“Plaub Hlis Ntuj 22–28: ‘Muaj Kev Hlub Puv Npo rau Vajtswv thiab Tib Neeg Txhua Tus.’ Mauxiyas 1–3,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2024)
“Plaub Hlis Ntuj 22–28. Mauxiyas 1–3,” Los, Nrog Kuv Mus—Siv hauv Tsev thiab lub Koom Txoos: 2024 (2024)
Txais Vaj Ntxwv Npeyamis tej Lus Qhia, los ntawm Maria Alejandra Gil
Plaub Hlis Ntuj 22–28: “Muaj Kev Hlub Puv Npo rau Vajtswv thiab Tib Neeg Txhua Tus”
Mauxiyas 1–3
Thaum koj hnov lo lus vaj ntxwv, tej zaum koj yuav xav txog cov vaj ntxwv tej kaus mom, cov tub qhe, thiab tej rooj theej kiab. Nyob hauv Mauxiyas 1–3, koj yuav nyeem ntawv txog ib tug vaj ntxwv txawv. Vaj Ntxwv Npeyamis tsis tau siv nws cov neeg tej hauj lwm kom nyob tau, tiam sis nws “siv [nws] txhais tes los ua hauj lwm” (Mauxiyas 2:14). Nws tsis tau cia lwm tus ua hauj lwm pab nws, es nws cia li pab nws cov neeg “kom kawg lub siab thiab lub dag lub zog uas tus Tswv tau muab rau [nws]” (Mauxiyas 2:11). Tus vaj ntxwv tsis tau xav kom nws cov neeg teev tiam nws; tiam sis, nws qhia lawv kom teev tiam lawv tus Vaj Ntxwv Saum Ntuj Ceeb Tsheej, Yexus Khetos. Vaj Ntxwv Npeyamis to taub tias yog “tus Tswv uas Muaj Hwj Chim Loj Tshaj Plaws uas kav” (Mauxiyas 3:5),” tus uas tau “tawm mus xyuas tib neeg, … xwv kom txoj kev cawm seej yuav los tau rau noob neej los ntawm txoj kev ntseeg nws lub npe” (Mauxiyas 3:5, 9).
Tej Tswv Yim Pab Qhia hauv Tsev thiab lub Koom Txoos
“Rau siab ntso tshawb” cov vaj lug kub.
Nyob hauv tej nqe no, saib tias cov ceev xwm txheej dawb huv twb pab Vaj Ntxwv Npeyamis cov neeg. Koj lub neej tau hloov li cas vim koj muaj cov vaj lug kub?
Thaum kuv pab lwm tus, kuv kuj ua hauj lwm pab Vajtswv.
Koj xav tias Vaj Ntxwv Npeyamis yuav hais li cas yog koj nug nws seb vim li cas nws ua hauj lwm pab lwm tus “kom kawg lub siab thiab lub dag lub zog”? (Mauxiyas 2:11). Cia li xav txog qhov no thaum koj nyeem Mauxiyas 2:10–26. Vaj Ntxwv Npeyamis tau qhia dab tsi uas ua rau koj xav ua tej yam zoo kom pab lwm tus? Piv txwv hais tias, qhov uas koj paub tias thaum twg koj pab lwm tus, koj kuj ua hauj lwm pab Vajtswv mas qhov ntawd muaj nqis npaum li cas rau koj? (saib Mauxiyas 2:17). Nrhiav kev tshoov siab kom paub tias koj yuav ua li cas pab ib tug neeg lub lim tiam no.
Txawm yog peb paub tias peb yuav tsum pab lwm tus, tej lub sij hawm peb muaj teeb meem thiab. Ib txoj kev kawm Mauxiyas 2:10–26 yog kev sau tej lus tseeb uas Vaj Ntxwv Npeyamis qhia uas pab tau koj kov yeej tej teeb meem uas tab kaum koj txoj kev pab lwm tus. Muaj tej yam twg uas pab koj paub tias tej uas Vaj Ntxwv Npeyamis tau qhia muaj tseeb? qhia
Thawj Tswj Hwm Joy D. Jones tau hais ib zaj lus zoo txog ib lub sij hawm uas tau hloov nws txoj kev xav txog kev pab lwm tus. Cia li nyeem zaj no nyob hauv “Rau Nws” (Ensign los sis Liahona, Kaum Ib Hlis Ntuj 2018, 50–52), thiab xav txog tej lub cib fim uas koj muaj kom pab lwm tus. Tej zaum koj yuav xav sau ob peb yam thiab xav txog qhov uas Thawj Tswj Hwm Jones zaj lus, nrog Mauxiyas 2:17 ua ke, yuav hloov koj txoj kev xav txog tej lub cib fim no. Ib zaj nkauj qhuas Vajtswv xws li “Ib tug Txiv Neej Txom Nyem Quaj Ntsuag” (Cov Nkauj Qhuas Vajtswv, zaj 14) los sis qhov vidi-aus xws li “The Old Shoemaker” (Txoj Moo Zoo cov Ntawv) yuav pab koj xav txog tej lub tswv yim ntxiv.
Kuj saib Mathais 25:40; “Faith Murray’s Story: Overcoming Adversity through Service,” “King Benjamin Teaches about Serving God” (cov vidi-aus), Txoj Moo Zoo cov Ntawv; JustServe.org; Txoj Moo Zoo tej Ntsiab Lus, “Service,” Txoj Moo Zoo cov Ntawv.
Thaum kuv pab lwm tus, kuv kuj ua hauj lwm pab Vajtswv.
Kev zoo siab yeej los ntawm kev ua raws li Vajtswv cov lus txib.
Koj yuav piav li cas txog kev zoo siab uas los ntawm txoj kev mloog Vajtswv lus? Puas muaj tej lus nyob hauv Mauxiyas 2:38–41 uas piav vim li cas koj ua raws li Nws cov lus txib?
Kuv yuav los ua ib tug neeg ntseeg dhau los ntawm Yexus Khetos txoj Kev Theej Txhoj.
Vaj Ntxwv Npeyamis, zoo li txhua tus yaj saub, tau ua tim khawv txog Yexus Khetos kom nws “cov ntawd thiaj yuav tau txais kev zam txim rau lawv tej kev txhaum, thiab yuav zoo siab nrog txoj kev xyiv fab uas loj kawg nkaus” (Mauxiyas 3:13). Nov yog tej lus nug rau koj xav txog thaum koj nyeem Vaj Ntxwv Npeyamis zaj lus tim khawv txog tus Cawm Seej nyob hauv Mauxiyas 3:1–20:
-
Kuv kawm dab tsi los ntawm tej nqe no txog tus Cawm Seej thiab Nws ntiag tug hauj lwm?
-
Kuv kawm dab tsi los ntawm Mauxiyas 3:18–19 txog txoj kev hloov los ua ib tug neeg ntseeg?
-
Yexus Khetos tau pab kuv li cas kom kov yeej kev txhaum, hloov kuv tus cwj pwm, thiab hloov los ua ib tug neeg ntseeg?
“Tus Tswv uas Muaj Hwj Chim Loj Tshaj Plaws … yuav nqis saum ntuj ceeb tsheej los.”
Hluav taws xob ua rau koj ua tau dab tsi? Koj lub neej yuav txawv li cas yog tias tsis muaj? Tej zaum tej lus nug no yuav pab koj xav txog lub hwj chim loj tshaj uas tus Cawm Seej muab rau koj lub neej.
Tus tim tswv uas tau tshwm sim rau Vaj Ntxwv Npeyamis tau hais tias Yexus Khetos yog “tus Tswv uas Muaj Hwj Chim Loj Tshaj Plaws,” yog ib lub npe uas qhia tias Nws muaj hwj chim tag nrho. Koj kawm dab tsi los ntawm Mauxiyas 3:5–21 txog qhov uas tus Cawm Seej siv lub hwj chim ntawd? Koj puas tau pom tus Cawm Seej lub hwj chim hauv koj lub neej thiab cov neeg nyob ib puag ncig koj? Nws lub hwj chim ua rau koj muaj peev xwm ua dab tsi thiab hloov los ua neeg zoo li cas? Koj lub neej yuav txawv li cas yog tias tsis muaj?
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Thaum kuv ua hauj lwm pab lwm tus, kuv ua hauj lwm pab Vajtswv.
-
Phab ntawv ntxim ua rau lub lim tiam no muaj ib lub kaus mom uas koj cov me nyuam ua taus. Tej zaum lawv yuav xav sawv saum ib lub rooj zaum ib leeg zuj zus ua txuj tias lawv yog Vaj Ntxwv Npeyamis thaum koj qhia txog tej yam uas Vaj Ntxwv Npeyamis tau qhia nws cov neeg, raws li qhia nyob hauv Mauxiyas 2–3. Tej zaum koj yuav xav qhia lawv los ntawm “Tshooj 12: Vaj Ntxwv Npeyamis” (Cov Dab Neeg hauv Phau Ntawv Maumoos, 32–35) kom pab lawv paub txog Vaj Ntxwv Npeyamis tej lus qhia.
-
Tej zaum Mauxiyas 2:17 yog ib nqe vaj lug kub zoo rau koj cov me nyuam kawm. Koj pab tau lawv rov qab hais ob peb lo lus zuj zus. Los sis koj sau tau nqe vaj lug kub ntawd, tsis txhob sau ob peb lo lus, ces nug koj cov me nyuam kom qhia tias tej lus twg tsis nyob. Ces koj tham tau nrog koj cov me nyuam txog qhov uas vim li cas Vajtswv xav kom peb ib leeg pab ib leeg.
-
Tej zaum koj yuav xav pab koj cov me nyuam nrhiav hauv Mauxiyas 2:11–18 kom kawm tias Vaj Ntxwv Npeyamis tau ua li cas kom pab lwm tus. Ces koj cov me nyuam sau tau ntawv rau tej daim ntawv txog tej yam uas lawv muaj peev xwm ua kom pab lawv tsev neeg. Tso cov ntawv hauv ib lub rau khoom, xws li ib lub hnab los sis lub hub, koj cov me nyuam thiaj li xaiv tau ib daim txhua hnub thiab ua qhov uas sau rau daim ntawv kom pab lwm tus.
Cov me nyuam kawm zoo thaum rov qab qhia tej yam qub. Tsis txhob txhawj yog koj rov qab ua yam ntxim saib ntxim ua ntau zaus, qhov tseem ceeb yog ua nrog cov me nyuam yaus. Kev rov qab ua li qub yuav pab cov me nyuam nco ntsoov tias lawv tau kawm dab tsi.
Vaj Ntxwv qhia tias peb ua hauj lwm pab Vajtswv thaum peb pab lwm tus.
Tag nrho kuv cov koob hmoov los ntawm Leej Txiv Saum Ntuj Ceeb Tsheej.
-
Vaj Ntxwv Npeyamis tau pab nws cov me nyuam vim nws ris Vajtswv txiaj. Koj yuav ua li cas kom tshoov koj cov me nyuam lub siab xav ib yam li ntawd? Tej zaum nej yuav xav nyeem Mauxiyas 2:21 ua ke thiab sau ntawv txog cov koob hmoov uas Leej Txiv Saum Ntuj Ceeb Tsheej tau foom pub rau peb. Ces koj sau tau lwm yam koob hmoov uas cov me nyuam xav txog.
-
Nov yog ib qho kev ua si ua yuav pab koj cov me nyuam paub txog Leej Txiv Saum Ntuj Ceeb Tsheej cov koob hmoov. Cia cov me nyuam muab ib daim duab txog tus Cawm Seej tso rau ib leeg zuj zus thaum lawv hu nkauj los sis mloog ib zaj nkauj txog kev ris txiaj (saib “Gratitude” nyob hauv daim phiaj nrhiav lub ntsiab nyob hauv Children’s Songbook) Tsum tsis hu nkauj ntxiv los sis tsis tso nkauj ob peb zaug, thiab caw leej twg uas tuav daim duab ntawd kom qhia txog ib txoj koob hmoov uas ua rau lawv xav ua Vajtswv tsaug. Raws li Mauxiyas 2:22–24 qhia, peb yuav ua li cas kom qhia tias peb ris Vajtswv txiaj rau peb cov koob hmoov?
Yexus Khetos pab kuv hloov los ua neeg zoo li Nws ntxiv.
-
Ib tug tim tswv tau qhia Vaj Ntxwv Npeyamis tej lus tseeb tseem ceeb txog Yexus Khetos lub neej thiab txoj hauj lwm qhuab qhia. Tej zaum koj thiab koj cov me nyuam yuav xav nrhiav cov duab txog tej yam uas hais txog nyob hauv Mauxiyas 3:5–10 (saib, ua piv txwv, Phau Muaj Duab txog Txoj Moo Zoo, naj npawb 30, 41, 42, 57, 59). Thaum koj nyeem Mauxiyas 3:5–10, tej zaum koj cov me nyuam yuav xav tsa tes thaum lawv hnov ib yam nyob hauv tej nqe vaj lug kub uas muaj hauv ib daim duab.
-
Koj cov me nyuam puas tau npaj ib pluas mov thaum lawv siv ib daim qhia ua mov? Tej zaum koj yuav xav hais txog txoj kev ua li ntawd thiab siv Mauxiyas 3:19 kom thiaj li sau ib daim “qhia kev ua mov” txog qhov uas peb yuav ua li cas kom hloov los ua neeg zoo li Yexus Khetos. Yexus ua li cas pab peb hloov los ua neeg zoo li Nws?
Yog xav tau tswv yim ntxiv, saib phau xov xwm Phooj Ywg rau lub hlis no.
Vaj Ntxwv Npeyamis zaj Lus, los ntawm Jeremy Winborg