“Tsib Hlis Ntuj 20–26: ‘Peb Tau Khi Lus nrog Nws.’ Mauxiyas 18–24,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2024)
“Tsib Hlis Ntuj 20–26. Mauxiyas 18–24,” Los, Nrog Kuv Mus—Siv hauv Tsev thiab lub Koom Txoos: 2024 (2024)
Minerva Teichert (1888–1976), Vaj Ntxwv Leehais thiab Nws cov Neeg Dim, 1949–1951, pleev roj rau pob zeb masonite, 35 7/8 x 48 yas tes. Brigham Young University Qhov Chaw Saib Duab, 1969.
Tsib Hlis Ntuj 20–26: “Peb Tau Khi Lus nrog Nws.”
Mauxiyas 18–24
Zaj uas hais txog Amas thiab nws cov neeg nyob hauv Mauxiyas 18; 23–24 qhia tias txoj kev “los rau hauv Vajtswv pab yaj” txhais li cas (Mauxiyas 18:8). Thaum Amas cov neeg ua kev cai raus dej, lawv tau khi lus nrog Vajtswv kom “ua hauj lwm rau nws thiab ua raws li nws tej lus txib” (Mauxiyas 18:10). Txawm yog nov yog kev cog lus rau Vajtswv uas nyias ua nyias los, lawv kuj tau cog lus tias lawv ib leeg yuav ua li cas rau ib leeg. Muaj tseeb tiag, peb nyias yuav tsum taug nyias txoj kev rov qab mus cuag Leej Txiv Saum Ntuj Ceeb Tsheej, thiab tsis muaj leej twg uas txawj sawv lwm tus cev ua raws li peb tej kev khi lus, tiam si qhov no tsis hais tias peb nyob peb ib leeg xwb. Peb ib leeg xav tau ib leeg. Vim peb yog cov mej zeej hauv Khetos lub Koom Txoos, peb khi lus tias peb yuav ua hauj lwm rau Vajtswv thaum peb ib leeg pab ib leeg, “ib leeg … ris ib leeg tej nra” (Mauxiyas 18:8–10). Amas cov neeg kuj muaj tej nra ris thiab, ib yam li peb txhua tus. Thiab ib txoj kev uas tus Tswv pab peb “ris tau [peb] tej nra hnyav yam yooj yim” (Mauxiyas 24:15) yog txoj kev tsa ib Tsoom Haiv Neeg Ntseeg uas tau cog lus tias lawv yuav nyuaj siab nrog peb thiab nplij peb lub siab, ib yam li peb tau cog lus tias peb yuav ua li ntawd rau lawv.
Kuj saib “The Lord Delivers the Covenant Peoples of Alma and Limhi” (vidi-aus), Txoj Moo Zoo cov Ntawv.
Tej Tswv Yim Pab Qhia hauv Tsev thiab lub Koom Txoos
Thaum kuv ua kev cai raus dej kuv nrog Vajtswv sib khi lus.
Cia li xav txog seb cov neeg uas ntseeg heev nyob hauv Mauxiyas 18 xav li cas txog Yexus Khetos. Lawv yuav tsum sib ntsib es tsis pub neeg pom, thiab tsis yooj yim kom kawm tau txog Nws (saib nqe 3). Thiab thaum muaj ib lub sij hawm uas lawv tau qhia tau txog lawv txoj kev khi lus ua kev cai raus dej, “lawv tau npuaj tes rau kev xyiv fab, thiab qw hais tias: Qhov no yog qhov uas peb lub siab xav tau” (Mosiah 18:11).
Thaum nyeem tej nqe no, yog ib lub sij hawm zoo xav seb koj tej kev khi lus tseem ceeb npaum li cas rau koj. Thaum koj kawm Mauxiyas 18:8–14 qhov tseem ceeb, xav txog tej lus nug zoo li tej no:
-
Koj kawm dab tsi los ntawm tej nqe no txog tej yam uas koj cog lus thaum koj tau ua kev cai raus dej? Vajtswv cog lus tias yuav muab dab tsi rau koj? (saib nqe 10, 13).
-
Qhov uas peb khi lus ua hauj lwm rau Vajtswv puas muaj nqis rau peb txoj hauj lwm uas ib leeg yuav txhawb pab ib leeg? (saib nqe 8–9).
-
Qhov uas koj “ua tim khawv txog Vajtswv” muaj nqis dab tsi rau koj? (nqe 9).
-
Qhov uas koj ua raws li koj txoj kev khi lus thaum ua kev cai raus dej pab koj li cas kom “muaj tus Ntsuj Plig puv npo”? (Mauxiyas 18:14). Tus Ntsuj Plig pab koj li cas kom koj ua raws li koj txoj kev khi lus?
Teb tej lus nug li no yuav pab tau koj xav seb vim li cas tej kev khi lus thiab cov kab ke tseem ceeb heev rau Vajtswv. Tej zaum koj yuav kawm tej yam zoo los ntawm Txwj Laug Gerrit W. Gong’s zaj lus “Kev Sib Khi Lus” (Liahona, Kaum Ib Hlis Ntuj. 2019, 80–83) los sis Thawj Tswj Hwm Jean B. Bingham’s zaj lus “Tej Kev Khi Lus nrog Vajtswv Ua rau Peb Muaj Zog, Tiv Thaiv Peb, thiab Npaj Peb Txais Tau Yeeb Koob Mus Ib Txhis Li” (Liahona, Tsib Hlis Ntuj 2022, 66–69). Vim li cas koj ua Vajtswv tsaug rau koj tej kev khi lus? Koj ua dab tsi kom ua raws li koj tej lus cog tseg?
Kuj saib Txoj Moo Zoo tej Ntsiab Lus, “Kev Cai Raus Dej,” Txoj Moo Zoo cov Ntawv; “Alma the Elder Teaches and Baptizes at the Waters of Mormon” (vidi-aus), Txoj Moo Zoo cov Ntawv.
Qhia los ntawm cov vaj lug kub thiab cov yaj saub hauv hnub nyoog kawg no. Thaum koj qhia—thiab kawm—nco ntsoov tias thaum peb tsom ntsoov rau cov vaj lug kub thiab cov yaj saub hauv hnub nyoog kawg no cov lus yuav pab peb xav txog peb txoj kev ntseeg Khetos (saib Mauxiyas 18:19).
Vajtswv txib Nws cov neeg sau los ua ke, txhim tsa, thiab koom siab koom ntsws.
Muaj neeg uas xav paub, vim li cas peb yuav tsum muaj ib lub koom txoos? Nrhiav hauv Mauxiyas 18:17–31, txog tej yam uas muaj nqis uas Amas cov neeg nrhiav tau thaum lawv sau los ua ke hauv “Khetos lub koom txoos” (Mauxiyas 18:17). Koj nrhiav tau tej yam dab tsi uas zoo ib yam hauv Yexus Khetos lub Koom Txoos nyob puag taum Amas lub caij nyoog thiab niaj hnub nim no?
Koj yuav hais li cas rau ib tug phooj ywg los sis ib tug hauv koj tsev neeg thaum lawv hais tias vim li cas yuav tsum txhim tsa ib lub Koom Txoos? Vim li cas koj zoo siab ua ib tug mej zeej hauv Yexus Khetos lub Koom Txoos?
Cia li xav seb koj ua tau dab tsi kom pab cov mej zeej hauv koj pawg ntseeg los sis ceg ntseeg “muab lawv lub siab sib khi ua ke los ntawm kev koom siab koom ntsws thiab los ntawm kev ib leeg hlub ib leeg” (Mauxiyas 18:21).
Kuj saib Dallin H. Oaks, “Yuav Tsum Muaj Ib lub Koom Txoos,” Liahona, Kaum Ib Hlis Ntuj. 2021, 24–26; “Ib Leeg Hlub Ib Leeg,” Cov Nkauj Qhuas Vajtswv, zaj 145.
Vajtswv pab kuv ris kuv tej nra.
Leehais cov neeg thiab Amas cov neeg ob pawg no raug poob cev qhev, txawm yog nyias pawg muaj nyias xwm txheej. Koj yuav kawm dab tsi los ntawm kev muab zaj txog Leehais cov neeg nyob hauv Mauxiyas 19–22 piv rau zaj uas hais txog Amas cov neeg nyob hauv Mauxiyas 18; 23–24? Thaum koj ua li no, nrhiav tej yam rau koj siv hauv koj lub neej. Piv txwv hais tias, “maj mam pib vam meej” txhais li cas? (Mauxiyas 21:16). Koj yuav ua raws li lub ntsiab cai no li cas?
Kuv tso siab tau rau tus Tswv.
Txawm yog lawv twb hloov siab lees txim rau lawv tej kev txhaum lawm, Amas thiab nws cov neeg tseem raug poob cev qhev. Zaj no qhia tias kev tso siab rau tus Tswv thiab kev ua raws li peb tej kev khi lus tsis ua rau peb dim teeb meem txhua lub sij hawm, tiam sis kev tso siab rau tus Tswv yuav pab peb kov yeej tej teeb meem ntawd. Thaum koj nyeem Mauxiyas 23:21–24 thiab 24:8–17, cia li nco txog tej lus uas yuav pab koj kawm tso siab rau Vajtswv, txawm yog koj raug dab tsi los xij.
Kuj saib David A. Bednar, “Kaj Siab Ris Lawv tej Nra,” Liahona, Tsib Hlis Ntuj 2014, 87–90.
Tej Tswv Yim Pab Qhia cov Me Nyuam
Thaum kuv ua kev cai raus dej kuv nrog Vajtswv sib khi lus.
-
Ib qho tseem ceeb uas pab koj cov me nyuam npaj ua kev cai raus dej yog qhov uas koj qhia lawv txog lawv tej kev khi lus uas lawv khi thaum lawv ua kev cai raus dej. Qhov no yooj yim npaum li thaum koj muab daim duab tom kawg lub lim tiam no tus txheej txheem qhia no rau lawv saib thiab nyeem txog kev khi lus ntawd nrog lawv nyob hauv Mauxiyas 18:9–10. Cia li xav seb puas caw ib tug me nyuam uas twb tau ua kev cai raus dej lawm los qhia qhov ntawd rau cov me nyuam uas tseem yaus. Tej zaum koj cov me nyuam yuav xav hnov txog thaum koj tau ua kev cai raus dej. Koj txoj kev khi lus nrog Vajtswv tau cia koj lub neej muaj koob hmoov li cas?
-
Kuj zoo rov qab qhia cov me nyuam uas tau ua kev cai raus dej txog lawv tej kev khi lus thiab thaum lawv rov qab khi lus txhua lub lim tiam thaum lawv noj lub cim nco txog. Tej zaum koj cov me nyuam yuav xav muab kev khi lus thaum ua kev cai raus dej nyob hauv Mauxiyas 18:8–10 piv rau cov lus thov Vajtswv foom koob hmoov rau lub cim nco txog (saib Lus Qhuab Qhia thiab Kev Khi Lus 20:77, 79). Peb yuav ua li cas txhua zaus txais lub cim nco txog kom muaj ib lub sij hawm tshwj xeeb ib yam li thaum peb tau ua kev cai raus dej?
Peb khi lus nrog Vajtswv thaum peb ua kev cai raus dej.
Thaum kuv ua kev cai raus dej, kuv los ua ib tug mej zeej ntawm Yexus Khetos lub Koom Txoos.
-
Koj cov me nyuam puas paub tias thaum los ua ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg txhais li cas? Xav seb nej puas pab lawv nrhiav cov duab uas piv rau tej yam uas cov mej zeej hauv lub Koom Txoos ua nyob hauv Mauxiyas 18:17–28. Piv txwv hais tias, muab cov duab Kev Tsa rau lub Pov Thawj Hwj thiab Kev Them Ib Feem Kaum (Phau Muaj Duab txog Txoj Moo Zoo, naj npawb 106, 113) piv rau nqe 18 thiab 27–28. Qhia lawv vim li cas koj zoo siab ua tsaug ua ib tug mej zeej hauv Yexus Khetos lub Koom Txoos.
-
Thaum koj pab koj cov me nyuam “muab lawv lub siab sib khi ua ke los ntawm kev koom siab koom ntsws thiab los ntawm kev ib leeg hlub ib leeg” (Mauxiyas 18:21) ces yuav pab lawv sib raug zoo nrog lub Koom Txoos tag nrho lawv lub neej. Xav seb puas caw koj cov me nyuam los nyeem Mauxiyas 18:17–28. Nyob hauv Amas lub caij nyoog, cov mej zeej hauv Khetos lub Koom Txoos ua dab tsi kom qhia tias lawv ib leeg hlub ib leeg thiab ib leeg pab ib leeg? Peb yuav ua li cas kom ua tau li no nyob hauv peb pawg ntseeg, ceg ntseeg, los sis peb lub zej zog? Ib zaj nkauj hais txog kev hlub, ib yam li “I’ll Walk with You” (Children’s Songbook, 140), kuj qhia tau txog zaj lus no.
Vajtswv txawj pab kom kuv tej lub nra yuav sib.
-
Txoj kev siv ib yam khoom qhia yeej pab tau kom cim ntsoov tej yam uas yus kawm. Cia li xav seb puas ntim ib lub hnab nrog tej yam uas hnyav (piv txog tej nra) thiab caw ib tug me nyuam los tuav lub hnab. Thaum koj nyeem Mauxiyas 24:8–17 nrog koj cov me nyuam, nug lawv kom tshem ib yam ntawm lub hnab txhua zaus lawv hnov ib yam dab tsi uas Amas thiab nws cov neeg ua kom nrhiav tau Vajtswv txoj kev pab ris lawv tej nra. Ces tej zaum koj kuj qhia lawv txog qhov uas Leej Txiv Saum Ntuj Ceeb Tsheej yuav ua li cas kom pab peb tej nra sib thaum peb nrhiav Nws txoj kev pab.
Yog xav tau tswv yim ntxiv, saib phau xov xwm Phooj Ywg rau lub hlis no.
Cov Dej Maumoos, los ntawm Jorge Cocco