Mauxiyas 11–17

Thaum koj kawm Mauxiyas 11–13; 17, saib cov duab txog Anpinadais hauv zaj lus no. Koj kawm dab tsi txog kev ua tim khawv txog Khetos? Qhov tseem ceeb, koj kawm tau tej nqe thiab tej lus nug zoo li no:

• Koj yuav piav txog Nau-as thiab nws cov neeg li cas? Vim li cas Anpinadais yuav tsum ua siab loj kom qhia Vajtswv cov lus rau lawv? (saib Mauxiyas 11:1–19, 27–29; 12:9–15).

• Koj yuav piav txog Anpinadais li cas? Anpinadais to taub dab tsi uas pab nws ua siab loj hauv nws cov lus tim khawv? (saib Mauxiyas 13:2–9, 28, 33–35; 17:8–10, 20).

Puas muaj sij hawm thaum koj xav tias koj sawv koj ib leeg tiv thaiv tus Cawm Seej thiab Nws txoj moo zoo? Nws tau ua li cas pab koj paub tias Nws nrog koj nyob? Thaum koj xav txog qhov no, koj kuj nyeem zaj uas hais txog Elisas thiab nws tus tub qhe nyob hauv 2 Vaj Ntxwv 6:14–17. Muaj dab tsi uas tshoov koj lub siab txog zaj no?

Koj kuj nrhiav phab 31–33 ntawm Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv kom nrhiav tej lus uas pab koj ua siab loj tiv thaiv qhov tseeb? Los yog koj ua ib yam hauv cov lus ntawm ib zaj nkauj li Ua Qhov uas Yog” los yog “Cia Peb Sawv Daws Ua Vajtswv Tes Num” (Cov Nkauj Qhuas Vajtswv, zaj 109, 113).

Koj yuav ua li cas kom ua raws li tej yam uas koj kawm los ntawm Anpinadais? Qhov vidi-aus “Dare to Stand Alone” (Txoj Moo Zoo cov Ntawv) qhia txog tej xwm txheej uas koj sawv ruaj khov rau Khetos thiab Nws txoj moo zoo tau. Koj nrhiav tau tej yam ntxwv ntxiv twg?

Kuj saib Loos 1:16; 2 Timautes 1:7–8; “Chapter 8: The Call for Courage,” Teachings of Presidents of the Church: Thomas S. Monson (2022), 135–47; Txoj Moo Zoo tej Ntsiab Lus, “Faith in Jesus Christ,” Txoj Moo Zoo cov Ntawv.

Vaj Ntxwv Nau-as cov pov thawj paub Vajtswv txoj lus. Lawv txawj hais tej nqe vaj lug kub thiab lawv hais tias lawv qhia cov lus txib. Tiam sis, zoo li lawv tsis ua neej raws li tus Cawm Seej txoj moo zoo hlo li. Vim li cas?

Xav txog qhov no thaum koj nyeem Mauxiyas 12:19–37. Koj xav tias yus ua li cas thaum yus muab yus lub siab tsom ntsoov kom to taub Vajtswv txoj lus? Tej lus twg tshoov koj lub siab kom hloov koj txoj kev kawm txog txoj moo zoo?

Xav txog Anpinadais kev soj ntsuam tias cov lus txib “tsis tau muab tej lus txib ntawd sau rau hauv [cov pov thawj] lub siab” (Mauxiyas 13:11). Zaj lus no txhais li cas? Thaum koj nyeem Mauxiyas 13:11–26, xav seb koj puas tau muab cov lus txib sau rau hauv koj lub siab.

Kuj saib Yelemis 31:31–34; 2 Kauleethaus 3:3.

Nyob hauv Mauxiyas 14–15, cia li xav txog tej lus uas piav txog tus Cawm Seej thiab tej uas Nws raug txom nyem rau koj. Tej nqe twg pab koj hlub Nws ntxiv thiab ris Nws txiaj ntxiv?

Anpinadais tau qhia tias Vajtswv uas yog Leej Tub—Yehauvas—yuav los ua tus Txhiv Dim (saib Mauxiyas 15:1), thaum ua neej ntawm sab cev nqaij daim tawv, los ua tib neeg thiab los ua Vajtswv (nqe 2–3). Nws ywj Nws tus kheej rau Vajtswv uas yog Leej Txiv lub siab nyiam tag nrho (nqe 5–9). Vim yog li no, Yexus Khetos yog Vajtswv Leej Tub thiab tus uas zoo ib yam li Vajtswv uas yog Leej Txiv nyob hauv lub ntiaj teb (saib Yauhas 14:6–10).

Yexus Khetos kuj yog Leej Txiv vim thaum peb lees yuav Nws txoj kev txhiv peb dim, peb hloov los ua “nws cov tub ki” thiab “yuav tau Vajtswv lub nceeg vaj los ua lawv tug” (Mauxiyas 15:11–12). Los yog hais tias, Nws ua kom peb rov qab yug los ntawm sab ntsuj plig (saib Mauxiyas 5:7).

Koj xav tias vim li cas thiaj tseem ceeb paub tej lus tseeb no txog Leej Txiv Saum Ntuj Ceeb Tsheej thiab Yexus Khetos? Anpinadais cov lus tim khawv txhawb koj txoj kev ntseeg Nkawd li cas?

• Muaj tej lub sij hawm hauv peb lub neej, peb ntsib kev nyuaj siab los xaiv tej yam uas tawm tsam peb txoj kev ntseeg Yexus Khetos. Koj cov me nyuam kawm dab tsi los ntawm Anpinadais txog txoj kev ua tim khawv txog Yexus Khetos, txawm tias tsis muaj neeg coob nyiam? Cov duab hauv tus txheej txheem qhia no los yog “Tshooj 14: Anpinadais thiab Vaj Ntxwv Nau-as” (nyob hauv Cov Dab Neeg hauv Phau Ntawv Maumoos, 38–42) pab kom lawv xav txog zaj dab neeg hauv Mauxiyas 11–13; 17. Nug seb lawv nyiam dab tsi txog Anpinadais.

• Tej zaum koj cov me nyuam yuav nyiam ua yeeb yam txog Anpinadais zaj dab neeg. Ces lawv ua tau yeeb yam txog tej xwm txheej uas pab lawv xyaum tej yam lawv yuav ua yog lwm tus xav kom lawv ua tej yam tsis yog. Los yog lawv hais txog tej lub sij hawm lawv ua siab loj thaum coj raws li Yexus Khetos. Anpinadais tau coj raws li Yexus Khetos li cas? (saib Mauxiyas 13:2–9; 17:7–10. Vim li cas Vaj Ntxwv Nau-as tsis ua qhov uas nws paub tias yog qhov yog? (saib Mauxiyas 17:11–12).

• Vaj ntxwv Nau-as cov pov thawj paub cov lus txib tiam sis tsis tau “muab sau rau hauv [lawv] lub siab” (Mauxiyas 13:11). Koj yuav ua li cas kom pab koj cov me nyuam paub cov lus txib thiab hlub cov lus txib? Tej zaum lawv yuav xav sau cov lus txib los ntawm Mauxiyas 12:33–36 thiab 13:11–24 rau tej daim ntawv uas muaj ntsis zoo li lub plawv. Thaum lawv ua li ntawd, nrog lawv sib tham txog cov lus txib txhais li cas thiab yuav ua li cas kom coj raws li cov lus txib. Peb yuav ua li cas kom muab cov lus txib sau rau hauv peb lub siab?

• Tej zaum nej yuav xav hu ib zaj nkauj ua ke txog cov lus txib, xws li “Keep the Commandments” (Children’s Songbook, 146–47). Peb tau tej koob hmoov twg thaum peb ua raws li cov lus txib?

• Txawm yog ib tshooj luv, Mauxiyas 14 muaj ob peb lo lus uas piav txog Yexus Khetos. Tej zaum koj thiab koj cov me nyuam yuav xav hais tej lus ntawd thaum nej nyeem tshooj no ua ke. Ces, tej zaum nej yuav xav sib tham txog nej txoj kev xav txog tus Cawm Seej thaum nej kawm cov lus.

• Anpinadais hais lus los ntawm tus yaj saub Yaxayas uas muab peb piv rau cov yaj uas ploj lawm thaum nws qhia txog Yexus Khetos. Tej zaum koj cov me nyuam yuav xav hais txog tej lub sij hawm thaum lawv lawv poob ib yam dab tsi los yog lawv poob zoo. Ua rau lawv xav li cas? Lawv tau ua dab tsi? Ces, nej nyeem ua ke Mauxiyas 14:6 thiab 16:4–9 los tau. Vim li cas peb zoo li cov yaj uas mus deb ntawm Vajtswv? Yexus Khetos ua li cas kom pab peb rov los?