“13–19 Jenuware : ‘Mi Bin Luk Wan Laet’: Josef Smit—Histri 1:1–26,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Josef Smit—Histri 1:1–26,” Kam Folem Mi—Blong Hom mo Jos: 2025
Tabu Bus, i kam long Greg Olsen
13–19 Jenuware : “Mi Bin Luk Wan Laet”
Josef Smit—Histri 1:1–26
Maet yu save talem se Doktrin mo Ol Kavenan i wan buk blong ol ansa long ol prea: plante long ol tabu revelesen insaed long buk ia, oli kam olsem ol ansa long ol kwestin. Kwestin we i bin statem evri samting—wan ia we i statem wan smol faea blong revelesen i kapsaet long ol lata-dei ia—wan boe we i gat 14, i bin askem. Wan “wo ia blong ol toktok mo raorao blong ol tingting” (Josef Smit—Histri 1:10) i mekem Josef Smit i konfius abaot relijin mo rilesensip blong hem wetem God. Maet yu save semmak long hemia. Yumi faenem plante aedia blong raorao mo ol voes blong winim tingting long dei blong yumi. Taem yumi wantem stretem gud ol mesej ia mo faenem trutok, yumi save mekem wanem Josef i bin mekem. Yumi save askem ol kwestin, stadi ol skripja, tingting hevi, mo askem stret long God. Long ansa blong prea blong Josef, wan laet i kam antap long heven. God Papa mo Jisas Kraes tufala i kamkamaot mo ansarem ol kwestin blong hem. Testemoni blong Josef abaot merikel eksperiens ia i talemaot klia se sapos wan man “we i [no gat] waes, hem i mas askem long God, mo kasem” (Josef Smit—Histri 1:26). Yumi evriwan i save kasem, sapos i no wan visen we i kam long heven, be wan visen we i klia, we laet blong heven i kavremap.
Ol aedia blong Stap Lanem Samting long Hom mo long Jos
Josef Smit i Profet blong Restoresen.
Stamba tingting blong Josef Smit Histri hem i blong putum yumi “long wan ples we ol trutok i stap long hem” from evri trutok abaot Josef, plante taem man i sakemaot (Josef Smit—Histri 1:1). Taem yu ridim Josef Smit—Histri 1:1–26, ?wanem i mekem testemoni blong yu abaot tabu koling blong hem i kam strong moa?
Luk tu long Saints, 1:3–19.
?Olsem wanem nao mi save kasem ansa blong ol prea blong mi?
?I bin gat wan taem we yu “nogat waes” o filim konfius long wan desisen we yu nidim blong mekem? (Josef Smit—Histri 1:13). Eksperiens we Josef Smit i bin kasem long 1820 i save givim wan gudfala paten long revelesen blong yuwan. Eksampol, taem yu lukaotem Josef Smit—Histri 1:5–25, lukaotem ol eksperiens we yu save folem. Wanem nao yu lanem abaot:
-
?Long wanem wei nao Josef i bin rere blong kasem wan tabu eksperiens tru long prea? (luk long ol ves 8, 11, 14–15).
-
?Wok blong stadi skripja blong lukaotem revelesen? (luk long ol ves 11–12).
-
?Wanem blong mekem taem yu fesem fasin blong go agens? (luk long ol ves 15–16, 21–26).
-
?Akseptem mo stap tekem aksen folem ol ansa we yu kasem? (luk long ol ves 18–25).
Invaetem ol pikinini blong serem wanem oli gat Blong stap lukaotem ol skripja, i invaetem ol tingting mo filing we i kam tru long Tabu Spirit. Blong stap serem ol tingting mo filing ia, i save invaetem Tabu Spirit blong talem witnes long ol narawan, mo tu, long hem we i stap serem.
?Wanem sam moa niu tingting we yu save kasem aot long atikol blong Presiden Henry B. Eyring “The First Vision: A Pattern for Personal Revelation”? (Liahona, Feb. 2020, 12–17).
Mo tu, yu save lukaotem tu ol narafala eksampol blong ol pipol insaed long ol skripja we oli stap toktok wetem God. Ol pikja insaed long Gospel Art Buk o ol narafala Kam Folem Mi buk i save givim ol aedia long yu. Traem blong stap ansarem ol kwestin we oli mekem lis blong olgeta faswan blong wanwan eksampol we yu faenem. ?Wanem ol eksperiens we yu bin kasem taem yu kasem ol ansa long prea blong yu? ?Wanem nao yu save mekem blong helpem ol narawan blong kasem ol gudfala eksperiens tu?
Luk tu long Russell M. Nelson, “Lisin Gud long Hem,” Liahona, Mei 2020, 88–92; Topics mo Questions, “Personal Revelation,” Gospel Laebri.
Josef Smit i bin luk God Papa mo Pikinini blong Hem, Jisas Kraes.
Josef Smit i trastem se God bae i ansarem prea blong hem, be hem i no save olsem wanem ansa ia bae i jenisim laef blong hem—mo blong wol. Taem yu rid abaot eksperiens blong Josef, tingting hevi long olsem wanem ol risal blong Fas Visen i bin jenisim laef blong yu.
Eksampol, Fas Visen i talemaot sam trutok abaot God, Papa mo Pikinini blong Hem, Jisas Kraes, we oli defren long wanem we plante pipol long taem blong Josef, oli bin bilivim. Taem yu ridim Josef Smit—Histri 1:15–20, tingting blong stap raetemdaon ol defren wei blong komplitim wan stetmen olsem hemia: “From se Fas Visen i bin hapen, mi save se …”
?Wanem ol filing we yu gat taem yu tingting hevi long eksperiens blong Josef mo evri samting we i kamaot long eksperiens ia?
Luk tu long “Ask of God: Josef Smit’s First Vision” (video), Gospel Laebri; “Josef Smit’s First Prayer,” Hym, namba 26.
Askem long God: Fas Visen blong Josef Smit
Wan smol pat blong peinting ia Sipos Wan long Yufala I No Gat Waes, i kam long Walter Rane
?From wanem i gat defdefren stori blong Fas Visen?
Long laef blong hem, Josef Smit i bin rekodem eksperiens blong hem long Tabu Bus kolosap fo taem, plante taem hem i yusum wan i raet blong hem. Antap long hemia, sam stori hem i ol pipol we oli bin harem Josef i tokbaot visen blong hem mo oli bin raetem. Nomata ol stori ia oli defdefren long sam pat, dipen nomo long man we i raetem, huia olgeta we oli stap lisin mo long weaples, be oli semmak evriwan. Mo wanwan stori i ademap moa infomesen we i helpem yumi blong andastanem gud moa eksperiens blong Josef Smit, semmak olsem we ol fofala Niu Testeman Gospel we oli helpem yumi andastanem gud moa ministri blong Sevya.
Luk tu long Topics mo Questions, “First Vision Accounts,” Gospel Laebri.
Mi save gohed blong stap tru long wanem we mi save, iven sapos ol narawan oli no wantem lisin o akseptem mi.
Afta long naesfala Fas Visen blong hem, Josef Smit, long nomo wei, i wantem blong serem eksperiens blong hem wetem ol narawan. Fasin blong go agens we i hem i fesem, i mekem hem i sapraes. Taem yu stap ridim stori blong hem, ?wanem nao i givim insperesen long yu blong yu gohed blong stap tru long testemoni blong yu? ?Wanem ol narafala eksampol—aot long ol skripja, wan bubu blong bifo o ol pipol we yu save—i givim yu strong paoa long tingting blong stap tru long ol eksperiens long saed blong spirit we yu bin gat?
Luk tu long Gary E. Stevenson, “Fidim mo Serem Testemoni blong Yu,” Liahona, Novemba 2022, 111–14.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Stap Tijim Ol Pikinini
Josef Smit i bin rere blong kam wan profet blong God.
-
Blong stap lanem abaot yangfala taem blong Josef Smit, i save helpem ol pikinini blong yu blong oli komperem olgeta long Josef Smit, taem oli lanem samting aot long ol eksperiens blong hem. Maet oli save leftemap wan pikja blong Josef Smit mo serem wanem we oli save abaot hem. Sapos i gat nid, yu save ademap sam moa tru samting abaot hem insaed long Josef Smit—Histri 1:3–14 (luk tu long “Japta 1: Josef Smit mo Famli blong Hem,” long Ol Doktrin mo Ol Kavenan Stori, 6–8, o vidio we i go wetem long Gospel Laebri). ?Wanem nao Josef i bin go tru long hem blong mekem hem i rere blong kam wan profet? ?Wanem nao God i save stap mekem i rere blong yumi blong mekem?
3:22Joseph Smith's Family: A family of faith
Wan smol pat blong peinting ia Fas Visen blong Josef Smit, i kam long Greg Olsen
God i save ansarem ol kwestin blong mi tru long ol skripja.
-
Tingting blong stap soem long ol pikinini blong yu ol defdefren buk, we i tekem tu ol skripja. Helpem olgeta blong tingting long ol kwestin we ol buk ia i save ansarem. Afta, tugeta, yufala i save ridim Josef Smit—Histri 1:10–11 blong faenemaot ol wanem kwestin nao Josef Smit i bin gat mo wanem ol ansa we hem i bin faenem insaed long ol skripja.
-
Maet ol pikinini blong yu bae oli save faenem ol toktok insaed long ves 12 we oli tokbaot olsem Jemes 1:5 i gat paoa long Josef. Afta, yu save serem ol eksperiens wetem wanwan long yufala, abaot wan sentens blong skripja we i bin gat bigfala paoa long yu. Mo tu, tugeta, yufala i save singsing wan singsing abaot stap ridim ol skripja, olsem “Search, Ponder, and Pray” (Children’s Songbook, 109). ?Wanem nao singsing ia i tijim abaot from wanem yumi ridim ol skripja?
Papa long Heven i harem mo ansarem ol prea blong mi.
-
Blong statem wan toktok raon abaot olsem wanem yumi toktok wetem Papa long Heven, maet yu mo ol pikinini blong yu i save askem yufala wanwan ol kwestin abaot fasin blong stap yusum ol defdefren wei blong toktok, olsem wan teks mesej, wan fon kol o wan not we oli raetem. ?Long wanem wei nao yumi askem ol kwestin i go long Papa long Heven? ?Long wanem wei nao yumi soem long Hem se yumi lavem Hem? Tugeta, ridim Josef Smit—Histri 1:16–19 mo toktok raon long olsem wanem nao Papa long Heven i ansarem prea blong Josef Smit. Afta, yu mo ol pikinini blong yu i save serem ol eksperiens blong taem we wan i askem God blong helpem hem mo kasem wan ansa.
Josef Smit i bin luk Papa long Heven mo pikinini blong Hem, Jisas Kraes.
-
Ol smosmol pikinini bae oli glad blong stap stanap mo openem han blong olgeta mo stap priten se oli ol tri insaed long Tabu Bus, taem bae yu stap talem long olgeta abaot Fas Visen. Askem ol pikinini blong swing i go saedsaed olsem we win i blo, taem yu tokbaot Josef we i stap prea. Afta, askem olgeta blong stanap kwaet taem yu talem long olgeta se Papa long Heven mo Jisas i kamkamaot long Josef.
-
Maet ol bigfala pikinini bae oli glad blong stap yusum wan o moa long ol pikja long aotlaen ia blong talem long yu wanem oli save abaot Fas Visen. Leftemap tingting blong olgeta blong luklukbak long Josef Smit—Histri 1:14–17 mo blong serem tingting mo ol filing blong olgeta abaot eksperiens blong Josef (luk tu long “Japta 2: Fas Visen blong Josef Smit,” long Ol Doktrin mo Ol Kavenan Stori, 9–12, o vidio we i go wetem long Gospel Laebri).
3:23Joseph Smith's First Vision: An answer to a humble prayer
Blong kasem moa aedia, luk long namba blong manis ia long Fren magasin.