“Nsanananmu no ho Ndze Ahorow: Joseph Smith n’Ebusua,” Bra, Bɛka Mo Do—Ma Fie na Asɔr: Nkyerɛkyerɛ na Ahyɛmudzi 2025 (2025)
“Joseph Smith n’Ebusua,” Bra, Bɛka Mo Do—Ma Fie na Asɔr: 2025
Nsanananmu no ho Ndze Ahorow
Joseph Smith n’Ebusua
Hɛn ebusua abrabɔ no wɔ nsusuando a no mu dɔ wɔ hɛn mu kor biara do, a Joseph Smith kã ho. N’awofo hɔn nyamesom ho gyedzi na ndzeyɛɛ duaa gyedzi aba wɔ no mu a ɔmaa Nsanananmu no tumii bae. Joseph kyerɛɛw wɔ no journal mu nkamfo nsɛm yi: “Nkasafua na kasa tɔ sin dɛ medze bɛkã enyisɔ a mo wɔ ma Nyankopɔn dɛ ɔama me awofo enyimdzifo a wɔtse dɛm.”
Ɔserɛkã a odzi do yinom fi ne maame, Lucy Mack Smith; no nuabanyin William Smith, na Nkɔnhyɛnyi no ɔno ankasa hɔ a ɔma yehu nyamesom ho nhyɛdo a nna ɔwɔ Smith fie no kakrabaa.
Joseph Smith Ebusua, Dan Baxter yɛɛ nsaano mfonyin no
Lucy Mack Smith
“[Bɛyɛ afe 1802 mu no], meyaree. … Mekãa kyerɛɛ moho dɛ, minnyɛɛ krado dɛ mubowu a minnyim Christ n’akwan, na ɔyɛ dɛ ma sum bɔnsa kann da emi na Christ ntamu a mennkɛpɛ koraa dɛ mobotwa. …
“Mohwɛɛ Ewuradze na mototɔe serɛɛ Ewuradze dɛ Ɔmfa mo nkwa nkyɛ me ama maatsetse me mba na maama mo kun n’akoma awerɛkyekyer; dɛm na medze daa hɔ anafua ne nyina. … Menye Nyankopɔn dzii ahyɛmu [dɛ] sɛ Ɔma metsena ase a, mobɔbɔ mbɔdzen dɛ mebenya dɛm nyamesom kor no a ɔbɛma mobɔsom no yie, sɛ ɔwɔ Bible mu o anaa beebiara a wobohu no, sɛ mpo wobodua mpaabɔ na gyedzi do enya efir sor a. Ewiei no ndze bi kasaa kyerɛɛ me na ɔsee dɛ, ‘Hwehwɛ na ibohu; bɔ mu na wobobue wo. Ma w’akoma nya awerɛkyekyer. Gye Nyankopɔn dzi, gye mo so dzi.’ …
“Fi mber yi dze kɔ kan no minyaa ahoɔdzen nkakrakakra. Mannkasa ammfa nyamesom ho kɛse naaso ɔgyee m’adwendwen nyina, na modween ho dɛ mobɔbɔ mbɔdzen ahwehwɛ nyimpa tseneneenyi bi a onyim Nyankopɔn n’akwan ma ɔakyerɛkyerɛ me Ɔsor ho nsɛm.”
William Smith
Me maame a, ɔyɛ ɔbaa tseneneenyi na ne mba hɔn yieyɛ, wɔ ha na owuekyir, hia no ara yie no, duaa kwan biara do a no dɔ dɛ ɔwofo bɛkyerɛ no, dɛ ɔbɛma yɛdze hɛn ho ahyɛ hɛn akra no nkwagye ho, anaa (dɛ mbrɛ nna wɔkã no) ‘yebenya nyamesom.’ Ɔhyɛɛ hɛn do dɛ yɛnkɔ nhyiamu horow, na ebusua no nyina enyi gyee asɛm no ho, na yɛbɛyɛɛ nokwar ho ahwehwɛfo.”
Mekaa kɔ ekyir ara yie dɛ nna daa yɛbɔ ebusua mpaabɔ. Mekaa yie dɛ nna egya n’ahwehwɛ-enyiwa hyɛ no sortar no kotoku mu, … na ber a hɛn mbanyimba no hu dɛ ɔrohwehwɛ n’ahwehwɛ-enyiwa no nna ɔyɛ asɛnkyerɛdze dɛ yɛbɛyɛ krado ma mpaabɔ na sɛ yɛannhyɛ no nsew a, enã bɛkã dɛ, ‘William,’ anaa obiara a n’adwen nnyi hɔ no dɛ, ‘yɛ krado ma mpaabɔ. Mpaabɔ n’ekyir no nna yɛwɔ ndwom a yɛbotow.”
Joseph Panyin na Lucy Smith kyerɛkyerɛɛ hɔn ebusua dɛ wonsũa kyerɛwsɛm no.
Joseph Smith
“Afei mekã dɛ, mbrɛ minyim no, dɛ [m’egya] annyɛ etsirmuɔdzen ndzeyɛɛ biara a bia wɔbɛkã dɛ ɔnnyɛ adɔyɛ, wɔ n’abrabɔ mu. Modɔ m’egya na no ho nkaa; n’enyimnyamhyɛ ndzeyɛɛ horow, dze nhyɛdo kɛse ada m’adwen do; na n’ayamuyie na ɔwofo nsɛm pii no, wɔakyerɛw no wɔ m’akoma pon do. N’abrabɔ ho abakɔsɛm a ɔsom me bo ho adwendwen no yɛ krɔnkrɔn ma me, na woetwuuw afa m’adwen mu na mara m’ahyɛnsew fitsi ber a wɔwoo me na medze edua. … Me maame so yɛ enyimnyamfo mu ɔbaako, na mbaa mu nyia ɔkrɔn kɛse.”