Mauxiyas 4–6

Tej lub sij hawm, txawm yog koj xav tias Vajtswv tau zam txim rau koj tej kev txhaum lawm, ua nyuaj rau koj tseem xav li ntawd thiab taug txoj kev ncaj ncees mus li. Vaj Ntxwv tau qhia nws cov neeg kom lawv paub txais tau kev zam txim rau lawv tej kev txhaum . Thaum koj kawm tshooj 4 ntawm phau Mauxiyas, tej zaum koj yuav xav nug koj tus kheej tej yam xws li no:

Nqe 1–8.Yuav tsum muaj xwm txheej dab tsi es Vajtswv thiaj li zam tau nej tej kev txhaum? Koj kawm tau dab tsi txog Nws hauv cov nqe no es ua rau koj xav hloov siab lees txim? Koj yuav ua li cas kom paub tias koj tau hloov siab lees txim?

Nqe 11–16.Raws li tej nqe no, yuav muaj li cas hauv peb lub neej yog tias peb ua raws li tej yam uas nws piav txog nyob hauv nqe 11? Koj los sis ib tug uas koj hlub puas tau hloov siab li no? Muab tej kev hloov siab no los piv rau tej hloov siab uas hais nyob hauv Mauxiyas 3:19.

Nqe 16–30.Qhov uas koj pub tej yam uas koj tau rau lwm tus pab koj li cas kom niaj hnub txais tau kev zam txim? Koj yuav ua dab tsi kom ua neeg zoo li Khetos raws li qhia hauv nqe 27 ?

Vim li cas peb zoo li cov neeg thov khawv? Raws li tej nqe no, peb yuav tsum ua li cas rau Vajtswv cov me nyuam tag nrho? (saib Mauxiyas 4:26). Leej twg xav tau koj txoj kev pab?

Kuj saib Becky Craven, “Khaws cov Nyiaj Ntxiv Rov Qab Los,” Liahona, Kaum Ib Hlis Ntuj 2020, 58–60.

Vaj Ntxwv Npeyamis cov lus caw kom ntseeg thiab tso siab rau tus Tswv tseem ceeb hnub no ib yam li puag thaum ub thiab. Thaum koj nyeem Mauxiyas 4:5–10, nrhiav cov lus tseeb txog Vajtswv uas pab tau koj ntseeg Nws. Cia li nco txog Vaj Ntxwv Npeyamis cov lus caw uas nws hais hauv nqe 10. Vim li cas yog peb ntseeg Vajtswv yuav yooj yim ua tej yam uas Vaj Ntxwv Npeyamis caw kom ua?

Tej zaum koj yuav xav nrhiav hauv cov vaj lug kub no thiab sau ntawv txog Vajtswv tej cwj pwm: Yelemis 32:17; 1 Yauhas 4:8; 2 Nifais 9:17; Amas 32:22; Maumoos 9:9; Ethaws 3:12; Lus Qhuab Qhia thiab Kev Khi Lus 19:1–3; 88:41 (kuj saib qhov vidi-aus “Christlike Attributes,” Txoj Moo Zoo cov Ntawv). Koj kuj siv tau koj cov ntawv sau pab koj sau cov kab lus no kom tiav xws li: “Vim kuv paub Vajtswv , kuv yuav tso siab rau Nws .”

Peb txoj kev tso siab rau Vajtswv loj hlob tuaj thaum peb koom nrog Nws ua neej. Nyob hauv Mauxiyas 4:1–3, muaj dab tsi uas pab Vaj Ntxwv Npeyamis cov neeg “los paub txog Vajtswv txoj kev zoo”? (nqe 6). Xav txog tej lub sij hawm thaum koj ua neej koom nrog Vajtswv. Tej xwm txheej no tau qhia dab tsi rau koj txog Nws? Koj ua dab tsi tam sim no (los yuav ua tam sim no) kom pab koj ntseeg los sis tso siab rau Vajtswv?

Kuj saib Jeffrey R. Holland, “The Grandeur of God,” Liahona, Nov. 2003, 70–73; Txoj Moo Zoo tej Ntsiab Lus “God the Father,” Txoj Moo Zoo cov Ntawv; “Kuv Paub Kuv Txiv Tseem Nyob,” Cov Nkauj Qhuas Vajtswv, zaj 143.

Vajtswv tsis muab ib daim ntawv rau peb uas qhia txog txhua yam kev txhaum. Raws li Mauxiyas 4:29–30 qhia, Nws tau ua dab tsi? Cia li xav seb koj tej kev xav, tej lus hais, thiab tej yam uas koj ua, ua dab tsi rau koj thiab lwm tus lub siab. Tej ntawd hloov tau koj txoj kev sib raug zoo nrog Vajtswv li cas? Koj “xyuas” koj tus kheej li cas?

Tib neeg ib txwm hais tias “Kuv hloov tsis taus. Kuv yeej zoo li no xwb.” Tiam sis, Vaj Ntxwv Npeyamis cov neeg qhia peb tias tus Tswv tus Ntsuj Plig yeej hloov tau peb lub siab tiag tiag. Thaum koj nyeem Mauxiyas 5:1–5, cia li xav txog qhov uas yuav ua li cas kom koj txais tau txoj kev “hloov loj” uas ua rau lawv hloov siab los ntseeg tiag tiag. Tsis yog tej yam “hloov loj” hauv koj lub neej xwb tiam sis xav txog tej yam me me uas hloov zuj zus thiab. Tej yam no pab tau koj li cas thaum koj raug kev ntxias?

Kuj saib Exekhees 36:26–27; Amas 5:14; “A Change of Heart,” “The People of King Benjamin Make a Covenant” (vidi-aus), Txoj Moo Zoo cov Ntawv.

Koj kawm dab tsi los ntawm Mauxiyas 5:7–9 txog qhov uas yus ris Khetos lub npe txhais li cas? Ob zag lus thov foom koob hmoov rau lub cim nco txog (saib Maulaunais 4–5) qhia dab tsi txog qhov no? Koj yuav ua li cas qhia tias koj “yog” tus Cawm Seej li?

Kuj saib D. Todd Christofferson, “Vim Li Cas Yuav Taug txoj Kev Ua Raws Li Kev Khi Lus,” Liahona, Tsib Hlis Ntuj 2021, 116–19.

• Kom qhia txog txoj kev xyiv fab uas los ntawm kev hloov siab lees txim, tej zaum koj xav kom koj cov me nyuam cia lawv cov tes lo tej yam nplaum los sis qias neeg thiab saib seb lawv xav li cas tom qab ntxuav tes. Ces koj kuj piv qhov ntawd rau tej yam uas cov neeg nyob hauv Mauxiyas 4:1–3 xav li cas ua ntej thiab tom qab Vajtswv zam txim rau lawv tej kev txhaum. Qhia koj zaj lus tim khawv hais txog tus Cawm Seej lub hwj chim ntxuav tau peb ntawm sab ntsuj plig.

• Koj cov me nyuam puas paub hloov siab lees txim tag nrho? Pab lawv nrhiav seb Vaj Ntxwv Npeyamis cov neeg ua dab tsi hauv Mauxiyas 4:1–3, 10. Tej zaum lawv kuj yuav xav nyeem “Hloov Siab Lees Txim” nyob hauv Guide to the Scriptures. Yexus Khetos ua dab tsi kom muaj tau kev hloov siab lees txim?

• Kev pab lwm tus neeg ua rau peb zoo siab. Tej zaum koj cov me nyuam xav qhia txog ib lub sij hawm thaum lawv hlub los sis pab lwm tus thiab qhia seb tej lub sij hawm ntawd ua rau lawv xav li cas. Vim li cas muaj cov tib neeg uas tsis xav pab lwm tus? Peb yuav hais li cas rau lwm tus kom caw tau lawv los pab cov neeg txom nyem? Nrhiav tswv yim nyob hauv Mauxiyas 4:16–26.

• Vaj Ntxwv Npeyamis qhia tias thaum peb los cuag Khetos thiab txais kev zam txim, peb yuav “muaj Vajtswv txoj kev hlub puv npo” (Mauxiyas 4:12). Qhov no yuav ua rau peb xav haj yam hlub thiab muab kev siab zoo rau lwm tus. Koj thiab koj cov me nyuam yuav xav nrhiav hauv Mauxiyas 4:13–16, 26 (los sis hauv ib zaj nkauj “I’ll Walk with You,” Children’s Songbook, 140–41) thiab nrhiav tej kab lus uas qhia tias yuav tsum pab lwm tus li cas. Ces tej zaum lawv yuav xav ua yeeb yam txog tej no los sis kos duab txog tej no thiab twv seb cov kab lus yog dab tsi. Peb yuav ua li cas kom qhia tias peb paub hlub thiab muab kev siab zoo rau lwm tus hauv tsev, tom tsev kawm ntawv, los sis tom lub koom txoos?

• Tej zaum koj cov me nyuam yuav nyiam ua daim ntawv qhia npe uas muaj lub npe “Yexus Khetos” thiab coj rau ntawm lawv lub tsho (saib lub lim tiam no phab ntawv ntxim ua). Thaum lawv ua li ntawd, koj nyeem tau rau lawv Mauxiyas 5:12 thiab sib tham txog txoj kev khi lus, los kev cog lus, nrog Vajtswv yog zoo li koj muab Khetos npe “sau hauv peb lub siab”