Ob Hlis Ntuj 26–Peb Hlis Ntuj 3: ‘Nws lub Npe Yuav Hu Ua … Tus Tub Vaj Ntxwv ntawm Kev Thaj Yeeb.’ 2 Nifais 11–19,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2024)
“Ob Hlis Ntuj 26–Peb Hlis Ntuj 3. 2 Nifais 11–19,” Los, Nrog Kuv Mus—Siv hauv Tsev thiab lub Koom Txoos: 2024 (2024)
Ob Hlis Ntuj 26–Peb Hlis Ntuj 3: “Nws lub Npe Yuav Hu Ua … Tus Tub Vaj Ntxwv ntawm Kev Thaj Yeeb”
2 Nifais 11–19
Kev sau rau saum cov phiaj toog yeej tsis yooj yim, thiab tsis muaj chaw ntau nyob hauv Nifais cov phiaj me. Yog li ntawd vim li cas Nifais yuav siv zog sau tus yaj saub Yaxayas cov lus ntau hauv nws cov ceev xwm txheej? Yog vim nws xav kom peb ntseeg Yexus Khetos. Nws sau hais tias, “Kuv tus ntsuj plig zoo siab ua pov thawj rau kuv cov neeg tias … Khetos [yuav] los” (2 Nifais 11:4). Nifais tau pom tias nws cov neeg yuav raug dab tsi thaum yav tom ntej. Nws pom tias, txawm yog nws cov neeg yuav tau koob hmoov ntau heev vim lawv khi lus nrog Vajtswv, lawv yuav hloov los ua neeg uas muab hlob, sib cav sib ceg, thiab ua raws li neeg ntiaj teb (saib 1 Nifais 12; 15:4–6). Nws kuj pom tias peb yuav muaj tej teeb meem no nyob hauv peb lub caij nyoog (saib 1 Nifais 14). Yaxayas sau ntawv ceeb toom txog kev phem no. Tiam sis lawv kuj ua rau Nifais muaj kev cia siab rau yav tom ntej—kev phem yuav ploj mus, yuav muab cov neeg rau siab ntseeg sau los ua ke, thiab cov uas “taug kev hauv kev tsaus ntuj” yuav pom “ib txoj kev kaj ci ntsa iab” (2 Nifais 19:2). Muaj tag nrho tej yam no vim “ib tug me nyuam yug los” kom kev kub ntxhov tag lawm—“Tus Tub Vaj Ntxwv ntawm Kev Thaj Yeeb” (2 Nifais 19:6).
Tej Tswv Yim Pab Qhia hauv Tsev thiab lub Koom Txoos
Kuv yuav ua li cas kom to taub Yaxayas tej lus qhia zoo dua?
Nifais lees hais tias rau ib txhia neeg, “Yaxayas tej lus tsis tshua meej” (2 Nifais 25:4). Tiam sis Nifais kuj qhia kom peb paub nrhiav tau lub ntsiab txog Yaxayas tej lus:
-
“Muab nws tej lus los piv rau” koj tus kheej (2 Nifais 11:2). Yaxayas tej lus qhia feem ntau muaj ntau lub ntsiab thiab ntau yam uas siv tau. Piv txwv hais tias, thaum koj nyeem txog tej qhov chaw nyob hauv 2 Nifais 14:5–6, xav seb tej nqe no pab tau koj hauv koj lub tsev li cas. Nug koj tus kheej, “Leej Txiv Saum Ntuj Ceeb Tsheej xav kom kuv kawm dab tsi?”
-
Nrhiav tej lub cim txog Yexus Khetos (saib 2 Nifais 11:4). Yaxayas tej lus los feem ntau siv tej lub cim kom qhia txog tus Cawm Seej. Piv txwv hais tias, muaj tej lub cim twg txog tus Cawm Seej nyob hauv 2 Nifais 19:2? Qhov txuj ci tseem ceeb no qhia dab tsi rau koj txog Nws?
-
“Nrhiav kev kom “muaj lub txiaj ntsim qhia tau tej uas yuav muaj los yav tom ntej”” (2 Nifais 25:4). Thaum koj kawm, thov Vajtswv kom txais tau tus ntsug plig txoj kev coj koj mus. Tej zaum koj yuav tsis to taub txhua yam thaum tib lub sij hawm, tiam sis tus Ntsuj Plig yeej pab tau koj kawm tias koj yuav tsum paub dab tsi.
Tej zaum yuav pab koj saib tej kev pab kawm vaj lug kub, tsis hais cov lus cim nram qab, tej zaj piav txog tshooj, thiab Phau Qhia txog Vaj Lug Kub. Cov ntawv kawm hauv txoj kev kawm vaj lug kub Phau Ntawv Maumoos thiab Phau Qub kuj muaj lus qhia ntxiv es pab tau koj kawm txog cov keeb kwm ntawm Yaxayas tej lus qhia.
Yaxayas ua tim khawv txog Yexus Khetos.
Vim Yaxayas sau tej lus uas yog lub cim, ua rau peb tsis nco qab txog nws tej lus tim khawv uas muaj hwj chim txog Yexus Khetos. Nrhiav tus Cawm Seej nyob hauv 2 Nifais 13:13; 14:4–6; 15:1–7; 16:1–7; 17:14; 18:14–15; 22:2. Tej nqe no qhia dab tsi txog Nws rau koj?
Tej lus qhia txog yav tom ntej nyob hauv 2 Nifais 19:6 qhia txog Yexus Khetos tej lub npe. Nws tau ua li cas kom muaj raws li tej luag hauj lwm no hauv koj lub neej?
Kuj saib Ulisses Soares, “Yexus Khetos: Tus uas Tu Peb Sab Ntsuj Plig,” Liahona, Tsib Hlis Ntuj 2021, 82–84.
Cov neeg muab hlob thiab neeg ntiaj teb yuav raug tej yam kom lawv txo hwj chim.
Nifais twb pom hais tias kev muab hlob yuav ua rau nws cov neeg poob mus (saib 1 Nifais 12:19). Yog li ntawd peb paub zoo tias yog vim li cas Nifais xav qhia nws cov neeg txog Yaxayas tej lus ceeb toom txog kev muab hlob. Nyob hauv tshooj 12 thiab 13, nrhiav tej lus uas Yaxayas siv kom piav txog kev muab hlob, xws li muaj plhus thiab khav txiv. Nyob hauv 2 Nifais 15:1–24, nrhiav tej lus uas piav txog tej yam uas neeg raug thaum lawv muab hlob. Ces tej zaum koj yuav xav sau ntsiab lus txog tej yam uas koj tau nyeem. Xav txog seb koj yuav ua li cas thiaj xaiv kom txo hwj chim.
Kuj saib “Chapter 18: Beware of Pride,” Teachings of Presidents of the Church: Ezra Taft Benson (2014), 229–40.
Lub tuam tsev yog tus Tswv lub tsev.
Yaxayas tau hu lub tuam tsev “lub roob ntawm tus Tswv lub tsev” (2 Nifais 12:2). Vim li cas lub roob yog ib lub cim zoo rau lub tuam tsev?
Koj yuav hais dab tsi kom piav vim li cas peb yuav tsum muaj cov tuam tsev? Koj kuj nrhiav tau ib cov lus teb nyob hauv 2 Nifais 12:2–3 thiab Thawj Tswj Hwm Russell M. Nelson’s zaj lus “Lub Tuam Tsev thiab lub Hauv Paus rau Nej Sab Ntsuj Plig” (Liahona, Kaum Ib Hlis Ntuj. 2021, 93–96). Raws li tej yam uas koj tau nyeem, tus Tswv xav kom koj kawm thiab paub txog dab tsi hauv Nws lub tsev dawb huv? Koj twb raug xwm zoo li cas thaum koj nyob haud?
Koj nrhiav tau tej lus nug rau kev xam phaj tau ib daim ntawv tso cai nkag tuam tsev nyob hauv cov phab ntawv 36–37 hauv Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv. Xav seb puas nyeem txhua lo lus nug thiab nug koj tus kheej, lo lus nug no qhia dab tsi rau kuv txog tus Tswv tej kev? Qhov ntawd pab tau kuv “ua lub neej raws li nws tej kev cai”?
Kuj saib Txoj Moo Zoo tej Ntsiab Lus, “Temples,” Txoj Moo Zoo cov Ntawv; “Nyob Puag Saum Ib lub Roob,” Cov Nkauj Qhuas Vajtswv, zaj 4.
Yexus Khetos yuav los txhiv Nws cov neeg dim.
Txawm yog nws pom kev ua phem ntau heev, Yaxayas tseem cia siab rau yav tom ntej. Cia li xav seb puas kawm tej nqe nram qab no. Sau tej lus tseeb uas txhua nqe qhia txog peb lub caij nyoog: 2 Nifais 12:1–5; 14:2–6; 15:20–26; 19:2–8. Koj xav yog vim li cas peb yuav tsum to taub tej nqe no?
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Nrhiav tej tus yam ntxwv. Nyob hauv vaj lug kub peb nrhiav tau tej tus yam ntxwv uas qhia peb tias tus Tswv ua Nws tej hauj lwm li cas. Nyob hauv 2 Nifais 11–19, tej zaum koj yuav nrhiav tau tej tus yam ntxwv uas qhia tias tus Tswv ceeb toom txog tej kev txhaum thiab zam txim rau cov uas tau hloov siab lees txim.
Tej Tswv Yim Pab Qhia cov Me Nyuam
Lub tuam tsev yog tus Tswv lub tsev.
-
Yaxayas tau hais tias lub tuam tsev yog “lub roob ntawm tus Tswv lub tsev.” Tej zaum koj cov me nyuam yuav nyiam ua yeeb yam txog kev nce ib lub roob thaum koj nyeem tej nqe no 2 Nifais 12:2–3. Pab lawv nrhiav cov lus hauv cov nqe no es qhia peb vim li cas peb muaj cov tuam tsev.
-
Kom qhia txog cov lus “peb yuav taug nws tej kev” los ntawm 2 Nifais 12:3, koj ua tau ib txoj kev hauv av, es muaj daim duab txog lub tuam tsev nyob tom kawg. Thaum koj cov me nyuam taug txoj kev hauv av no, lawv kuj qhia txog tej yam uas lawv ua tau kom taug tau tus Tswv tej kev.
-
Tej zaum koj cov me nyuam kos tau ib daim duab txog lawv tus kheej mus hauv lub tuam tsev. Lawv kuj hu ib zaj nkauj los mloog ib zaj nkauj txog lub tuam tsev, xws li “I Love to See the Temple” (Children’s Songbook, 95). Pab lawv nrhiav tej lo lus hauv cov nkauj uas qhia tias lub tuam tsev yog dab tsi thiab peb ua dab tsi haud.
Yexus Khetos yog kuv tus Cawm Seej.
-
Yexus Khetos muaj ntau lub npe nyob hauv 2 Nifais 11:4–7; 17:14; 19:6. Pab koj cov me nyuam nrhiav cov npe ntawd thiab tham qhia seb lawv txhais li cas. Piv txwv tias, “Khetos” txhais tau tias “tus tau pleev roj rau” thiab “Emanu-es” txhais tau tias “Vajtswv nrog peb.” Tej npe no qhia peb dab tsi txog Yexus?
-
Cia lawv pom ib feem ntawm qhov vidi-aus “The Christ Child” (Txoj Moo Zoo cov Ntawv) uas cia pom tej tib neeg uas pom Yexus thawj zaug. Nres qhov vidi-aus thaum pom tej no, thiab nug koj cov me nyuam seb cov tib neeg no tau xav li cas. Peb yuav xav li cas yog peb nyob thaum ntawd? Peb yuav xav li cas thaum peb rov qab pom Nws dua?
Dab Ntxwg Nyoog xav ua kom kuv tsis paub qhov twg yog qhov zoo thiab yog qhov phem.
-
Cia koj cov me nyuam pom ib qhov dab tsi iab iab los sis qaub xws li ib sab txiv qaub uas nyob hauv ib daim qhob noom qhwv. Nyeem 2 Nifais 15:20 ua ke. Dab Ntxwg Nyoog ua li cas kom tej yam phem zoo nkaus li yog tej yam zoo? Koj kuj cia lawv pom 90 chib tom hauv paus ntawm qhov vidi-aus “You Will Be Freed” (Txoj Moo Zoo cov Ntawv). Vim li cas tus neeg nuv ntses ua kom zais tus npev? Vim li cas Dab Ntxwg Nyoog zais tej kev txhaum ? Yexus Khetos ua li cas kom pab peb tsis txhob raug Dab Ntxwg Nyoog tej kev ntxias?
Yog xav tau tswv yim ntxiv, saib phau xov xwm Phooj Ywg rau lub hlis no.
Lub Tuam Tsev Panama City Panama. “Tus Tswv yuav muab lub roob ntawm tus Tswv lub tsev tsa rau saum tej ncov roob, … thiab txhua haiv neeg yuav ntws los mus rau lub roob ntawm tus Tswv lub tsev.” (2 Nifais 12:2).