“30 Disemba–5 Jenuware: ‘Restoresen we God I Promesem I Stap Go Fored’: Restoresen blong Gospel blong Jisas Kraes we I Fulwan,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Restoresen blong Gospel blong Jisas Kraes we I Fulwan,” Kam Folem Mi—Blong Hom mo Jos: 2025
30 Disemba–5 Jenuware: “Restoresen we God I Promesem I Stap Go Fored”
Restoresen blong Gospel blong Jisas Kraes we I Fulwan
?Long wanem wei nao yu makem 200 yia aniveseri blong wan samting we i hapen mo i jenisim wol? Hemia nao kwestin we Fas Presidensi mo Kworom blong Olgeta Twelef oli tingting hevi long hem taem Epril 2020 i stap kam kolosap, blong makem 200 yia blong Fas Visen blong Josef Smit. “Mifala i bin askem mifalawan sapos bae mifala i leftemap wan ston,” Presiden Russell M. Nelson i tingtingbak. Be, taem mifala i stap tingting long spesel histri blong Fas Visen mo hamas i tajem wol, mifala i filim blong leftemap wan ston, be i no wan we oli katem long ston be blong ol toktok … , we bae oli no kavem long “ol tebol blong ston” be oli raetem “long ol tebol blong mit” blong hat blong yumi [2 Korin 3:3]” (“Lisin Gud long Hem,” Liahona, Mei 2020, 90).
Ol toktok long ston we oli mekem, taetol hem i “Restoresen blong Gospel blong Jisas Kraes, we I Fulwan: Tu Handred Yia Ofisol Toktok I Go long Wol.” Hem i no wan ston nomo blong Fas Visen be tu, hem i blong evri samting we Jisas Kraes i bin mekem—mo we Hem i stap mekem yet—long taem ia kasem tedei. Restoresen blong gospel blong Hem i stat taem wan i tanem hem i go long God mo harem Hem. Hemia i gohed long semmak wei: wan hat, wan tabu eksperiens long wan taem—we i tekem tu, hemia blong yu.
Ol aedia blong Stap Lanem Samting long Hom mo long Jos
God i lavem ol pikinini blong Hem long evri nesen blong wol.
Long tingting blong yu, ?from wanem wan ofisol toktok abaot Restoresen i stat wetem wan stetmen abaot lav blong God? Taem yu stadi long ofisol toktok, lukaot ol toktok we i talemaot filing blong God abaot lav blong Hem long “ol pikinini blong Hem long evri nesen blong wol.” ?Long wanem wei nao Restoresen blong gospel i bin helpem yu blong filim lav blong Hem?
Luk tu long Gerrit W. Gong, “Evri Kantri, Famli mo Lanwis,” Liahona, Novemba 2020, 38–41.
Restoresen i stat wetem wan ansa blong wan kwestin.
Oli save talem olsem se Sevya i bin statem Restoresen blong gospel blong Hem tru taem we Hem i givim ansa long wan kwestin. ?Wanem mesej nao yu filim se Restoresen ofisol toktok i gat i stap blong wan we i gat ol kwestin abaot God, gospel o “long saed blong fasin blong sevem sol blong [hem]”? Mo tu, yu save stadi long Josef Smit—Histri 1:5–20 blong luksave wanem we yu save lanem long Josef Smit abaot stap faenem ol ansa blong ol kwestin blong gospel.
Luk tu long Topics and Questions, “Seeking Answers,” Gospel Laebri.
Wan smol pat blong The Desires of My Heart, i kam long Walter Rane
Jisas Kraes i bin putumbak Jos Ia blong Hem.
?Wanem nao yu save abaot “Kraes Niu Testeman Jos,”we Sevya i putumbak tru long profet Josef Smit? Tingting blong stap stadi long ol skripja ia mo mekem sam lis blong sam samting abaot Jos blong Hem:
-
Matiu 16:15–19
-
Mak 16:15–18
-
Luk 6:12–13
-
Ol Wok 4:34–35
-
1 Korin 15:29
-
Efesas 4:11–15
Narafala samting we yu save mekem, yu save majem ol skripja antap ia wetem olgeta daon ia, we oli tokbaot olsem wanem Jisas Kraes i putumbak ol samting blong Jos tru long Josef Smit:
?From wanem yu glad from Restoresen blong gospel blong Jisas Kraes?
Elda Jeffrey R. Holland mo waef blong hem, long wan taem, tufala i traem blong pikjarem long maen blong tufala, wanem bae tufala i bin filim blong laef bifo Jos i bin kambak bakegen long wol ia. “?Wanem nao ol samting we yumi wantem tumas blong gat?” oli askem long olgeta wan. Rid abaot ol eksperiens blong olgeta long “Wan Stret mo Klin Hop” (Liahona, Mei 2020, 81–82). ?Olsem wanem nao Restoresen i help blong mekem i hapen ol hop blong yu long saed blong spirit?
Luk tu long Topics and Questions, “Apostasy and the Restoration of the Gospel,” Gospel Laebri.
“Restoresen we God i promesem i stap go fored.”
?Yu, yu eva tingting long yuwan olsem pat blong Restoresen blong gospel? Tingting long ol toktok we i kam long Presiden Dieter F. Uchtdorf: “Samtaem yumi tingting long Restoresen blong gospel olsem wan samting we i komplit, i pas finis. … Wanem we i tru i we, Restoresen i wan samting we i stap gogohed; yumi stap laef long hem naoia” (“Are You Sleeping through the Restoration?,” Liahona, May 2014, 59).
Taem yu stap rere blong stadi long olsem wanem gospel i bin kambak long ol yia 1800, maet bae yu stat blong tingting hevi long olsem wanem i bin kambak bakegen long laef blong yu. Ridim Restoresen ofisol toktok mo gat ol kwestin olsem long maen: ?Olsem wanem nao mi kam blong save se hemia i tru? ?Long wanem wei nao mi tekpat insaed long Restoresen tedei?
“Ol heven oli open.”
?Wanem nao sentens ia “ol heven oli open” i minim long yu? ?Wanem pruf nao yu luk—insaed long Restoresen ofisol toktok, insaed long Jos tedei, insaed long ol skripja, mo long laef blong yu—se i tru, ol heven oli open?
Mo tu, i save gat “The Morning Breaks” (Hym, namba 1) olsem pat blong stadi blong yu. ?Wanem nao yu faenem insaed long hym ia we i mekem yu andastanem moa sentens ia “ol heven oli open”?
Luk tu long Quentin L. Cook, “Blesing blong Revelesen we I Stap Gogohed we I Go long Ol Profet mo Revelesen blong Yuwan blong Soem Rod blong Laef blong Yu,” Liahona, Mei 2020, 96–100.
Stap Lan Tugeta. Presiden Nelson i invaetem yumi blong “stadi long [Restoresen ofisol toktok] long praevet mo wetem ol memba blong famli mo ol fren blong [yumi]” (“Hear Him,” 92). Tingting long olsem wanem yu save mekem ol narawan oli kam pat long stadi blong yu.
Blong kasem moa aedia, luk long ol magasin blong manis ia Liahona mo Blong Ol Yut Oli Kam Strong magasin.
Sam Aedia blong Stap Tijim Ol Pikinini
“Mifala i talem tabu toktok ia.”
-
Taem yu ridim ol pat blong Restoresen ofisol toktok wetem ol pikinini blong yu (o wajem vidio blong Presiden Nelson we i stap ridim), helpem olgeta blong faenem ol sentens we i stat wetem ol toktok olsem “mifala i talem,” “mifala i stap talemaot,” o “mifala i talem tru.” ?Wanem nao ol trutok we ol profet mo ol aposol oli stap talemaot? Maet yu mo ol pikinini blong yu, i save serem ol testemoni blong yufala wanwan abaot sam long ol semmak trutok ia.
6:0The Restoration of the Fulness of the Gospel of Jesus Christ
“Josef Smit … i bin gat ol kwestin.”
-
Maet bae ol pikinini blong yu oli gat intres blong faenemaot sam long ol kwestin we Josef Smit i bin gat we i lid i go long Restoresen blong gospel blong Sevya. Helpem olgeta blong faenem sam eksampol insaed long Josef Smit—Histri 1:10, 29, 68. From se God i ansarem ol kwestin blong Josef Smit, ?Wanem blesing nao i kam long yumi tedei?
-
Maet yu save givim janis tu long ol pikinini blong yu blong tokbaot ol kwestin we oli bin gat. ?Wanem nao yumi lanem long Josef Smit abaot olsem wanem blong faenem ol ansa? (luk long Josef Smit—Histri 1:8–17; luk tu long ol ves 3 mo 4 long “This Is My Beloved Son,” Children’s Songbook, 76).
“Ol mesenja blong Heven oli bin kam blong givim instraksen long Josef.”
-
?Huia ol “mesenja blong heven [we] oli bin kam blong givim instraksen long Josef”? Ol pikinini blong yu bae oli glad blong stap lukaotem ol pikja blong olgeta long Gospel Art Buk (luk long ol namba 91, 93, 94, 95). ?Olsem wanem nao wanwan long ol mesenja ia oli help blong“bildimap bakegen Jos Ia blong Jisas Kraes”? Ol skripja oli givim sam tingting long aktiviti pej blong wik ia we i save helpem yu blong ansarem kwestin ia.
Jisas Kraes i bin putumbak Jos Ia blong Hem.
-
?Long wanem wei nao yu save helpem ol pikinini blong yu blong andastanem wanem i minim blong putumbak Jos Ia blong Sevya? Maet oli save bildimap wan simpol taoa wetem ol pleiplei blok o pepa kap mo “putumbak,” o bildimap bakegen. O sapos ol pikinini blong yu bae oli eva wantem blong riplesem wan samting from we i bin lus o i no gud, yu save komperem eksperiens ia wetem Sevya we i stap putumbak Jos Ia blong Hem. Helpem olgeta blong faenem ol stret samting we oli tokbaot long Restoresen ofisol toktok we Sevya i bin putumbak.
“Ol heven oli open.”
-
Blong soem wanem sentens ia “ol heven oli open” i minim, bae yu save serem wan mesej wetem ol pikinini blong yu, faswan, biaen long wan doa we i klos mo afta, serem taem wan doa i open. Givim taem long wanwan blong oli serem wan mesej tu. ?Wanem mesej nao Jisas Kraes i gat blong givim long yumi? ?Wanem nao ol eksperiens we i bin helpem yumi blong save se ol heven oli open long yumi?
Blong kasem moa aedia, luk long magasin blong Fren long manis ia.