“Ang Propetang si Samuel,” Mga Kuwento sa Aklat ni Mormon (2023)
Ang Propetang si Samuel
Pagtuturo tungkol sa pagsilang at kamatayan ni Jesus
Isang propetang Lamanita na nagngangalang Samuel ang nagpunta sa Zarahemla para turuan ang mga Nephita. Itinuro Niya ang tungkol sa pagsisisi. Hindi nakinig ang mga Nephita at pinalayas siya sa lungsod.
Babalik na sana si Samuel sa kanyang bayan. Pero sinabi sa kanya ng Panginoon na bumalik upang turuan ang mga Nephita.
Sinabi ng Panginoon kay Samuel na ipaaalam Niya sa kanya ang sasabihin niya. Sumunod si Samuel sa Panginoon. Bumalik siya sa Zarahemla. Pero ayaw siyang papasukin ng mga Nephita sa lungsod.
Umakyat si Samuel sa pader ng lungsod. Sinabi niya ang mga bagay na inilagay ng Panginoon sa kanyang puso. Binalaan niya ang mga tao na sila ay malilipol dahil sila ay gumagawa ng masasamang bagay. Sinabi niya na tanging pagsisisi at pananampalataya kay Jesucristo ang makapagliligtas sa kanila. Sinabi niya na si Jesus, ang Anak ng Diyos, ay isisilang sa loob ng limang taon.
Helaman 13:4–11; 14:2, 8, 12–18
Sinabi ni Samuel na magkakaroon ng mga palatandaan ang pagsilang ni Jesus. Sinabi niya sa mga tao na abangan ang mga palatandaan. Ang isang tanda ay isang gabi na walang kadiliman. Ang iba pang mga palatandaan ay ang isang bagong bituin at maraming kamangha-manghang bagay ang lilitaw sa kalangitan.
Gusto ni Samuel na manampalataya ang mga tao kay Jesus. Sinabi niya na si Jesus ay mamamatay at mabubuhay na mag-uli upang ang lahat ng tao ay maligtas kung sila ay magsisisi.
Sinabi ni Samuel na magkakaroon ng mga palatandaan ang kamatayan ni Jesus. Hindi makikita ng mga tao ang araw, buwan, o mga bituin. Mawawalan ng liwanag sa loob ng tatlong araw.
Magkakaroon ng kulog at kidlat. Magkakaroon ng mga lindol, at mawawasak ang mga lungsod.
May ilang tao na naniwala kay Samuel, pero maraming Nephita ang nagalit sa kanya. Kanilang binato at pinagpapana siya ng mga palaso. Pinrotektahan ng Panginoon si Samuel habang nakatayo siya sa pader. Walang bato at palaso na tumama sa kanya.
Nang walang makatama kay Samuel, marami pang tao ang naniwala sa kanyang mga salita. Pero karamihan sa mga tao ay galit pa rin. Tinangka nilang hulihin si Samuel at itali siya. Nakatakas si Samuel at umuwi. Patuloy niyang tinuruan ang kanyang mga tao.
Ang mga Nephita na naniwala kay Samuel ay nagsisi at nabinyagan ni propetang Nephi. Naniwala sila kay Jesus at hinintay ang mga palatandaan ng pagsilang ni Jesus na sinabi sa kanila ni Samuel.