబాంక్, “ఆయన మనల్ని ఉపయోగించాలని నేను ప్రార్థిస్తున్నాను,” లియహోనా, నవ. 2021, 53–56 కూడా చూడండి.

సంఘము బయల్పాటు చేత నడిపించబడుతున్నదని తెలుసుకోవడానికి ఆతృతగా ఉన్న ఒక క్రొత్త సంఘ సభ్యునితో మీరు మాట్లాడుతున్నట్లు ఊహించుకోండి. ఆయన ప్రవక్త చేత ఆయన సంఘాన్ని నడిపించడానికి ప్రభువు యొక్క నమూనాను ఆమె లేదా అతనికి వివరించడానికి మీరు సిద్ధాంతము మరియు నిబంధనలు 43:1–16ను ఎలా ఉపయోగించగలరు? వ్యక్తిగత బయల్పాటును పొందడం గురించి బోధించడానికి మీరు సిద్ధాంతము మరియు నిబంధనలు 42:61, 65–68ను ఎలా ఉపయోగించగలరు?

ప్రభువు నుండి ఆయన ఆత్మ ద్వారా మీరు పొందిన కొన్ని “శాంతికరమైన విషయాలు” మరియు సంతోషకరమైన విషయాలు ఏవి?

ప్రభువు మీతో ఎలా సంభాషిస్తారో వివరిస్తూ మీ స్వంత వీడియోను రూపొందించడాన్ని పరిగణించండి.

రస్సెల్ ఎమ్. నెల్సన్, “సంఘము కొరకు బయల్పాటు, మన జీవితాల కొరకు బయల్పాటు,” లియహోనా, మే 2018, 93–96 కూడా చూడండి.

• యేసు క్రీస్తు శిష్యులుగా ఉండడం అంటే ఏమిటో మీ పిల్లలకు తెలియజేయడానికి, మీరు శిష్యుడు అనే పదం ఉండవలసిన చోటును ఖాళీగా ఉంచి, ఒక కాగితంపై సిద్ధాంతము మరియు నిబంధనలు 41:5 అని వ్రాయవచ్చు. తర్వాత వారు అక్కడ లేని పదం కోసం 5వ వచనములో చూడవచ్చు. ఈ వచనం ప్రకారం, యేసు క్రీస్తు శిష్యునిగా ఉండడం అంటే ఏమిటి? క్రీస్తుకు మంచి శిష్యులుగా ఉండేందుకు మనం ఎలా ప్రయత్నిస్తున్నాము?

• జాగ్రత్తగా వినడం మరియు సూచనలను అనుసరించడం అవసరమైన ఆట‌ను ఆడడాన్ని మీ పిల్లలు ఆనందించవచ్చు. ప్రభువును “విని, ఆలకించుడి, పాటించుడి” అంటే ఏమిటో మాట్లాడడానికి మీరు ఈ ఆటను ఉపయోగించవచ్చు (సిద్ధాంతము మరియు నిబంధనలు 42:2). ఆయన మనకు ఇచ్చిన సూచనలేవి? ఆయన చట్టాలకు మరియు ఆజ్ఞలకు లోబడడం ద్వారా మనం ఎలా దీవించబడ్డాము?

• మీరు ఈ వారపు ప్రోత్సాహ కార్యక్రమ పేజీని మీ పిల్లలతో పూర్తిచేయవచ్చు. దేవుని చట్టాలకు లోబడుట గురించి ఒక పాటను కూడా మీరు పాడవచ్చు. దేవుని చట్టాలకు లోబడడం వల్ల మీకు ఎలా సంతోషం కలిగిందో ఒకరితో ఒకరు పంచుకోవడం గురించి ఆలోచించండి.

  

• సిద్ధాంతము మరియు నిబంధనలు 42:38 చదివిన తరువాత, ఇతరులకు సేవ చేయడం ద్వారా యేసును ఎలా సేవించవచ్చో మీ పిల్లలు ఆలోచించేలా వారికి సహాయం చేయండి.

  

  2:18

  

• మీరు మీ పిల్లలకు దశమ భాగం మరియు ఇతర అర్పణల కాగితా‌న్ని చూపించి, ఇతరులను దీవించేందుకు మనం కలిగియున్న దానిని ఇవ్వడానికి దానిని ఎలా ఉపయోగించాలో మాట్లాడవచ్చు.

• సాక్ష్యపు సమావేశంలో ఎవరైనా లేచి నిలబడి, అతను సంఘము మొత్తానికి బయల్పాటు అందుకున్నట్లు వార్డుకు చెప్పినట్లు ఊహించుకోవడానికి మీ పిల్లలను ఆహ్వానించండి (ఉదాహరణకు, మనం ఇకపై క్యారెట్లు తినకూడదు లేదా నీటికి బదులుగా మనం పాలతో చేతులు కడుక్కోవాలి అనే బయల్పాటు.) ప్రవక్తకి బదులుగా మనం ఆయన చెప్పేది వినాలి అని అతడు అంటాడు. అందులో తప్పేముంటుంది? ప్రభువు తన సంఘానికి ఆజ్ఞలను ఎలా ఇస్తారో కనుగొనడానికి అప్పుడు మీరు సిద్ధాంతము మరియు నిబంధనలు 43:1–7ను కలిసి చదువవచ్చు.

• మీరు జీవించి ఉన్న ప్రవక్త చిత్రాన్ని చూపించి, ఆయన ఇటీవల బోధించిన విషయాన్ని పంచుకోవడానికి కూడా మీ పిల్లలను ఆహ్వానించవచ్చు. వారికి సహాయం కావాలంటే, ఇటీవలి సర్వసభ్య సమావేశ సందేశం నుండి వీడియో క్లిప్ లేదా గద్యభాగాన్ని పంచుకోండి. నేడు జీవించియున్న ప్రవక్త ఉండడం ఎందుకు దీవెనకరమైనది?