Yakhauj 1–4

Yakhauj xav tias, kev qhia Vajtswv txoj lus yog ib “txoj hauj lwm los ntawm tus Tswv,” yog li ntawd nws twb khwv kom “rau siab ua [nws] txoj luag hauj lwm” (Yakhauj 1:17, 19). Koj xav tias tej lus uas Yakhauj siv muaj lub ntsiab dab tsi? Cia li xav seb ib daim iav rub kom pom loj loj ua dab tsi. Qhov no puas pab koj tawm tswv yim? Thaum koj xav txog Yakhauj 1:6–8, 15–19 thiab 2:1–11, cia li xav txog tej hauj lwm uas tus Tswv xav muab rau koj tam sim no. Koj txais kev tshoov siab ua dab tsi kom rau siab ua tej hauj lwm ntawd?

Kuj saib “Whom the Lord Calls, the Lord Qualifies,” nyob hauv Teachings of Presidents of the Church: Thomas S. Monson (2022), 209–20; “Rise to Your Call” (vidi-aus), Txoj Moo Zoo cov Ntawv.

Cov Neeg Nifais muaj teeb meem vim lawv muab hlob thiab tsom ntsoov rau lawv cov nyiaj txiag (saib Yakhauj 2:13), tiam sis tsis yog ib qho teeb meem rau lawv puag thaum ub xwb. Tus yeeb ncuab ua li cas kom peb tsom ntsoov rau peb cov nyiaj txiag niaj hnub no? Tom qab koj nyeem Yakhauj 2:12–21, piav tias Vajtswv xav kom peb saib peb cov nyiaj txiag li cas. Ib zaj nkauj qhuas Vajtswv xws li “Rau Qhov Koj Tau Pub Ntau rau Kuv” (Cov Nkauj Qhuas Vajtswv, zaj 97) yuav pab peb tawm tswv yim ntxiv. Koj txais kev tshoov siab ua dab tsi los ntawm tej yam uas koj kawm?

Thaum koj nyeem Yakhauj 2:22–35; 3:10–12, koj kawm dab tsi uas pab koj to taub vim li cas Vajtswv saib txoj kev coj dawb huv tseem ceeb heev? Yuav raug li cas thaum tib neeg coj tsis dawb huv—nyob hauv Yakhauj lub caij nyoog thiab peb lub caij nyoog? Yus tau koob hmoov twg thaum yus ua neej coj dawb huv?

Txwj Laug David A. Bednar qhia tias peb nyob hauv “ib lub ntiaj teb uas nyiam thuam kev yug me nyuam” (“Peb Ntseeg Kev Coj Dawb Huv,” Liahona, Tsib Hlis Ntuj 2013, 41–44). Koj yuav ua li cas kom lwm tus to taub vim li cas koj ua raws li txoj kev cai coj dawb huv? Ib qho zoo pib yog cov lus piav txog Vajtswv cov kev cai txog kev sib deev nyob hauv “Koj lub cev yeej dawb ceev” nyob hauv Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv (phab 22–29). Koj kawm dab tsi ntxiv nyob hauv phau no uas yuav pab koj piav tias yog vim li cas koj ua raws li kev cai coj dawb huv?

Koj nrhiav tau tej lus teb nyob hauv Txwj Laug Bednar zaj lus los sis nyob hauv qhov vidi-aus “I Choose to Be Pure” (Txoj Moo Zoo cov Ntawv).

Vajtswv txoj kev cai coj dawb huv thiab lwm zaj lus uas koj hnov sib txawv li cas? Yus tau koob hmoov twg thaum yus ua neej coj dawb huv?

Kuj saib Txoj Moo Zoo tej Ntsiab Lus, “Virtue,” Txoj Moo Zoo cov Ntawv; “Same-Sex Attraction” nyob hauv Pawg “Life Help” nyob hauv Txoj Moo Zoo cov Ntawv.

Yakhauj tau thov nws cov neeg kom lawv “sib raug zoo nrog [Vajtswv] los ntawm Khetos txoj kev theej txhoj” (Yakhauj 4:11). Ib lub ntsiab ntawm sib raug zoo yog kev rov qab sib haum xeeb los sis rov qab ua phooj ywg. Thaum koj xav txog koj lub neej, cia li xav txog ib lub sij hawm thaum koj xav tias koj nyob deb ntawm koj Leej Txiv Saum Ntuj Ceeb Tsheej. Tus Cawm Seej ua li cas kom pab koj rov qab sib raug zoo? Koj nrhiav tau tej lub tswv yim twg hauv tshooj no uas pab koj nrog Vajtswv rov qab sib raug zoo? (saib nqe 4–14).

Koj kawm dab tsi ntxiv los ntawm Mathais 5:23–24? Tus Cawm Seej ua li cas kom pab koj nrog Vajtswv rov qab sib raug zoo—thiab nrog lwm tus sib raug zoo?

Kuj saib 2 Nifais 10:24.

Thaum Yakhauj ua hauj lwm kom nws cov neeg tig hlo mus rau tus Tswv, nws ceeb toom lawv kom lawv tsis txhob dig muag ntawm sab ntsuj plig thiab tsis txhob ntxub txoj moo zoo “tej lus uas qhia meej” (saib Yakhauj 4:13–14). Raws li Yakhauj 4:8–18 qhia, peb yuav tsum ua li cas kom tsis txhob raug kev dig muag ntawm sab ntsuj plig?

Kuj saib Quentin L. Cook, “Looking beyond the Malakaus,” Ensign, Peb Hlis Ntuj 2003, 40–44.

• Kom pab koj cov me nyuam to taub tias yuav ua li cas kom kho “tej ntsuj plig uas raug mob,” sib tham ua ke txog qhov uas peb lub cev raug mob li cas thiab muaj dab tsi uas pab tau lawv rov qab zoo. Tej zaum koj cov me nyuam yuav xav sib tham txog tej lub sij hawm thaum lawv raug mob thiab muaj dab tsi uas pab kho lawv zoo. Tej zaum koj yuav xav muab ntaub qhwv mob los sis cov tshuaj rau lawv saib thaum nej sib tham txog qhov no. Tej zaum koj yuav xav qhia lawv tias tus Cawm Seej tau pab koj li cas thaum koj tus ntsuj plig xav tau kev kho mob.

• Cov neeg nyob hauv Yakhauj lub caij nyoog nplua nuj heev, tiam sis lawv tsis tau xav muab lawv tej khoom faib rau lwm tus. Thaum koj nyeem txog Yakhauj cov lus qhia lawv nyob hauv Yakhauj 2:17–19, tej zaum koj yuav xav muab cov duab los sis tej khoom rau koj cov me nyuam los tuav uas qhia txog tej lo lus los sis tej kab lus hauv tej nqe vaj lug kub no. Tej zaum koj yuav xav piav tias koj faib tej khoom no rau lawv; tej zaum koj yuav xav caw lawv muab tej khoom ntawd faib rau koj los sis rau lwm tus. Cia li sib tham txog qhov uas nej xav li cas thaum nej faib nej tej khoom. Peb yuav qhia dab tsi ntxiv rau lawv kom pab lawv zoo siab?

• Tom qab nej nyeem Yakhauj 2:17 ua ke, tej zaum koj cov me nyuam yuav xav hais tej koob hmoov uas Leej Txiv Saum Ntuj Ceeb Tsheej tau muab rau lawv. Vim li cas Nws xav kom peb muab peb tej khoom faib rau lwm tus?

• Yakhauj txoj kev ntseeg Yexus Khetos muaj zog heev thiaj li nyob khov kho. Xwv kom qhia koj cov me nyuam kom paub ua li cas muaj kev ntseeg zoo li ntawd, tej zaum koj yuav xav nug seb peb ua dab tsi kom peb lub cev muaj zog? Peb yuav ua li cas kom peb txoj kev ntseeg Yexus Khetos yuav muaj zog ntxiv? Cia li nyeem Yakhauj 4:6 ua ke kom pab cov me nyuam kawm tias Yakhauj thiab nws cov neeg tau ua li cas kom lawv txoj kev ntseeg “khov kho.”

• Ib yam uas yuav pab koj cov me nyuam to taub hais tias txoj kev muaj kev ntseeg “khov kho” txhais li cas yog nrhiav ib tug ntoo nyob ze thiab hais kom lawv muab tej ceg ntoo co co. Ces hais kom lawv sim muab lub cev ntoo co co. Vim li cas nyuaj kom muab lub cev ntoo co co? Tej kab lus twg nyob hauv Yakhauj 4:6, 10–11 piv txog qhov uas peb yuav ua li cas kom peb txoj kev ntseeg Yexus Khetos “khov kho”?

  

• Yog xav muaj lwm zaj lus piv txwv kom qhia koj cov me nyuam txog kev ntseeg Yexus Khetos uas khov kho, saib Neil L. Andersen, “Khaub Zig Cua ntawm Sab Ntsuj Plig” (Liahona, Tsib Hlis Ntuj 2014, 18–21; thiab qhov vidi-aus “Khaub Zig Cua ntawm Sab Ntsuj Plig“) or “The Wise Man and the Foolish Man” (Children’s Songbook, 281; kuj saib Mathais 7:24–27).