“6–12 Jenuware: ‘Lisin Gud, O Yufala Ol Pipol’: Doktrin mo Ol Kavenan 1,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 1,” Kam Folem Mi—Blong Hom mo Jos: 2025
6–12 Jenuware: “Lisin Gud, O Yufala Ol Pipol”
Doktrin mo Ol Kavenan 1
Long Novemba 1831, Jos Ia blong Jisas Kraes we i bin kambak, i jes stanap blong wan yia haf nomo. Nomata se i stap gro yet, hem i bin stap yet wan smol grup we oli no save gud tumas we i blong olgeta we oli biliv, we oli stap laef long ol smol taon we oli semsemmak, we wan profet we i gat samples twante yia olsem i stap lidim. Be God i tekem olgeta ia we oli biliv ia blong oli stap olsem ol wokman mo ol mesenja blong Hem mo Hem i wantem se ol revelesen we Hem i bin givim long olgeta, se oli mas printim blong i go aot long wol.
Doktrin mo Ol Kavenan seksen 1 hem i fas toktok blong Lod, o ol fas toktok blong ol revelesen ia. Hemia i soem klia se nomata ol membasip blong Jos i bin smol, i nogat wan samting we i smol abaot mesej we God i bin wantem Ol Sent blong Hem oli serem. Hem i wan “voes blong woning” blong evri “man we oli stap laef long wol,” we i stap tijim olgeta blong sakem sin mo blong stanemap “kavenan blong God we i no gat en” (ol ves 4, 8, 22 Ol wokman we oli stap karem mesej ia oli “no strong mo oli simpol.” Be ol wokman we tingting blong olgeta i stap daon i wanem we God i nidim—bifo mo naoia—blong tekemaot Jos blong Hem “long ples we i haed mo aot long tudak” (ol ves 23, 30).
Ol aedia blong Stap Lanem Samting long Hom mo long Jos
“Lisin Gud, O yufala ol pipol.”
Wan fas toktok insaed long wan buk, i presentem buk ia. Hem i talemaot ol stamba toktok mo stamba tingting blong buk ia mo hem i helpem olgeta we bae oli rid blong oli rere blong ridim. Taem yu ridim seksen 1—“fas tok” blong Lod blong Doktrin mo Ol Kavenan (ves 6)—lukaotem ol stamba toktok mo ol stamba tingting we Lod i i bin givim blong ol revelesen blong Hem. ?Wanem nao yu lanem we bae i helpem yu long stadi blong yu blong Doktrin mo Ol Kavenan long yia ia? Eksampol. Maet yu save tingting hevi se i minim wanem ia blong “harem voes blong Lod” long ol revelesen ia (ves 14) o blong “luklukgud long ol komanmen ia” (ves 37).
Luk tu long Fas Toktok long Doktrin mo Ol Kavenan.
Doktrin mo Ol Kavenan 1:4–6, 23–24, 37–39
Lod i toktok tru long ol wokman blong Hem, we i tekem tu, ol lata-dei profet.
Seksen 1 i stat mo i en wetem toktok blong Lod we Hem i mekem tru ol wokman blong Hem, we Hem i bin jusum (luk long ol ves 4–6, 23–24, 38). Raetemdaon wanem yu lanem long revelesen ia abaot:
-
Lod mo voes blong Hem.
-
From wanem i nid blong gat ol profet long dei blong yumi.
?Wanem nao yu filim i gud tumas blong mekem olsem wan risal blong wanem we yu faenem?
?Wetaem nao yu bin harem voes blong Lod tru long voes blong ol wokman blong Hem?(luk long ves 38).
Mo tu, yu save pikjarem long maen blong yu se wan fren we i no save abaot ol profet we i stap ridim seksen 1 wetem yu. ?Wanem kwestin nao bae ol fren blong yu oli gat? ?Ol wanem ves nao yu wantem blong toktok raon long olgeta wetem fren blong yu, blong hem i andastanem wanem nao yu filim abaot blong gat ol profet long dei blong yumi?
Maet bae yu intres blong save se taem we ol elda blong kaonsel oli kam tugeta long 1831 blong tokbaot blong pablisim ol revelesen blong Josef Smit, sam pipol oli agensem aedia ia. Oli bin sem from se Josef i no save raet gud, mo oli bin wari se sapos oli pablisim ol revelesen bae i mekem moa problem long olgeta Sent (luk long Saints, 1:140–43). Sapos yu bin wan memba blong kaonsel ia, ?wanem nao bae yu talem long saed blong aedia ia? ?Wanem nao ol niu tingting we yu faenem insaed long seksen 1 we bae i save help? (luk long, eksampol, ol ves 6, 24, 38).
Tingting blong gat wan hym tu olsem “Come, Listen to a Prophet’s Voice” (Hym, namba 21) long taem blong stadi mo wosip blong yu. Lukaotem ol paragraf insaed long hym we oli tijim ol semmak prinsipol olsem ol ves long seksen 1.
Luk tu long Topics and Questions, “Prophets,” Gospel Laebri.
Lod i toktok long yumi tru long ol wokman blong Hem, ol profet.
Doktrin mo Ol Kavenan 1:12–30, 34–36
Restoresen i helpem mi blong go tru ol jalenj blong ol lata-dei ia.
Insaed long Doktrin mo Ol Kavenan seksen 1, Lod i eksplenem from wanem Hem i bin putumbak gospel blong Hem. Luk hamas risen yu save putum long lis taem yu stap ridim ol ves 12–23. Long eksperiens blong yu, ?olsem wanem nao ol stamba wok blong Lod long Restoresen, oli bin hapen?
Lod i bin save se dei blong yumi bae i gat ol strong jalenj (luk long ves 17). ?Wanem nao yu faenem long ol ves 17–30, 34–36 we oli helpem yu blong filim pis mo gat tras nomata ol jalenj ia?
Luk tu long Russell M. Nelson, “Akseptem mo Fesem Fiuja Wetem Fet,” LiahonaNovemba 2020, 73–76.
Lod i yusum “olgeta we oli no strong mo oli simpol” blong oli save mekem wok blong Hem i kamtru.
Taem yu ridim Doktrin mo Ol Kavenan 1:19–28, maet bae yu tingting hevi long wanem i minim blong stap olsem wan wokman blong Lod. ?Wanem nao ol fasin we Lod i wantem ol wokman blong Hem oli mas gat? ?Wanem nao Lod i stap mekem i hapen tru long ol wokman blong Hem? ?Olsem wanem nao ol profesi insaed long ol ves ia oli stap kamtru raon long wol mo long laef blong yu?
Lukaotem Jisas Kraes. Stamba tingting blong ol skripja, hem i blong testifae abaot Sevya mo gospel blong Hem. Taem yu stap rid long Doktrin mo Ol Kavenan 1, tingting blong makem, o tekem not long ol ves we oli stap tijim yu wan samting abaot Jisas Kraes.
Blong kasem moa aedia, luk long ol magasin blong manis ia Liahona mo Blong Ol Yut Oli Kam Strong magasin.
Sam Aedia blong Stap Tijim Ol Pikinini
Doktrin mo Ol Kavenan 1:4, 37–39
Tru long ol profet blong Hem, Lod i wonem mi abaot ol denja long saed blong spirit.
-
Blong statem wan toktok raon abaot ol woning we oli kam long Lod, yu save tokbaot ol woning we yumi kasem long ol narafala pipol abaot ol denja we yumi no save luk. Sam long eksampol ia i save gat tu, wan flo we i glis glis, wan strong win mo ren we i stap kam o wan trak we i stap ron i kam kolosap. Maet yu mo ol pikinini blong yu i save lukluk long ol eksampol blong ol woning saen mo komperem ol woning ia wetem ol woning we Lod i stap givim long yumi. Folem wanem we i stap insaed long Doktrin mo Ol Kavenan 1:4, 37–39, ?long wanem wei nao Lod i stap wonem yumi? ?Wanem nao Hem i bin wonem yumi long hem i no longtaem i pas? Ating yu save luk o ridim sam pat blong jeneral konfrens mesej mo lukaotem ol eksampol blong “voes blong woning” blong God.
-
Singsing tugeta wan singsing abaot ol profet, olsem las ves blong “Follow the Prophet” (Children’s Songbook, 111). Serem testemoni blong yu se profet i stap talem ol toktok blong God.
Restoresen i helpem mi blong go tru ol jalenj blong ol lata-dei ia.
-
Blong toktok raon mo sapotem Doktrin mo Ol Kavenan 1:17, yu mo ol pikinini blong yu i save pikjarem long maen blong yufala se, yu stap rere blong go long wan trip. ?Wanem nao bae yu fulumap? Sapos yu bin save finis se bae i gat ren o se bae wan wil blong trak o bas blong yu bae i flat, ?olsem wanem nao hemia bae i jenisim wei we yu rere from trip ia? Tugeta, ridim ves 17, mo tokbaot wanem we Lod i bin save we bae i hapen long yumi. ?Olsem wanem nao Hem i rere from? (Sapos i nid, eksplenem se “bigfala trabol” i wan disasta o wan samting we i nogud tumas.) ?Olsem wanem nao ol komanmen blong God i helpem yumi blong fesem ol jalenj blong taem blong yumi?
Doktrin mo Ol Kavenan 1:17, 29
Lod i singaotem Josef Smit blong kam wan profet.
-
Blong lanem abaot wok blong Josef Smit blong putumbak gospel blong Sevya, yu mo ol pikinini blong yu i save lukluk long wan pikja blong Josef Smit (luk long ol pikja long aotlaen ia) mo tokbaot wanem we Sevya i bin givim long yumi tru long Josef Smit. Ol pikinini blong yu oli save lukaotem ol eksampol insaed long Doktrin mo Ol Kavenan 1:17, 29. Talem long ol pikinini blong yu olsem wanem yu save se God i “bin singaotem wokman blong mi, Josef Smit Junia, mo mi stap long heven mo toktok long hem” (ves 17).
© 1998 David Lindsley
Jos Ia blong Jisas Kraes blong Ol Lata-dei Sent i “jos ia [blong Lod], we i tru mo i stap laef.”
-
?Hem i minim wanem blong talem se Jos Ia i “tru mo i laef”? Blong pulum tingting blong ol pikinini blong yu blong oli stap tingting long kwestin ia, bae yu save soem long olgeta ol samting we oli gat laef mo ol samting we oli no gat laef—olsem wan plan we i laef mo wan we i ded. ?Olsem wanem nao yumi save se wan samting i stap laef? Afta yu save ridim Doktrin mo Ol Kavenan 1:30 mo tokbaot wanem hemia i minim long Jos blong stap olsem “tru mo stap laef.”
Blong kasem moa aedia, luk long magasin blong Fren blong manis ia.