2 Nifais 20–25

Kev sib cav sib ceg yog ib qho teeb meem rau Lihais cov me nyuam. Qhov teeb meem ntawd twb loj tuaj thaum yav tom ntej, ua rau lawv sib nrug, raug ntes, muaj kev tu siab, thiab raug puas tsuaj. Thiab niaj hnub nim no kev sib cav sib ceg tseem yog ib qhov teeb meem.

Cia li xav txog tej ntawd thaum koj xav txog tej uas yuav muaj los yav tom ntej nyob hauv 2 Nifais 21–22. Cia li xav txog qhov uas Tus Cawm Seej ua li cas kom muaj raws li tej uas yuav muaj los yav tom ntej. Koj xav li cas txog tej lus qhia tej uas yuav muaj los yav tom ntej txog tus hma uas yuav “nyob nrog tus me nyuam yaj”? (2 Nifais 21:6). Cia li xav txog tej yam koj yuav ua kom xaiv ua ib tug uas tsim kev thaj yeeb nyab xeeb.

Saib Dale G. Renlund, “Khetos txoj Kev Thaj Yeeb Rhuav Kev Ntxub,” Liahona, Kaum Ib Hlis Ntuj 2021, 83–85.

Nifais thiab nws tsev neeg tau pom lub sij hawm uas Ixayees txoj kev tawg khiav ri niab(see 2 Nifais 25:10). Tam sim no koj muaj peev xwm koom tes pab muab Ixayees sau los ua ke (saib 2 Nifais 21:12). Thaum koj nyeem 2 Nifais 21:9–12, xav txog seb koj muaj peev xwm ua dab tsi kom pab muaj raws li tej uas qhia yuav muaj los yav tom ntej uas cov nqe no piav txog.

Piv txwv hais tias, thaum koj nyeem txog “tus chij” uas yuav tsa muab Vajtswv cov neeg sau los ua ke, xav txog seb koj tau pom Vajtswv muab Nws cov neeg sau los ua ke ntawm sab cev nqaij daim tawv thiab sab ntsuj plig. Tib neeg nyiam dab tsi txog tus Tswv thiab nws lub Koom Txoos?

Koj txais kev tshoov siab ua dab tsi kom pab muab Vajtswv cov neeg sau los ua ke?

Lub nceeg vaj Npanpiloos muaj pawg tub rog uas tawm tsam Ixayees puag thaum ub. Tiam sis raws li Nifais cov neeg xav—thiab peb xav ib yam li no niaj hnub no— Npanpiloos yog ib lub cim txog tej yam uas phem tshaj: kev ua li neeg ntiaj teb ua thiab kev ua txhaum. Cia li xav txog qhov uas tus Tswv tej lus ceeb toom nyob hauv 2 Nifais 23–24 ua rau cov neeg uas ntshai los sis xav tau Npanpiloos txoj kev nplua nuj thiab lub hwj chim xav li cas (saib, piv txwv hais tias 23:6–9, 11, 19–22; 24:10–19). Niaj hnub no peb ntshai los sis nyiam los sis tso siab rau tej yam twg zoo li ntawd? Koj xav tias tus Cawm Seej qhia dab tsi rau koj nyob hauv tej tshooj no? Xav seb koj yuav ua li cas kom qhia tias koj “zoo siab txog [tus Tswj] lub yeeb koob” (2 Nifais 23:3).

NIfais yeej nyiam qhia txog tej yam uas nws ntseeg—qhov tseem ceeb yog nws tej lus tim khawv txog Yexus Khetos. Thaum koj kawm 2 Nifais 25, cia li xav txog Nifais txoj kev xav kom “yaum [nws] cov me nyuam … kom los ntseeg Khetos, thiab rov los nrog Vajtswv sib raug zoo” (nqe 23). Nifais xav kom tib neeg paub dab tsi txog tus Cawm Seej? (saib nqe 12–13, 16). Nifais ua li cas kom sim yaum tib neeg los ntseeg Nws? (saib nqe 19–29). Cia li xav txog tej nqe hauv tej tshooj no uas pab koj ntseeg thiab coj raws li Yexus Khetos.

Peb ib txhia tej zaum tsis muaj peev xwm npaum li Nifais thaum tham txog Khetos. Tiam sis tej zaum koj kuj nrhiav tau ib yam dab tsi hauv Nifais tej lus qhia nyob hauv 2 Nifais 25:23–26 uas pab tau koj hais ntxiv txog Nws rau lwm tus. Piv txwv hais tias, Nifais tej lus “Peb xyiv fab rau Khetos” tej zaum yuav ua rau koj xav txog tej yam uas tus Cawm Seej tau ua kom koj muaj kev xyiv fab—thiab koj yuav ua dab tsi pab muab kev xyiv fab rau lwm tus.

Hauv nws zaj lus “Peb Hais txog Khetos” (Liahona, Kaum Ib Hlis Ntuj. 2020, 88–91), Txwj Laug Neil L. Andersen caw qhia peb kom peb hais txog Khetos ntxiv nyob hauv txhua qhov chaw. Nws tej lus twg yog tej uas koj nyiam? Koj muaj cib fim dab tsi kom hais txog Khetos nrog lwm tus?

Koj txais kev tshoov siab hais dab tsi txog Yexus Khetos rau lwm tus? Yog koj xav tau tej lub tswv yim, tej zaum koj yuav xav nyeem “Tus Khetos uas Muaj txoj Sia Nyob: Cov Thwj Tim tej Lus Tim Khawv” (Txoj Moo Zoo cov Ntawv). Zaj nkauj li “I Kuv Ntseeg Tswv Yexus” (Cov Nkauj Qhuas Vajtswv, no. 51) kuj pab muab tswv yim ntxiv rau koj.

• Yog xav pab nej tsev neeg xav txog tej nqe no, sim seb puas nrhiav tau ib tug ntoo uas raug ntov tas lawm los yog ib ceg ntoo uas hlav tuaj ntawm ib tug ntoo (los sis nrhiav ib daim duab muab rau lawv saib). Yog “ceg ntoo” nyob hauv 2 Nifais 21:1 piv rau Yexus Khetos, ces nqe 2–5 qhia tau rau peb txog Nws li cas?

• 2 Nifais 21:6–9 qhia dab tsi rau peb txog qhov uas yuav muaj li cas thaum txhua tus neeg coj raws li tus Cawm Seej? (kuj saib 4 Nifais 1:15–18). Peb yuav ua li cas kom kho peb lub tsev ua ib qhov chaw zoo li no? Tej zaum koj cov me nyuam yuav nyiam saib cov duab txog cov tsiaj uas nyob hauv nqe 6–7—tej tsiaj uas ntau zaus yog yeeb ncuab tiam sis yuav los sib raug zoo thaum Yexus rov qab los dua (saib phab ntawv ntxim ua rau lub lim tiam no). Koj cov me nyuam kos tau ib daim duab txog lawv tus kheej thiab cov tsiaj no nyob ua ke sib raug zoo nrog Yexus.

• Yaxayas tau hais tias tus Tswv yuav “tsa ib tug chij rau tej haiv neeg” kom pab cov tib neeg lo cuag Nws (saib 2 Nifais 21:11–12). Pab koj cov me nyuam to taub tias tus ensign yeej yog ib tug chij. Tej zaum lawv yuav zoo siab kos ib daim duab txog lawv tus chij. Tej zaum lawv yuav kos duab thiab sau tej lus uas hais vim li cas lawv los cuag Yexus Khetos thiab Nws lub Koom Txoos. Cia lawv tham txog lawv cov chij, thiab pab lawv xav seb lawv yuav pab tau lwm tus li cas los “cuag” Yexus Khetos.

• Tom qab nyeem ua ke tas 2 Nifais 22:4–5, tej zaum koj yuav xav tham nrog koj cov me nyuam txog tus Tswv tej yam “xwm txheej uas zoo kawg nkaus”. Muaj tej yam twg uas tus Tswv ua rau [peb] uas peb xav tshaj tawm txog? Kom pab koj cov me nyuam xav txog lus nug no, tej zaum koj yuav xav hu ib zaj nkauj ua ke txog tus Cawm Seej, xws li “Kuv Ntseeg Tswv Yexus” (Cov Nkauj Qhuas Vajtswv, zaj. 51). Tej zaum koj tsev neeg yuav xav hais ib kab lus kom tiav xws li no: “Kuv ntseeg Yexus Khetos; Nws .” Peb yuav ua li cas pab tib neeg paub txog tej yam uas tus Cawm Seej tau ua rau peb?

• Koj pab tau koj cov me nyuam kom muab kev “xyiv fab rau Khetos” li cas? Tej zaum koj qhia tau ib zaj dab neeg txog thaum Yexus Khetos tau muab kev xyiv fab los rau lwm tus, los tej zaum koj kuj muab ib qhov vidi-aus zoo li “Jesus Heals a Man Born Blind” los sis “Suffer the Little Children to Come unto Me” rau lawv saib (Txoj Moo Zoo cov Ntawv). Koj cov me nyuam qhia tau rau koj txog tej lub sij hawm hauv zaj dab neeg los qhov vidi-aus uas muaj kev xyiv fab. Ces, thaum nej nyeem 2 Nifais 25:26 ua ke, lawv kuj qhia tau txog vim li cas lawv muaj kev “xyiv fab rau Khetos.”