Mauaina o Manatu Tupito o le Malamalama

Manatua: O se aafiaga moni lenei na faasoa mai i se tagata na faasaoina mai le sauaina. Ua suia igoa ma le faailoaina o faamatalaga.

Sa foliga mai na amata lelei la’u faaipoipoga. Sa ou maua le alofa ma sa ou fiafia. Ae ina ua mavae sina taimi, sa amata le sauaina faaletino, faalelagona, ma upu. Sa ou manaomia se auala e tausisia ai le saogalemu o a’u lava ma la’u fanau. O le leai o so’u iloa pe faapefea ona fatuina se lumanai fou mo lo’u aiga ma lo’u fefe na taofia ai a’u mai le mauaina o se fesoasoani. Ae ina ua mavae le iva tausaga, sa ou iloa ai le auala e faasaoloto ai.

Na faapefea ona ou aluese mai le mavae ai o le iva tausaga o ola ai i lena sauaga faatautala? O le a la’u mea sa fai? Na iu lava ina ou le toe faalogo i le leo o le fili lea na fai mai ia te a’u e leai se auala e aluese ai. Nai lo lena, sa ou faliu atu e saili ni manatu o le malamalama na tuuina mai e lo’u Tama Faalelagi mo a’u o se taiala e tuua ai le faaipoipoga faatautala. Sa manaomia le aoaoina o le auala e tatalo ai ma mulimuli i Lana taitaiga e saili ai na tali o le malamalama:

Sa ou tausia a’u feagaiga, totogi la’u sefuluai, ma aoao pe faapefea ona mulimuli i uunaiga a le Agaga—o na faatinoga na faatumauina ai lo’u taula ma le faatuatua i lo’u Tama Faalelagi.
Sa ma galulue ma lo’u epikopo ma maua le malosi e maua ai faaaliga faaletagata lava ia. E ala mai i lena malosi sa ou iloa ai le taimi e alu ese ai.
Sa ou maua le vaaiga ma le tali e le mafai ona ou fesoasoani, faaleleia, pe taitai lo’u toalua i le malamalama. Sa i ai o ia i aao o le Tama Faalelagi—sa tatau ona ou faamatuu esea!
Sa ou maua lo’u tutoatasi i mea tautupe e ala i le mauaina o aoaoga faamasani ma le avea ma se faiaoga (ae na alu ai le lima tausaga i la’u faaipoipoga e ausia ai lena tulaga).
O tulaga na taitai atu ai au i se leoleo o le na tuuina mai ia te au faamatalaga o le nofoaga autu mo faalavelave.
Sa fesoasoani le nofoaga autu mo faalavelave ia te a’u ia maua se faatulagaga le tumau o le puipuiga.
Sa tuuina mai ia te a’u e le faamasinoga se faatulagaga tumau o le puipuiga, ona tatalaina lea o se faaipoipoga ma le tausia atoatoa o le ma fanau.

Sa i ai faafitauli faalemafaufau ma faalelagona a o ou faamaloloina; o nei mea na tutupu i le taimi o a’u miti taufaafefe. E ta’u mai e le fili ia te a’u ia pepelo, e pei o le, “Ua tele naua oe: ua tele naua galuega, ua toatele naua tamaiti, ua tele naua faafitauli. O ai o le a manao ia te oe pe a e alu? Ua tele naua mea e te taulimaina. Sa e vaivai tele e fesoasoani i lau lava tane.” Sa tu’itu’i mai e le fili mafaufauga le lelei i lo’u taua faaletagata lava ia, ma taumafai ia ou talitonu ou te le aoga. O le siuleo le mafaagaloina lea na fiti solo i lo’u ulu ina ua mavae nei vaega uma sa lei umi lava.

Aisea? Ona o le anoanoai o galuega sa tatau ona ou faia: “O a’u o se tina o se fanau e toalima, o le toatolu o i latou e i ai le faaletonu o le mafaufau. Sa ou tausia ma o loo tausia a’u feagaiga. Sa ou faiaoga i le vasega lima i tamaiti e i ai le faaletonu o le mafaufau, sa ou mauaina la’u tusi faamaonia o le aoao atu, ma sa ou mauaina le faailoga o lo’u matuaofaiva i aoaoga faapitoa i le taimi lava e tasi. A o ou taulai atu i la’u galuega, la’u molimau, ma lo’u olaga, sa ou maua se vaaiga ma se faamaoniga o o’u faamanuiaga. O lena faamaoniga na faafilemu ai le leo o le fili.

Sa ou maua foi se vaaiga ma le faamoemoe e mafai ona atiina ae fesootaiga, faauoga, ma le alofa. Ou te matauina, faamaumau i la’u api talaaga, ona faitau lea ma toe faitau pea lava pea e saili mamanu, lagolago, fausaga, faauoga, ma mailei e mafai ona tupu i soo se tasi o i tatou.

A o ou aoao e toe lagonaina le alofa, sa ou aoaoina ni manatu mamana se lua: (1) O le alofa o le Tama Faalelagi mo Ana fanau uma e atoatoa ma (2) ona o lena alofa, o le a le faalavelavea ai le Tama Faalelagi i le faitalia o Ana fanau. E ala i lo tatou faitalia e mafai ai ona tatou filifili le malamalama po o le pogisa, alofa po o taua. E mafai ona tatou tatala atu mo uunaiga a le Agaga. E mafai ona tatou maua le faamoemoe! Ma le mea mulimuli, e mafai ona tatou maua le susulu o le malamalama e taiala ai i tatou mai le o’oo’o o le sauaina.

Afai na sauaina oe po o se tasi e te iloa, saili vave se fesoasoani mai pulega faalemalo, auaunaga o puipuiga a tamaiti, po o auaunaga o puipuiga a tagata matutua. E mafai foi ona e sailia le fesoasoani mai se fautua po o se faufautua po o se polofesa faafomai. O nei auaunaga e mafai ona fesoasoani e puipuia oe ma puipuia ai nisi sauaga. Tagai i le itulau "I Faalavelave" mo nisi faamatalaga.