“Peb Hlis Ntuj 18–24: ‘Qhov No Yog txoj Kev.’ 2 Nifais 31–33,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024(2024)
“Peb Hlis Ntuj 18–24. 2 Nifais 31–33,” Los, Nrog Kuv Mus—Siv hauv Tsev thiab lub Koom Txoos: 2024 (2024)
Khetos Qhia Nws cov Thwj Tim, los ntawm Justin Kunz
Peb Hlis Ntuj 18–24: “Qhov No Yog txoj Kev”
2 Nifais 31–33
Nyob hauv Nifais’s tej lus uas nws sau ntawv thaum kawg, peb nyeem tau tej lus tshaj tawm no: “Tus Tswv tau txib kuv li no, thiab kuv yuav tsum mloog lus” (2 Nifais 33:15). Cov lus no yog ntsiab lus txog Nifais lub neej. Nws sim to taub tus Tswv lub siab nyiam thiab ua siab loj ua li ntawd—tsis hais nws yuav tsum raug xwm txheej thaum nqa cov phiaj toog los ntawm Lanpas, ua ib lub nkoj thiab hla dej hiav txwv, los sis rau siab ntseeg qhia Khetos cov lus qhuab qhia, qhia meej thiab qhia nrog lub hwj chim. Nifais txawj hais lus yaum kom tib neeg paub tias lawv yuav tsum “txiv mus lawm tom hauv ntej nrog txoj kev ntseeg Khetos uas khov kho,” lawv yuav tsum taug “txoj kev ti thiab nqaim no uas yuav coj mus rau txoj sia nyob mus ib txhis” (2 Nifais 31:20, 18), vim txoj kev ntawd yog txoj kev uas nws twb taug lawm. Nws paub los ntawm nws lub neej tias txoj kev no, txawm tej lub sij hawm raug tej yam nyuaj los, yeej yog ib txoj kev xyiv fab, thiab “yeej tsis muaj lwm txoj kev los sis lwm lub npe nyob hauv qab ntuj uas yuav cawm tau tib neeg nyob hauv Vajtswv lub nceeg vaj” (2 Nifais 31:21).
Tej Tswv Yim Pab Qhia hauv Tsev thiab lub Koom Txoos
Yexus Khetos thiab Nws cov lus qhuab qhia yog tib txoj kev mus rau txoj sia nyob mus ib txhis.
Yog tias koj yuav tsum siv ob peb lo lus xwb hais tej ntsiab lus txog txoj kev mus rau txoj sia nyob mus ib txhis, koj yuav hais li cas? Cia li saib seb Nifais piav li cas hauv 2 Nifais 31. Xav seb koj puas kos duab txog ib txoj kev thiab nyob ntawm txoj kev cia li sau tej ntsiab cai uas koj nrhiav tau hauv tej tshooj no. Tej zaum koj yuav xav sau ib zaj ntsiab lus txog tej uas Nifais qhia txog txhua lub ntsiab cai no.
Thaum koj nyeem 2 Nifais 31:18–20, xav txog koj siv zog li cas kom “txiv mus lawm tom hauv ntej” ntawm txoj kev uas yog txoj moo zoo.
Kuj saib “Thawb Mus Tom Ntej, Haiv Neeg Ntseeg,” Cov Nkauj Qhuas Vajtswv, zaj 27.
Kev coj raws li Yexus Khetos tej lus qhia coj peb mus rau txoj sia nyob mus ib txhis.
Yexus Khetos tau ua yam ntxwv zoo tag nrho txog kev mloog lus thaum Nws ua kev cai raus dej.
Txawm koj ua kev cai raus dej nag hmo los sis 80 tawm xyoo tas los, lub sij hawm ntawd yeej tseem ceeb. Koj tau khi lus tias koj yuav raws Yexus Khetos mus ib txhis. Cia li xav txog thaum koj ua kev cai raus dej thaum koj nyeem txog tus Cawm Seej txoj kev ua kev cai raus dej nyob hauv 2 Nifais 31:4–13. Teb tej lus nug li no yuav pab tau koj:
-
Vim li cas Khetos tau ua kev cai raus dej? Vim li cas kuv txiav txim siab ua kev cai raus dej?
-
Kuv cog lus dab tsi thaum kuv ua kev cai raus dej? Tus Tswv cog lus dab tsi rau peb? (saib nqe 12–13; kuj saib Mauxiyas 18:10–13).
-
Kuv yuav ua li cas kom qhia tias kuv cog lus rau thiab coj raws li Yexus Khetos?
“Tus uas nyiaj mus kom txog thaum kawg, tus ntawd yuav txais kev cawm dim.”
Thaum koj nyeem 2 Nifais 31:15–20, nug koj tus kheej, “Kuv yuav ua li cas thiaj paub tias kuv nyiaj kom mus txog thaum kawg?” Koj kawm dab tsi los ntawm Nifais uas pab koj teb lo lus nug no?
Txwj Laug Dale G. Renlund tau qhia: “Txoj kev nyiaj kom mus txog thaum kawg tsis yog ib txoj kev uas tsis muaj feem nrog Khetos cov lub qhuab qhia—tsis yog hais tias peb ua kom thawj plaub kauj ruam tiav ces nyob twj ywm, tom hniav qees, thiab tos kom tuag xwb. Tsis yog, txoj kev nyiaj kom mus txog thaum kawg yog ib txoj uas yus rov ua dua cov kauj ruam” (“Lifelong Conversion” [Brigham Young University kev sib ntsib hawm Vajtswv, Cuaj Hlis Ntuj 14, 2021], 2, speeches.byu.edu). Koj ua li cas kom rov qab ua cov kauj ruam ntawm Khetos cov lus qhuab qhia (kev ntseeg, kev hloov siab lees txim, kev cai raus dej, thiab lub txiaj ntsim Vaj Ntsuj Plig Dawb Huv)?
Los ntawm Khetos cov lus thiab tus Vaj Ntsuj Plig Dawb Huv, Vajtswv yuav qhia kuv tias kuv yuam tsum ua dab tsi.
Koj puas tau xav tias tsis paub meej txog cov kauj ruam tom ntej hauv koj lub neej? Nifais cov neeg kuj xav ib yam (saib 2 Nifais 32:1). Nrhiav Nifais tej lus teb nyob hauv 2 Nifais 32:2–9. Koj yuav piav li cas siv koj cov lus hais tej yam uas Nifais tau qhia? Tej yam twg hauv koj lub neej tau qhia koj tias Nifais cov lus muaj tseeb?
Xav seb koj puas sau ntawv txog kev txiav txim siab los yog tej xwm txheej (tam sim no thiab yav tom ntej) uas koj xav tau Vajtswv txoj kev pab. Koj kawm dab tsi los ntawm 2 Nifais 32 uas yuav pab koj txais kev tshoov siab zoo los ntawm Nws? Tej yam twg yuav ua rau tib neeg “ua lawv lub siab tawv qhawv tawm tsam tus Ntsuj Plig Dawb Huv”? (2 Nifais 33:2).
Thaum koj xav txog Nifais cov lus, xav txog seb koj kawm tus Cawm Seej cov lus li cas. Koj puas piav tias yog kev kawm me ntsis xws, kawm zoo, los yog kawm ntau? Raws li koj txoj kev xav, tej no sib txawv li cas? Cia li xav seb koj yuav ua li cas kom koj kawm tau tus Cawm Seej cov lus ntau. Tej zaum koj yuav xav tau tswv yim los ntawm ib tug phooj ywg los yog ib tug neeg hauv tsev neeg.
Mloog ntsoov Khetos tej lus. Muaj ntau txoj kev mloog ntsoov Khetos tej lus, ib yam li thov Vajtswv kom txais kev tshoov siab, nug tej yam ua ntej thiab thaum yuav nyeem vaj lug kub, txhais cov lus, xav txog, saib tej nqe uas muaj feem, nrhiav cov lus tseeb ntawm txoj moo zoo, thiab siv cov vaj lug kub hauv koj lub neej (saib 1 Nifais 19:23).
Koj yuav ua li cas kom caw tus Vaj Ntsuj Plig Dawb Huv los nrog koj koom ua ke txhua lub sij hawm hauv koj lub neej, tsis yog ib lub sij hawm tuaj xyuas xwb? Nyeem David A. Bednar peb lub tswv yim kom thiaj li muaj tus Vaj Ntsuj Plig Dawb Huv nrog koj koom ua ke txhua hnub nyob hauv “Txais tus Vaj Ntsuj Plig Dawb Huv” (Liahona, Kaum Ib Hlis Ntuj 2010, 94–97). Peb yuav raws nws tej lus qhia li cas?
Kuj saib Txoj Moo Zoo tej Ntsiab Lus, “Kev Tshwm Sim,” Txoj Moo Zoo cov Ntawv; “Daily Bread: Pattern” (vidi-aus), Txoj Moo Zoo cov Ntawv.
Phau Ntawv Maumoos yaum kom txhua tus ntseeg Khetos.
Nyob hauv 2 Nifais 33, thaum Nifais xaus nws tej kev sau ntawv, nws piav vim li cas nws sau ntawv. Koj nrhiav tau yog vim li cas nyob hauv tshooj no? Cia li xav txog cov dab neeg thiab cov lus qhuab qhia uas koj tau nyeem nyob hauv 1 Nifais thiab 2 Nifais. Tej yam twg tau cuam tshuam koj thiab koj txoj kev ntseeg Khetos tshaj plaws?
Kuj saib “Nephi Records His Final Testimony” (vidi-aus), Txoj Moo Zoo cov Ntawv.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Thaum kuv ua kev cai rau dej, kuv coj raws li Yexus Khetos.
-
Muaj ib daim duab txog Yexus thaum Nws ua kev cai rau dej ntawm tus txheej txheem qhia no. Tej zaum koj cov me nyuam yuav xav siv daim duab no thiab qhia koj seb lawv paub dab tsi txog qhov no (kuj saib Mathais 3:13–17). Vim li cas Yexus xav kom peb ua kev cai rau dej ib yam li Nws? Tej zaum koj cov me nyuam yuav xav mloog seb puas hnov vim li cas thaum koj nyeem los ntawm 2 Nifais 31:4–13 ua ke. Tej zaum yuav pab tau yog ib tug me nyuam uas nyuam qhuav ua kev cai rau dej piav txog nws txoj kev tshwm sim.
Yexus Khetos qhia kuv tias yuav ua li cas kom rov qab mus cuag Leej Txiv Saum Ntuj Ceeb Tsheej.
-
Xwv kom pab koj cov me nyuam xav txog cov lus qhuab qhia hauv 2 Nifais 31, lawv kuj kos duab txog ib txoj kev uas muaj Khetos thaum kawg. Koj kuj pab tau lawv nrhiav los yog kos duab txog cov kauj ruam ntawm txoj kev, ib yam li kev ntseeg Khetos, kev hloov siab lees txim, kev cai raus dej, kev txais lub txiaj ntsim Vaj Ntsuj Plig Dawb Huv, thiab nyiaj kom mus txog thaum kawg. Tej zaum lawv taw tes rau cov duab thaum koj nyeem 2 Nifais 31:17–20 ua ke los tau.
Kuv yuav mloog ntsoov Khetos tej lus.
-
Kom qhia txog kev “mloog ntsoov” Khetos tej lus, tej zaum koj nug tau koj cov me nyuam kom lawv qhia koj seb lawv noj cov mov uas lawv nyiam tshaj plaws li cas. Nyob hauv 2 Nifais 32:3, Nifais hais tias peb yuav tsum mloog ntsoov dab tsi? Mloog ntsoov Vajtswv tej lub txawv li cas ntawm kev nyeem xwb? Tej zaum koj cov me nyuam qhia tau seb txawv li cas. Qhia lawv txog cov koob hmoov koj tau txais thaum koj mloog ntsoov cov vaj lug kub.
Leej Txiv Saum Ntuj Ceeb Tsheej xav kom kuv thov Vajtswv tas mus li.
-
Tom qab nyeem 2 Nifais 32:8–9, tham nrog koj cov me nyuam txog qhov uas vim li cas Dab Ntxwg Nyoog tsis xav kom peb thov Vajtswv. Vim li cas Vajtswv xav kom peb “thov Vajtswv tas mus li”? Tej zaum koj cov me nyuam yuav xav sau los yog kos duab txog tej lub sij hawm uas lawv thov Vajtswv tau. Ces nej hu tau ib zaj nkauj uas qhia txog kev thov Vajtswv, xws li “Koj Puas Tau Thov Vajtswv?” ( (Cov Nkauj Qhuas Vajtswv, zaj 55). Koj kuj muab cov lus hauv zaj nkauj pauv kom siv tej lus uas lawv tau sau lawm. Tus Tswv foom koob hmoov rau peb li cas thaum peb thov Vajtswv tas mus li?
Yog xav tau tswv yim ntxiv, saib phau xov xwm Phooj Ywg rau lub hlis no.
Kom Muaj Raws Li Tag Nrho Kev Ncaj Ncees, los ntawm Liz Lemon Swindle