Lus Qhuab Qhia thiab Kev Khi Lus 12–17; Joseph Smith—Keeb Kwm 1:66–75

Joseph Knight thiab David Whitmer xav paub seb nkawd yuav ua li cas kom pab ua tus Tswv txoj hauj lwm. Thaum koj nyeem tus Tswv lo lus teb nkawd (Lus Qhuab Qhia thiab Kev Khi Lus 12; 14), cia li xav seb koj xav tias “kev pab coj thiab tsa lub hom phiaj ntawm Xi-oos” txhais li cas (12:6; kuj saib 14:6). Koj nrhiav tau tej lub ntsiab thiab tej cwj pwm zoo li Khetos hauv tshooj no uas pab koj ua li no?

Kuj saib “The Knight and Whitmer Families,” nyob hauv Revelations in Context, 20–24.

Yauhas tus uas Muab Neeg Ua Kev Cai Raus Dej hu Joseph Smith thiab Oliver Cowdery nws “ob tug kwv luag tub qhe.” Koj xav tias kev ua ib tug kwv luag tub qhe nrog Yauhas tus uas Muab Neeg Ua Kev Cai Raus Dej txhais li cas? (saib Mathais 3:13–17; Lukas 1:13–17; 3:2–20).

Thaum koj nyeem tej yam uas Yauhas tus uas Muab Neeg Ua Kev Cai Raus Dej hais txog lub Pov Thawj Hwj Aloos nyob hauv tshooj 13, cia li xav seb vim li cas cov yawm sij rau lub pov thawj hwj tau pab Yauhas ua nws txoj hauj lwm npaj tus Tswv txoj kev. Piv txwv hais tias:

• “Cov tim tswv txoj kev txhawb pab” yog dab tsi? (saib 2 Nifais 32:2–3; Maulaunais 7:29–32; Phau Qhia txog Vaj Lug Kub, “Tim Tswv,” Txoj Moo Zoo cov Ntawv).

• “Txoj moo zoo ntawm kev hloov siab lees txim” yog dab tsi? (saib Lus Qhuab Qhia thiab Kev Khi Lus 84:26–27; Dale G. Renlund, “Lub Pov Thawj Hwj thiab tus Cawm Seej lub Hwj Chim Theej Txhoj,” Liyahaunas, Kaum Ib Hlis Ntuj 2017, 64–67).

Vim li cas cov kab ke ntawm lub Pov Thawj Hwj Aloos (ib yam li kev ua kev cai raus dej thiab lub cim nco txog) pab npaj txoj kev rau koj txais tus Cawm Seej hauv koj lub neej?

Txwj Laug Dale G. Renlund thiab nws tus poj niam, Ruth, qhia li no txog yawm sij pov thawj hwj:

“Lo lus cov yawm sij pov thawj hwj los muaj ob txoj kev kom siv. Thawj txoj kev hais txog ib txoj cai tshwj xeeb uas txhua tus uas txais lub Pov Thawj Hwj Aloos los yog Mekhixedes tau txais. … Piv txwv tias, cov uas tuav lub Pov Thawj Hwj Aloos txais cov yawm sij ntawm cov tim tswv tej kev los txhawb pab thiab txoj moo zoo ntawm kev hloov siab lees txim thiab kev cai raus dej rau txoj kev zam txim rau tej kev txhaum (saib Lus Qhuab Qhia thiab Kev Khi Lus 13:1; 84:26–27). Cov uas tuav lub Pov Thawj Hwj Mekhixedes txais cov yawm sij ntawm tej txuj ci neeg paub tsis txog ntawm lub nceeg vaj, tus yawm sij ntawm txoj kev paub txog Vajtswv, thiab yawm sij ntawm tag nrho lub Koom Txoos tej koob hmoov ntawm sab ntsuj plig (saib Lus Qhuab Qhia thiab Kev Khi Lus 84:19; 107:18). …

“Txoj kev thib ob hais txog cov yawm sij pov thawj hwj yog hais txog kev ua cov thawj coj. Cov thawj coj ntawm lub pov thawj hwj txais yawm sij ntxiv, txoj cai saib xyuas ib pawg koom haum ntawm lub Koom Txoos los sis ib pawg. Zoo li no, cov yawm sij pov thawj hwj yog txoj cai thiab hwj chim qhia, coj, thiab kav lub Koom Txoos” (The Melchizedek Priesthood: Understanding the Doctrine, Living the Principles [2018], 26).

Koj puas tau xav seb yuav zoo li cas yog koj tau nrog Joseph Smith thiab Oliver Cowdery nyob thaum tej lub sij hawm tseem ceeb ntawm txoj Kev Muab Txoj Moo Zoo Txum Tim Rov Qab Los? Thaum koj nyeem Joseph Smith—Keeb Kwm 1:66–75, tsis hais lus cim ntawm nqe 71 qhov kawg, tej zaum koj yuav to taub me ntsis seb lawv xav li cas. Koj txais kev tshoov siab twg txog lawv tej lus? Qhov tseem ceeb, xav txog cov koob hmoov uas lawv tau txais rau qhov lawv txais lub pov thawj hwj thiab tau ua kev cai raus dej. Tus Cawm Seej tau pub tej koob hmoov twg rau koj los ntawm cov kab ke pov thawj hwj?

Yog xav kawm ntxiv, xav seb okj puas kos duab uas muaj ob lo lus sau hais tias Kab Ke thiab Koob Hmoov. Ces tej zaum koj yuav xav nrhiav hauv cov vaj lug kub kom sau cov kab ke thiab cov koob hmoov uas los ntawm cov kab ke ntawd: Yauhas 14:26; Tes Hauj Lwm 2:38; Lus Qhuab Qhia thiab Kev Khi Lus 84:19–22; 131:1–4; Joseph Smith—Keeb Kwm 1:73–74. Koj xav tias muaj lwm cov koob hmoov twg uas koj yuav sau thiab? Cov kab ke uas koj tau txais tau ua li cas kom koj txais tau tus Cawm Seej lub hwj chim hauv koj lub neej?

Kuj saib David A. Bednar, “Vajtswv lub Hwj Chim uas Muaj Yeeb Koob Heev,” Liyahaunas, Kaum Ib Hlis Ntuj 2021, 28–30; Saints, 1:65–68; “God of Power, God of Right,” Hymns, zaj 20; Tej lub Ntsiab Lus thiab tej Lus Nug, “Tej Kev Khi Lus thiab cov Kab Ke,” Txoj Moo Zoo cov Ntawv.

Koj puas tau xav paub, ib yam li John thiab Peter Whitmer xav paub seb “qhov muaj nqis tshaj plaws rau koj” hauv koj lub neej yog dab tsi? (Lus Qhuab Qhia thiab Kev Khi Lus 15:4; 16:4). Thaum koj nyeem Lus Qhuab Qhia thiab Kev Khi Lus 15–16, cia li xav seb vim li cas txoj kev coj neeg los cuag Khetos muaj nqis tshaj plaws. Koj ua dab tsi kom “coj tau neeg” los cuag Khetos?

Kuj saib Saints, 1:68–71.

Ib tug tim khawv yog leej twg? Vim li cas tus Tswv siv cov neeg ua tim khawv nyob hauv Nws txoj hauj lwm? (saib 2 Kauleethaus 13:1). Cia li xav txog tej lus nug no thaum koj nyeem Vajtswv txoj lus rau Peb tug Tim Khawv nyob hauv phau Lus Qhuab Qhia thiab Kev Khi Lus 17. (Kuj saib “Zaj Lus Tim Khawv ntawm Peb tug Tim Khawv” nyob hauv Phau Ntawv Maumoos.) Cov neeg tim khawv ua li cas kom pab coj tau Vajtswv “lub hom phiaj ncaj ncees” los? (nqe 4).

Koj ua tau tim khawv txog dab tsi?

Kuj saib Saints, 1:73–75; “A Day for the Eternities” (video), Txoj Moo Zoo cov Ntawv.

23:10

• Cov duab nyob hauv daim ntawv no pab koj cov me nyuam xav txog txoj kev txum tim lub Pov Thawj Hwj Aloos rov qab los (kuj saib “Tshooj 6: Joseph thiab Oliver Txais Yuav lub Pov Thawj Hwj,” nyob hauv Cov Dab Neeg hauv phau Lus Qhuab Qhia thiab Kev Khi Lus, 26–27, los sis zaj vidi-aus nyob hauv Txoj Moo Zoo cov Ntawv). Lawv puas nyiam kos duab txog lub sij hawm uas lawv nrog koj nyeem nyob hauv Joseph Smith—Keeb Kwm 1:68–74?

  

  2:12

• Tej zaum koj yuav xav muab ib daim duab txog Yauhas tus Muab Neeg Ua Kev Cai Raus Dej rau lawv saib thaum nej nyeem Mathais 3:13–17; Joseph Smith—Keeb Kwm 1:68–70 ua ke. Vim li cas qhov uas tus Tswv txib Yauhas tus Muab Neeg Ua Kev Cai Raus Dej kom muab txoj cai pov thawj hwj muab neeg ua kev cai raus dej rau Joseph Smith yog ib qho tseem ceeb?

• Kom pab nej pib sib tham txog cov yawm sij uas hais txog nyob hauv Lus Qhuab Qhia thiab Kev Khi Lus 13, tej zaum koj thiab koj cov me nyuam yuav xav saib ib cov yawm sij thiab sib tham seb cov yawm sij ua rau peb ua taus tej yam twg. Tej zaum koj pab tau lawv nrhiav lo lus yawm sij nyob hauv tshooj 13. Koj nrhiav tau tej lus twg nyob hauv Lus Qhuab Qhia thiab Kev Khi Lus 13 uas piav txog cov koob hmoov los ntawm lub Pov Thawj Hwj Aloos? Tej zaum koj cov me nyuam yuav xav kawm txog tej yam uas Leej Txiv Saum Ntuj Ceeb Tsheej ua kom foom koob hmoov rau peb los ntawm lub pov thawj hwj nyob hauv zaj vidi-aus “Blessings of the Priesthood” (Txoj Moo Zoo cov Ntawv).

• John thiab Peter Whitmer xav paub qhov twg yog qhov uas muaj nqis tshaj plaws nyob hauv nkawd lub neej (saib Lus Qhuab Qhia thiab Kev Khi Lus 15:4; 16:4). Tej zaum koj thiab koj cov me nyuam yuav xav sib tham txog tej yam uas muaj nqis rau nej. Thaum koj nyeem Lus Qhuab Qhia thiab Kev Khi Lus 15:6 los yog 16:6, thov koj cov me nyuam tsa tes thaum lawv hnov seb tus Tswv hais qhov uas “muaj nqis tshaj plaws” yog dab tsi.

• Kev “coj tau neeg los cuag [Yexus Khetos]” txhais li cas? Pab koj cov me nyuam sau ntawv txog tej tswv yim, zoo li ua phooj ywg rau lwm tus, muab koj phau vaj lug kub rau ib tug phooj ywg, los yog thov Vajtswv rau ib tug uas xav tau kev pab. Tej zaum koj cov me nyuam yuav xav nrhiav cov duab txog tej no hauv lub Koom Txoos cov ntawv xov xwm los yog Phau Muaj Duab txog Txoj Moo Zoo. Los sis lawv kos tau duab raws li lawv xav. Caw lawv xaiv ib qho uas lawv yuav ua. Tej zaum nej kuj yuav xav hu nqe plaub ntawm zaj nkauj “I Feel My Savior’s Love” (Children’s Songbook, 74–75).

• “Tshooj 7: Cov Tim Khawv Pom cov Phiaj Kub” (nyob hauv Cov Dab Neeg hauv phau Lus Qhuab Qhia thiab Kev Khi Lus, 31–33, los sis zaj vidi-aus txog qhov no nyob hauv Txoj Moo Zoo cov Ntawv) yuav pab koj cov me nyuam kawm txog Peb tug Tim Khawv. Tom qab nej nyeem Lus Qhuab Qhia thiab Kev Khi Lus 17:5–6, qhia koj cov me nyuam tias koj tau ua li cas thiaj paub tias Phau Ntawv Maumoos muaj tseeb. Peb yuav ua li cas kom ua tim khawv txog Phau Ntawv Maumoos?

  

  4:58