Yakhauj 5–7

Yakhauj 5 yog ib zaj dab neeg uas muaj lub ntsiab lus. Zaj no piav txog tsob ntoo thiab txiv hmab txiv ntoo thiab cov neeg ua hauj lwm, tiam sis yeej yog txog Vajtswv txoj kev nrog Nws cov neeg txhua txhia qhov chaw nyob hauv peb zaj keeb kwm. Yog li ntawd thaum koj nyeem zaj dab neeg, xav txog tej yam dab tsi hauv zaj dab neeg muaj ntsiab lus.

Piv txwv hais tias, yog lub vaj txiv roj yog lub ntiaj teb, thiab ib tug ntoo txiv roj nyeg piv txog Ixayees (los yog cov uas tau khi lus nrog Vajtswv; saib Yakhauj 5:3), ces cov ntoo txiv roj qus piv txog dab tsi? Cov txiv zoo thiab cov txiv phem piv txog dab tsi? Koj pom lub cim dab tsi ntxiv?

Txawm tias Yakhauj 5 qhia txog lwm haiv neeg thiab ntau pua xyoo hauv keeb kwm ntiaj teb, yeej qhia txog koj thiab koj lub neej. Koj nrhiav tau tej ntsiab lus twg rau koj tus kheej nyob hauv Yakhauj 5?

Tej zaum qhov tseem ceeb tshaj yog tias Yakhauj 5 qhia txog Yexus Khetos. Nrhiav Nws thaum koj nyeem. Piv txwv hais tias, koj kawm dab tsi txog Nws nyob hauv nqe 40–41, 46–47?

Xwv kom muaj tswv yim ntxiv txog Yakhauj 5, saib daim duab ntawm zaj lus no qhov kawg.

“Lwm cov tub qhe” (Yakhauj 5:70) uas tus Tswv hu hauv Nws lub vaj txiv roj yog tib neeg zoo li koj. Koj nrhiav tau tej lus tseeb twg nyob hauv Yakhauj 5, qhov tseem ceeb yog nqe 61–62 thiab 70–75, uas hais txog kev ua hauj lwm hauv tus Tswv lub vaj txiv roj? Koj kawm dab tsi txog Nws thaum koj pab ua Nws txoj hauj lwm?

Thaum koj nyeem txog “zaum kawg” uas tus Tswv ua hauj lwm hauv Nws lub vaj txiv roj, muaj dab tsi uas tshoov koj lub siab kom ua hauj lwm rau tus Tswv “nrog [koj] lub dag lub zog”? (Yakhauj 5:71). Tej zaum koj yuav xav txog thaum twg koj muaj kev xyiv fab thaum lawv ua hauj lwm rau tus Tswv ntawm lub vaj txiv roj—ua piv txwv, thaum lawv qhia txog txoj moo zoo, ua hauj lwm hauv lub tuam tsev, los sis txhawb nqa lwm tus. Tej zaum koj yuav xav nyeem tej yam uas Txwj Laug Gary E. Stevenson hais nyob hauv zaj lus “Yooj Yim To Taub thiab Zoo Nkauj Kawg” (Liahona, Kaum Ib Hlis Ntuj 2021, 47–50).

Thawj Tswj Hwm Russell M. Nelson qhia hais tias: “Txhua lub sij hawm nej ua ib yam dab tsi pab lwm tus—tsis hais nyob sab twg ntawm daim ntaub thaiv los yog—mus ib ruam tom ntej khi lus nrog Vajtswv thiab ua kev cai raus dej thiab ua kab ke hauv lub tuam tsev, nej pab muab Ixayees sau los ua ke. Yeej yooj yim to taub npaum li ntawd“ (”Hope of Israel” (kev tshaj tawm rau cov neeg hluas thoob ntiaj teb, Rau Hli Ntuj 3, 2018), ChurchofJesusChrist.org). Cia li xav seb puas xav sau tej lub tswv yim kom pab muab Ixayees sau los ua ke. Los ntawm tej yam uas koj sau, koj xav tias tus Tswv xav kom koj ua dab tsi hauv Nws lub vaj txiv roj hnub no? Raws li nqe 75, tus Tswv muab nqi zog rau peb li cas thaum peb ua hauj lwm hauv Nws lub vaj txiv roj?

Kuj saib “Ixayees, Vajtswv Hu Nej,” Cov Nkauj Qhuas Vajtswv, zaj 6; “Old Testament Olive Vineyard” (vidi-aus), Txoj Moo Zoo cov Ntawv; Txoj Moo Zoo tej Ntsiab Lus, “Gathering Israel,” “Inviting All to Receive the Gospel of Jesus Christ,” “Participating in Temple and Family History Work,” Txoj Moo Zoo cov Ntawv.

Ib lub ntsiab ntawm lo lus muab siab npuab yog kom lo rau ib yam dab tsi ruaj khov, ze heev, thiab tsis hloov. Kev txhais ntawd puas hloov koj txoj kev to taub Yakhauj 6:4–5? Tus Tswv ntawm lub vaj txiv roj muab nws “txhais npab hlua tshua” ncav rau peb li cas hauv zaj dab neeg txog tsob ntoo txiv roj? (saib, ua piv txwv, Yakhauj 5:47, 51, 60–61, 71–72). Nws tau ua li cas kom ua li no rau koj?

Qhov uas muaj los rau cov Neeg Nifais nrog Seles los twb rov qab muaj niaj hnub nim no: neeg uas xav ua kev ntseeg Yexus Khetos puas tsuaj mus. Yakhauj tau ua li cas thaum muaj neeg tawm tsam nws txoj kev ntseeg? Koj kawm dab tsi los ntawm nws tej lus teb? Koj ua tau dab tsi tas sim no kom npaj rau tej lub sij hawm thaum tib neeg yuav tawm tsam koj txoj kev ntseeg tus Cawm Seej?

Kuj saib Jeffrey R. Holland, “Tus Nqi—thiab cov Koob Hmoov—ntawm Kev Ua Thwj Tim,” Ensign los sis Liahona, Tsib Hlis Ntuj 2014, 6–9; “Sherem Denies Christ” (vidi-aus), Txoj Moo Zoo cov Ntawv.

• Koj pab tau koj cov me nyuam kom to taub zaj dab neeg txog tsob ntoo txiv roj li cas? Ib txoj kev yog mus taug kev sab nraum thiab saib ib tsob ntoo thiab piav cov ntsiab lus ntawm zaj dab neeg. Tus Tswv ntawm lub vaj txiv roj ua li cas rau Nws cov ntoo? Peb yuav ua li cas kom ua li cov neeg ua hauj lwm hauv zaj dab neeg thiab pab lwm tus hnov tus Cawm Seej txoj kev hlub?

• Yakhauj qhia zaj dab neeg txog cov ntoo txiv roj kom caw nws cov neeg los cuag Khetos. Zaj dab neeg ntawd kuj yuav ua ib yam li ntawd rau koj cov me nyuam. Tej zaum koj qhia zaj dab neeg siv nqe Yakhauj 5:3–4, 28–29, 47, thiab 70–72 (kuj saib “Old Testament Olive Vineyard” [vidi-aus], Txoj Moo Zoo cov Ntawv). Koj los yog koj cov me nyuam kuj nyeem Yakhauj 5:11, 41, 47, thiab 72, thiab nrhiav tej yam uas qhia txog tus Tswv rau lub vaj txiv roj (Yexus Khetos) txoj kev mob siab txog cov ntoo. Tus Cawm Seej ua dab tsi los qhia tias Nws hlub peb?

• Yakhauj 6:4–5 muaj lus tseem ceeb thaum peb xaiv qhov tsis yog. Tej zaum koj pab koj cov me nyuam nrhiav. Nqe twg pab peb muaj kev cia siab rau Vajtswv txoj kev hlub uas txhiv dim? Txwj Laug Allen D. Haynie zaj dab neeg qhia txog tau qias neeg hauv av nkos, hauv nws cov lus “Nco txog Tus uas Peb Tso Siab Rau” (Liahona, Kaum Ib Hlis Ntuj 2015, 121–22), pab tau. Zaj dab neeg no thiab Yakhauj 6:4–5 qhia dab tsi rau peb txog peb txoj kev dim hauv Vajtswv lub nceeg vaj?

• Koj paub koj cov me nyuam tuav raws tej yam tseeb li Yakhauj ua li cas? Tej zaum koj cov me nyuam yuav xav saib qhov vidi-aus “Chapter 10: Jacob and Sherem” (Txoj Moo Zoo cov Ntawv) thiab ua yeeb yam txog Yakhauj thiab Seles txoj kev sib tham, thaum siv Yakhauj 7:1–23 kom pab. Yakhauj tau ua li cas kom ua raws nraim li qhov yog? Caw koj cov me nyuam qhia txog tej lub sij hawm thaum lawv tau ua raws li qhov yog, los sis qhia txog ib zaug thaum koj ua li ntawd. Tej zaum lawv kuj yuav xav hu ib zaj nkauj uas pab lawv ua siab loj zoo li Yakhauj, xws li “Stand for the Right,” Children’s Songbook, 159.