Ua Mafai Ona Ou Toe Lagonaina le Filemu

Manatua: O se aafiaga moni lenei na faasoa mai i se tagata na faasaoina mai le sauaina. Ua suia igoa ma le faailoaina o faamatalaga.

Sa matou fananau mai ma nai o’u tei i se aiga e le faatulagaina lelei. Mai lava i le taimi sa ou laitiiti ai, ou te manatua le tauaimisa tele o o’u matua. Sa laua pulea i matou i auala sa ou manatu o ni mea masani ae ua iloa nei o se sauaga: ta, po, sasaina, faataele i vai malulu, faatiga, taufaamata’u, ma le futi ulu ma le toso taliga. O nisi taimi la te tauai mai ai ni mea faitino ia i matou. Sa masani ona laua le i ai i le fale ma sa vaaia matou e lo’u uso matua. Sa mulimuli o ia i faataitaiga a o’u matua i lona taulimaina o i matou.

O le a le galo lava ia te a’u ina ua amata ona sauaina a’u e Luis i feusuaiga ina ua ono ou tausaga. O lenei mea na masani ona tupu pe a na o i maua toalua le fale. Sa ou faapea na o a’u lava le tagata na ia sauaina faalefeusuaiga seia oo ina ou vaai ia te ia ma lo’u tuafafine ina ua valu o’u tausaga.

Na faasolo ina leaga sauaga a Luis i le aluga o tausaga. Sa ia ta’u mai ia te a’u afai ma te le galulue faatasi, o le a ia fasiotia a’u. Sa ou talitonu ia te ia. O le tele o taimi i lo’u talavou, sa leai ai so’u faamoemoe atoa ma lagona ai le mafatia atoatoa, ma moomoo maimau pe ana mafai ona ou mou ese atu pe oti. Sa ou lagona le tausalaina ma mafaufau po o a mea leaga na ou faia ina ia faasalaina malosi ai a’u. Sa ou fefe i taimi uma. Sa ou tatalo i le tele o taimi i le Atua; ae peitai, sa ou manatu e lei faafofoga mai lava o Ia ia te a’u. Sa ou lagonaina le le puipuia o a’u ma le tuulafoaiina.

Sa ou fefe e ta’u atu i o’u matua e uiga i amioga a Luis. Ma sa mataitu pea a’u e Luis. A o i ai o’u matua, na te faaaogaina le gagana o le tino e faamata’u ai a’u ma faaali mai ia te a’u le mea o le a tupu pe afai ou te fai atu se tala. Sa ou taumafai pea lava pea e lafi mai lo’u uso ma ou te lei lagonaina le saogalemu i lo’u lava aiga. Sa ou manao e tuua le aoga ma alu e faigaluega ina ia ou le toe i ai soo i le fale. Ae peitai, sa le faatagaina a’u e faia lena mea.

I se tasi aso ina ua 11 o’u tausaga, sa tuuina mai ai e lo’u tama ia te a’u se tupe e faatau ai ni meainu mo le aiga. A o ou savali atu i le faleoloa, sa sau Luis ia te a’u mai tua ma poloaiina a’u e avatu ia te ia le tupe. Sa ia fai mai, “Afai e fesili atu Tama ia te oe po o fea o i ai meainu, ta’u atu ia te ia sa gaoi e se tasi le tupe mai ia te oe.”

Sa ou lelava i lenei tulaga i lo’u olaga ma sa ou musu e usitai ia te ia. Sa ita o ia ma fasi a’u seia oo ina ou pau i le eleele. Sa ou tu i luga ma toe tautevateva atu i lo’u tama. Faatasi ai ma loimata o loo tafe ifo i o’u foliga, sa ou ta’u atu ia te ia le mea na faia e Luis. Sa ita tele lo’u tama ia te ia.

Ina ua mavae lena, sa ou lagonaina sina mapusaga. Ou te lei ta’uina i lo’u tama e uiga i le sauaina faalefeusuaiga; sa ou maasiasi ma na toetoe lava a ou lagonaina le sese ona o le mataga o mea tau feusuaiga lea o le a faia e Luis ou te faia. Ina ua uma ona ou talanoa i lo’u tama, sa le toe sauaina a’u e Luis i feusuaiga, ae sa faaauau pea ona ia sasaina a’u ma faatiga ia te a’u. Sa ou aoao e ola ma le tiga. Sa leai se mea na faatusalia i le mea sa ia faia muamua.

Mulimuli ane, sa tonu ia Luis e auai i le vaegaau. Mo i matou, o le filifiliga sili lena ona leaga sa mafai ona ia faia. Sa mapu lo’u tina ma lo’u tama ona o le a toesea Luis mai lo matou fale mo sina taimi, ae sa faigata ia Luis i le vaegaau. Sa atili faavalevalea ai o ia. Po o le a lava se mea na ia oo i ai i le vaegaau na faaosoina ai lona natura saua. Ina ua foi mai o ia mai lana auaunaga, sa sili atu lona leaga nai lo le taimi muamua.

Na iu lava ina amata e Luis lona lava aiga. Sa matou faamoemoe atonu o le a fesoasoani lenei mea ia te ia e sui ai. Ae e le o le tulaga lena. Sa ia foafoaina nisi tagata na aafia fua. Sa fetagisi e le aunoa lona toalua ma lana fanau. Ma sa faaauau pea ona matou tauaimisa ma e oo lava i o matou tuaoi.

I le 18 o o’u tausaga, sa iu ai ina ou filifili e tuua lo’u aiga. Sa ou matua lelava lava i lo’u olaga. Sa i ai o’u mailaila ma ponaivi gaui e faamanatu mai ai ia te a’u sauaga na faia e Luis ia te a’u.

Ina ua mavae ni nai tausaga sa ou feiloai i se tamaitai talavou ma faaipoipo, ma moomoo ia maua se aiga matagofie o le a sili atu nai lo le aiga na ou ola ae ai. Ae peitai, sa lei lelei lena mea, ma sa faamutaina la’u faaipoipoga. Sa amata ona ou faanoanoa. Sa leai sa’u galuega. Sa le mafai ona ou toe a’oga. Sa ou solia le tulafono o le ola mama ma ua le toe alu i le lotu. Sa lagona e se vaega o a’u le le toe i ai i le mea moni. Sa leai so’u faamoemoe po o se uunaiga.

Na iu lava ina amata ona ou tatalo malosi mo le Atua e fesoasoani mai ia te au. Sa ou a’oa’oina lo’u lototele ma ta’uta’u atu a’u agasala i le epikopo. Sa auina atu a’u e lo’u epikopo i le Tautua a le AAG mo Aiga ina ia maua ai se tofo. I le taimi muamua sa ou manatu e le tele ni o’u faafitauli. Ae peitai, sa amata ona ou faasoa atu lo’u talaaga ma feagai ma o’u faafitauli matautia. Sa ou aoao e faaleleia atili la’u sootaga ma o’u uso. Sa ou iloaina foi sa i ai so’u vaisu o le itupa ma amata ona auai i fonotaga a le Polokalama o le Toe Faaleleia mai Vaisu a le AAG. Sa ou mauaina le tele o mea e uiga ia te au lava i lena faagasologa.

O se auala faigata, ae ina ua mavae sina taimi, faatasi ai ma le faamalosiauga mai a’u uo mai le polokalama o le toe faaleleia, sa ou filifili ai e toe foi atoatoa mai i le Ekalesia. Sa amata ona ou galue malosi ina ia faamagaloina i filifiliga sa ou faia o se taunuuga o lo’u tiga ma ia ou agavaa e toe alu i le malumalu.

Ua ou maua tali i fonotaga o le toe faaleleia. O iina e mafai ona ou faasoa saoloto atu ai o’u manatu ma lagona. E malamalama a’u uo i le polokalama i o’u faafitauli ma aua le faamasinoina a’u. Latou te talia a’u po o ai a’u ma vaai i le susulu o lo’u lumanai.

O loo faaauau pea ona manaomia e la’u malaga le taimi, onosai, alofa, auauna atu, fesootaiga tatala, ma se lotomaualalo. Ou te uia ni laa laiti taitoatasi, ma maua ai se toomaga mai le mamafatu o o’u tauau. E ala i le mana o Keriso ma Lana Togiola, ua ou maua ai le pulea atili i lo’u olaga. Ua suia e le Atua lo’u agaga, ma ua mafai ona ou toe lagonaina le filemu. Ua i ai nei lo’u faamoemoe mo le lumanai.

Afai na sauaina oe po o se tasi e te iloa, saili vave se fesoasoani mai pulega faalemalo, auaunaga o puipuiga a tamaiti, po o auaunaga o puipuiga a tagata matutua. E mafai foi ona e sailia le fesoasoani mai se fautua po o se faufautua po o se polofesa faafomai. O nei auaunaga e mafai ona fesoasoani e puipuia oe ma puipuia ai nisi sauaga. Tagai i le itulau “I Faalavelave” mo nisi faamatalaga.