“Yim Hli Ntuj 26–Cuaj Hlis Ntuj 1: ‘Lub Pob Zeb uas Yog Peb tus Txhiv Dim.’ Hilamas 1–1,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Yim Hli Ntuj 26–Cuaj Hlis Ntuj 1. Hilamas 1–1,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Yim Hli Ntuj 26–Cuaj Hlis Ntuj 1: “Lub Pob Zeb uas Yog Peb tus Txhiv Dim”
Hilamas 1–6
Phau Hilamas hais txog tej kev muaj yeej thiab kev raug txom nyem ntawm cov Neeg Nifais thiab cov Neeg Lamas. Thaum pib phau no tau “pib muaj teeb meem nyuaj heev nyob hauv cov Neeg Nifais” (Hilamas 1:1), thiab tej yam nyuaj los muaj ntau nyob hauv phau no. Peb nyeem txog tej kev dag ntxias hauv tsoom fwv, tej pawg tub sab, kev xyeej cov yaj saub, thiab kev muab hlob thiab kev tsis ntseeg uas nyob thoob plaws thaj av. Tiam sis peb kuj muaj neeg uas coj yam ntxwv zoo li Nifais thiab Lihais thiab “cov uas txo hwj chim zog,” cov uas twb nyiaj dhau tiam sis kuj muaj zog ntawm sab ntsuj plig (Hilamas 3:34). Lawv tau ua li cas kom zoo li no? Lawv tau ua li cas kom muaj zog thaum lawv zej zog tab tom poob mus thiab raug puas tsuaj? Lawv tau ua ib yam li peb yuav tsum ua yog peb xav muaj zog thaum tus dab phem xa “cua daj cua dub” los raug peb—peb yuav tsum ua peb lub neej tsa “nyob rau saum lub pob zeb uas yog peb tus Txhiv Dim, tus uas yog Khetos, Vajtswv Leej Tub, … ib lub hauv paus uas yog neeg cog rau saud lawv yuav tsis vau” (Hilamas 5:12).
Tej Tswv Yim Pab Qhia hauv Tsev thiab lub Koom Txoos
Kev muab hlob ua rau kuv ncaim tus Ntsuj Plig thiab tus Tswv lub zog.
Thaum koj nyeem Hilamas 1–6, tej zaum koj yuav kawm txog ib yam uas cov Neeg Nifais pheej ua. Thaum lawv ncaj ncees, Vajtswv foom koob hmoov rau lawv thiab lawv vam meej. Tom qab ib ntus, lawv muab hlob thiab ua phem, xaiv ua tej yam uas ua rau lawv raug puas tsuaj thiab raug txom nyem. Ces lawv txo hwj chim thiab hloov siab lees txim, thiab Vajtswv foom koob hmoov rau lawv dua. Rov qab muaj li no ntau zaus heev es muaj neeg uas hais tias lawv “ib ncig rov qab los txog kev muab hlob.”
“Ib ncig rov qab los txog kev muab hlob.”
Nrhiav thaum twg muaj kev mus ib ncig no thaum koj nyeem Hilamas 1–6. Nov yog tej lus nug uas yuav pab koj to taub kev mus ib ncig no:
-
Muaj dab tsi uas qhia tias cov Neeg Nifais muab hlob lawm? (saib, ua piv txwv, Hilamas 3:33–34; 4:11–13). Koj puas pom kev muab hlob li no hauv koj tus kheej?
-
Muaj li cas los ntawm kev muab hlob thiab kev ua phem? (saib Hilamas 4:23–26). Tej yam uas los ntawm kev txo hwj chim thiab kev hloov siab lees txim yog dab tsi? (saib Hilamas 3:27–30, 35; 4:14–16).
-
Hilamas xav kom nws cov tub nco txog dab tsi? (saib Hilamas 5:4–12). Qhov uas koj nco txog tej yam tseeb no yuav pab koj li cas kom tsis txhob muab hlob?
Kuj saib “Chapter 18: Beware of Pride,” Teachings of Presidents of the Church: Ezra Taft Benson (2014), 229–40; “Tus Tswv Nyob Nrog Nraim Kuv,” Cov Nkauj Qhuas Vajtswv, zaj 36.
Kev ntseeg Khetos ua rau kuv muaj kev zoo siab.
Nyob hauv Hilamas 3, Maumoos piav txog ib lub sij hawm zoo siab thaum lub Koom Txoos tau koob hmoov heev ua rau cov thawj coj xav tsis thoob. Raws li tej yam koj nyeem hauv nqe 24–32, koj xav li cas thiaj ua rau lawv muaj kev xyiv fab ntawd? Tiam sis, tsis yog txhua tus mej zeej uas tau muaj kev xyiv fab. Cia li nrhiav qhov txawv ntawm cov neeg uas piav txog nyob hauv nqe 33–35. Koj kawm dab tsi los ntawm lawv tus yam ntxwv?
Nrhiav kev siv rau tus kheej. Tus yaj saub Maumoos tau hais tej lus “yog li no peb pom tias” kom qhia txog tej yam tseeb tseem ceeb thaum nws tau sau ntsiab lus txog cov ceev xwm txheej dawb ceev. Nws xav kom peb kawm dab tsi nyob hauv Hilamas 3:27–30? Thaum koj kawm vaj lug kub, tej zaum koj yuav xav nres thiab nug koj tus kheej seb koj yuav hais li cas txog tej yam koj tau nyeem tom qab hais “thiab yog li no peb pom tias.”
Kuv yuav hwm tus Cawm Seej lub npe.
Thaum koj nyeem Hilamas 5:6–7 tej zaum koj yuav xav txog koj lub npe, suav nrog cov npe uas los ntawm koj tsev neeg. Koj xav li cas txog cov npe no? Koj yuav ua li cas hwm cov npe ntawd? Tiam sis qhov tseem ceeb tshaj, cia li xav seb txoj kev ris the Cawm Seej lub npe txhais li cas (saib Maulaunais 4:3). Koj yuav ua li cas hwm lub npe dawb ceev ntawd?
Yog Yexus Khetos yog kuv lub hauv paus, kuv yeej yuav tsis poob.
Qhov uas yus cog yus lub hauv paus saum “lub pob zeb uas yog peb tus Txhiv Dim” txhais li cas? (Hilamas 5:12). Yexus Khetos tau pab koj li cas kom tiv thaiv koj thaum raug cua daj cua dub hauv lub neej no? Thaum koj nyeem Hilamas 5:12-52, saib Nifais thiab Lihais tau koob hmoov vim nkawd cog nkawd lub hauv paus saum lub pob zeb uas yog nkawd tus Txhiv Dim.
Cov neeg ib txhia kawm zoo dua thaum lawv xam pom tej yam uas lawv kawm. Tej zaum koj yuav xav ua ib lub tsev me me thiab tso rau saum tej lub hauv paus uas sib txawv kom pab kawm txog Hilamas 5:12. Ces tej zaum koj yuav xav tsim “cua daj cua dub” thaum koj tsuag dej rau thiab siv ib lub kiv cua. Qhov no ua rau koj kawm dab tsi txog kev cog koj lub hauv paus saum Yexus Khetos? Koj kawm dab tsi ntxiv los ntawm qhov vidi-aus “A Secure Anchor”? (Txoj Moo Zoo cov Ntawv).
Nqe 50 hais txog “tej pov thawj loj” uas cov Neeg Lamas tau txais. Thaum koj nyeem Hilamas 5:12–52, tej zaum koj yuav nco txog tej pov thawj uas Vajtswv tau pub rau koj. Piv txwv hais tias, tej zaum tus Vaj Ntsuj Plig Dawb Huv “lus ntxhi” tau ua rau koj txoj kev ntseeg tus Cawm Seej muaj zog ntxiv (Hilamas 5:30; kuj saib Lus Qhuab Qhia thiab Kev Khi Lus 88:66). Los sis tej zaum koj twb nyob hauv kev tsaus ntuj, thiab koj twb thov Vajtswv kom muaj kev ntseeg ntxiv (saib Hilamas 5:40–47). Muaj lwm yam uas tau pab koj cog koj lub hauv paus saum Yexus Khetos?
Kuj saib Russell M. Nelson, “Lub Tuam Tsev thiab lub Hauv Paus rau Nej Sab Ntsuj Plig,” Liyahaunas, Kaum Ib Hlis Ntuj 2021, 93–96; Sean Douglas, “Tiv Tau Nag Xob Nag Cua ntawm Sab Ntsuj Plig Thaum Peb Ntseeg Khetos,” Liyahaunas, Kaum Ib Hlis Ntuj 2021, 109–11; Txoj Moo Zoo tej Ntsiab Lus, “Kev Ntseeg Yexus Khetos,” Txoj Moo Zoo cov Ntawv.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Leej Txiv Saum Ntuj Ceeb Tsheej xav kom kuv txo hwj chim.
-
Xav seb puas caw koj cov me nyuam kos duab txog “ib ncig rov qab los txog kev muab hlob” ib yam li daim duab saum toj no. Ces, thaum nej nyeem Hilamas 3:24, 33–34 thiab 4:11–15 ua ke, tej zaum lawv xav taw tes rau tej qhov chaw ntawm kev mus ib ncig no uas tej nqe hais txog. Peb yuav ua li cas kom txiav txim siab txo hwj chim—thiab txo hwj chim tas mus li?
Kuv yuav ua kuv lub hauv paus cog rau saum Yexus Khetos.
-
Xav seb koj puas siv ib daim duab ntawm ib lub tuam tsev thiab pib sib tham txog vim li cas cov vaj tse yuav tsum muaj lub hauv paus muaj zog. Los sis tej zaum yuav xav saib lub hauv paus ntawm koj lub tsev los sis lub tsev koom txoos. Kom qhia txog qhov uas ib lub hauv paus ruaj khov muaj zog li ib lub pob zeb, tej zaum koj cov me nyuam yuav xav sim tshuab ib lub pob zeb seb lub pob zeb puas txav mus. Thaum nej nyeem Hilamas 5:12 ua ke, nug koj cov me nyuam vim li cas Yexus Khetos yog “ib lub hauv paus ruaj nrees” hauv peb lub neej. Peb yuav ua li cas kom tsim peb lub neej rau saum Nws? (saib Hilamas 3:27–29, 35 thiab Tej Nqe Kev Ntseeg 1:4).
-
Caw koj cov me nyuam tsim ib tug pej thuam siv pob zeb los sis lwm yam khoom ntawm ntau hom hauv paus (ib yam li daim ntaub los sis ib lub pob zeb tiaj tus). Ib lub hauv pauv ruaj kho zoo li Yexus Khetos li cas? Tej zaum lawv ntxiv ib lub pob zeb txhua zau lawv muaj tswv yim txog txoj kev raws Nws qab.
Tus Vaj Ntsuj Plig Dawb Huv ntxhi ua ib lub suab yau yau thiab me me.
-
Hilamas 5:29–30, 45–47 qhia txog ib lub suab uas qhia peb ib txoj kev uas tus Vaj Ntsuj Plig Dawb Huv hais lus rau peb. Tej zaum koj xav nyeem “Tshooj 37: Nifais thiab Lihais nyob hauv Tsev Rau Txim” (Cov Dab Neeg hauv Phau Ntawv Maumoos, 99–102). Siv lub suab yau yau thaum koj tham txog lub suab uas cov neeg hnov. Rov qab piav zaj dab neeg ob peb zaug, thiab caw cov me nyuam ntxhi nrog koj. Pab lawv xav txog lwm txoj kev uas tus Vaj Ntsuj Plig Dawb Huv hais lus rau peb. Tej zaum nej yuav xav hu zaj nkauj “The Still Small Voice” (Children’s Songbook, 106–7) ua ke kom to taub lub ntsiab cai no.
Txoj kev hloov siab lees txim hloov qhov tsaus ntuj ntawm sab ntsuj plig nrog qhov kaj.
-
Tej zaum koj xav nyeem tej nqe no siv ib lub teeb nyem xwb koj to taub zoo dua seb Hilamas 5:20–41 qhia dab tsi txog kev tsaus ntuj thiab kev kaj. Tej zaum koj cov me nyuam xav mloog kom paub seb cov neeg yuav tsum ua li cas kom tsis txhob tsaus ntuj. Ces qhib teeb, thiab nyeem nqe 42–48 ua ke. Tej nqe no qhia dab tsi rau peb txog kev hloov siab lees txim?
Yog xav tau tswv yim ntxiv, saib phau xov xwm Phooj Ywg rau lub hlis no.
Txawm yog hauv lub tsev kaw los, Vajtswv lub hwj chim tau pov hwm Nifais thiab Lihais
© The Book of Mormon for Young Readers, Nifais thiab Lihais hauv Ib tug Ncej Nplaim Hluav Taws, los ntawm Briana Shawcroft; tsis pub luam