“Ol Nek bilong Restoresen: Famili bilong Joseph Smith,” Kam, Bihainim Mi—Bilong Haus na Sios: Doktrin na ol Kavanen 2025 (2025)
“Famili bilong Joseph Smith,” Kam, Bihainim Mi—Bilong Haus na Sios: 2025
Ol Nek bilong Restoresen
Famili bilong Joseph Smith
Yumi olgeta wanwan i save pilim famili laip, na Joseph Smith i no narakain. Ol pasin bilong lotu bilong ol papamama bilong em i planim ol sid bilong feit we i mekim Restoresen i isi long kamap. Rekod bilong Joseph i gat tribiut bilong em olsem : “Ol toktok na tokples [i] no inap long autim bikpela tenkyu mi gat long God long givim gutpela ol papamama.”
Ol dispela kotesen i kam long mama bilong em, Lucy Mack Smith; brata bilong em William Smith; na Profet em yet i givim yumi piksa i go insait long wanem kain lotu i bin stap long haus bilong ol Smith.
Lucy Mack Smith
“[Long yia 1802], Mi bin kisim sik. … Tok long mi yet, mi no redi long dai long wanem mi no save long ol wei bilong Krais, na em i luk olsem long mi i bin gat wanpela taim bilong tudak namel long mi na Krais mi i hat long stretim.
“Mi lukluk long Bikpela na askim Bikpela olsem em bai lukautim laip bilong mi bai mi lukautim ol pikinini bilong mi na kamfotim bel bilong man bilong mi; olsem na mi slip olgeta nait. … Mi mekim kavanen wantaim God [olsem] sapos em bai larim mi stap laip mi bai traim long painim dispela lotu we bai mi sevim em stret, maski em i stap long Baibel o wanem hap bai mi painim, sapos mi ken kisim long heven wantaim prea na feit. Bihain tru wanpela nek i toktok long mi na i tok, ‘Painim na yu bai painim, nok na em bai open long yu. Larim bel bilong yu bai bel isi. Yu bilip long God; bilip tu long mi.’ …
“Long dispela taim i go Mi kisim strong i go yet. Mi toktok liklik long toktok bilong lotu maski em i pulapim tingting bilong mi olgeta, na Mi ting olsem mi bai mekim stret taim mi painim sampela gutpela man husat i save long ol wei bilong God long instraktim mi long ol samting bilong Heven.”
William Smith
“Mama bilong mi, husat i bin wanpela gutpela meri na i gat interes long ol gutpela sindaun bilong ol pikinini bilong em, long hia nau na bihain taim, mekim yus long olgeta we em i save olsem mama, long mekim mipela stap strong long painim salvesen bilong sol bilong mipela o (olsem tok long dispela taim) ‘long kisim lotu.’ Em save mekim mipela go long ol miting bilong mipela, na olgeta famili bai interes long dispela samting, na painim ol toktru.”
“Mipela olgeta save gat ol famili prea stat long taim mi inap long tingim. Mi tingim papa save karim ol aiglas long poket bilong vest bilong em, … na taim mipela ol mangi lukim em painim aiglas, mipela save em i signel long redi long prea, na sapos mipela i no luksave mama bai tok , ‘William,’ o husat i no luksave, ‘redi long pre.’ Bihain long beten mipela i gat wanpela singsing mipela bai singim.”
Joseph Sr. na Lucy Smith i tisim famili bilong ol long stadim ol dispela skripsa.
Joseph Smith
“Nau mi tok, olsem [papa bilong mi] i no bin mekim samting i min olsem bai luk olsem i nogat gutpela pasin, long laip bilong em, long save bilong mi. Mi lavim papa bilong mi na memori bilong em, na dispela memori bilong ol nambawan pasin bilong em, i stap wantaim bikpela hevi long tingting bilong mi, na planti long ol dispela kain pasin na toktok bilong papa, i stap long bel bilong mi. Sekred long mi, em ol tingting mi holim pas long histori bilong laip bilong em, i save raun long tingting bilong mi na i stap, long lukluk bilong mi yet stat long taim mi bon. … Mama bilong mi tu i wanpela long ol lain i namba wan tru, na em i gutpela meri tru.”