Tasi le Aso i le Taimi

Manatua: O se aafiaga moni lenei na faasoa mai i se tagata na faasaoina mai le sauaina. Ua suia igoa ma le faailoaina o faamatalaga.

Ou te le manatua pe o le a tonu lo’u matua ina ua amata ona tupu le sauaga. O lo’u tuagane, pe tusa ma le iva tausaga le matua nai lo a’u, na amata ona ia sauaina a’u. O nisi taimi na tupu ai le sauaga i le aso na o ese ai o’u matua ma sa tausitama o ia. I se tasi taimi sa ki lana leitio—ou te manatua pea le pese o loo taina. Ou te inoino i lena pese.

Ina ua atoa lo’u valu tausaga, sa tatau ona papatisoina a’u e lo’u tama. Sa iu ina le mafai ona i ai o ia iina i le aso faatulagaina ma sa lei manao lo’u tina e toe faatulaga lo’u papatisoga, o lea sa ia fautuaina ai lo’u tuagane e papatiso a’u. Ou te lei iloa se tala e fai atu, o lea sa ou faatagaina ai o ia. Mulimuli ane, sa ou fesiligia lo’u papatisoga mo se taimi umi lava.

O le isi tagata faatautala o lo’u tausoga. Sa amata ona ia sauaina a’u ina ua o mai lona aiga e asiasi mai ia i matou mo le lua vaiaso. Sa fitu pe valu o’u tausaga. Sa ou inoino i ia mea uma.

Pe a ma le lua tausaga mulimuli ane, na faalatalata atili atu ai le aiga o lo’u tausoga i lo’u aiga. Matou te asiasi atu ia i latou mo faaiuga o vaiaso, ma i le taimi o le taumafanafana o le a matou nonofo ai mo ni vaiaso i se taimi. Sa faaauau pea le sauaina. E taumafai pea lava pea ia maua na o a’u. Sa ou lagonaina le mataga ma le palapala ma le leai o se malosi.

I le 12 o o’u tausaga sa ma talanoa ai ma lo’u epikopo e uiga i le mauaina o se pepa faataga o le malumalu e faia papatisoga mo e ua maliliu. Ina ua fesiligia e lo’u epikopo se tasi o fesili o le faatalanoaga o le pepa faataga, sa amata ona ou tagi. Sa ia silafia le uiga o lena mea. Pau lava le mea na ia fai mai ai o le, “O ai?” Sa na ona ou lipoti atu o lo’u tausoga. E le o toe mamao ae sau lo’u tuagane i le fale mai lana misiona, o lea ou te lei fai atu ai se tala e uiga ia te ia. Sa ou tauivi ma lena faaiuga mo le tele o lo’u olaga.

Sa amata ona ou inu ava malosi i le vasega valu po o le iva. I le taimi o o’u tausaga talavou sa ou aafia ai i feusuaiga ma nisi o uo tama. Sa i ai so’u uiga “ou te le popole” ma faia soo se mea na fesiligia ai a’u. Ina ua maea le aoga maualuga, sa iu ina ma nonofo ma la’u uo tama pe tusa ma se tausaga seia oo ina malepe le ma mafutaga.

Sa fesoasoani se uo lelei ia te au e mafaufau e uiga i le mea sa ou manao e fai i lo’u olaga. Sa amata ona ou toe alu i le lotu ma toe maua mai lo’u olaga i luga o le ala. Na iu lava ina ou faaipoipo i se alii ofoofogia. Ina ua 13 tausaga talu ona ma faaipoipo, sa ou ta’u atu ia te ia e uiga i le sauaina. Sa na ona ia opoina a’u i ona lima ma opomau a’u. Sa ia fesoasoani ia te au i le au faufautua ona amata lea ona ou auai i le vaega o togafitiga a le taulasea. Sa ou lagona le faanoanoa mo ni masina ina ua uma ona ou ta’u atu i lo’u toalua e uiga i le sauaina, ae ina ua uma ona ou auai i fautuaga a tagata taitoatasi ma vaega, sa sili atu ona lelei la’u faatinoga.

Ua ou oo i le tele o aafiaga mai le sauaina. O au o se tina e sili ona puipuia. Ou te le faatuatuaina gofie tagata. E faigata ia te a’u ona faia ni faaiuga na o a’u lava.

I nisi o auala ua ou faaaogaina ai mea ua ou aoaoina e avea ai ma se matua e sili atu ona lelei. Ma te aoaoina ma lo’u toalua le ma fanau e uiga i le pa’i talafeagai. O loo i ai sa tatou aiaiga o le faitotoa tatala ma ta’u atu i a tatou fanau e mafai ona latou talanoa mai ia i matou e uiga i soo se mea.

O loo i ai pea o’u aso leaga, ae ua ou aoao e ave mea i le aso e tasi i le taimi. Ua le tele nei ona tulai mai ni aso leaga. Ua i ai lo’u faamoemoe mo le lumanai.

Afai na sauaina oe po o se tasi e te iloa, saili vave se fesoasoani mai pulega faalemalo, auaunaga o puipuiga a tamaiti, po o auaunaga o puipuiga a tagata matutua. E mafai foi ona e sailia le fesoasoani mai se fautua po o se faufautua po o se polofesa faafomai. O nei auaunaga e mafai ona fesoasoani e puipuia oe ma puipuia ai nisi sauaga. Tagai i le itulau o le “I Faalavelave” mo nisi faamatalaga.