Whakaakoranga me ngā Kawenata 1

Ko tā te whakataki he tīmatanga kōrero mō tētahi pukapuka. Ka whakatakotoria iho ngā kaupapa me ngā take o tētahi pukapuka, ā, e āwhina ana anō i te hunga pānui ki te pānui. I a koe e pānui ana i wāhanga 1—ko tā te Ariki “kupu whakataki” ki te Whakaakoranga me ngā Kawenata (whiti 6)—rapua ngā kaupapa me ngā take i homai ai e te Ariki mō Ana whakakitenga. He aha tāu e ako ai mā konā kaha ake tō rangahau i te Whakaakoranga me ngā Kawenata i tēnei tau? Hei tauira, māu e āta whakaaro ki te tikanga o te “whakarongo ki te reo o te Ariki” i roto i ēnei whakakitenga (whiti 14) kia “rapua ēnei whakahaunga” rānei (whiti 37).

Tirohia anōtia te whakatūwheratanga kōrero ki te Whakaakoranga me ngā Kawenata.

Ka tīmata, ā, ka mutu tewāhanga 1 ki tā te Ariki whakapuakitanga kei te kōrero Ia mā roto i Ana pononga kua kōwhiria mai nei (tirohia whiti 4–6, 23–24, 38). Tuhia iho tāu e ako ai i tēnei whakakitenga mō:

• Te Ariki me Tōna reo.

• He aha e whai tikanga ana ngā poropiti i ēnei rā.

He aha tāu e rongo nei hei mahi māu nā tō rapunga?

Nōnahea koe rongo ai i te reo o te Ariki mā roto i te reo o Ana pononga? (tirohia whiti 38).

Me huri rānei ō whakaaro anō nei e pānui tahi ana kōrua ko tētahi hoa kāore e mōhio ana ia e pā ana ki ngā poropiti ora i te wāhanga 1. He aha pea ētahi o ngā pātai a tō hoa? He aha ngā whiti pai hei kōrerotanga mā kōrua ko tō hoa hei āwhina i a ia kia mārama ki ō whakaaro mō ngā poropiti i ēnei rā?

Ka pai pea ki a koe kia mōhio ai i te huinga ake o tētahi kaunihera o ngā erata i te tau 1831 ki te kōrero e pā ana ki te whakaputanga ake o ngā whakakitenga a Hōhepa Mete, i whakahēngia taua whakaaro e ētahi. I whakamā rātou i te ngoikore a Hōhepa ki te tuhituhi, ā, i māharahara rātou ka hua ake ētahi atu raruraru ki te Hunga Tapu i tā rātou whakaputa i ngā whakakitenga (tirohia Hunga Tapu, 1:140–43). Mehemea he tangata pēnei i tō kaunihera, he aha tāu ki ēnei māharahara? He aha ngā tirohanga e kite ai koe i te wāhanga 1 tērā pea kua āwhina i tēnei āhuatanga? (tirohia, hei tauira, whiti 6, 24, 38).

Me toro atu ki tētahi hīmene pērā i “Come, Listen to a Prophet’s Voice” (Hymns, no. 21) i roto i tō rangahau me ō mahi koropiko. Rapua ngā rerenga i te hīmene e whakaako ana i aua tikanga kei roto nei i te wāhanga 1.

Tirohia anōtia ngā Kaupapa me ngā Pātai, “Prophets,” Wharepukapuka Rongopai.

Ka whakamāramahia e te Ariki i Whakaakoranga me ngā Kawenata wāhanga 1, he aha Ia i whakahoki ai Tana rongopai. Tirohia e hia nei ngā take e taea ai te whakarārangi i a koe e pānui ana i ngā whiti 12–23. Ki ō whakaaro, me pēhea ngā hiahia a te Ariki e pā ana ki te Whakahokinga e whakatutuki ai?

I mōhio te Ariki ka nui ngā whakapātaritari i ō tātou rā (tirohia whiti 17). He aha tāu e kite ai i ngā whiti 17–30, 34–36 e āwhina ai i a koe kia rongo ake i te rangimārie me te māia ahakoa ēnei whakapātaritari?

Tirohia Russell M. Nelson, “Embrace the Future with Faith,” Liahona, Noema 2020, 73–76.

I a koe e pānui ana i Whakaakoranga me ngā Kawenata 1:19–28, māu pea e whakaaroaro ki te tikanga o te tū hei pononga nā te Ariki. E ai ki te Ariki, he aha ngā āhuatanga me mau i Ana pononga? He aha ngā mea e whakatutuki nei te Ariki mā roto i Ana pononga? Me pēhea ngā poropititanga i ēnei whiti e whakatutukihia ana huri noa i te ao, i tō oranga anō hoki?

• Hei tīmatatanga kōrero māu mō ngā whakatūpato a te Ariki, māu pea e kōrero mō ngā whakatūpato e whiwhi nei tātou i ētahi atu tāngata e pā ana ki ngā mōrearea tē taea te kite. Ko ētahi tauira pea, arā, ko te papa māniania, he marangai e whakatata mai ana, he waka e tere mai ana rānei. Tērā pea mā koutou ko ō tamariki e rapu tauira mō ngā tohu whakatūpato me te whakataurite i ēnei ki ngā whakatūpato e tukua mai ai e te Ariki ki a tātou. E ai ki Whakaakoranga me ngā Kawenata 1:4, 37–39, he aha te āhua e whakatūpato ai te Ariki i a tātou? He aha Tana whakatūpato inātata nei? Tērā pea me mātaki i tētahi whitiāhua, me pānui rānei i ētahi wāhanga o tētahi huinga whānui o te Hāhi kātahi anō ka hori me te rapu i ngā tauira o tō te Atua “reo whakatūpato.”

• Waiatahia tahitia tētahi waiata mō ngā poropiti, pērā i te whiti whakamutunga o “Follow the Prophet” (Children’s Songbook, 111). Tohaina tō whakaaturanga mō tā te poropiti kōrero i te kupu a te Atua.

• Hei tīmatanga kōrero mō Whakaakoranga me ngā Kawenata 1:17, me whakaaro ake koutou ko ō tamariki anō nei kei te whakarite koutou mō tētahi haerenga. He aha ngā mea e haria atu nei e koe? Mehemea i mōhio koe i mua noa atu ka ua, ka pakaru rānei te wīra o te waka rānei, ka pēhea kē tō whakarite mō taua haerenga? Pānuitia ngātahitia whiti 17, kātahi ka kōrero mō ngā mea i mōhio ai te Ariki ka pā mai ki a tātou. I pēhea Tana whakarite? (Mehemea e tika ana, whakamāramahia ko te “aituā” tētahi mea pōuri nui.) Me pēhea ngā whakahaunga a te Atua e āwhina ai i a tātou kia aro atu ai ki ngā wero i ō tātou rā?

• Me pānui pea koutou ko ō tamariki i tētahi pukapuka kia ako ai e pā ana ki te mahi a Hōhepa Mete i te whakahokinga mai i te rongopai a te Kaiwhakaora, me te titiro hoki ki tētahi pikitia o Hōhepa Mete (tirohia ngā pikitia i tēnei whakatakoranga mahi) kātahi ka kōrero mō tā te Kaiwhakaora i homai ai ki a tātou mā roto i a Hōhepa Mete. Ka rapua e ngā tamariki ngā tauira i Whakaakoranga me ngā Kawenata 1:17, 29. Me kī atu ki ō tamariki mō tō mōhio tērā anō te Atua “i karangatia ake taku pononga a Hōhepa Mete, Tama., kātahi ka kōrero atu ki a ia i te rangi” (whiti 17).

• He aha te tikanga o te kōrero e mea ana ko te Hāhi “pono e ora ana”? Hei kōkiri i ngā whakaaro a ō tamariki ki tēnei pātai, tērā pea māu rātou e whakaatu ngā mea ora me ngā mea kāore e ora ana—pērā i tētahi otaota e ora ana me tētahi kua mate. Me pēhea tātou e mōhio ai kei te ora tētahi mea? Kātahi koe ka pānui i Whakaakoranga me ngā Kawenata 1:30 me te kōrero mō te tikanga o te Hāhi mēnā rānei he mea “pono e ora ana.”