E I Ai Lo’u Faamoemoe

Manatua: O se aafiaga moni lenei na faasoa mai i se tagata na faasaoina mai le sauaina. Ua suia igoa ma le faailoaina o faamatalaga.

A o o’u talavou, sa sauaina a’u faaletino ma toso faamalosi e se uo faaleaiga. O ia o se alii sa ou faaaloalogia ma faatuatuaina muamua. O mea uma sa ou manatu sa ou iloa e uiga i le olaga ua suia.

Sa ou ola ae ma aoaoina ina ia fiafia a o ou i ai faatasi ma isi tagata. O le auala lea sa ou taulimaina ai luitau uma i le olaga, ma o le tua patatua o le osofaiga sa leai se eseesega. I tagata na siomia au, sa ou foliga faamanuiaina. Sa faaauau pea ona ou maua ni togi lelei ma auai i se au taaalo a le aoga, faapea ai foi ma isi gaoioiga faaopoopo. Sa ou toaga i la’u uarota ma gaoioiga a le autalavou. Ou te le’i manao e iloa e se tasi le mea na tupu, o lea sa ou faia ai mea uma ou te mafaia e foliga mai e masani ai.

Ae o le tele o lo’u taumafai, sa le mafai ona ou lafi mai le mea na tupu. E ui lava i o’u foliga vaaia, ae sa ou tauivi ma le atuatuvale, popolevale, ma le faaletonu o le atuatuvale. Sa ou le toe faatagaina se tasi e pa’i mai ia te a’u—e oo lava i o’u matua, uso, ma tuafafine. I le ao, ua ou toefaaolaina le osofaiga e ala i manatuaga; i le po, sa ou toefaaolaina i a’u miti. E oo lava i le faatinoga faamafanafana o le tatalo na lagonaina le vaivai tele ma e masani ona faamutaina i osofaiga o le atuatuvale.

Sa faamata’uina a’u e le na osofaia au e fasioti a’u, ma sa tele taimi sa ou manatu ai o le a sili atu pe ana mulimuli o ia i ana upu.

O le sailia o le puleaina ma se aoaiga mai le tiga faalelagona, sa ou liliu atu ai i le faaleagaina o au lava ia o se solaese. Sa faatumulia a’u i le maasiasi tele ma le manatu faapito e uiga i mea sa faia i lo’u tino ma sa foliga mai e le afaina po o le a le isi mea na tupu i ai. Sa ou tauivi e talitonu sa i ai so’u tāua. O le le mafai ona tuueseeseina o mea sa faia ia te au mai le tagata sa ou i ai, sa ou lagonaina le palapala tele. E mafai faapefea ona alofa moni le Atua ia te au? Ou te lei malamalama po o le a le uiga o le taulaga a le Faaola mo au, ma sa ou lagonaina le le mafai ona toe faaleleia. O nei talitonuga le manino, ma le le maloloina na taitai atu ai i le leai o se faalagolago i le Tama Faalelagi ma taofia ai au mai le latalata atu ia te Ia ma le faamaoni.

I le taimi lea, sa ou sailia ai le fesoasoani a se fomai ua laiseneina ma se fomai tomai faapitoa o le mafaufau. Sa ou iloaina sa ou manaomia se fesoasoani ma sa faamanuiaina i matua o e na aveina au e vaai se taulasea. O le faagasologa o le faamalologa mai mafatiaga o se mea umi ma le tiga, ae a o ou faatagaina o ia e fai, sa ia fesoasoani mai ia te au e aoao pe faapefea ona taulimaina ou mafatiaga i se auala lelei, ma suia ai le faataumaoi o le taulimaina o mai sa ou faaaogaina. E ala i le togafitiga na ou iloa ai le aafia o lo’u olaga i mamanu o mafaufauga le lelei sa ou atiina ae ina ua mavae le osofaiga.

Sa ou iloaina sa ou taumamao foi a’u lava mai le Atua. Ioe, sa ou faia se filifiliga magafagafa e faaauau pea ona ou alu i le lotu. Ioe, sa ou iloaina sa ou manao—ma manaomia—le talalelei i lo’u olaga, ae sa le lava le malosi o la’u molimau e taofia ai lo’u le mautonu. O nei talitonuga o le mea aupito sili lea ona faigata mo a’u e talanoaina ma vaaia ai le faamanuiaina i se faatulagaga o togafitiga.

I ni nai tausaga talu ona toso faamalosi a’u, sa amata ona ou auai i le kolisi. O lenei vaitau fou i lo’u olaga na oo mai ma se luitau mai lo’u epikopo e atiina ae atili ai la’u sootaga ma le Tama Faalelagi. Sa ou le mautinoa lava pe mafai ona ou faia, pe ou te agavaa foi i mea sa ta’u mai ia te a’u na ofoina mai ia te Ia, ae sa ou naunau lava e taumafai.

O le mau i le Alema 32:27 sa avea ma se fesoasoani mo au: “Ae faauta, afai tou te ala mai ma fafagu o outou mafaufau, e oo i le tofotofo i a’u upu, ma faatino sina vaega itiiti o le faatuatua, ioe, e tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe, seia oo lava ina ia e talitonu ai i se ala e mafai ai ona e tuu ane o se avanoa mo se vaega o a’u upu.” Ma sa i ai so’u manao e faalatalata atili atu i lo’u Tama Faalelagi.

Sa ou iloa e tele au galuega e fai, ma sa ou fia iloa le mea e amata ai. I lena taimi, o le vaega aupito sili ona malosi o la’u molimau e totonugalemu i le Toefuataiga. Sa ou iloaina sa maua e Iosefa Samita se tali i lana fesili, o lea sa ou filifili ai e fesili atu i le Tama Faalelagi pe mafai faapefea ona ou faalatalata atili atu ia te Ia.

Na oo mai le tali i le manatu filemu, “Aoao po o ai a’u.”

Sa ou mulimuli i lenei taitaiga e ala i le tuuina o au lava i tulaga e mafai ai ona ou aoaoina le talalelei. Sa amata ona ou iloa sa i ai lava iina le Tama Faalelagi e faatalitali mai mo au e tatala a’u lava e talia o Ia. O le talepeina i lalo o puipui sa ou fauina i nai tausaga ua mavae atu, o se faagasologa lemu, ae tumau. I le taimi lea, sa masani ona toe faaleo atu e a’u tatalo le tama o le sa aioi atu i le Faaola e fai ma sui o lona atalii, “Le Alii e, ua ou faatuatua; ia e fesoasoani i lo’u le talitonu” (Mareko 9:24). A o ou aoao atili e uiga i le talalelei, sa tuputupu ae la’u molimau ma faaitiitia lo’u tuleia ese o le Tama Faalelagi.

Sa ou fiafia lava e aoao, ae mo le taimi muamua i lo’u olaga sa ou fiafia ai i le suesueina o le talalelei. O le tele o lo’u aoaoina, o le tele foi lea o lo’u talitonu ma le tele o lo’u fia iloa. Sa amata ona ou vaaia suiga i lo’u olaga, ma sa amata ona faaitiitia le aafiaga o le sauaga.

E faaauau pea ona ou vaai i se tagata e faia le galuega pe a manaomia. O lena fesoasoani faapolofesa o se vaega taua o le faamalologa mai lo’u mafatiaga faalefeusuaiga. Ua ou aoaoina le auala e iloa ai o’u lagona ma talanoaina o’u mafaufauga ma amioga. O tomai faafilemu sa ou aoaoina i le taulasea ua faasaoina ai lo’u olaga i le silia ma le tasi le taimi. O le taulai atu i lo’u atinaega faaleagaga ma le soifua maloloina faalemafaufau o le mea tonu lava lea sa ou manaomia e fesoasoani ai ia ou tuputupu ae.

O le a avea pea a’u ma se tamaitai sa toso faamalosi, ae o lena mea na tupu e le aafia ai po o ai a’u o se afafine o le Atua. O lagona o le faaleagaina, palapala, po o le le lava o le lelei o loo oso mai pea i lo’u mafaufau, ae o lenei ua mafai ona ou manatuaina upumoni e faavavau e luiina ai i latou. Faatasi ai ma laasaga uma ou te uia, ou te talitonu atili ai i na upumoni.

Ua ou aoao e uiga i le maoae o le Togiola a Keriso ma le mana e le gata ua Ia togiolaina ai i tatou mai a tatou agasala, ae ia faapaiaina ai i tatou ma mafai ai ona tatou ausia lo tatou gafatia paia. Ou te talitonu i le mana e suia ai lea e oo mai e ala i le Faaola ma Lana Togiola. Ua ou talitonu i lo’u taua o se afafine o le Tama Faalelagi, ma ua ou iloa nei e sili atu le loloto o le alofa o lo’u Tama ma lo’u Faaola ia te a’u nai lo le mea e mafai ona ou malamalama i ai.

O le mea sili lava, ua ou aoao e uiga i le natura o le Tama Faalelagi ma Iesu Keriso. E ala i le mulimuli i le uunaiga e aoao atili po o ai moni i Laua, ua faaali mai ai ia te au e mafai ona ou faatuatuaina atoatoa i Laua ma le auala e faatino ai lena faatuatuaga ma le faatuatua.

Sa masani ona ou lagonaina le pogisa tele. Ae o le filifili e mulimuli i le talalelei a Iesu Keriso ua aumaia ai Lona malamalama e le mafaatusaina i lo’u olaga. Ia, a o ou tilotilo atu i luma, ua ia te a’u le faamoemoe.

Afai na sauaina oe po o se tasi e te iloa, saili vave se fesoasoani mai pulega faalemalo, auaunaga o puipuiga a tamaiti, po o auaunaga o puipuiga a tagata matutua. E mafai foi ona e sailia le fesoasoani mai se fautua po o se faufautua po o se polofesa faafomai. O nei auaunaga e mafai ona fesoasoani e puipuia oe ma puipuia ai nisi sauaga. Tagai i le itulau “I Faalavelave” mo nisi faamatalaga.