Lus Qhuab Qhia thiab Kev Khi Lus 3–5

Joseph Smith ua hauj lwm qhuab qhia thaum xub thawj, nyuaj rau nws ntaus phooj ywg zoo—cov phooj ywg zoo li Martin Harris, uas yog ib tug txiv neej nplua nuj uas neeg coob saib taus uas nws twb ua ntau yam uas txhawb nqa Joseph txoj hauj lwm. Ces thaum Martin tau thov kom cia nws muab 116 daim nplooj txhais Phau Ntawv Maumoos rau nws tus poj niam saib, Joseph xav ua li ntawd, txawm tus Tswv twb tau ceeb toom kom tsis txhob ua. Tu siab uas thaum Martin tseem muaj cov ntaub ntawv ces cov ntaub ntawv twb xiam lawm, thiab tus Tswv tau qhuab ntuas Joseph thiab Martin heev (saib Saints, 1:51–53).

Thaum koj nyeem Lus Qhuab Qhia thiab Kev Khi Lus 3:1–15, xav seb tus Tswv xav kom koj kawm dab tsi los ntawm tej yam uas nkawd kawm. Piv txwv hais tias, koj kawm dab tsi txog:

• Vajtswv txoj hauj lwm? (saib nqe 1–3, 16).

• Tej xwm txheej los ntawm kev hwm neeg tshaj li hwm Vajtswv? (saib nqe 4–8).

• Cov koob hmoov uas los ntawm kev rau siab ntseeg? (saib nqe 8).

• Tus Tswv txoj kev qhia thiab txhawb nqa Joseph? (saib nqe 9–16).

Nyob hauv nws zaj lus “Nej Sawv Tig Mus rau Sab Twg?,” Txwj Laug Lynn G. Robbins qhia tej piv txwv ntau nyob hauv vaj lug kub txog cov neeg uas hwm Vajtswv thiab cov tib neeg uas ua li lwm tus xav kom lawv ua (Liyahaunas, Kaum Ib Hlis Ntuj 2014, 9–11). Cia li xav puas nyeem tej piv txwv no hauv vaj lug kub uas nws tau qhia. Koj kawm dab tsi los ntawm tej zaj lus no? Koj tau raug tej yam zoo li cas uas koj tau tso siab rau tus Tswv thaum raug kev ntxias kom ua dab tsi txawv? Twb tau muaj dab tsi los ntawm tej kev xaiv no?

Kuj saib Dale G. Renlund, “Tus Txheej Txheem Txais Kev Tshwm Sim,” Liyahaunas, Kaum Ib Hlis Ntuj 2022, 16–19; “The Contributions of Martin Harris,” nyob hauv Revelations in Context (2016), 1–9; Tej Ntsiab Lus thiab tej Lus Nug, “Nrhiav Qhov Tseeb thiab Kev Dim Kev Ntxias,” Txoj Moo Zoo cov Ntawv; “Vajtswv Lus Txib Mos Muag,” Cov Nkauj Qhuas Vajtswv, zaj 46.

Tshooj 4 los feem ntau yog hais rau cov tub txib. Tiam sis, yog ib yam zoo kawm hais tias kev tshwm sim no yog muab rau Joseph Smith tus Laus thaum xub thawj, es tus Tswv tsis hu nws mus ua tub txib tiam sis nws tseem “xav ua hauj lwm rau Vajtswv” (nqe 3).

Ib txoj kev rau koj nyeem tshooj no yog kom xav tias yog ib zaj piav txog txoj hauj lwm rau ib tug uas xav ua tus Tswv tej hauj lwm. Tus Tswv nrhiav dab tsi? Nws muab tej txiaj ntsim dab tsi rau peb ?

Koj kawm dab tsi txog txoj kev ua hauj lwm rau tus Tswv los ntawm kev tshwm sim no?

Thawj Tswj Hwm Russell M. Nelson tau hais txoj kev sau Ixayees los ua ke yog “qhov tseem ceeb tshaj plaws, lub hom phiaj tseem ceeb tshaj plaws, thiab txoj hauj lwm tseem ceeb tshaj plaws hauv lub ntiaj teb” (“Hope of Israel” [kev tshaj tawm rau cov neeg hluas thoob ntiaj teb, Rau Hli Ntuj 3, 2018], Txoj Moo Zoo cov Ntawv). Koj nrhiav dab tsi hauv nws zaj lus uas ua rau koj xav pab ua txoj hauj lwm no?

Nyob hauv xyoo 1829, Martin Harris tus poj niam, Lucy, tau xa ntawv liam hais tias Joseph Smith ntxias cov neeg vim nws ua txuj txhais cov phiaj kub (saib Saints, 1:56–58). Yog li ntawd Martin tau thov Joseph kom muab puav pheej ntxiv hais tias muaj cov phiaj kub tiag. Lus Qhuab Qhia thiab Kev Khi Lus 5 yog kev tshwm sim uas teb Martin tej lus thov. Koj kawm dab tsi los ntawm tshooj no txog tej yam no:

• Tus Tswv hais tias dab tsi yuav tshwm sim yog tias lawv cia cov phiaj kub rau lub ntiaj teb pom (saib Lus Qhuab Qhia thiab Kev Khi Lus 5:7). Koj xav tias yog vim li cas lawv nug li ntawd?

• Lub luag hauj lwm ntawm cov neeg tim khawv nyob hauv tus Tswv txoj hauj lwm (saib nqe 11–15; kuj saib 2 Kauleethaus 13:1).

• Yuav ua li cas kom txais tau ib zaj lus tim khawv txog Phau Ntawv Maumoos rau koj tus kheej (saib nqe 16, 24; kuj saib Maulaunais 10:3–5).

Phau Lus Qhuab Qhia thiab Kev Khi Lus 5:1–10 qhia dab tsi rau koj txog Joseph Smith lub luag hauj lwm hauv peb lub caij nyoog—thiab nyob hauv koj lub neej? (Kuj saib 2 Nifais 3:6–24.)

• Kom pib sib tham txog kev kawm tso siab rau Leej Txiv Saum Ntuj Ceeb Tsheej, tej zaum koj yuav xav rov qab tshab xyuas zaj dab neeg uas piav txog cov phab ntawv uas ploj lawm (saib Cov Dab Neeg hauv phau Lus Qhuab Qhia thiab Kev Khi Lus, 18–21). Koj thiab koj cov me nyuam kuj ua tau yeeb yam txog tej lub sij hawm thaum lawv raug kev ntxias ua tej yam uas lawv paub hais tias lawv yuav tsum tsis txhob ua. Koj nrhiav tau tej lus twg nyob hauv Lus Qhuab Qhia thiab Kev Khi Lus 3:5–8; 5:21–22 uas pab tau lawv thaum raug twj xwm li no?

  

  4:39

• Txhua nqe hauv Lus Qhuab Qhia thiab Kev Khi Lus 4 muaj tej lus tseeb uas muaj nqis uas pab tau koj cov me nyuam kawm txog txoj kev ua hauj lwm rau Vajtswv. Nov yog ob peb lub tswv yim uas pab tau lawv kawm tej lus tseeb no:

  • Tej zaum nej yuav xav nyeem Lus Qhuab Qhia thiab Kev Khi Lus 4:1 ua ke thiab muab cov duab ua qhia txog Vajtswv txoj hauj lwm hauv hnub nyoog kawg uas “zoo kawg nkaus” rau lawv pom (xws li cov tub txib, cov tuam tsev, thiab Phau Ntawv Maumoos).

  • Tej zaum koj cov me nyuam yuav nyiam xav txog tej yam uas neeg ua los sis kos duab txog cov lus “ua hauj lwm rau nws kawg nej lub siab lub ntsws thiab lub dag lub zog” (Lus Qhuab Qhia thiab Kev Khi Lus 4:2).

  • Nej nrhiav tau cov cuab yeej uas siv ua hauj lawm hauv ib daim teb. Tej cuab yeej no pab peb li cas? Ces koj cov me nyuam kuj nrhiav tau tej yam hauv Lus Qhuab Qhia thiab Kev Khi Lus 4:5–6 uas zoo li tej cuab yeej uas pab ua Vajtswv txoj hauj lwm.

  • Cov me nyuam hlob kuj nrhiav hauv Lus Qhuab Qhia thiab Kev Khi Lus 4 lawv tus kheej los tau thiab sau txog tej yam uas ua hauj lwm rau tus Tswv txhais li cas.

  • Tej zaum nej hu tau ib zaj nkauj txog cov tub txib txoj hauj lwm, xws li “I Want to Be a Missionary Now” (Children’s Songbook, 168).

• Kom pab qhia koj cov me nyuam txog cov neeg tim khawv, koj kuj nug lawv kom xav txog tias ib tug phooj ywg qhia lawv tias nws pom ib tug miv taug kev ntawm nws ob sab ceg ntawm xub ntiag. Lawv puas ntseeg nws? Ces xav li cas yog tias lwm tus phooj ywg tau hais ib yam li ntawd thiab? Sib tham txog “ib tug tim khawv” yog leej twg thiab vim li cas cov neeg tim khawv tseem ceeb. Koj kuj pab tau koj cov me nyuam nrhiav hauv Lus Qhuab Qhia thiab Kev Khi Lus 5:1–3, 7, 11 tej lus teb rau tej lus nug li no:

  • Martin Harris xav paub dab tsi?

  • Joseph Smith muab cov phiaj kub rau leej twg pom tau?

  • Vim li cas kev pom cov phiaj kub yuav tsis pab ib tug neeg paub tias Phau Ntawv Maumoos muaj tseeb?

  • Peb yuav ua li cas thiaj ua tim khawv txog Phau Ntawv Maumoos? (saib Lus Qhuab Qhia thiab Kev Khi Lus 5:16; Maulaunais 10:3–5).