Ol Tabu Skripja—Fandesen blong Fet

I no long taem i pas, waef blong mi Mary mo mi, i bin luk wan tiset we i gat wan pikja blong wan buk mo wan mesej we i talem se: “Ol Buk: Fas Orijinol Divaes We Oli Save Holem.”

Mi stap tingting long intresting mesej ia mo olsem wanem ol divaes we yumi save holem oli kam impoten tumas naoia. Taem mi stap tingting i go moa, mi kam blong luksave se eni divaes o iven wan we i gat atifisol save, bae i neva impoten semmak long gaed we yumi kasem long spirit, we i kam tru long tabu revelesen.

Nomata we yu save holem o i dijitol, Tabu Baebol mo Buk blong Momon: Wan Nara Testeman blong Jisas Kraes, i givim gaed long saed blong spirit mo tijing we i kam long Jisas Kraes, Sevya blong wol. Ol buk ia oli gat bigfala valiu from wok blong olgeta we i rekodem ol daereksen we God i givim long ol profet mo pipol blong bifo mo gaed we oli givim long laef blong yumi wanwan.

Tugeta wetem ol tijing blong ol profet we oli stap laef, ol tabu skripja ia oli givim daereksen long bilif blong yumi long wol blong tedei. Ol skripja ia oli gat moa paoa taem oli givim instraksen, stretem yumi, mo kamfotem wanwan man, woman mo famli we oli stap lukaotem gaed blong Lod.

Ol skripja tugeta wetem insperesen we i kam long Tabu Spirit, oli gohed blong stap olsem ol fas tul we i mekem fasin blong jenisim laef i kam moa isi, long olgeta we oli gat wan hat we i fulap wetem sore mo wan spirit we i wantem blong sakem sin mo wantem folem Jisas Kraes. Ol skripja oli help blong bildim wan fandesen we i save stanap agensem ol traehad blong enemi blong daonem fet.

Ol niu konvet oli blesem mo stap olsem blad we i givim laef long Jos truaot long histri blong hem. Wan eksampol i gat bigfala valiu long mi. Taem mi wan yang bisop, tu gudfala sista misinari i stap tijim William Edward Mussman famli. Papa ia i wan gudfala loya, mo hem i wan jeneral kaonsel blong wan bigfala koperesen. Waef blong hem Janet, i givim plante taem blong hem, blong stap helpem famli blong folem wan laef we i olsem blong Kraes.

Gudfala boe mo gel blong tufala, tugeta i gat samples twante samting yia, mo oli stap tijim tufala tu. Olgeta evriwan oli stap tekem ol lesen mo stap kam long jos. Ol sista misinari oli tokbaot plante blong stap ridim Buk blong Momon mo prea blong gat wan testemoni abaot tabu skripja ia. I naes tumas we famli ia, wetem prea oli ridim ful Buk blong Momon long wan sot taem nomo.

Ol stek misinari, we fastaem oli bin ol Rilif Sosaeti presiden, oli stap folem olgeta i go long ol sakramen miting.

Kolosap long taem we bae famli ia i kasem baptaes, oli kasem fulap raeting we i stap tokbaot nogud Jos. Hemia i bin bifo long intanet, be ol raeting ia oli fulumap long wan bigfala katen.

Ol sista misinari oli invaetem mi we long taem ia oli jes singaotem mi olsem bisop we mi gat 34 yia, blong help blong ansarem ol kwestin we oli gat. Taem mifala i kam tugeta long salong blong olgeta, bigfala katen blong ol raeting ia we i tokbaot nogud Jos, i stap long medel blong rum. Mi prea plante long olsem wanem blong handelem asaenmen ia. Long taem blong fas prea, Spirit i toktok kwaet long mi se, “hem i save finis se i tru.” Hemia i impoten. Ol sista oli bilivim se ful famli i gat wan testemoni finis. Be oli no sua long papa blong olgeta.

Kwiktaem mi talem long papa ia se Spirit i bin talem long mi se hem i gat wan testemoni finis. “?Hemia i tru?” Hem i lukluk mi wetem tru hat mo i talem se Spirit i bin konfemem trutok abaot Buk blong Momon mo Jos long hem.

Afta mi askem se ?i nidim blong luklukbak long ol raeting ia, sapos oli gat wan konfemesen finis long saed blong spirit?

Papa ia i ansa se, i no nidim. Ful famli i agri wetem ansa blong hem.

Be hem i talem se hem i gat wan impoten kwestin: Wan risen from wanem oli bin kasem plante raeting we i agensem Jos i from we oli ol memba blong wan nara relijin. Antap long hemia, hem i bin mekem wan promes blong help blong bildim wan niu japel blong jos ia. Hem i talem se ol sista misinari oli bin tijim hem abaot hamas hem i impoten blong pem taeting, we hem i glad blong akseptem, be hem i stap askem sapos hem i rong tu blong onarem promes we hem i bin mekem long nara jos. Mi talem long hem se hem i stret blong onarem promes blong hem blong givim mane blong bildim nara japel ia.

Ful famli i bin kasem baptaes. Wan yia afta, oli sil olsem wan famli long Oklan Kalifonia Tempol. Mi bin gat janis ia blong stap long taem ia. Boe blong tufala i finisim loa skul, i pasem eksam blong loa, mo kwiktaem i givim wan fetful seves long wan misin long Japan. Mi bin wajem ova long ol yia olsem wanem ol jeneresen we oli stap kam antap oli gohed blong stap fetful long gospel. Mi bin gat janis ia blong mekem siling blong wan long ol bubu gel blong famli Mussman.

Ol laef we oli stap jenis we oli stap hapen tedei oli naes tumas. Long las Jun, Koj Andy Reid, hed futbol koj blong Kansas City Chiefs, mo mi, wetem sam narawan we mifala i ripresentem relijin blong yumi mo ol nara relijin, mifala i toktok long wan iven blong plante relijin long Riverside Church long New York City. Koj Reid i tokbaot plante ol seken janis mo blong stap ansa long ol invitesen mo janis, we i wanem we gospel ia i tijim. Long nekis moning, mitufala wetem ol waef blong mitufala, Tammy Reid mo Mary, mifala i go long sakramen miting long Manhattan Second Wod. Hem i wan seves we i fulap long spirit. I bin gat plante niu konvet long kongregesen. Faef memba we oli bin baptaes i no long taem, fo man mo wan yangfala man, oli tekpat olsem ol Aronik Prishud memba we oli pasem sakramen. Mi hapi blong ripotem se i gat wan bigfala namba blong ol niu memba we oli stap kam truaot long Jos.

Mifala i talem tangkyu long namba blong ol pipol we i stap go antap we oli stap akseptem ol tabu invitesen ia, stap jenisim laef blong olgeta, mo akseptem janis ia blong folem Jisas Kraes. Oli kam insaed long kavenan rod ia tru long fet, fasin blong sakem sin, baptaes, mo konfemesen olsem we oli tijim long Tabu Baebol mo Buk blong Momon.

Yumi no save tingdaon long hamas ol tabu skripja oli impoten taem yumi stap jenisim laef mo stap gohed blong stap fetful long gospel. Ol profet blong bifo olsem we oli tokbaot long Buk blong Momon oli bin save abaot misin blong Jisas Kraes mo oli bin tijim gospel blong Hem. Buk blong Momon i helpem yumi blong kam moa kolosap long God taem yumi lanem samting, andastanem, mo yusum ol tijing blong hem. Profet Josef Smit i tijim se “Wan man o [woman] bae i kam moa kolosap long God sapos hem i folem ol tijing blong hem, bitim eni narafala buk.”

Blong save se Buk blong Momon i toktok blong God, yumi nid blong ridim, tingting hevi long hem, mo prea from mo afta mekem folem ol tijing blong hem Profet Moronae i promesem se God bae i talemaot trutok abaot buk ia long yumi taem yumi prea wetem wan tru hat, wetem strong tingting, mo wetem fet long Kraes. Blong stap stadi long Buk blong Momon i impoten blong gat fasin blong jenisim laef we i stap strong kasem en.

Taem yumi tingting gud long rilesensip bitwin Baebol mo Buk blong Momon olsem ol divaes we yu save holem, wan i save askem kwestin ia: ?Yu ting se hamas nao bae tufala buk ia i gat yus mo go gud tugeta sapos Lod i talemaot se oli mas joenem [tufala] tugeta mo “kam wan long han blong yu”? Hemia i wanem we Lod i bin talemaot abaot “laen blong Juda,” we i Baebol, mo “laen blong Josef,” we i Buk blong Momon.

Long plante impoten lukluk, Buk blong Momon i givim stamba doktrin we i bildimap Baebol mo i mekem ol samting i kam moa klia. Doktrin mo Atonmen blong Jisas Kraes i wan gudfala eksampol.

Baebol i givim wan stret storian abaot ministri blong Jisas Kraes long wol ia, we i tekem tu ded blong Hem mo taem we Hem i Girap bakegen long ded. Buk blong Momon i tokbaot klia gud moa ol ditel abaot Atonmen blong Jisas Kraes, wan samting we ol profet oli bin eksplenem gud bifo Hem i ded.

Heding blong Alma japta 42 i tokbaot hamas doktrin blong Atonmen blong Jisas Kraes i impoten.

Oli ridim olsem: “Laef long wol i wan taem blong tes blong mekem se man i save sakem sin mo givim seves long God—Foldaon i karem ded blong bodi mo spirit long evri man—Fasin blong pemaot man i kam tru long fasin blong sakem sin—God Hemwan nomo i pem praes from ol sin blong wol—Fasin blong sore hem i blong olgeta we oli sakem sin—Evri narafala man oli mas kasem jastis blong God—Fasin blong sore i kam from Atonmen—God i sevem olgeta nomo we oli sakem sin tru.”

Presiden Russell M. Nelson i bin talem se: “Mi promes se taem yufala i stap prea mo stadi long Buk blong Momon evri dei, bae yu mekem ol desisen we oli gud moa—evri dei.” Hem i promes tu se sapos “yu draonem yuwan long Buk blong Momon, bae yu gat proteksen long ol ivel blong tedei.”

Olsem we mi bin talem, mi bin laekem aedia ia blong fas orijinol divaes we yu save holem—we i wan buk. Be afta, mi luksave hamas Intanet i impoten plante long wol tedei. Wan divaes we yu save holem tedei i save givim infomesen we long taem bifo, bae i fulumap wan bigfala laebri. Yumi glad tumas blong laef long wan taem olsem hemia blong tedei. Mi mi glad speseli from hem i save mekem ol tabu buk mo ol materiol blong Jos i stap long dijitol vesen. Intanet hem i wan tul blong stap stadi long gospel, we i gat fulap paoa. Tedei plante pipol oli serem ol skripja wetem ol fren tru long teknoloji. Eksampol, ap blong Buk blong Momon, i wan gudfala wei blong introdiusum Buk blong Momon long ol fren mo oli save serem long ol wei we i nomol long weaples yu stap long hem.

Intanet i givim plante blesing, be olsem ol raeting ia we i tokbaot nogud Jos olsem we mi tokbaot fastaem, oli bin yusum hemia tu blong mekem ol pipol oli gat tu tingting mo daonem fet long ol gospel prinsipol we i gat bigfala valiu. Hem i save stap pat blong “ol ivel blong dei blong yumi” we Presiden Nelson i bin talem.

Enemi mo olgeta we oli helpem hem, oli save mo semmak taem no luksave, se oli bin krietem wan semmak bokis blong ol materiol we i tokbaot nogud Jos long Intanet, olsem we mi bin talem fastaem, mo hem i blong pulumaot yu long trutok blong God.

Ol problem we oli tokbaot oli mekem ol pipol oli gat tu tingting ova long ol yia long semmak fasin. Hemia i tru tumas speseli taem yu komperem taem blong yumi tedei wetem ol yia 1960, taem mi gat twante samting yia.

Ol skripja oli tijim yumi blong yusum jajmen mo stap waes long evri samting. Intanet oli save yusum long wan gud wei o nogud wei.

Ol memba blong longtaem mo olgeta we oli niu we oli stap stadi long gospel, oli nidim blong tingting gud abaot wanem oli stap lukluk. No stap letem yuwan blong wajem o ridim ol samting we oli no klin, no ones, mo no stret mo gud. Sapos yu mekem olsem, ol program we oli kontrolem i save lidim yu go long wan rod we bae i spolem fet mo progres blong yu blong laef we i no save finis. Mo i save lidim yu blong mekem samting folem gud o nogud. Lukaotem stret mo gud fasin mo stap longwe long ol nogud samting long Intanet o ol samting we i daonem tingting blong yu. Fulumap laef blong yu wetem ol aedia we oli stret mo gud, stap glad, gat gud taem be stap longwe long ol krangke fasin. I gat wan samting we i defren. Namba 13 toktok blong bilif i wan gudfala gaed. Draonem yuwan plante taem insaed long Buk blong Momon bitim eni nara samting, we bae i pulum Spirit i kam long laef blong yu mo helpem yu blong luksave trutok mo rong samting.

Kaonsel blong mi long olgeta we oli bin gowe long eni wei aot long kavenan rod, i blong kambak long ol tabu skripja, gaed blong ol profet, laef folem gospel long hom, mo lisin long miusik blong fet. Evri sol i gat bigfala valiu long Lod. !Mifala i nidim yufala! !Lod i nidim yufala, mo yufala i nidim Hem! Oltaem bae yufala i welkam. Long plante yia blong mi we mi givim seves long Jos, ol gudfala pipol we oli bin kambak long kavenan oli spesel long mi, mo afta oli givim seves mo blesem evriwan we oli lavem o ol pipol we oli kam blong save olgeta.

Ol tabu skripja mo ol profet we oli stap laef oli wan bigfala rod we Papa long Heven we i lavem yumi, i yusum blong mekem plan blong Hem blong stap glad, i stap blong evri pikinini blong Hem.

Mi serem sua witnes blong mi abaot tabu fasin blong Jisas Kraes mo Atonmen blong Hem we i tru tumas, long nem blong Jisas Kraes, amen.