Enos–Maumoos cov Lus

Tej zaum koj txoj kev thov Vajtswv yuav tsis zoo li Enos, tiam sis yeej yuav muaj nqis zoo ib yam. Nov yog tej lus nug rau koj xav txog thaum koj kawm Enos 1:1–17:

• Tej lus twg piav txog Enos txoj kev siv zog thov Vajtswv?

• Enos tej lus thov tau hloov li cas nyob hauv nqe 4 txog 11?

• Kuv kawm dab tsi los ntawm Enos uas yuav pab kuv thov Vajtswv zoo dua?

Kuj saib “Enos Prays Mightily” (vidi-aus), Txoj Moo Zoo cov Ntawv; “Kev Thov Vajtswv,” Cov Nkauj Qhuas Vajtswv, zaj 57.

Tej zaum muaj ib tug hauv koj tsev neeg uas koj xav kom pab los cuag Khetos, tiam sis koj xav paub seb koj txoj kev siv zog puas pab tiag tiag. Koj kawm tau dab tsi los ntawm Enos 1:1–4 txog Yakhauj txoj kev pab nws tus tub Enos? Piv txwv hais tias, koj xav tias cov lus “tus Tswv tej kev cob qhia thiab kev qhuab ntuas” txhais li cas? Koj yuav ua li cas kom caw Nws nyob hauv koj tsev?

Thaum koj xav txog koj tsev neeg, cia li xav txog tej lus nug thiab tej kev pab no?

• Koj yuav ua li cas kom pab koj tsev neeg ua zoo? (saib 1 Nifais 2:16–18; 3:15–21; 5:1–6; 7:20–21; Amas 36:17–20; “Tsev Neeg: Ib zaj Lus Tshaj Tawm rau lub Ntiaj Teb”). Koj yuav ua li cas yog tias muaj neeg uas tsis xav tau koj txoj kev pab los sis ua tsis zoo rau koj?

• Koj kawm tej lub ntsiab cai twg nyob hauv tej nqe vaj lug kub no uas pab koj sib haum xeeb nrog koj tsev neeg? Mathais 5:21–24, 38–44; 6:14; 7:1–5; 22:36–39; 3 Nifais 18:21; Maulaunais 7:33; Lus Qhuab Qhia thiab Kev Khi Lus 18:10–13.

Txwj Laug Dieter F. Uchtdorf tau qhia tej yam uas pab tau koj tsev neeg nyob hauv “Qhuas cov uas Cawm Lwm Tus” (Ensign los sis Liahona, Tsib Hlis Ntuj 2016, 77–80). Nws zaj lus tshoov koj lub siab ua dab tsi kom txhawb koj tsev neeg lub zog? (qhov tseem ceeb saib feem hu ua “Cawm Peb Tsev Neeg”).

Kuj saib Txoj Moo Zoo tej Ntsiab Lus, “Family,” Txoj Moo Zoo cov Ntawv; “Home and Family—Through Small Things” (vidi-aus), Txoj Moo Zoo cov Ntawv.

Tej lub sij hawm koj yuav xav paub seb puas tau zam txim rau koj tej kev txhaum, tsis hais tom qab koj twb hloov siab lees txim rau tej kev txhaum ntawd. Koj kawm dab tsi los ntawm Enos zaj lus nyob hauv Enos 1:1–8? Enos tau ua li cas kom qhia tias nws ntseeg Yexus Khetos ua ntej thiab tom qab nws tau txais kev zam txim?

Phau Yaloos thiab phau Oonis piav txog qhov uas kev ncaj ncees thiab kev vam meej sib khi li cas. Koj kawm dab tsi los ntawm Yaloos 1:7–12; Oonis 1:5–7, 12–18? Neeg ntiaj teb txoj kev vam meej thiab tus Tswv txoj kev vam meej txawv li cas? Tus Tswv ua dab tsi kom pab Nws cov neeg vam meej? (saib Amas 37:13; 48:15–16).

Cov lus “Los cuag Khetos” los hais ntau zaus nyob hauv Phau Ntawv Maumoos. Muaj tseeb tiag, ib lub hom phiaj tseem ceeb ntawm phau ntawv no yog kev caw txhua leej txhua tus ua li no. Thaum koj nyeem Oonis 1:25–26, koj nrhiav tau tej lo lus los sis kab lus uas piav tias yuav ua li cas kom los cuag Khetos? Koj yuav ua li cas kom los cuag Nws ntxiv?

Tus Tswv tau tshoov Maumoos lub siab kom tso Nifais cov phiaj me hauv Phau Ntawv Maumoos vim tias Vajtswv paub tias thawj 116 phab ntawv yuav ploj mus (saib Lus Qhuab Qhia thiab Kev Khi Lus 10; Saints, phau 1, tshooj 5). Vim li cas koj zoo siab uas Maumoos tau ua raws li tus Tswv tej lus qhia kom tso tej lus sau rau hauv phau no (uas yog phau 1 Nifais txog phau Oonis)? Maumoos tau hais dab tsi txog qhov uas vim li cas nws muab tso rau haud? (saib Maumoos cov Lus 1:3–7). Thaum twg koj tau pom Vajtswv ua hauj lwm dhau los ntawm koj los sis lwm tus?

• Koj pab tau koj cov me nyuam kom lawv txoj kev thov Vajtswv muaj nqis heev? Xav seb puas muab ib daim duab txog Enos kev thov Vajtswv; cia lawv piav txog tej yam uas lawv pom. Ces hais kom lawv qi muag thiab xav tias lawv tab tom sib tham nrog Leej Txiv Saum Ntuj Ceeb Tsheej tim ntsej tim muag. Lawv yuav xav hais txog dab tsi? Nws yuav hais li cas rau lawv?

• Thaum koj nyeem Enos 1:1–5, tej zaum cov me nyuam yaus yuav xav ua txuj tias lawv yog Enos uas mus plob hav zoov, txhos caug thov Vajtswv, thiab li ntawd. Tej zaum cov me nyuam loj zog yuav xav mloog seb puas muaj ib lo lus los sis ib kab lus uas piav txog Enos txoj kev thov Vajtswv. Tej lus no qhia dab tsi rau peb txog Enos txoj kev thov Vajtswv? Cia li qhia txog ib lub sij hawm thaum koj sab ntsuj plig “ntshaw” thiab koj tau “thov” tus Tswv (Enos 1:4).

• Koj yuav ua li cas pab koj cov me nyuam to taub tias Leej Txiv Saum Ntuj Ceeb Tsheej yuav hnov thiab teb lawv tej lus thov? Xav seb koj puas xav caw lawv sau ntawv txog tej yam uas lawv thov Vajtswv txog. Ces koj pab tau lawv nrhiav tau tej yam uas Enos tau thov Vajtswv txog nyob hauv Enos 1:2, 9, 13–14, thiab 16 (kuj saib “Tshooj 11: Enos,” Cov Dab Neeg hauv Phau Ntawv Maumoos, 30–31).

  Twb tau muaj dab tsi vim Enos thov Vajtswv? (saib nqe 6, 9, 11).

  Peb kawm dab tsi los ntawm Enos txog kev thov Vajtswv zoo dua?

• Hu ib zaj nkauj txog kev thov Vajtswv ua ke, xws li “A Child’s Prayer” (Children’s Songbook, 12–13). Tej zaum koj cov me nyuam yuav xav tsa lawv tes txhua zaus lawv hnov lo lus “thov Vajtswv” los sis lwm lo lus uas pheej hais. Qhia koj cov me nyuam txog tej yam uas Leej Txiv Saum Ntuj Ceeb Tsheej tau ua kom teb koj tej lus thov.

• Maumoos tau ua raws li tus Vaj Ntsuj Plig Dawb Huv qhia thaum nws muab Nifais cov phiaj me tso rau hauv Phau Ntawv Maumoos. Txhua yam uas peb tau kawm nyob hauv Phau Ntawv Maumoos xyoo no tau los rau peb vim Maumoos tau xaiv mloog tus Ntsuj Plig lus. Koj yuav ua li cas kom pab koj cov me nyuam kawm txog kev mloog tus Ntsuj Plig lus? Caw lawv nyeem los ntawm tej nqe hauv Maumoos cov Lus 1:3–8. Tej zaum nej yuav xav sib tham txog tej yam uas nej tau kawm los ntawm txhua nqe. Ces koj cov me nyuam ua tau li no:

  • Qhia tias lawv tau kawm dab tsi los ntawm cov dab neeg hauv Phau Ntawv Maumoos xyoo no (cov duab los ntawm phau Los, Nrog Kuv Mus pab tau lawv nco qab).

  • Hu ib zaj nkauj ua ke txog tus Vaj Ntsuj Plig Dawb Huv, xws li “The Still Small Voice” (Children’s Songbook, 106–7).

  • Sib tham txog tej xwm txheej dhau los thaum tus Ntsuj Plig tau coj lawv kev kom foom koob hmoov rau lwm tus.