Phau Lus Qhuab Qhia thiab Kev Khi Lus 2; Joseph Smith—Keeb Kwm 1:27–65

Yeej yog ib qhov uas peb ntseeg tau tias Vajtswv muaj ib txoj hauj lwm rau Joseph Smith ua—peb ntsia tau nws lub neej thiab pom meej tej yam nws tau ua. Tiam sis koj puas tau xav tias Vajtswv muaj ib txoj hauj lwm rau koj ua thiab? Thaum koj nyeem Joseph Smith—Keeb Kwm 1:27–33, xav txog seb txoj hauj lwm ntawd yog dab tsi. Qhov ntawd pab tau tus Cawm Seej txoj moo zoo txum tim rov qab li cas?

Txwj Laug Gary E. Stevenson qhia tias: “Thaum peb los cuag Khetos thiab pab lwm tus ua li ntawd, peb koom tes ua Vajtswv txoj hauj lwm cawm seej thiab kev tsa nto, uas tsom ntsoov rau tej kev lav ris uas Vajtswv tsa. … Tej kev lav ris no yeej yooj yim to taub thiab nej txawj ua. Tej kev lav ris no yog:

• Ua neej raws li Yexus Khetos txoj moo zoo

• Saib xyuas cov uas xav tau kev pab

• Caw txhua tus los txais txoj moo zoo

• Muab tej tsev neeg khi ua ke mus ib txhis li” (“Yooj Yim To Taub thiab Zoo Nkauj Kawg,” Liyahaunas, Kaum, Ib Hlis Ntuj 2021, 47).

Xav txog tej lub sij hawm thaum koj tau pab ua tej no uas yog tej kev lav ris uas Vajtswv tsa. Tus Cawm Seej yuav xav kom koj ua dab tsi ntxiv? Muaj ib daim nplooj Tej lub Ntsiab Lus thiab tej Lus Nug rau tej kev lav ris no (saib “Peb lub Luag Hauj Lwm hauv Vajtswv txoj Hauj Lwm Cawm Seej thiab Kev Tsa Nto,” Txoj Moo Zoo cov Ntawv). Tej zaum koj yuav xav nyeem tej nplooj no kom pab koj teb lus nug no.

Tej zaum koj yuav xav tias tus Tswv siv tsis tau koj vim koj tau ua yuam kev hauv koj lub neej. Koj kawm dab tsi txoj Joseph Smith lub neej nyob hauv Joseph Smith—Keeb Kwm 1:28–29? Koj yuav ua li cas thiaj li paub “[Vajtswv] xav li cas txog koj”?

Kuj saib “Youth Responsibility in the Work of Salvation” (vidi-aus), ChurchofJesusChrist.org; “The Work of Salvation and Exaltation,” Phau Qhia Kev Coj lub Koom Txoos, 1.2.

3:15

Thaum Maulaunais tau tshwm sim rau Joseph Smith, nws hais txog ob peb zaj qhia tej yam uas yuav muaj los yav tom ntej nyob hauv Phau Qub thiab Phau Tshiab, xws li Yaxayas 11; Tes Hauj Lwm 3:22–23; thiab Yau-ees 2:28–32. Thaum koj nyeem Joseph Smith—Keeb Kwm 1:34–47, xav txog seb vim li cas tej lus uas qhia txog tej yam uas yuav muaj los yav tom ntej yog cov lus tseem ceeb rau Joseph paub. Vim li cas cov lus no tseem ceeb rau koj paub?

Koj kuj nyeem tau tej lus uas Txwj Laug David A. Bednar tau qhia txog Maulaunais txoj kev tshwm sim rau Joseph Smith zaum thib Ib “Vajtswv lub Hwj Chim uas Muaj Yeeb Koob Heev” (Liyahaunas, Kaum Ib Hlis Ntuj 2021, 28).

13:16

Kuj saib “Ib tug Tim Tswv Nyob Siab,” Cov Nkauj Qhuas Vajtswv, zaj 7.

Joseph muaj 17 xyoo xwb thaum nws xub thawj pom cov phiaj kub. Tiam sis tsis tau cia rau nws saib xyuas, mus txog thaum, plaub xyoo tom qab ntawd. Nyeem Joseph Smith—Keeb Kwm 1:48–60, thiab nrhiav seb muaj dab tsi tshwm sim thaum lub sij hawm ntawd hauv nws lub neej. Koj xav hais tias tej ntawd tau npaj Joseph li cas los ua txoj hauj lwm uas Vajtswv tau txib nws ua? Koj tau muaj xwm dab tsi hauv koj lub neej uas tau npaj koj los ua hauj lwm rau Vajtswv thiab pab lwm tus? Muaj dab tsi hauv koj lub neej tam sim no uas npaj koj pab lwm tus thaum yav tom ntej?

Tej lus xws li “cog,” “lub siab,” thiab “tig” hauv tshooj no qhia dab tsi rau koj txog Eliyas ntiag tug hauj lwm thiab cov koob hmoov ntawm cov yawm sij pov thawj hwj uas nws muab txum tim rov qab los? Thaum twg koj tau hnov koj lub siab tig mus rau koj cov poj koob yawm txwv? Cia li xav txog tej yam uas koj ua tau kom muaj tej kev xav li ntawd ntau ntxiv. Kev nrhiav koj cov poj koob yawm txwv thiab ua tej kab ke rau lawv hauv lub tuam tsev yog ib txoj kev koj ua tau (saib FamilySearch.org). Koj nrhiav tau tej yam ntxwv ntxiv twg?

Kuj saib Lus Qhuab Qhia thiab Kev Khi Lus 110:13–16; Gerrit W. Gong, “Zoo Siab thiab Tas Mus Li,” Liyahaunas, Kaum Ib Hlis Ntuj 2022, 83–86.

• Tej lub sij hawm peb sawv daws xav “raug txim rau [peb] txoj kev qaug zog thiab kev tsis zoo,” ib yam li Joseph Smith xav. Koj thiab koj cov me nyuam kuj kawm hauv Joseph Smith—Keeb Kwm 1:29 ua ke, nyeem txog tej yam Joseph ua thaum nws xav li ntawd. Peb kawm dab tsi los ntawm nws tus yam ntxwv uas pab tau peb thaum peb ua yuam kev? Vim li cas tseem ceeb tias peb paub Vajtswv tau hu Joseph txawm nws tsis zoo kawg nkaus?

• Tej zaum koj cov me nyuam yuav nyiam ua yeeb yam hais tias lawv yog Joseph Smith thaum koj qhia txog thaum Maulaunais tuaj xyuas nyob hauv Joseph Smith—Keeb Kwm 1:27–54 los sis “Tshooj 3: Tus Tim Tswv Maulaunais thiab cov Phiaj Kub” (nyob hauv Cov Dab Neeg hauv phau Lus Qhuab Qhia thiab Kev Khi Lus, 13–17, los sis zaj vidi-aus nyob hauv Txoj Moo Zoo cov Ntawv). Piv txwv hais tias, cov me nyuam quav npab zoo nkaus li thov Vajtswv los sis ua yeeb yam nce lub roob Hill Cumorah, thiab li ntawd. Ces koj nug tau lawv kom qhia txog seb Vajtswv tau hus kom Joseph Smith ua dab tsi thiab peb tau koob hmoov los ntawm qhov ntawd li cas. Piv txwv hais tias, peb tau txais koob hmoov li cas vim Joseph Smith tau muab Phau Ntawv Maumoos txhais lus? Nws txoj hauj lwm tau pab peb los ze Leej Txiv Saum Ntuj Ceeb Tsheej thiab Yexus Khetos li cas?

  

  2:29

• Tej zaum koj thiab koj cov me nyuam yuav nyiam saib tej duab txog koj tsev neeg, tej zaum saib ib daim duab txog koj tsev neeg tom lub tuam tsev (los sis saib Phau Muaj Duab txog Txoj Moo Zoo, naj npawb. 120). Ces koj nyeem tau Phau Lus Qhuab Qhia thiab Kev Khi Lus 2 thiab sib qhia txog koj tej kev xav txog seb vim li cas peb muaj tuam tsev thiab vim li cas Leej Txiv Saum Ntuj Ceeb Tsheej xav kom tsev neeg nyob ua ke mus ib txhis li. Xav seb nej puas xav hu ua ke “Families Can Be Together Forever” (Children’s Songbook, 188). Hauv zaj nkauj, peb kawm tias peb yuav tsum ua dab tsi kom nrog peb tsev neeg nyob mus ib txhi li cas?

• Me nyuam muaj tau kev zoo siab thiab kev xyiv fab txog tsev neeg zaj keeb kwm. Kom pab tau lawv, koj kuj qhia tej zaj dab neeg los sis tej duab txog koj poj koob yawm txwv. Nrog koj cov me nyuam sib tham txog thaum koj cov poj koob yawm txwv yog me nyuam thiab lawv lub neej zoo li cas. Tej zaum koj cov me nyuam yuav nyiam tej yam ntxim ua txog tsev neeg zaj keeb kwm nyob hauv FamilySearch.org/discovery.