2 Nifais 3–5

Lihais qhia nws tus tub Yauxej txog qhov uas yuav muaj los yav tom ntej los ntawm Yauxej tim Iyiv teb chaws. Zaj no hais txog ib tug “pom tau uas tseem ceeb heev” thaum yav tom ntej, Joseph Smith. Nqe 6–24 hais li cas txog qhov uas Joseph Smith yuav ua dab tsi kom foom koob hmoov rau Vajtswv cov neeg? Cia li xav txog vim li cas Joseph Smith tej hauj lwm “muaj nqis heev” rau koj. Tej zaum koj yuav txais tswv yim los ntawm cov vidi-aus txog Joseph Smith nyob hauv pawg “Prophets of the Restoration” nyob hauv Txoj Moo Zoo cov Ntawv. Xav txog tej lus nug li no, thiab xav seb koj puas sau ntawv txog koj tej lus teb:

• Koj paub dab tsi txog Leej Txiv Saum Ntuj Ceeb Tsheej thiab Yexus Khetos los ntawm tej yam uas Joseph Smith tau qhia?

• Koj lub neej tau hloov npaum li cas los ntawm tej uas tus Tswv muab txum tim rov qab los dhau los ntawm Joseph Smith?

• Koj lub neej yuav zoo li cas yog tias tsis tau muab Txoj Moo Zoo Txum Tim Rov Qab Los?

Ib feem ntawm Joseph Smith ntiag tug hauj lwm yog kev ua kom Phau Ntawv Maumoos tawm los. Koj kawm dab tsi los ntawm tshooj no txog vim li cas Phau Ntawv Maumoos tseem ceeb heev? Qhov tseem ceeb, tej zaum koj yuav xav nrhiav hauv nqe 7, 11–13, 18–24.

Kuj saib Joseph Smith Kev Txhais Lus, Chiv Keeb 50:24–38 (nyob hauv phau Npaivnpaum cov ntawv ntxiv rau tom qab); Txoj Moo Zoo tej Ntsiab Lus, “Joseph Smith,” Txoj Moo Zoo cov Ntawv; “Qhuas tus Txiv Neej,” Cov Nkauj Qhuas Vajtswv, zaj 13.

Nifais hais tias nws yuav “sau ntau yam ntawm kuv tus ntsuj plig” (nqe 15). Thaum koj nyeem tej yam uas nws sau nyob hauv 2 Nifais 4:15–35, nug koj tus kheej seb “Tej yam ntawm kuv tus ntsuj plig yog dab tsi?” Xav seb koj puas sau ntawv txog tej ntawd, ib yam li Nifais, thiab qhia tej ntawd rau cov neeg uas koj hlub.

Pom seb Nifais tau nrhiav kev nplij siab li cas thaum nws nyuaj siab thiab ntxhov siab pab koj thaum koj muaj kev xav zoo ib yam. Nrhiav hauv nqe 15–35 rau cov lus uas ua rau koj muaj kev nplij siab. Koj puas paub leej twg uas tej zaum yuav txais kev nplij siab los ntawm tej nqe no?

Kuj saib Ronald A. Rasband, “Tej Yam ntawm Kuv tus Ntsuj Plig,” Liahona, Kaum Ib Hlis Ntuj 2021, 39–41.

Koj xav hais tias kev zoo siab txhais tau li cas? Nifais sau ntawv hais tias nws cov neeg tau “ua neej nyob zoo siab” (2 Nifais 5:27). Tej zaum koj yuav xav nrhiav tej yam uas Nifais thiab nws cov neeg tau xaiv uas ua rau lawv zoo siab (saib, ua piv txwv 2 Nifais 5:6,10–17). Koj yuav ua li cas tsim lub neej zoo siab li Nifais cov neeg?

Nyob hauv Nifais lub caij nyoog kev foom tsis zoo uas los rau cov Neeg Lamas yog qhov uas lawv “tau raug txiav tawm ntawm [tus Tswv] xub ntiag mus … vim lawv txoj kev ua phem” (2 Nifais 5:20–21). Qhov no txhais hais tias tus Tswv tus Ntsuj Plig twb tso lawv tseg ntawm lawv lub neej mus. Tom qab ntawd thaum cov Neeg Lamas tau muab siab rau ntseeg Yexus Khetos txoj moo zoo, “Vajtswv txoj kev foom tsis zoo tsis nrog lawv mus ntxiv lawm” (Amas 23:18).

Phau Ntawv Maumoos kuj hais tias cov Neeg Lamas muaj daim tawv nqaij dub tom qab lawv ncaim cov Neeg Nifais mus. Qhov uas lub cim no zoo li cas thiab muaj vim li cas los peb tsis to taub txhua yam. Thaum xub thawj lub cim no ua rau cov Neeg Lamas txawv cov Neeg Nifais. Tom qab ntawd, thaum cov Neeg Nifais thiab cov Neeg Lamas ob pawg no nyias muaj nyias sij hawm thaum lawv ua phem thiab ua ncaj ncees, lub cim no tsis tseem ceeb hlo li.

Cov yaj saub nyob hauv peb hnub nyoog no qhia tias daim tawv nqaij dub tsis yog ib lub cim uas qhia tias Vajtswv tsis pom zoo los sis foom tsis zoo. Thawj Tswj Hwm Russell M. Nelson tau hais tias: “Kuv qhia kom nej paub tias Vajtswv tsis txiav txim rau nej raws li nej daim tawv nqaij yog xim dab tsi. Qhov uas Vajtswv pom zoo rau yus yeej nyob ntawm nej txoj kev hawm Vajtswv thiab kev ua raws li Nws cov lus txib tsis yog vim nej daim tawv nqaij yog xim dab tsi” (“Cia Vajtswv Yeej,” Liahona, Kaum Ib Hlis Ntuj 2020, 94).

Ib yam li Nifais qhia, tus Tswv “yeej tsis tau txwv ib tug twg uas los cuag nws, … tsis hais poj niam los txiv neej; … thiab txhua txhia tus zoo tib yam nkaus rau Vajtswv” (2 Nifais 26:33).

Kuj saib “Till We All Come in the Unity of the Faith” (vidi-aus), Txoj Moo Zoo cov Ntawv.

• Xav txog seb koj qhia koj cov me nyuam li cas txog txoj hauj lwm zoo kawg naus uas Vajtswv tau ua tiav dhau los ntawm Joseph Smith. Koj pib los ntawm kev pab koj cov me nyuam nrhiav lo lus “tus pom tau” hauv 2 Nifais 3:6 thiab qhia tias cov yaj saub yog cov uas pom tau rau qhov Leej Txiv Saum Ntuj Ceeb Tsheej pab lawv pom tej yam uas peb tsis pom. Cia li qhia vim li cas koj zoo siab tias muaj ib tug pom tau coj lub Koom Txoos.

• Phau Muaj Duab txog Txoj Moo Zoo muaj duab koj siv tau qhia txog txoj hauj lwm Vajtswv tau ua los ntawm Joseph Smith (saib duab 89–95). Cia koj cov me nyuam qhia seb lawv paub dab tsi txog cov duab. Vim li cas tau hu Joseph Smith ua ib tug “pom tau uas tseem ceeb heev”? Joseph Smith tau ua dab tsi uas “muaj nqis heev”? (nqe 7).

• Tej yam dab tsi ua rau peb zoo siab? Xav seb puas xav nyeem tej nqe los ntawm 2 Nifais 4 ua ke kom nrhiav qhov uas ua Nifais zoo siab (saib nqe 15–16, 20–25, 34–35). Nyob hauv nws zaj lus “Tej Yam ntawm Kuv tus Ntsuj Plig,” Txwj Laug Ronald A. Rasband qhia xya “yam ntawm tus Tswv” uas muaj nuj nqis rau nws (Liahona, Kaum Ib Hlis Ntuj 2021, 39–41). Tej zaum nej nyeem nws tej zaj ua ke thiab sib tham txog “tej yam los ntawm tus Tswv” uas muaj nuj nqis rau nej.

• 2 Nifais 5 kuj qhia tej yam uas pab cov neeg Nifais tau “ua neej nyob zoo siab” (nqe 27). Tej zaum koj muab lo lus los duab uas sawv cev rau tej yam no thiab pab koj cov me nyuam phim tej yam ntawd rau tej nqe hauv tshooj 5. Ib cov piv txwv yog tsev neeg (nqe 6), Vajtswv cov lus txib (nqe 10), cov vaj lug kub (nqe 12), kev ua hauj lwm (nqe 15 thiab 17), cov tuam tsev (nqe 16), thiab txoj kev hu hauv lub Koom Txoos (nqe 26). Yog vim li cas tej no thiaj ua rau peb zoo siab?

• Thaum koj nyeem 2 Nifais 5:15–16 rau koj cov me nyuam, tej zaum lawv yuav xav ua yeeb yam txog qhov uas lawv pab Nifais tsim ib lub tuam tsev. Tej zaum koj qhia duab txog cov tsev sib txawv, thiab ib lub tuam tsev. Cov tuam tsev txawv li cas ntawm lwm cov tsev? Cia ib leeg qhia ib leeg tias vim li cas lub tuam tsev tseem ceeb rau nej (kuj saib “I Love to See the Temple,” Children’s Songbook, 95).