“Rau Hli Ntuj 24–30: ‘Nkag Mus rau Hauv tus Tswv Qhov Chaw So.’ Amas 13–16,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Rau Hli Ntuj 24–30. Amas 13–16,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Daim duab txog Amas thiab Amulej txoj kev dim lub tsev kaw, los ntawm Andrew Bosley
Rau Hli Ntuj 24–30: “Nkag Mus rau Hauv tus Tswv Qhov Chaw So”
Amas 13–16
Feem ntau, Amulej thiab Xi-elas twb muaj lub neej zoo nyob hauv Amoonaihas. Amulej yog “ib tug neeg uas muaj suab npe,” uas muaj “kwv tij neej tsa thiab phooj ywg coob” thiab “muaj kev nplua nuj heev” (Amas 10:4). Xi-elas yog ib tug kws lij choj uas txawj tshaj thiab “muaj hauj lwm ntau ua heev” (Amas 10:31). Ces Amas tuaj txog kom caw lawv hloov siab lees txim thiab “nkag mus rau hauv tus Tswv qhov chaw so” (Amas 13:16). Amulej, Xi-elas, thiab lwm tus, lawv yuav tsum tso ntau yam tseg thiab raug tej kev txom nyem loj kawg nkaus kom lees txais nws txoj kev caw no.
Tiam sis zaj no tsis tau tag ntawm no. Nyob hauv Amas 13–16, peb kawm txog qhov uas thaum kawg yuav muaj li cas rau cov neeg uas ntseeg “Khetos lub hwj chim uas cawm tau tib neeg” (Amas 15:6). Tej lub sij hawm peb txais kev dim, tej lub sij hawm peb txais kev kho mob—thiab tej lub sij hawm peb lub neej yeej nyuaj npaum li qub. Tiam sis txhua lub sij hawm, “tus Tswv twb txais [Nws cov neeg] mus rau nws tus kheej, nyob hauv yeeb koob” (Amas 14:11). Txhua lub sij hawm, tus Tswv “pub hwj chim rau [peb], raws li [peb] txoj kev ntseeg uas yog txoj kev ntseeg Khetos” (Amas 14:28). Thiab txhua lub sij hawm, txoj kev ntseeg ntawd ua rau peb muaj “kev cia siab tias [peb] yuav tau txais txoj sia nyob mus ib txhis” (Amas 13:29). Thaum nej nyeem tej tshooj no, nej yeej txais tau kev nplij siab los ntawm tej lus cog tseg no, thiab nej yuav to taub zoo dua ntxiv txog qhov uas Amas hais thaum nws hais txog “tus Tswv qhov chaw so” (Amas 13:16).
Tej Tswv Yim Pab Qhia hauv Tsev thiab lub Koom Txoos
Cov kab ke pov thawj hwj pab kuv saib ntsoov Yexus Khetos thov kev txhiv dim.
Amas tej lus qhia nyob hauv Amas 13 qhia ntau yam tseeb txog Vajtswv lub pov thawj hwj thiab lub hom phiaj ntawm lub pov thawj hwj ntawd—kom pab peb yuav nkag tau mus rau hauv “tus Tswv qhov chaw so,” uas yog txoj sia nyob mus ib txhis (Amas 13:16). Tej zaum koj yuav xav sau ib yam tseeb rau txhua nqe hauv Amas 13:1–19. Nov yog ob peb lub tswv yim kom pab koj pib ua li ntawd:
-
Nqe 1.Lub pov thawj hwj kuj hu ua “raws li tus txheej txheem ntawm [Vajtswv] Leej Tub” (kuj saib Lus Qhuab Qhia thiab Kev Khi Lus 107:1–4).
-
Nqe 2.Vajtswv tsa cov pov thawj hwj kom pab tib neeg cia siab rau Nws Leej Tub kom txais tau kev txhiv dim.
Koj nrhiav tau dab tsi ntxiv? Koj xav li cas txog lub pov thawj hwj thaum koj xav txog tej yam tseeb no?
Koj puas tau xav tias cov kab ke pov thawj hwj yog lub txiaj ntsim los ntawm Vajtswv uas pab koj “saib ntsoov Khetos thov kev txhiv dim?” (nqe 2; kuj saib nqe 16). Tej zaum koj xav sau txog cov kab ke uas koj tau txais, ib yam li txoj kev cai raus dej, kev pom zoo, lub cim nco txog, raug tsa los ua ib txoj kev hu, ib txoj koob hmoov nplij siab los yog kho mob, tus yawg suab txoj koob hmoov, thiab lub tuam tsev tej kab ke. Cia li xav txog tej lub sij hawm thaum koj tau txais cov kab ke zoo li no. Xav txog kev siv tej lub cim thiab tus Ntsuj Plig uas koj tau hnov. Cov kab ke no pab koj saib ntsoov Yexus Khetos thov kev txhiv dim li cas?
Ib txhia neeg xav tsis yog hais tias tsis tas ua cov kab ke thiab tsis tas muaj txoj cai pov thawj hwj los ua tej kab ke ntawd. Koj yuav hais li cas txog lub tswv yim no? Nov yog ob zaj lus los ntawm lub Tuam Rooj Sab Laj uas pab koj xav; cia li xaiv ib zaj, thiab sau tej lus teb uas koj xav txogj: Russell M. Nelson, “Tej Nqi Zog ntawm Sab Ntsuj Plig,” Liahona, Kaum Ib Hlis Ntuj 2019, 76–79; Dale G. Renlund, “Lub Pov Thawj Hwj thiab tus Cawm Seej lub Hwj Chim Theej Txhoj,” Liahona, Kaum Ib Hlis Ntuj 2017, 64–67.
Kuj saib Lus Qhuab Qhia thiab Kev Khi Lus 84:19–22; Txoj Moo Zoo tej Ntsiab Lus, “Khi Lus,” Txoj Moo Zoo cov Ntawv.
Cov kab ke pov thawj hwj pab peb saib ntsoov Yexus Khetos thov kev txhiv dim.
Tus Tswv caw kom kuv nkag rau hauv Nws qhov chaw so.
Kev caw kom “nkag mus rau hauv tus Tswv qhov chaw so” (Amas 13:16) los hais ntau zaus hauv Amas 13. Tej zaum koj yuav xav nrhiav txhua nqe uas muaj lo lus “so” thiab xav txog tej yam txhua nqe qhia koj txog “tus Tswv qhov chaw so.” Tus Tswv qhov chaw so txawv ntawm kev so ntawm yus lub cev nqaij daim tawv? Peb nrhiav li cas?
Kuj saib Russell M. Nelson, “Kov Yeej lub Ntiaj Teb thiab Nrhiav Tau Kev So,” Liahona, Kaum Ib Hlis Ntuj 2022, 95–98; “Los Cuag Tswv Yexus,” Cov Nkauj Qhuas Vajtswv, no. 42.
Peb yuav tsum tso siab rau tus Tswv thaum muaj kev txom nyem.
Tej zaum koj yuav xav paub, ib yam li neeg coob xav paub, vim li cas tej yam phem heev raug cov neeg uas sim ua neej ncaj ncees. Tej zaum koj yuav nrhiav tsis tau txhua yam uas teb tau txoj lus nug nyuaj heev nyob hauv Amas 14, tiam sis muaj ntau yam uas koj kawm tau los ntawm tej yam uas Amas thiab Amulej ua thaum nkawd raug xwm txheej li no. Nkawd tej lus thiab tej yam lawv ua qhia dab tsi rau koj txog qhov uas vim li cas muaj tej lub sij hawm uas tus Tswv cia cov ncaj ncees raug txom nyem? Koj xav tias Amas thiab Amulej yuav hais kom peb ua dab tsi thaum peb ntsib tej kev sim siab nyuaj heev?
Kuj saib Loos 8:35–39; 1 Petus 4:12–14; Lus Qhuab Qhia thiab Kev Khi Lus 122:5–9; Dale G. Renlund, “Tej Yam Tsis Ncaj uas Ua rau Yus Chim,” Liahona, Tsib Hlis Ntuj 2021, 41–45.
Ua tib zoo npaj txhua lub sij hawm. Tej lub sij hawm zoo qhia los dhau mus sai heev, yog li ntawd ua tib zoo qhia thaum muaj sij hawm. Piv txwv hais tias, thaum lub ntiaj teb raug xwm txheej, tej zaum lub sij hawm ntawd yog ib lub cib fim qhia tej ntsiab cai los ntawm Amas 14 txog vim li cas uas tus Tswv cia cov neeg uas tsis muaj txim raug txom nyem.
Yuav tsum ua kev txi kom ua ib tug thwj tim.
Tej zaum yuav zoo yog koj sau ntawv txog tej yam uas Amulej tau tso tseg kom nws thiaj li txais tau txoj moo zoo (saib Amas 10:4–5; 15:16) thiab muab piv rau tej yam uas nws tau txais (saib Amas 15:18; 16:13–15; 34:8). Koj txaus siab tso tej yam twg tseg kom thiaj li rau siab ntxiv ua Yexus Khetos ib tug thwj tim uas rau siab ntseeg?
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Vim hnub Sunday no yog hnub Sunday thib tsib rau lub hlis no, xav kom cov xib hwb hauv lub Koom Haum Me Nyuam Yaus siv tej yam ntxim kawm uas nyob hauv “Ntaub Ntawv Ntxiv tom Kawg B: Npaj cov Me Nyuam Taug Vajtswv txoj Kev Ua Raws Li Kev Khi Lus Tas Ib Sim Neej.”
Lub hwj chim pov thawj hwj pab kuv los cuag Khetos.
-
Ib txoj kev pab koj cov me nyuam kawm tias lub hwj chim pov thawj hwj ua rau peb tsom ntsoov rau Yexus Khetos yog kev muab daim duab rau lawv saib tias tib neeg siv lub hwj chim pov thawj hwj li cas (saib Phau Muaj Duab txog Txoj Moo Zoo, naj npawb 103–110). Tej zaum koj cov me nyuam yuav xav pab koj xav txog tej yam uas Yexus ua kom siv Nws lub hwj chim (piv txwv, saib, Mathais 26:26–28; Malakaus 5:22–24, 35–43; Phau Muaj Duab txog Txoj Moo Zoo, naj npawb 38–41). Ces koj nyeem tau Amas 13:2 thiab sib tham txog lub hwj chim ntawm lub pov thawj hwj pab peb “cia siab tos ntsoov [Vajtswv] Leej Tub” thiab hloov los ua neeg zoo li Nws.
-
Vim li cas Vajtswv muab cov kab ke pov thawj hwj rau peb? Pab koj cov me nyuam nrhiav tej lus teb hauv Amas 13:16. Yog hais tias lawv xav tau kev pab kom to taub ib txoj kab ke, muaj cov npe hauv General Handbook, 18.1 thiab 18.2. Tej zaum koj thiab koj cov me nyuam yuav xav sib tham txog tej yam uas muaj los rau nej tom qab tau txais cov kab ke no. Cov kab ke pab peb “cia siab tos ntsoov [Yexus Khetos] kom txais kev zam txim rau [peb] tej kev txhaum” li cas? Ib zaj nkauj zoo li “When I Am Baptized” (Children’s Songbook, 103) pab tau koj cov me nyuam xav txog lwm yam uas ua rau yus ua Vajtswv tsaug rau cov kab ke pov thawj hwj.
Yexus Khetos muaj peev xwm ntxuav kuv huv.
-
Tom qab nej nyeem tej nqe no ua ke, tej zaum koj yuav xav pab koj cov me nyuam xav txog tej yam uas lawv qhia. Tej zaum nej yuav xav ntxuav tau ib yam dab tsi ua ke. Peb xav li cas thaum peb qias neeg? Peb xav li cas thaum peb rov qab huv lawm? Tej kev xav no puas zoo ib yam li peb xav thaum peb ua txhaum ces peb hloov siab lees txim thiab rov qab los ua neeg huv los ntawm tus Cawm Seej txoj Kev Theej Txhoj?
Leej Txiv Saum Ntuj Ceeb Tsheej txhawb kuv lub dag zog thaum kuv ntseeg Yexus Khetos (Amas 14:18–29).
-
Phab ntawv ntxim ua rau lub lim tiam no pab tau koj—los yog koj cov me nyuam—piav zaj dab neeg hauv Amas 14:18–29 (kuj saib “Tshooj 22: Amas Mus Ua Tub Txib rau Amoonaihas,” Cov Dab Neeg hauv Phau Ntawv Maumoos, 58–63). Cia li qhia tias Amas thiab Amulej tau txais lub zog los ntawm nkawd “txoj kev ntseeg Khetos” (Amas 14:26). Tej zaum koj kuj yuav xav hais txog ib zaug thaum Vajtswv muab zog rau koj “raws li [koj] txoj kev ntseeg.” Peb yuav tsum ua li cas kom muaj kev ntseeg zoo li Amas thiab Amulej?
5:47Chapter 22: Alma’s Mission to Ammonihah
Yexus Khetos muaj hwj chim hloov peb lub siab.
-
Xi-elas txoj kev hloov siab dhau los ntawm Yexus Khetos yog ib zaj uas tshoov yus lub siab. Xav saib puas tsim nyog rov qab tshab xyuas tej yam lawv tau kawm lub lim tiam dhau los txog Xi-elas. Ces, koj nyeem tau Amas 15:3–12 ua ke kom paub tias nws tau hloov siab li cas. Peb kawm dab tsi los ntawm lub sij hawm uas Xi-elas kawm txog tus Tswv lub hwj chim? (saib “Zeezrom Is Healed and Baptized” [vidi-aus], Txoj Moo Zoo cov Ntawv).
2:43Zeezrom Is Healed and Baptized | Alma 15
Yog xav tau tswv yim ntxiv, saib phau xov xwm Phooj Ywg rau lub hlis no.
Amas thiab Amulej Nyob hauv lub Tsev Kaw, los ntawm Gary L. Kapp