“Tsib Hlis Ntuj 27–Rau Hli Ntuj 2: ‘Lawv Hu Ua Vajtswv cov Neeg.’ Mauxiyas 25–28,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2024)
“Tsib Hlis Ntuj 27–Rau Hli Ntuj 2. Mauxiyas 25–28,” Los, Nrog Kuv Mus—Siv hauv Tsev thiab lub Koom Txoos: 2024 (2024)
Amas tus Hluas txoj Kev Hloov Siab Los Ntseeg, los ntawm Gary L. Kapp
Tsib Hlis Ntuj 27–Rau Hli Ntuj 2: “Lawv Hu Ua Vajtswv cov Neeg”
Mauxiyas 25–28
Yuav luag peb tiam neeg twb dhau mus thaum lawv nyias nyob nyias thaj av, tiam sis cov Neeg Nifais tau rov qab ua ib haiv neeg. Leehais cov neeg, Amas cov neeg, thiab Mauxiyas cov neeg—tsis hais cov neeg hauv Xalahelas uas tsis yog los ntawm Nifais—tam sim no lawv sawv daws “tau suav nrog cov Neeg Nifais” (Mauxiyas 25:13). Lawv feem coob kuj xav los ua mej zeej hauv tus Tswv lub Koom Txoos, ib yam li Amas cov neeg. Yog li ntawd txhua tus uas “xav los ris Khetos lub npe” tau ua kev cai raus dej, “thiab lawv hu ua Vajtswv cov neeg” (Mauxiyas 25:23–24). Ntau xyoo tom qab muaj kev tawm tsam thiab kev poob cev qhev, zoo li cov Neeg Nifais yuav muaj ib lub caij ntawm kev thaj yeeb.
Tiam sis tsis ntev tom qab ntawd, cov uas tsis ntseeg pib tsim txom Haiv Neeg Ntseeg. Qhov tu siab heev yog qhov uas cov uas tsis ntseeg coob yog cov ntseeg cov me nyuam—“tiam neeg uas tab tom loj hlob” (Mauxiyas 26:1), tsis hais Mauxiyas cov tub thiab Amas ib tug tub. Zaj no qhia txog ib qho txuj ci tseem ceeb thaum ib tug tim tswv tau tuaj. Tiam sis qhov txuj ci tseem ceeb hauv zaj dab neeg no tsis yog qhov uas ib tug tim tswv tuaj tshwm sim rau ib tug tub uas ua txhaum pom xwb. Kev hloov siab los ntseeg yog ib qho txuj ci tseem ceeb uas peb txhua tus yuav tsum muaj, txawm los ntawm txoj kev twg los xij.
Tej Tswv Yim Pab Qhia hauv Tsev thiab lub Koom Txoos
Kuv muaj cuab kav pab lwm tus los cuag Khetos.
Kev hloov siab los ntseeg yeej nyob ntawm ib tug neeg thiab yus muab tsis tau rau lwm tus zoo li yus muab tej cuab yeej cuab tam rau yus cov me nyuam. Thaum koj nyeem Mauxiyas 26:1–6, cia li xav txog vim li cas “tiam neeg uas tab tom loj hlob” tau poob mus, thiab saib tias lawv raug li cas vim lawv tsis ntseeg. Tej zaum koj yuav xav txog lwm tus neeg uas koj xav coj los cuag Khetos. Thaum koj kawm Mauxiyas 25–28, tej zaum tus Ntsuj Plig yuav ntxhi lus rau koj txog tej yam uas koj ua tau kom pab lawv txoj kev ntseeg Yexus Khetos loj tuaj.
Vajtswv cov tub qhe uas rau siab ntseeg xav ua raws li Nws lub siab nyiam.
Tej lub sij hawm peb xav tias ib tug thawj coj hauv lub Koom Txoos xws li Amas yuav paub txhua yam nws yuav tsum ua. Nyob hauv Mauxiyas 26 peb nyeem txog ib qho teeb meem hauv lub Koom Txoos uas Amas tsis tau pom dua. Amas tau ua dab tsi thaum lub sij hawm no? (saib Mauxiyas 26:13–14, 33–34, 38–39). Amas zaj no qhia dab tsi rau koj txog qhov uas koj yuav ua li cas thaum muaj teeb meem nyuaj heev hauv koj tsev neeg los sis hauv koj txoj kev ua hauj lwm hauv lub Koom Txoos?
Tus Tswv tau qhia dab tsi rau Amas nyob hauv Mauxiyas 26:15–32? Cia li saib hais tias ib txhia ntawm tus Tswv tej lus teb tsis yog kom teb Amas tej lus nug. Qhov no qhia dab tsi rau koj txog kev thov Vajtswv thiab kev txais kev tshwm sim?
Tej ntsiab cai kav mus ib txhis li. Cia li xav seb tej dab neeg thiab tej lus qhia hauv vaj lug kub los yuav siv li cas hauv koj lub neej. Piv txwv hais tias, koj nug tau koj tus kheej hais tias, “Kuv twb raug tej xwm txheej uas zoo li Amas?” los sis “Tej lus tseeb uas Amas qhia kuv los tej lus twg yuav pab kuv?”
Vajtswv zam txim pub rau kuv thaum kuv hloov siab lees txim thiab zam txim pub rau lwm tus.
Kev hloov siab lees txim thiab kev zam txim yeej yog ob lub ntsiab uas hais ntau nyob hauv Mauxiyas 26–27. Nrhiav tej lo lus los sis kab lus uas qhia txog kev hloov siab lees txim thiab kev zam txim nyob hauv Mauxiyas 26:22–24, 29–31; 27:23–37.
Tej lub sij hawm tib neeg xav paub seb Vajtswv puas zam txim rau lawv tiag tiag. Koj xav tias Amas tus Laus yuav qhia dab tsi rau ib tug mej zeej hauv lub Koom Txoos nyob hauv Xalahelas uas txhawj txog qhov ntawd? Tus Tswv tau qhia dab tsi rau Amas nyob hauv Mauxiyas 26:15–31 uas yuav pab lub Koom Txoos tus mej zeej no? (kuj saib Maulaunais 6:8; Lus Qhuab Qhia thiab Kev Khi Lus 19:16–18; 58:42–43).
Los ntawm Yexus Khetos, kuv muaj peev xwm hloov los ua neeg zoo dua.
Txhua tus twb paub lawm tias Amas tus Hluas yuav tsum yug dua tshiab ntawm sab ntsuj plig. Nws thiab Mauxiyas cov tub yog “cov neeg ua txhaum uas phem tshaj plaws” (Mauxiyas 28:4). Tiam sis tsis ntev tom qab nws hloov siab los ntseeg, Amas ua tim khawv tias txhua leej txhua tus yuav tsum hloov siab los ntseeg—rau txhua leej txhua tus: Nws hais tias, “Tsis txhob xav tsis thoob tias tib neeg sawv daws … yuav tsum yug dua tshiab” (Mauxiyas 27:25; ntxiv qhov uas ntawv qaij).
Thaum koj nyeem txog Amas tej xwm txheej nyob hauv Mauxiyas 27:8–37, xav seb yuav zoo li cas yog koj pauv nws chaw. Koj puas txawj xav txog tej yam uas yuav tsum hloov ntawm koj tus kheej? Leej twg, zoo li Amas txiv, Vajtswv pab koj “nrog kev ntseeg ntau heev”? Tej yam twg tau pab “ua kom koj paub txog Vajtswv lub hwj chim thiab txoj cai”? (Mauxiyas 27:14). Tus Tswv tau ua “tej yam tseem ceeb” twg rau koj los sis koj tsev neeg uas koj yuav tsum “nco ntsoov”? (Mauxiyas 27:16). Koj kawm dab tsi los ntawm Amas tus Hluas tej lus thiab tej yam nws tau ua txog qhov uas kev yug dua tshiab txhais li cas? Koj tau pom tej yam twg uas yog yam ntxwv txog qhov no?
Siv sij hawm me ntsis sau ntawv txog tej yam uas tus Cawm Seej ua kom pab koj hloov siab—los sis yug dua tshiab—txawm yog koj tsis tau raug ib yam loj npaum li Amas los xij. Puas muaj ib zaj nkauj uas koj xav hu nkauj los sis mloog uas qhia tias koj xav li cas, xws li “Kuv Zoo Siab Yexus Hlub Kuv”? (Cov Nkauj Qhuas Vajtswv, zaj 82). Leej twg yuav tau txais txiaj ntsig los ntawm tej yam uas koj kawm hauv koj lub neej txog qhov no?
Txwj Laug David A. Bednar muab tus txheej txheem yug los dua tshiab piv rau txoj kev uas ib lub dib hloov los ua dib qaub (saib “Ye Must Be Born Again,” Liahona, Tsib Hlis Ntuj 2007, 19–22). Qhov no qhia dab tsi rau koj txog txoj kev hloov siab los ntseeg?
Kuj saib Txoj Moo Zoo tej Ntsiab Lus, “Become like Jesus Christ,” Txoj Moo Zoo cov Ntawv; “Alma Testifies He Has Been Born of God” (vidi-aus), Txoj Moo Zoo cov Ntawv.
Vajtswv hnov kuv tej lus thov thiab yuav teb raws li Nws lub siab nyiam thiab Nws lub sij hawm.
Tej zaum koj zoo li Amas tus Laus vim muaj ib tug hauv koj tsev neeg uas xaiv tej yam tsis zoo. Koj kawm dab tsi nyob hauv Mauxiyas 27:8–24 uas ua rau koj muaj kev cia siab? Tej nqe no yuav ua rau koj hloov koj tej kev thov Vajtswv li cas thaum koj thov pab lwm tus?
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Tus Tswv xav kom kuv zam txim pub rau lwm tus.
-
Kom pab koj cov me nyuam paub tias tus Tswv qhia dab tsi rau Amas txog kev zam txim, tej zaum koj yuav xav caw lawv nyeem Mauxiyas 26:29–31 thiab suav pes tsawg zaus muaj lo lus “zam txim.” Tej nqe no qhia dab tsi txog kev zam txim pub rau lwm tus? (Kuj saib “Help Me, Dear Father,” Children’s Songbook, 99.)
-
Xwv kom qhia txog tus Cawm Seej tus yam txwv txog kev zam txim, tej zaum koj yuav xav muab ib daim duab txog Nws saum tus ntoo khaub lig rau lawv saib thiab nyeem Lukas 23:33–34 ua ke. Yexus tau thov Leej Txiv Saum Ntuj Ceeb Tsheej ua li cas rau cov neeg uas tau muab Nws ntsia saum tus ntoo khaub lig? Tom qab nej sib tham, tej zaum koj cov me nyuam yuav xav ua yeeb yam txog kev zam txim.
-
Tej lub sij hawm ua nyuaj rau peb zam txim rau peb tus kheej thaum peb ua yuam kev. Vajtswv tej lus uas Nws hais rau Amas pab li cas? Tej zaum koj cov me nyuam yuav xav ua yeeb yam txog qhov uas lawv nrog ib tug neeg tham es tus neeg ntawd tsis xav tias Vajtswv yuav zam txim pub rau lawv. Caw koj cov me nyuam kom nrhiav ib yam nyob hauv Mauxiyas 26:22–23, 29–30 uas yuav pab tus neeg ntawd.
Yexus Khetos pab kuv hloov los ua neeg zoo li Nws ntxiv.
-
Tej zaum Amas tus Hluas thiab Mauxiyas cov tub pib txoj kev hloov siab los ntseeg yuav qhia koj cov me nyuam tias, thaum muaj tus Cawm Seej lub hwj chim, txhua tus muaj peev xwm hloov siab. Koj los sis koj cov me nyuam siv tau cov duab hauv tus txheej txheem qhia no, phab ntawv ntxim ua rau lub lim tiam no, thiab ob peb nqe vaj lug kub los ntawm Mauxiyas 27:8–37 kom qhia zaj dab neeg no (kuj saib “Tshooj 18: Amas tus Hluas Hloov Siab Lees Txim,” nyob hauv Cov Dab Neeg hauv Phau Ntawv Maumoos, 49–52). Qhov tseem ceeb tsom ntsoov rau nqe 24, kom qhia tias Amas tau hloov siab lees txim thiab Yexus Khetos tau pab nws hloov siab. Cia koj cov me nyuam ua yeeb yam txog zaj dab neeg no yog tias lawv xav ua li ntawd.
Nws Txiv Zoo Siab, los ntawm Walter Rane
Kuv thov Vajtswv thiab yoo mov kom Vajtswv foom koob hmoov rau cov neeg uas kuv hlub.
-
Cia li nyeem Mauxiyas 27:8–24 ua ke, thiab hais kom koj cov me nyuam qhia tias Amas thiab nws cov neeg tau ua dab tsi kom pab Amas tus Hluas. Koj puas tau thov Vajtswv thiab yoo mov kom pab ib tug neeg? Qhia zaj no rau koj cov me nyuam, thiab cia lawv qhia koj.
-
Koj los sis koj cov me nyuam puas paub ib tug neeg uas xav tau Vajtswv txoj kev pab? Raws li Amas tus yam ntxwv, tej zaum nej yuav xav thov Vajtswv ua ke rau tus neeg ntawd, thiab yog koj cov me nyuam ua taus, yoo mov kom pab lawv thiab.
Yog xav tau tswv yim ntxiv, saib phau xov xwm Phooj Ywg rau lub hlis no.
Daim duab txog ib tug tim tswv tshwm sim rau Amas tus Hluas, los ntawm Kevin Keele