3 Nifais 27–4 Nifais

Thaum tus Cawm Seej cov thwj tim pib tsa Nws lub Koom Txoos nyob thoob plaws teb chaws ntawd, pib muaj lus nug, uas ib txhia xav tias tsis tshua tseem ceeb—lawv yuav tsum hu Nws lub Koom Txoos li cas? (saib 3 Nifais 27:1–3). Koj kawm dab tsi txog qhov uas lub npe no tseem ceeb heev los ntawm tus Cawm Seej tej lus teb nyob hauv 3 Nifais 27:4–12?

Tus Cawm Seej tau qhia Nws lub Koom Txoos lub npe niaj hnub no nyob hauv Lus Qhuab Qhia thiab Kev Khi Lus 115:4. Cia li xav txog txhua lo lus ntawm lub npe ntawd. Tej lus no pab peb li cas kom paub tias peb yog leej twg, peb ntseeg dab tsi, thiab peb yuav tsum ua dab tsi?

Kuj saib Russell M. Nelson, “Lub Koom Txoos lub Npe uas Raug Lawm,” Liyahaunas, Kaum Ib Hlis Ntuj 2018, 87–89; “Jesus Christ Declares the Name of His Church and His Doctrine” (vidi-aus), Txoj Moo Zoo cov Ntawv.

Tom qab Nws qhia tias Nws lub koom txoos yuav tsum “ua raws li [Nws] txoj moo zoo” (3 Nifais 27:10), tus Cawm Seej piav tias Nws txoj moo zoo yog dab tsi. Koj yuav hais li cas kom hais ntsiab lus txog tej yam uas Nws hais nyob hauv 3 Nifais 27:13–22? Raws li kev txhais lus no, qhov uas lub Koom Txoos—thiab koj—ua raws li Nws txoj moo zoo muaj nqis dab tsi rau koj?

Koj yuav hais li cas yog tus Cawm Seej nug koj, ib yam li Nws tau nug Nws cov thwj tim tias, “Nej xav tau dab tsi ntawm kuv?” (3 Nifais 28:1). Xav txog qhov no thaum koj nyeem 3 Nifais 28:1-11. Koj kawm dab tsi txog cov thwj tim lub siab xav los ntawm lawv txoj kev teb Nws txoj lus nug? Koj tej kev xav hloov li cas thaum koj ua raws li Yexus Khetos txoj moo zoo?

Feem ntau tej zaj nkauj qhuas Vajtswv qhia txog tej uas yus lub siab ntshaw—“Pab Kuv Ua Dawb Huv Ntxiv” yog ib zaj nkauj zoo li no (Cov Nkauj Qhuas Vajtswv, zaj 49). Xav seb koj puas nrhiav ib zaj nkauj uas qhia txog koj txoj kev ntshaw.

Xav txog tej cim uas qhia koj paub tias ib yam yuav tshwm sim. Piv txwv tias, vim li cas koj ho paub tias yuav los nag los sis lub caij yuav hloov? Los ntawm 3 Nifais 29:1–3, vim li cas koj thiaj li paub hais tias Vajtswv txoj hauj lwm sau Nws cov neeg ua ke “twb pib muaj puv npo lawm”? (kuj saib 3 Nifais 21:1–7). Tej zaum koj kuj yuav xav sau ntawv txog tej yam nyob hauv 3 Nifais 29:4–9 uas tib neeg yuav tsis kam txais nyob rau niaj hnub no. Phau Ntawv Maumoos ua li cas pab txhawb koj txog kev ntseeg tej no?

Yog koj tau ua neej nyob tom qab tus Cawm Seej tuaj xyuas ces yuav zoo li cas? Thaum koj kawm 4 Nifais 1:1–18, xav seb puas sau tej koob hmoov uas tib neeg tau txais. Tej zaum koj kuj yuav xav sau lub cim rau tej yam uas cov neeg xaiv kom muaj lub neej zoo li no. Yexus tau qhia dab tsi uas pab lawv xav xaiv kev ncaj ncees? Nov yog ob peb yam, tiam sis tej zaum koj yuav nrhiav lwm yam thiab: 3 Nifais 11:28–30; 12:8–9, 21–24, 40–44; 13:19–21, 28–33; 14:12; 18:22–25.

Xav seb koj yuav ua li cas kom pab koj tsev neeg, pawg ntseeg, los sis zej zog ua neej nyob koom siab thiab muaj kev zoo siab. Koj yuav ua li cas kom kov yeej kev sib cais thiab koom siab nrog Vajtswv cov me nyuam? Koj yuav ua raws li Yexus Khetos tej lus qhia twg kom ua raws li lub hom phiaj no?

Nyuaj siab vim Xi-oos uas muaj nyob hauv 4 Nifais thaum kawg twb poob mus ua phem. Thaum koj nyeem 4 Nifais 1:19–49, nrhiav tej cwj pwm thiab tej yam ntxwv uas ua rau lawv tej kev zoo siab thiab kev koom siab ploj mus. Koj ua tau li cas kom tsis txhob coj cwj pwm li no los sis tsis txhob xav li no?

Kuj saib Mauxes 7:18; D. Todd Christofferson, “Cov Xam Khoo uas Kav Tau Ntev,” Liyahaunas, Kaum Ib Hlis Ntuj 2020, 32–35; Reyna I. Aburto, “Sib Koom Ib lub Siab,” Liyahaunas, Tsib Hlis Ntuj 2018, 78–80; Txoj Moo Zoo tej Ntsiab Lus, “Belonging in the Church of Jesus Christ,” Txoj Moo Zoo cov Ntawv.

• Sib tham nrog koj cov me nyuam txog lawv lub npe kom pib qhia txog vim li cas Yexus Khetos lub Koom Txoos lub npe tseem ceeb. Vim li cas peb lub npe tseem ceeb? Ces tej zaum koj yuav xav nyeem 3 Nifais 27:3 ua ke, thiab nrhiav Yexus cov thwj tim tej lus nug. Pab koj cov me nyuam nrhiav tej lus teb qhov no nyob hauv 3 Nifais 27:5-8. Vim li cas lub Koom Txoos lub npe tseem ceeb?

• Tej zaum koj xav pab koj cov me nyuam xav txog tej pawg uas lawv koom nrog, ib yam li ib tsev neeg los sis ib chav rau lub Koom Haum Me Nyuam Yaus. Nug seb lawv nyiam dab tsi txog kev koom nrog txhua pawg. Ces tej zaum nej yuav xav hu zaj nkauj “The Church of Jesus Christ” (Children’s Songbook, 77) ua ke thiab sib tham txog vim li cas nej zoo siab koom nrog tus Cawm Seej lub Koom Txoos.

• Tus Cawm Seej qhia txog Nws txoj moo zoo nyob hauv 3 Nifais 27. Tej zaum koj yuav xav piav txog lub ntsiab ntawm lo lus txoj moo zoo. Peb nrhiav txoj moo zoo twg nyob hauv 3 Nifais 27:13–16? Siv phab ntawv ntxim ua rau lub lim tiam no kom qhia tias tus Cawm Seej lub Koom Txoos lub hauv paus yog Nws txoj moo zoo.

• Tej zaum nej yuav xav ua si kom ib tug mus nkaum thiab lwm tus yuav mus nrhiav nws. Tej zaum ua li no yuav ua rau nej xav sib tham txog kev txoj kev xyiv fab uas los thaum nrhiav ib tug uas ploj lawm. Tom qab nej nyeem 3 Nifais 27:30–31, tej zaum nej yuav xav sib tham txog kev sib pab kom nyob ze Leej Txiv Saum Ntuj Ceeb Tsheej thiaj li tsis muaj “leej twg … ploj.”

• Kom pab koj cov me nyuam kawm txog txoj kev zoo siab uas cov neeg piav txog nyob hauv 4 Nifais, tej zaum koj yuav xav saib duab txog cov neeg uas zoo siab. Ces, thaum nej nyeem nqe 2–3 thiab 15–17 (los sis “Tshooj 48: Kev Thaj Yeeb hauv Amelikas,” Cov Dab Neeg hauv Phau Ntawv Maumoos, 136–37) ua ke, tej zaum lawv yuav xav taw tes rau cov duab thaum koj nyeem txog kev zoo siab.

• Kom pab koj cov me nyuam to taub tej yam uas tau qhia nyob hauv 4 Nephi 1:15–16, tej zaum koj yuav xav qhia txog tej lub sij hawm uas tib neeg ib leeg npau taws rau ib leeg. Caw kom lawv ua txuj seb yuav ua li cas yog tias peb muaj “Vajtswv txoj kev hlub” hauv peb lub siab.