“Ib Hlis Ntuj 6–12: ‘Cia Li Mloog, Auj Nej cov Neeg’: Lus Qhuab Qhia thiab Kev Khi Lus 1,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025 (2025)
“Lus Qhuab Qhia thiab Kev Khi Lus 1,” Los, Nrog Kuv Mus—Siv hauv Tsev thiab lub Koom Txoos: 2025
Ib Hlis Ntuj 6–12: “Cia Li Mloog, Auj Nej cov Neeg”
Lus Qhuab Qhia thiab Kev Khi Lus 1
Thaum lub Kaum Ib Hlis Ntuj xyoo 1831, Yexus Khetos lub Koom Txoos uas tau muab txum tim rov qab los tsuas muaj ib xyoos thiab ib nrab xwb. Txawm yog cov ntseeg coob zuj zus tuaj los, cov ntseeg tseem yog ib co neeg uas neeg tsis paub txog nyob hauv ib qho chaw uas tsis tshua muaj neeg nyob, thiab ib tug yaj saub uas muaj nees nkaum tawm xyoo xwb yog tus uas coj lawv. Tiam sis Vajtswv xav tias cov neeg no yog Nws cov tub qhe thiab Nws cov tub xa xov, thiab Nws xav muab tej kev tshwm sim uas Nws tau muab rau lawv tshaj tawm rau lub ntiaj teb.
Lus Qhuab Qhia thiab Kev Khi Lus tshooj 1 yog tus Tswv zaj lus qhia ua ntej txog tej kev tshwm sim no. Tshooj no qhia meej tias txawm yog cov mej zeej hauv lub Koom Txoos tsis coob, zaj lus uas Vajtswv xav kom Nws Haiv Neeg Ntseeg tshaj tawm yeej yog ib zaj lus tseem ceeb kawg. Yog “lub suab ceeb toom” rau tag nrho “cov neeg uas nyob hauv lub ntiaj teb,” uas qhia kom lawv hloov siab lees txim thiab kom lawv tsa Vajtswv “txoj kev khi lus uas kav ib txhis” (nqe 4, 8, 22). Cov tub qhe uas tshaj tawm zaj lus no yog “cov neeg qaug zog thiab cov neeg dog dig.” Tiam sis cov tub qhe uas txo hwj chim yeej yog cov uas Vajtswv xav tau—thaum ntawd thiab tam sim no—kom coj Nws lub Koom Txoos “tawm hauv txoj kev pom tsis tseeb thiab qhov tsaus ntuj los” (nqe 23, 30).
Tej Tswv Yim Pab Qhia hauv Tsev thiab lub Koom Txoos
Lus Qhuab Qhia thiab Kev Khi Lus 1
“Cia li mloog, auj nej cov neeg.”
Ib zaj lus qhia ua ntej piav txog ib phau ntawv. Zaj no hais txog ib phau ntawv tej lub ntsiab thiab hom phiaj thiab pab tib neeg npaj nyeem phau ntawv ntawd. Thaum koj nyeem tshooj 1—tus Tswv “zaj lus qhia ua ntej” txog phau Lus Qhuab Qhia thiab Kev Khi Lus (nqe 6)—cia li nrhiav tej lub ntsiab thiab tej hom phiaj uas tus Tswv qhia yog vim li cas Nws qhia Nws tej kev tshwm sim. Koj kawm dab tsi uas yuav pab koj kawm phau Lus Qhuab Qhia thiab Kev Khi Lus xyoo no? Piv txwv hais tias, tej zaum koj yuav ua tib zoo xav txog qhov uas kev “mloog tus Tswv lub suab” hauv tej kev tshwm sim no (nqe 14) los yog kev “tshawb xyuas tej lus txib no” (nqe 37) txhais li cas.
Kuj saib zaj lus piav txog phau Lus Qhuab Qhia thiab Kev Khi Lus.
Lus Qhuab Qhia thiab Kev Khi Lus 1:4–6, 23–24, 37–39
Tus Tswv hais lus dhau ntawm Nws cov tub qhe, tsis hais cov yaj saub hauv hnub nyoog kawg no.
Tshooj 1 pib thiab kaw thaum Vajtswv tshaj tawm tias Nws hais lus los ntawm cov tub qhe uas Nws tau xaiv (saib nqe 4–6, 23–24, 38). Cia li sau ntawv txog tej yam uas koj kawm los ntawm kev tshwm sim no txog:
-
Tus Tswv thiab Nws lub suab.
-
Vim li cas yuav tsum muaj cov yaj saub hauv peb hnub nyoog.
Koj txais kev tshoov siab kom ua dab tsi los ntawm tej yam uas koj nrhiav tau?
Thaum twg koj tau hnov tus Tswv lub suab los ntawm Nws cov tub qhe? (saib nqe 38).
Tej zaum koj kuj yuav xav txog ib tug phooj ywg uas tsis paub txog cov yaj saub thiab xav seb yuav zoo li cas yog nws nrog koj nyeem tshooj 1. Koj tus phooj ywg yuav muaj lus nug dab tsi? Koj yuav xav nrog koj tus phooj ywg sib tham txog tej nqe twg kom pab nws to taub koj xav li cas txog qhov uas muaj cov yaj saub niaj hnub nim no?
Tej zaum koj yuav nyiam paub tias thaum ib pawg txwj laug sib ntsib ua ke nyob rau xyoo 1831 kom sib tham txog kev muab Joseph Smith tej kev tshwm sim luam tawm, muaj ib feem uas tsis nyiam lub tswv yim ntawd. Lawv txawj muag vim Joseph tsis txawj sau ntawv zoo, thiab lawv txhawj tias qhov uas lawv muab tej kev tshwm sim ntawd luam tawm yuav tsim teeb meem rau Haiv Neeg Ntseeg ntxiv (saib Saints, 1:140–43). Yog tias koj yog ib tug mej zeej hauv pawg sab laj no, koj yuav hais li cas txog tej kev txhawj no? Koj nyeem tej lub tswv yim twg hauv tshooj 1 uas yuav pab tau lawv? (saib, ua piv txwv, nqe 6, 24, 38).
Xav seb puas hu ib zaj nkauj qhuas Vajtswv xws li “Los, Mloog Ib tug Yaj Saub lub Suab” (Cov Nkauj Qhuas Vajtswv, zaj 9) thaum koj kawm thiab hawm Vajtswv Cia li nrhiav tej kab lus nyob hauv zaj nkauj no uas qhia tej lub ntsiab uas nyob hauv tej nqe ntawm tshooj 1.
Kuj saib Tej Ntsiab Lus thiab tej Lus Nug, “Yaj Saub,” Txoj Moo Zoo cov Ntawv.
Tus Tswv hais lus rau peb dhau los ntawm Nws cov tub qhe, uas yog cov yaj saub.
Lus Qhuab Qhia thiab Kev Khi Lus 1:12–30, 34–36
Kev Muab Txoj Moo Zoo Txum Tim Rov Qab Los pab kuv kov yeej tej teeb meem ntawm hnub nyoog kawg no.
Nyob hauv phau Lus Qhuab Qhia thiab Kev Khi Lus tshooj 1, tus Tswv piav vim li cas Nws muab Nws txoj moo zoo txum tim rov qab los. Saib seb koj paub sau pes tsawg qhov uas qhia vim li cas thaum koj nyeem nqe 12–23. Raws li koj xav, tau ua li cas kom muaj raws li tus Tswv lub hom phiaj muab txoj moo zoo Txum Tim Rov Qab Los?
Tus Tswv paub tias nyob hauv peb hnub nyoog peb yuav muaj tej teeb meem loj heev (saib nqe 17). Koj nrhiav tau dab tsi nyob hauv nqe 17–30, 34–36 uas pab koj nyob kaj siab lug thiab ua siab loj txawm yog muaj tej teeb meem no?
Kuj saib Russell M. Nelson, “Muaj Kev Ntseeg Mus rau Yav Tom Ntej,” Liyahaunas, Kaum Ib Hlis Ntuj 2020, 73–76.
Lus Qhuab Qhia thiab Kev Khi Lus 1:19–28
Tus Tswv siv “cov neeg qaug zog thiab cov neeg dog dig” kom ua Nws txoj hauj lwm.
Thaum koj nyeem Lus Qhuab Qhia thiab Kev Khi Lus 1:19–28, tej zaum tsim nyog uas koj xav txog lub ntsiab ntawm txoj kev ua tus Tswv tus tub qhe. Tus Tswv xav kom Nws cov tub qhe muaj tej cwj pwm twg? Tus Tswv ua dab tsi dhau los ntawm Nws cov tub qhe? Nyob thoob plaws lub ntiaj teb thiab nyob hauv koj lub neej mas puas tau muaj raws li tej lus qhia txog tej yam ntawm yav tom ntej hauv tej nqe no?
Cia li nrhiav Yexus Khetos. Lub ntsiab ntawm cov vaj lug kub yog kev ua tim khawv txog tus Cawm Seej thiab Nws txoj moo zoo. Thaum koj nyeem phau Lus Qhuab Qhia thiab Kev Khi Lus 1, cia li xav seb puas sau lus cim los sis nco txog tej nqe uas qhia koj tej yam txog Yexus Khetos.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Lus Qhuab Qhia thiab Kev Khi Lus 1:4, 37–39
Dhau los ntawm Nws cov yaj saub, tus Tswv ceeb toom kuv txog tej xwm txheej phem ntawm sab ntsuj plig.
-
Kom pib sib tham txog tus Tswv tej lus ceeb toom, tej zaum koj yuav xav nrog lawv tham txog tej lus ceeb toom uas peb txais los ntawm tib neeg txog tej xwm txheej uas peb pom tsis taus. Piv txwv hais tias txoj kev uas nplua, cua daj cua dub uas yuav los, los sis ib lub tsheb uas khiav ceev. Tej zaum koj thiab koj cov me nyuam yuav xav saib tej lub cim ceeb toom thiab muab tej no piv rau tej lus ceeb toom uas tus Tswv muab rau peb. Raws li Lus Qhuab Qhia thiab Kev Khi Lus 1:4, 37–39 hais, tus Tswv ua li cas kom ceeb toom peb? Tsis ntev tas los no Nws tau ceeb toom peb txog dab tsi? Tej zaum nej yuav xav saib los yog nyeem tej zaj los ntawm lub tuam rooj sab laj tsis ntev los no thiab nrhiav tej lus piv txwv txog Vajtswv “lub suab ceeb toom.”
-
Hu ib zaj nkauj ua ke txog cov yaj saub, xws li nqe kawg ntawm zaj “Follow the Prophet” (Children’s Songbook, 111). Hais lus tim khawv tias tus yaj saub hais Vajtswv txoj lus.
Lus Qhuab Qhia thiab Kev Khi Lus 1:17
Kev Muab Txoj Moo Zoo Txum Tim Rov Qab Los pab kuv kov yeej tej teeb meem ntawm hnub nyoog kawg no.
-
Kom pab nej sib tham txog Lus Qhuab Qhia thiab Kev Khi Lus 1:17, tej zaum koj thiab koj cov me nyuam yuav xav seb yuav zoo li cas yog nej npaj mus ncig ua si. Nej yuav tso dab tsi hauv nej lub nra? Yog tias nej paub ua ntej lawm tias ntuj yuav los nag los sis nej lub tsheb los sis lub npav lub log yuav tawg, ces nej yuav ua dab tsi kom npaj rau txoj kev mus ncig ua si. Nyeem nqe 17 ua ke, thiab sib tham txog qhov uas tus Tswv paub tias peb yuav raug dab tsi. Nws tau ua li cas kom npaj rau tej ntawd? (Yog tias yuav tsum piav lo lus “kev puas tsuaj,” piav tias yog ib qho xwm txheej phem los sis ib yam tsis zoo hlo li.) Vajtswv cov lus txib ua li cas kom pab peb kov yeej tej kev sim sib hauv peb lub neej?
Lus Qhuab Qhia thiab Kev Khi Lus 1:17, 29
Tus Tswv hu Joseph Smith los ua ib tug yaj saub.
-
Xwv kom kawm txog Joseph Smith txoj hauj lwm muab tus Cawm Seej txoj moo zoo txum tim rov qab los, tej zaum koj thiab koj cov me nyuam yuav xav saib ib daim duab txog tug Cawm Seej thiab ib daim duab txog Joseph Smith (saib cov duab hauv tus txheej txheem no) thiab sib tham txog tej yam uas tus Cawm Seej pub rau peb dhau los ntawm Joseph Smith. Tej zaum koj cov me nyuam yuav xav nrhiav tej yam nyob hauv Lus Qhuab Qhia thiab Kev Khi Lus 1:17, 29. Cia li qhia koj cov me nyuam tias yog vim li cas koj paub tias Vajtswv tau “hu kuv tus tub qhe Joseph Smith, tus Hluas, thiab hais lus saum ntuj ceeb tsheej los rau nws” (nqe 17).
© 1998 David Lindsley
Lus Qhuab Qhia thiab Kev Khi Lus 1:30
Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog tus Tswv “lub koom txoos uas tseeb thiab muaj sia zees nyob.”
-
Qhov uas hais tias lub Koom Txoos “tseeb thiab muaj sia zees” txhais tau li cas? Xwv kom pab koj cov me nyuam xav txog lo lus nug no, tej zaum koj yuav xav muab tej uas ciaj thiab tej uas tsis ciaj rau lawv saib—xws tsob ntoo uas tseem ciaj thiab tsob ntoo uas qhuav tuag lawm. Peb ua li cas ho paub tias ib yam tseem ciaj? Ces tej zaum koj yuav xav nyeem phau Lus Qhuab Qhia thiab Kev Khi Lus 1:30 thiab sib tham seb qhov no lub ntsiab qhia dab tsi txog qhov uas lub Koom Txoos “tseeb thiab muaj sia zees.”
Yog xav tau tswv yim ntxiv, saib phau xov xwm Phooj Ywg rau lub hlis no.