“Ob Hlis Ntuj 19–25: ‘Auj Peb tus Vajtswv txoj Hau Kev Tseem Ceeb Kawg.’ 2 Nifais 6–10,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2024)
“Ob Hlis Ntuj 19–25. 2 Nifais 6–10,” Los, Nrog Kuv Mus—Siv hauv Tsev thiab lub Koom Txoos: 2024 (2024)
Thov Koj Ua Raws Li Koj lub Siab Nyiam Xwb, los ntawm Harry Anderson
Ob Hlis Ntuj 19–25: “Auj Peb tus Vajtswv txoj Hau Kev Tseem Ceeb Kawg”
2 Nifais 6–10
Twb yog 40 xyoos tom qab Lihais tsev neeg tawm Yeluxalees mus. Lawv nyob hauv ib thaj av tshiab uas txawv heev, nyob deb ntawm Yeluxalees. Lihais twb tas sim neej lawm, thiab nws tsev neeg twb tau pib txoj kev sib cav sib ceg uas yuav kav ntev li ob peb txhiab xyoos los ntawm cov Neeg Nifais—“cov uas ntseeg tej lus ceeb toom thiab Vajtswv tej kev tshwm sim”—thiab cov Neeg Lamas, uas tsis ntseeg (2 Nifais 5:6). Yakhauj, tus uas yog Nifais tus kwv thiab tus uas yog ib tug xib hwb rau cov Neeg Nifais, xav kom cov neeg khi lus paub tias Vajtswv yeej yuav nco ntsoov lawv, yog li ntawd lawv thiaj li yuav tsum nco ntsoov Nws. Nov yog ib zaj lus uas peb yeej xav tau niaj hnub no thiab (saib Lus Qhuab Qhia thiab Kev Khi Lus 1:15–16). “Cia peb nco ntsoov txog nws, … vim Vajtswv tsis tau muab peb tso pov tseg. … Tus Tswv tej lus cog tseg uas nws tau cog rau lawv … muaj nuj nqis heev,” yog tej lus uas Yakhauj hais (2 Nifais 10:20–21). Hais txog tej lus cog tseg no, tsis muaj ib yam uas muaj nqis tshaj qhov uas yuav muaj ib “txoj kev theej txhoj uas tsis muaj qhov kawg” kom kov yeej kev tuag thiab ntuj txiag teb tsaus (2 Nifais 9:7). Yakhauj hais tias, “Yog li ntawd, nej cia li zoo siab hlo”! (2 Nifais 10:23).
Tej Tswv Yim Pab Qhia hauv Tsev thiab lub Koom Txoos
Tus Tswv muaj siab hlub tshua Nws cov neeg thiab Nws yuav ua raws li Nws tej kev khi lus.
Xwv kom pab nws cov neeg to taub tias lawv yog ib feem ntawm tsev neeg Ixayees thiab tsim nyog tso siab rau Vajtswv thiab Nws cov lus cog tseg, Yakhauj tau hais Yaxayas tej lus qhia tej uas yuav muaj los yav tom ntej, uas sau tseg hauv 2 Nifais 6–8. Zaj lus no los nws kuj hais rau koj thiab, vim Tsoom Haiv Neeg Ntseeg hauv Hnub Nyoog Kawg kuj yog Vajtswv cov neeg khi lus thiab. Thaum koj nyeem tej tshooj no, cia li xav txog tej lus nug xws li:
-
Kuv kawm dab tsi txog tus Cawm Seej txoj kev hlub uas txhiv kuv dim? Tej lus twg piav txog txoj kev hlub no zoo?
-
Tus Cawm Seej muab dab tsi rau cov neeg uas nrhiav Nws?
-
Kuv yuav ua li cas kom rau siab “tos ntsoov” tus Cawm Seej thiab cov koob hmoov Uas Nws cog lus tias kuv yuav txais?
Yexus Khetos cawm kuv dim kev txhaum thiab kev tuag.
Ib txoj kev rau koj qhia tias koj ris Yexus Khetos txiaj yog kev xav tias peb yuav raug dab tsi yog tias tsis muaj Nws. Thaum koj nyeem 2 Nifais 9:1–26, tej zaum koj yuav xav siv ib xim kom sau lub cim rau tej yam uas peb yuav raug yog tias tsis muaj Yexus Khetos txoj Kev Theej Txhoj. Ces siv lwm yam xim sau lub cim rau tej yam uas peb txais tau los ntawm tus Cawm Seej txoj Kev Theej Txhoj. Raws li tej yam koj nyeem, koj yuav piav li cas txog qhov uas vim li cas peb xav tau Yexus Khetos txoj Kev Theej Txhoj? Koj kawm dab tsi uas tshoov koj lub siab ua rau koj xav qhuas “Vajtswv lub tswv yim, nws txoj kev hlub tshua thiab txoj kev tshav ntuj”? (2 Nifais 9:8).
Yakhauj tau qhia tias Yexus Khetos cawm peb dim dab tsi, es nws kuj qhia txog tej yam uas Yexus tau ua kom cawm peb dim thiab. Xav seb koj puas sau ntawv txog tej yam uas koj kawm nyob hauv 2 Nifais 9:11–15, 20–24.
Yakhauj qhuas Vajtswv txoj hau kev txhiv dim li no hais tias, “Auj, peb tus Vajtswv txoj hau kev tseem ceeb kawg.” Nrhiav nws tej lus qhuas li no nyob hauv 2 Nifais 9 (feem ntau yog nyob hauv nqe 8–20). Koj kawm tau dab tsi los ntawm tej nqe no txog Vajtswv txoj hau kev? Tej yam twg tau pab koj los paub txog tej yam uas Yakhauj xav? Thaum koj teev tam thiab kawm, xav seb puas muaj ib zaj nkauj qhuas Vajtswv uas yuav qhia tias koj xav li cas txog Nws, xws li “Koj Zoo Kawg Nkaus” (Cov Nkauj Qhuas Vajtswv, zaj 30).
Kuj saib “Where Justice, Love, and Mercy Meet,” “Jacob Teaches of the Resurrection” (cov vidi-aus), Txoj Moo Zoo cov Ntawv; Txoj Moo Zoo tej Ntsiab Lus, “Atonement of Jesus Christ,” Txoj Moo Zoo cov Ntawv.
Tus Cawm Seej txoj Kev Theej Txhoj tsis muaj qhov kawg.
Koj yuav ua dab tsi zoo dua kom to taub Yexus Khetos “txoj kev theej txhoj uas tsis muaj qhov kawg”? (2 Nifais 9:7). Tej zaum lawv yuav xav saib los sis xav txog tej yam uas zoo li tsis muaj qhov kawg—cov nyom hauv ib thaj teb, cov xuab zeb nyob rau ntawm ntug hiav txwv, los sis cov hnub qub saum ntuj. Tus Cawm Seej txoj Kev Theej Txhoj tsis muaj qhov kawg li cas? Nws txoj Kev Theej Txhoj ua li cas pab txhua tus? Tej lus twg nyob hauv 2 Nifais 9 ua rau peb muaj kev ris txiaj rau qhov uas tus Cawm Seej ua rau peb?
Kuv muaj peev xwm los cuag Khetos thiab ua raws li Vajtswv txoj hau kev.
Nyob hauv 2 Nifais 9, Yakhauj tau hais ob lo lus uas tsis zoo ib yam: “tus Tsim uas muaj hwj chim txoj hau kev uas muaj kev hlub tshua” thiab “tus niag phem lub tom txwv ntse ntawd” (2 Nifais 9:6, 28). Tej zaum koj yuav xav kos duab txog ib txoj kev thiab sau npe rau hu ua Leej Txiv Saum Ntuj Ceeb Tsheej txoj Hau Kev. Ces cia li nyeem 2 Nifais 9:27–52. Nrhiav tej lus ceeb toom thiab tej lus caw uas Yakhauj hais kom pab peb ua raws li txoj hau kev no. Sau tej yam uas koj kawm nyob rau ntawm txoj kev. Dab Ntxwg Nyoog ua dab tsi kom coj peb mus deb ntawm Vajtswv txoj hau kev? Koj txais kev tshoov siab twg kom ua raws li Yakhauj tau ceeb toom thiab tau caw koj?
Yexus Khetos txoj kev txheej txhoj ua rau kuv muaj kev xyiv fab.
Yakhauj zaj lus yeej yog ib zaj lus xyiv fab heev. Nws hais tias, “Kuv hais tej no rau nej xwv kom nej yuav zoo siab, thiab tsa nej lub taub hau mus ib txhis li” (2 Nifais 9:3). Thaum koj nyeem 2 Nifais 10:20, 23–25, koj nrhiav tau dab tsi uas ua rau koj muaj kev zoo siab? Koj yuav ua li cas kom nco txog tej no thaum koj poob siab?
Kuj saib Yauhas 16:33; D. Todd Christofferson, “Txoj Kev Xyiv Fab ntawm cov Ntseeg,” Liahona, Kaum Ib Hlis Ntuj 2019, 15–18; “Jacob Encourages the Nephites to Be Reconciled with God” (vidi-aus), Txoj Moo Zoo cov Ntawv.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Yexus Khetos yog kuv tus Cawm Seej.
-
Koj yuav ua li cas kom pab koj cov me nyuam to taub thiab xav tias lawv xav tau tus Cawm Seej Yexus Khetos? Tej zaum phab ntawv ntxim ua rau lub lim tiam no yuav pab. Phab ntawv no muaj ib zaj lus piv txwv txog ib lub qhov av thiab tus ntaiv. Xav seb koj puas siv 2 Nifais 9:21–22 kom pab koj nrog koj cov me nyuam sib tham txog qhov uas vim li cas koj ris Yexus Khetos txiaj.
-
Ib txoj kev kom pab koj cov me nyuam to taub vim li cas peb xav tau tus Cawm Seej yog kev qhia lawv txog txoj Kev Poob. Tej zaum koj yuav xav muab ib daim duab txog Adas thiab Evas rau lawv saib, xws li Leaving the Garden of Eden (Txoj Moo Zoo cov Ntawv), thiab ib daim duab txog Yexus Khetos saum tus ntoo khaub lig. Xav seb koj puas thov kom lawv piav tias ob daim duab no qhia dab tsi. Peb zoo li cas Adas thiab Evas li cas? Tej zaum 2 Nifais 9:6–10 yuav pab lawv paub tias Yexus Khetos ua li cas rau peb. Xav seb koj puas caw cov me nyuam qhia tias lawv xav li cas txog Yexus Khetos. Ib zaj nkauj zoo li “I Feel My Savior’s Love” (Children’s Songbook, 74–75) pab tau lawv.
Cia li siv tej zaj dab neeg thiab tej zaj lus piv txwv kom qhia qhov tseeb. Ua tib zoo kom tej zaj dab neeg thiab tej zaj lus piv txwv uas koj siv qhia qhov tseeb tiag. Piv txwv tias, thaum koj siv phab ntawv ntxim ua rau lub lim tiam no, cia li qhia tias Yexus Khetos tau los rau hauv “qhov av” kom pab peb tawm mus.
2 Nifais 9:20, 28–29, 42–43, 49
“Kuv lub siab nyiam txoj kev ncaj ncees.”
-
Xwv kom pab txhawb nqa koj cov me nyuam kom lawv “lub siab nyiam txoj kev ncaj ncees” los sis zoo siab ua raws li tus Tswv hais (2 Nifais 9:49), tej zaum koj yuav xav qhia txog tej lub sij hawm thaum ib tug me nyuam xaiv ib yam zoo los sis ib yam phem. Caw cov me nyuam sawv ntsug thaum qhov uas nws xaiv ua rau nws zoo siab thiab zaum thaum qhov uas nws xaiv ua rau nws tu siab. Thaum twg peb tau kev zoo siab vim peb tau xaiv coj raws li Yexus Khetos?
-
Ntshe koj cov me nyuam yuav nrog cov neeg sib tham (yog tias tseem tsis tau ua) uas xav tias tus Tswv cov lus txib yeej tsis muaj nqis los sis twb tsis yog rau peb lub caij nyoog. Tej zaum koj thiab koj cov me nyuam yuav xav sib tham txog qhov uas vim li cas peb zoo siab ua raws li cov lus txib. Vim li cas peb yuav tsum tso siab rau Vajtswv tej lus tsis hais thaum peb tsis to taub tag nrho los yog? Tej zaum koj yuav xav kom lawv kawm nyob hauv 2 Nifais 9:20, 28–29, 42–43 seb puas muaj dab tsi pab lawv xav thiab sib tham txog tej lus nug no.
Yog xav tau tswv yim ntxiv, saib phau xov xwm Phooj Ywg rau lub hlis no.
Nws Kho Neeg Coob cov uas Nyias Raug Nyias Mob, los ntawm J. Kirk Richards