“Kaum Ob Hlis Ntuj 30–Ib Hlis Ntuj 5: ‘Lub Caij Nyoog Txum Tim Rov Qab Los Tseem Mus Tom Ntej’: Txoj Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025 (2025)
“Txoj Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los,” Los, Nrog Kuv Mus—Siv hauv Tsev thiab lub Koom Txoos: 2025
Kaum Ob Hlis Ntuj 30–Ib Hlis Ntuj 5: “Lub Caij Nyoog Txum Tim Rov Qab Los Tseem Mus Tom Ntej”
Txoj Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los
Koj yuav ua li cas kom nco txog ib lub sij hawm uas tau hloov lub ntiaj teb 200 xyoo tom qab ntawd? Thawj Pawg Thawj Tswj Hwm thiab Pawg Kaum Ob tug Thwj Tim tau xav txog zaj lus nug ntawd thaum lub Plaub Hlis Ntuj 2020 tau los ze, uas yuav yog 200 xyoo tom qab Joseph Smith Thawj Zaug Ua Yog Toog. Thawj Tswj Hwm Russell M. Nelson nco qab tias, “Peb tau xav seb puas tsim nyog tsa ib tug mlom.” “Tiam sis thaum peb tau xav txog Thawj Zaug Ua Yog Toog ntawd, peb tau txais kev tshoov siab kom tsis txhob tsa ib tug mlom pob zeb tiam sis peb yuav tsa suab hais ib zaj lus tshaj tawm … , uas tsis yog ‘txaug rau saum ib daig txiag zeb’ tiam sis yog tej lus uas tau sau ‘rau hauv daim txiag nqaij uas yog peb nplooj siab’ [2 Kauleethaus 3:3]” (“Mloog Nws Hais,” Liyahaunas, Tsib Hlis Ntuj 2020, 90).
Zaj lus tshaj tawm lawv tau tsa hu ua “Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los: Ib zaj Lus Tshaj Tawm rau lub Ntiaj Teb Thaum Nco txog Ob Puas Xyoo Tas Los.” Tsis yog tsa tej lus kom nco txog Thawj Zaug Ua Yog Toog Pom xwb tiam sis txhua yam uas Yexus Khetos tau ua—thiab tseem ua—xij thaum ntawd los. Txoj Kev Txum Tim Nws txoj moo zoo rov qab los pib thaum ib tug tib neeg tau tig rau Vajtswv thiab hnov Nws. Yeej tseem zoo tib yam li ntawd: nrog ib lub siab, thaum ib lub sij hawm—tsis hais koj li thiab.
Tej Tswv Yim Pab Qhia hauv Tsev thiab lub Koom Txoos
“Vajtswv hlub Nws cov me nyuam nyob hauv txhua lub teb chaws hauv lub ntiaj teb.”
Koj xav li cas, vim li cas zaj lus tshaj tawm txog Kev Muab txoj Moo Zoo Txum Tim Rov Qab Los pib nrog ib zaj lus txog Vajtswv txoj kev hlub? Thaum koj kawm zaj lus tshaj tawm, nrhiav tej lus hais txog Vajtswv txoj kev hlub rau “Nws cov me nyuam nyob hauv txhua lub teb chaws hauv lub ntiaj teb.” Txoj kev muab txoj moo zoo Txum Tim Rov Qab Los tau pab koj paub tias Nws hlub koj li cas?
Kuj saib Gerrit W. Gong, “Txhua Haiv Neeg, Txhua Xeem Neeg, thiab Txhua Yam Lus,” Liyahaunas, Kaum Ib Hlis Ntuj 2020, 38–41.
Txoj moo zoo Txum Tim Rov Qab Los pib nrog lo lus teb rau ib lo lus nug.
Peb kuj hais tau tias tus Cawm Seej pib txoj Kev Txum Tim Nws txoj moo zoo rov qab los thaum Nws teb ib lo lus nug. Koj xav tias zaj lus tshaj tawm txog Kev Muab Txoj Moo Zoo Txum Tim Rov Qab Los qhia dab tsi rau ib tug tib neeg uas muaj lus nug txog Vajtswv, txoj moo zoo, los sis, “seb nws puas yuav txais kev cawm seej”? Tej zaum koj yuav xav kawm txog Joseph Smith—Keeb Kwm 1:5–20 kom saib seb koj kawm tau dab tsi los ntawm Joseph Smith txog kev nrhiav lus teb rau tej lus nug ntawm txoj moo zoo.
Kuj saib Tej Ntsiab Lus thiab tej Lus Nug, “Seeking Answers,” Txoj Moo Zoo cov Ntawv.
Pom qhov meej ntawm Kuv lub Siab tej Kev Xav Tau Xav Yuav, los ntawm Walter Rane
Yexus Khetos tau muab Nws lub Koom Txoos txum tim rov qab los.
Koj paub dab tsi txog “Khetos lub Koom Txoos hauv Phau Tshiab,” uas tus Cawm Seej muab txum tim rov qab los dhau los ntawm Joseph Smith? Xav seb koj puas kawm tej vaj lug kub no thiab sau txog tej yam nyob hauv Nws lub Koom Txoos:
-
Mathais 16:15–19
-
Malakaus 16:15–18
-
Lukas 6:12–13
-
Tes Hauj Lwm 4:34–35
-
1 Kauleethaus 15:29
-
Efexus 4:11–15
Tom qab, koj kuj piv cov vaj lug kub saud nrog cov hauv qab, uas qhia txog seb Yexus Khetos muab tej yam ntawd txum tim rov qab los dhau los ntawm Joseph Smith li cas:
Vim li cas koj zoo siab rau Yexus Khetos txoj Moo Zoo uas Txum Tim Rov Qab Los?
Txwj Laug Jeffrey R. Holland thiab nws tus poj niam ib zaug xav txog seb nkawd lub neej yuav zoo li cas yog tias nkawd tau ua neej nyob ua ntej lub Koom Txoos txum tim rov qab los. Muaj dab tsi uas wb xav tau? nkawd nug nkawd tus kheej. Nyeem tau txog lawv lub neej thaum lub sij hawm ntawd nyob hauv “Ib txoj Kev Cia Siab uas Ci Kawg Nkaus” (Liyahaunas, Tsib Hlis Ntuj 2020, 81–82). Txoj kev muab txoj moo zoo Txum Tim Rov Qab Los tau pab koj cia siab ntawm sab ntsuj plig li cas?
Kuj saib Tej Ntsiab Lus thiab tej Lus Nug, “Apostasy and the Restoration of the Gospel,” Txoj Moo Zoo cov Ntawv.
“Lub Caij Nyoog Txum Tim Rov Qab Los tseem mus tom ntej.”
Koj puas tau xav txog tias koj yeej koom tes pab ua txoj Moo Zoo uas Txum Tim Rov Qab Los? Xav txog tej lus no los ntawm Thawj Tswj Hwm Dieter F. Uchtdorf: “Tej lub sij hawm peb xav tias Kev Txum Tim Txoj Moo Zoo Rov Qab Los yog ib qho uas twb tiav lawm, tau muaj thaum yav tas los xwb. … Tiam sis, Kev Txum Tim Txoj Moo Zoo Rov Qab Los yog ib qho uas tshwm sim tam sim no; peb nyob hauv lub caij nyoog ntawd tam sim no (“Nej Puas Tsaug Zog Kom Dhau Kev Txum Tim txoj Moo Zoo Rov Qab Los?,” Liyahaunas, Tsib Hlis Ntuj 2014, 59).
Thaum koj npaj kawm txog txoj moo zoo txum tim rov qab los li cas thaum xyoo 1800, tej zaum koj yuav xav seb qhov ntawd tau los txum tim rov qab los li cas hauv koj lub neej. Nyeem zaj lus tshaj tawm txog Kev Muab Txoj Moo Zoo Txum Tim Rov Qab Los nrog tej lus nug li no hauv koj lub hlwb: Kuv tau los paub tias tej no muaj ntseeb li cas? Kuv yuav ua li cas koom tes pab ua txoj Moo Zoo uas Txum Tim Rov Qab Los li cas?
“Lub ntuj twb qhib plho lawm.”
Koj xav tias lo lus “lub ntuj twb qhib plho lawm” txhais li cas? Muaj dab tsi uas koj pom—nyob hauv zaj lus tshaj tawm txog Kev Muab Txoj Moo Zoo Txum Tim Rov Qab Los, hauv lub Koom Txoos niaj hnub no, hauv cov vaj lug kub, thiab hauv koj lub neeg—uas qhia tias lub ntuj twb qhib plho lawm tiag tiag?
Tej zaum koj kuj xav nyeem “Kaj Ntug Plaws Lawm” (Nkauj Qhuas Vajtswv, zaj. 1) thaum koj kawm tej no. Koj nrhiav tau dab tsi hauv zaj nkauj qhuas Vajtswv no uas pab koj to taub lo lus “lub ntuj twb qhib plho lawm”?
Kuj saib Quentin L. Cook, “Txoj Koob Hmoov uas Yog Kev Tshwm Sim rau cov Yaj Saub uas Tsis Tu Tsis Tseg thiab Kev Tshwm Sim uas Coj Peb lub Neej,” Liyahaunas, Tsib Hlis Ntuj 2020, 96–100.
Kawm ua ke. Thawj Tswj Hwm Nelson tau caw peb los “kawm [zaj lus tshaj tawm txog Kev Muab Txoj Moo Zoo Txum Tim Rov Qab Los] peb tus kheej thiab nrog [peb] tsev neeg thiab cov phooj ywg” (“Mloog Nws Hais,” 92). Xav seb koj yuav cia lwm tus kawm nrog koj li cas.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
“Peb tshaj tawm tias.”
-
Thaum koj nyeem zaj lus tshaj tawm txog Kev Muab Txoj Moo Zoo Txum Tim Rov Qab Los nrog koj cov me nyuam (los sis saib Thawj Tswj Hwm Nelson nyeem qhov ntawd hauv vidi-aus), pab lawv nrhiav tej kab lus uas pib nrog cov lus “peb tshaj tawm tias,” “peb tshaj tawm tiag,” los sis “peb ua tim khawv tias.” Peb cov yaj saub thiab cov thwj tim tshaj tawm tej lus tseeb dab tsi? Tej zaum koj thiab koj cov me nyuam yuav xav qhia txog nej tej lus tim khawv txog cov lus tseeb no.
6:0The Restoration of the Fulness of the Gospel of Jesus Christ
“Joseph Smith … muaj tej lus nug.”
-
Tej zaum yuav zoo rau koj cov me nyuam nrhiav thiab nyeem Joseph Smith tej lus nug uas pab pib tus Cawm Seej txoj moo zoo Txum Tim Rov Qab Los. Pab lawv nrhiav tej piv txwv uas nyob hauv Joseph Smith—Keeb Kwm 1:10, 29, 68. Peb tau koob hmoov li cas niaj hnub no vim Vajtswv tau teb Joseph Smith tej lus nug?
-
Tej zaum koj yuav muab ib lub sij hawm rau koj cov me nyuam qhia txog tej lus nug uas lawv muaj. Peb kawm dab tsi los ntawm Joseph Smith txog txoj kev nrhiav tej lus teb? (saib Joseph Smith—Keeb Kwm 1:8–17; kuj saib tej nqe 3 thiab 4 ntawm “This Is My Beloved Son,” Children’s Songbook, 76).
“Cov tub txib saum ntuj tau los qhia Joseph.”
-
“Cov tub txib saum ntuj [uas] tau los qhia Joseph” yog leej twg? Tej zaum koj cov me nyuam yuav nyiam nrhiav cov duab txog lawv hauv Phau Muaj Duab txog Txoj Moo Zoo (saib naj npawb. 91, 93, 94, 95). Cov tub txib saum ntuj no pab “txhim tsa Yexus Khetos lub Koom Txoos” li cas? Tej vaj lug kub nyob rau lub lim tiam no phab ntawv ntxim ua pab tau koj cov me nyuam teb lus nug no.
Yexus Khetos tau muab Nws lub Koom Txoos txum tim rov qab los.
-
Koj pab tau koj cov me nyuam kom to taub tias tus Cawm Seej lub Koom Txoos txum tim rov qab los tseem ceeb li cas? Tej zaum lawv pab tsim ib tug pej thuam siv pob zeb los sis cov khob thiab “rov qab kho,” los sis tsim ntxiv. Los yog, koj cov me nyuam tau pauv ib yam dab tsi vim qhov ntawd tau xiam los sis tau puas, koj kuj muab sib piv qhov ntawd rau tus Cawm Seej muab Nws lub Koom Txoos txum tim rov qab los. Pab lawv nrhiav hauv zaj lus tshaj tawm txog Kev Muab Txoj Moo Zoo Txum Tim Rov Qab Los uas qhia txog tej yam uas tus Cawm Seej muab txum tim rov qab los.
“Lub ntuj twb qhib plho lawm.”
-
Tej zaum koj qhia koj cov me nyuam los lus “lub ntuj twb qhib plho lawm” txhais li cas, thaum koj kaw qhov rooj thiab hais lus rau lawv, ces qhib qhov rooj thiab rov qab hais lus rau lawv. Cia lawv sim ua li ntawd hais lus thiab. Yexus Khetos muaj tej zaj lus twg uas Nws xav qhia rau peb? Tej yam twg tau pab peb paub tias lub ntuj twb qhib plho lawm rau peb?
Yog xav tau tswv yim ntxiv, saib phau xov xwm Phooj Ywg rau lub hlis no.