3 Nifais 20–26

Nyob hauv 3 Nifais 20–22, tus Cawm Seej tau qhia txog tej yam uas yuav muaj los tom ntej txog Nws cov neeg khi lus (qhov tseem ceeb saib3 Nifais 20:30–32, 39–41; 21:9–11, 22–29). Thaum koj nyeem cov lus cog tseg thiab tej uas yuav muaj los yav tom ntej no, cia li nco qab txog qhov uas Thawj Tswj Hwm Russell M. Nelson hais tias: “Peb yog tus Tswv cov neeg khi lus. Peb muaj cib fim koom tes ua kom muaj raws li tej lus cog tseg no. Yeej yog ib lub sij hawm zoo kawg rau peb ua neej nyob!” (“Kev Muab Ixayees Sau Los Ua Ke,” Liyahaunas, Kaum Ib Hlis Ntuj 2006, 79). Tej kev qhia txog tej uas yuav muaj los yav tom ntej twg ua rau koj zoo siab heev? Koj ua tau dab tsi kom muaj raws li tej lus ntawd?

Nyob hauv 3 Nifais 22 thiab 24, tus Cawm Seej hais Yaxayas thiab Malakis tej lus piv txwv uas ua rau yus pom meej—cov hluav ncaig hauv hluav taws, cov tseem nyiaj, kev sib yuav, tej rooj ntug (qhov tseem ceeb saib3 Nifais 22:7–8, 10–17; 24:10–12, 17–18). Tej piv txwv no qhia dab tsi rau koj txog Vajtswv txoj kev hlub Nws cov neeg—thiab Nws txoj kev hlub koj? Tau muaj li cas hauv koj lub neej los sis koj tsev neeg lub neej thiaj muaj raws li tej lus cog tseg hauv tej tshooj no?

Kuj saib “The Refiner’s Fire” (vidi-aus), Txoj Moo Zoo cov Ntawv.

Muaj dab tsi uas tshoov koj lub siab thaum tus Cawm Seej hais lus rau Nifais nyob hauv 3 Nifais 23:6–13? Yog tias tus Cawm Seej tau nyeem cov ceev xwm txheej uas koj tau sau, ces Nws yuav nug koj txog dab tsi? Koj yuav tsum sau ntawv txog tej yam tseem ceeb los sis tej yam ntawm sab ntsuj plig twg? Vim li cas kev ua li no yog ib qho tseem ceeb? (saib 3 Nifais 26:2).

Thaum koj nyeem 3 Nifais 20:10–12; 23; 26:1–12, cia li xav seb tus Cawm Seej xav li cas txog cov vaj lug kub. Qhov uas yus tshawb xyuas cov vaj lug kub thiab qhov uas yus lam nyeem xwb txawv li cas? (saib 3 Nifais 23:1).

Vajtswv yeej ib txwm txib Nws cov neeg kom them ib feem kaum (saib Chiv Keeb 14:17–20; Malakis 3:8–11). Thaum koj kawm 3 Nifais 24:7–12, cia li xav seb vim li cas Vajtswv hais kom Nws cov neeg them ib feem kaum. Tej lus nug no pab tau koj kawm:

• Txoj kev cai them ib feem kaum yog dab tsi? (Saib Lus Qhuab Qhia thiab Kev Khi Lus 119. “Paj laum” hauv kev tshwm sim no txhais tias nyiaj khwv. Txhua tus mej zeej uas ua tau nyiaj yuav tsum them ib feem kaum.) Txoj kev them ib feem kaum txawv li cas ntawm lwm yam kev pub dawb ?

• Lawv siv ib feem kaum ua dab tsi? Koj nrhiav tau ib feem ntawm tej yam siv nyob hauv Txoj Moo Zoo tej Ntsiab Lus, “Ib Feem Kaum” (Txoj Moo Zoo cov Ntawv). Koj tau koob hmoov zoo li cas vim cov mej zeem ntawm lub Koom Txoos tau them ib feem kaum?

• Muaj tej koob hmoov dab tsi los rau cov tib neeg uas ua txoj kev cai them ib feem kaum? (saib 3 Nifais 24:7–12). Koj nrhiav tau tej koob hmoov ntawd nyob hauv Txwj Laug David A. Bednar zaj lus “Tej Rooj Ntug” (Liyahaunas, Kaum Ib Hlis Ntuj 2013, 17–20). Nrhiav, qhov tseem ceeb, tej koob hmoov uas tsis yog hais txog nyiaj xwb. Koj tau pom cov koob hmoov no li cas hauv koj lub neej los lawm?

Tej zaum koj yuav xav saib qhov vidi-aus “Jesus Teaches about the Widow’s Mite” (Txoj Moo Zoo cov Ntawv), los sis nyeem Malakaus 12:41–44. Zaj dab neeg no qhia koj dab tsi rau koj?

Hauv peb lub caij nyoog, peb lub siab “tig mus rau [peb] cov yawg koob” dhau ntawm tej hauj lwm hauv lub tuam tsev thiab kev nrhiav tsev neeg zaj keeb kwm. Koj lub siab puas tau tig mus li no? Thaum koj nyeem 3 Nifais 25:5–6 thiab Lus Qhuab Qhia thiab Kev Khi Lus 110:13–16, xav seb vim li cas qhov no tseem ceeb hauv Vajtswv txoj hau kev.

Kuj saib “Families Can Be Together Forever,” Children’s Songbook, 188.

• Tus Cawm Seej tej lus qhia nyob hauv 3 Nifais 23 qhia tias cov vaj lug kub tseem ceeb npaum li cas rau Nws. Xwv kom pab koj cov me nyuam paub qhov no, tej zaum koj yuav xav nyeem 3 Nifais 23:1, 5 nrov thiab hais kom lawv mloog nrhiav ib lo lus uas tau hais peb zaug. Kev tshawb xyuas txawv li cas ntawm kev nyeem xwb?

• Tej zaum koj thiab koj cov me nyuam nyias yuav xav sau ib nqe vaj lug kub uas nyias nyiam tshaj thiab muab zais. Ces nej ib leeg zuj zus yuav mus nrhiav lwm tus nqe vaj lug kub uas tau muab zais, nyeem tej nqe ua ke, thiab sib tham txog seb vim li cas tej nqe no muaj nuj nqis.

• Pab koj cov me nyuam tshawb xyuas 3 Nifais 24:8–12 kom nrhiav tej yam sau kab lus no kom tiav: Yog kuv them ib feem kaum, tus Tswv yuav … . Tej zaum koj kuj yuav xav hais txog ib lub sij hawm thaum koj tau txais koom hmoov vim koj tau them ib feem kaum. Yog tias yuav pab tau, cia li xav seb puas sau ob peb yam cov nyiaj thiab pab koj cov me nyuam suav seb yuav them ib feem kaum (10 feem pua) npaum li cas.

• Phab ntawv ntxim ua rau lub lim tiam no pab tau koj cov me nyuam tham txog tej yam uas tus Tswv ua siv kev them ib feem kaum muab koob hmoov rau cov mej zeej hauv Nws lub Koom Txoos. Tej zaum lawv kos duab (los sis nrhiav cov duab hauv lub Koom Txoos tej phau ntawv xov xwm) txog tej koob hmoov uas lawv tau txais vim lawv them ib feem kaum .

• Koj yuav ua li cas kom tshoov koj cov me nyuam lub siab kom lawv tshawb xyuas thiab kawm txog lawv cov poj koob yawm txwv? Koj yuav ua li cas kom pab koj cov me nyuam ua kab ke rau lawv cov poj koob yawm txwv thaum lawv loj hlob? Xav seb koj puas pab lawv tshawb xyuas 3 Nifais 25:5–6 kom nrhiav seb yuav tsum muaj dab tsi tshwm sim hauv hnub nyoog kawg. Tej zaum cov me nyuam yaus yuav xav muab lawv txhais tes tso puab lawv lub siab txhua lub sij hawm lawv hnov lo lus “lub siab” thaum koj nyeem tej nqe no. Tej zaum koj yuav xav nyeem txog qhov uas tau muaj raws li tej lus qhia txog tej uas yuav muaj los yav tom ntej nyob hauv Lus Qhuab Qhia thiab Kev Khi Lus 110:13–16 (kuj saib Phau Muaj Duab txog Txoj Moo Zoo, naj npawb 95). Qhia koj cov me nyuam txog qhov uas koj lub siab twb tig mus rau koj cov poj koob yawm txwv. Piv txwv tias, tej zaum koj yuav xav qhia lawv txog tej lub sij hawm thaum koj kawm txog koj cov poj koob yawm txwv thiab ua cov kab ke hauv lub tuam tsev rau lawv.

• Pab koj cov me nyuam sau lawv tsev neeg caj ceg nrog lawv niam txiv thiab pog yawg lub npe. Koj qhia tau tej zaj dab neeg twg txog koj ib tug poj koob yawm txwv? Yog ua tau, muab daim duab rau lawv saib. Nej kuj hu zaj nkauj “Families Can Be Together Forever” (Children’s Songbook, 188) ua ke thiab qhia koj cov me nyuam vim li cas tsev neeg yog ib yam tseem ceeb rau Leej Txiv Saum Ntuj Ceeb Tsheej txoj hau kev.