Lus Qhuab Qhia thiab Kev Khi Lus 10–11

Dab Ntxwg Nyoog xav kom peb tsis nco qab tias muaj nws tiag tiag—los sis xav kom peb tsis paub thaum nws sim haub ntxias peb (saib 2 Nifais 28:22–23). Tiam sis tus Tswv tej lus nyob hauv Lus Qhuab Qhia thiab Kev Khi Lus 10 qhia tias yeej muaj Dab Ntxwg Nyoog—thiab nws tawm tsam Vajtswv txoj hauj lwm tas mus li. Nyob hauv nqe 1–33, cia li kawm seb Vajtswv paub txog tej yam uas Dab Ntxwg Nyoog ua (kuj saib nqe 62–63). Tej zaum koj yuav xav thov tus Tswv pab koj pom tias Dab Ntxwg Nyoog dag ntxias koj li cas. Thaum koj nyeem tshooj 10, xav txog seb tus Cawm Seej pab tau koj tiv taus Dab Ntxwg Nyoog li cas.

Nifais tsis paub vim li cas nws tau txais kev tshoov siab kom ua ob phau ceev xwm txheej txog nws cov neeg. Thiab Maumoos tsis paub vim li cas nws tau txais kev tshoov siab muab cov phiaj thib ob nrog cov phiaj kub. Tiam sis ob tug yaj saub tso siab tias Vajtswv muaj “ib lub hom phiaj tseem ceeb” (1 Nifais 9:5; Maumoos cov Lus 1:7). Hnub no peb paub me ntsis txog Vajtswv lub hom phiaj: pauv 116 tej phab ntawv ntawm Phau Ntawv Maumoos. Koj xav tias tus Tswv xav kom koj kawm dab tsi los ntawm tej no? Cia li xav txog qhov no thaum koj nyeem phau Lus Qhuab Qhia thiab Kev Khi Lus 10:34–52. Tej zaum koj yuav xav sau ntawv txog tej lus tseeb uas koj kawm los ntawm tus Tswv hauv tej nqe no. Tej lus tseeb no yuav ua li cas kom hloov tau koj txoj kev sib raug zoo nrog Vajtswv? Koj xav li cas txog tus Tswv laj lim tswv yim thiab txoj kev paub ua ntej npaj rau thaum yuav xiam 116 tej phab ntawv?

Tej zaum koj kuj yuav xav nrhiav tej yam hauv koj lub neej uas pom Nws laj lim tswv yim thiab txoj kev paub ua ntej. Nyeem tej zaj hauv Txwj Laug Ronald A. Rasband zaj lus “Los ntawm lub Ntuj Ceeb Tsheej tus Txheej Txheem”—tej zaj ntawd yuav pab koj nco qab (Liyahaunas, Kaum Ib Hlis Ntuj 2017, 55–57). Xav seb koj puas sau tej ntawd thaum koj nco qab. Tus Tswv tau ua hauj lwm dab tsi hauv koj lub neej? Piv txwv tias, Nws tau npaj tej “lam tau lam muaj” dab tsi? Nws tau teeb tej hauv paus dab tsi rau koj cov koob hmoov? Thaum twg Nws tau caw koj mus txhawb pab ib tug neeg uas xav tau?

Kuj saib Loos 8:28; Lus Qhuab Qhia thiab Kev Khi Lus 90:24; Tej Ntsiab Lus thiab tej Lus Nug, “Txoj Hau Kev Cawm Seej,” Txoj Moo Zoo cov Ntawv.

Joseph tus tij laug Hyrum xav ua raws li tus Tswv lub siab nyiam, ces nws nug Joseph kom Joseph txais kev tshwm sim rau nws. Tus Yaj Saub zoo siab ua li ntawd, tiam sis ib nqe lus ntawm kev tshwm sim ntawd (Lus Qhuab Qhia thiab Kev Khi Lus 11) hais tias Hyrum txawj txais tau kev tshwm sim rau nws tus kheej. Thiab “tag nrho cov uas muaj tej kev xav tau uas zoo, thiab tau muab lawv rab liag cev mus sau los” (nqe 27). Thaum koj nyeem tshooj 11, koj xav tias tus Tswv qhia koj dab tsi txog kev tshwm sim rau yus tus kheej? Qhov no nruab li cas rau tej yam uas Nws qhia Oliver Cowdery nyob hauv tshooj 6–9? Nws xav qhia dab tsi ntxiv rau koj?

Kuj saib “Cia tus Ntsuj Plig Dawb Huv Coj,” Cov Nkauj Qhuas Vajtswv, zaj 58.

Ua ntej tau muab Phau Ntawv Maumoos txhais lus, Hyrum Smith xav xav pab ua txoj hauj lwm muab txoj Moo Zoo Txum Tim Rov Qab Los. Thaum koj nyeem tias tus Tswv tau hais li cas txog nws txoj kev xav, cia li xav tias txoj kev “tau [Vajtswv] txoj lus” txhais tau li cas rau koj (nqe 21). Qhov uas koj tau Vajtswv txoj lus los qhov ntawd tau pab koj ua hauj lwm li cas rau Nws nrog lub hwj chim?

• Kom qhia koj cov me nyuam txog nqe no, koj nug tau lawv txog tej yam lawv ua “tas mus li.” Tus Tswv hais kom peb ua dab tsi tas mus li nyob hauv Lus Qhuab Qhia thiab Kev Khi Lus 10:5? Vim li cas Nws xav kom peb ua li no?

• Koj yuav ua li cas pab koj cov me nyuam nco ntsoov thov Vajtswv tas mus li? Tej zaum lawv khaws tau ib cov pob zeb kheej kheej thiab kos cov pob zeb “Lus Qhuab Qhia thiab Kev Khi Lus 10:5” los sis “Thov Vajtswv Tas Mus Li.” Lawv muab lawv cov pob zeb tso rau tej qhov chaw uas yuav pab lawv nco ntsoov thov, xws li tso ntawm lawv lub txaj pw, nrog lawv cov ntaub ntawv, los sis qhov chaw lawv noj mov. Raws li Lus Qhuab Qhia thiab Kev Khi Lus 10:5, Vajtswv ua li cas kom koom koob hmoov rau peb thaum peb thov Vajtswv? Koj cov me nyuam kuj nrhiav tau tej lus teb ntxiv xws li hauv zaj nkauj “A Child’s Prayer” (Children’s Songbook, 13).

• Cov me nyuam txawj kawm kom paub thaum tus Ntsuj Plig hais lus rau lawv. Kom pab tau lawv, koj muab tau ib lub teeb thiab ib daim duab uas muaj ib lub ntsej muag zais; ces hais kom koj cov me nyuam nrhiav tej yam khoom no. Nyeem Lus Qhuab Qhia thiab Kev Khi Lus 11:13, thiab pab koj cov me nyuam nrhiav tej lo lus uas piv rau tej khoom lawv nrhiav tau. Tej lus no qhia peb tias tus Vaj Ntsuj Plig Dawb Huv yuav pab peb li cas?

• Qhia lawv txog tej xwm txheej ntawm sab ntsuj plig hauv koj lub neej kom pab koj cov me nyuam paub tus Vaj Ntsuj Plig Dawb Huv lub hwj huam hauv lawv lub neej. Thaum koj qhia, hais kom lawv qhia txog lawv tej xwm txheej thiab. Tej zaum nej yuav xav nyeem Lus Qhuab Qhia thiab Kev Khi Lus 11:12–13 ua ke, thiab nrhiav tej yam uas peb ua tau kom thiaj li paub thaum twg tus Vaj Ntsuj Plig Dawb Huv coj peb kev. Ua tim khawv hais tias Leej Txiv Saum Ntuj Ceeb Tsheej xav coj peb kev dhau los ntawm tus Vaj Ntsuj Plig Dawb Huv.

• Ib yam li Hyrum Smith, tej zaum koj cov me nyuam yuav muaj ntau lub sij hawm qhia txoj moo zoo rau lwm tus neeg. Tej zaum nej yuav xav nyeem Lus Qhuab Qhia thiab Kev Khi Lus 11:21, 26 ua ke thiab nug koj cov me nyuam kom nrhiav seb Vajtswv hais rau Hyrum tias nws yuav tsum ua dab tsi ua ntej nws thiaj li qhia tau txoj moo zoo. Qhov uas yus “txais” Vajtswv txoj lus txhais tau li cas? Peb yuav ua li cas kom ua li no? Peb ua li cas kom “khaws” Vajtswv txoj lus cia rau hauv peb lub siab? Tej zaum koj cov me nyuam yuav xav ua yeeb yam kom qhia ib yam txog Yexus Khetos los sis Phau Ntawv Maumoos rau lwm tus.