Yu Kam Klin

Taem mi bin gat 5 yia, mi bin stap pleiplei futbol wetem ol fren blong mi bihaen long jos, long smol vilej blong mi long Côte d’Ivoire(Ivory Coast). Mi tingbaot filing ia we mi gat taem wan prija i singaot i go long kongrekesen blong hem blong oli klinim ol klos blong olgeta rere blong Sevya bae i kam. From we mi yang long taem ia, mi tekem se mi nidim blong go wasem klos blong mi ia nao. Mi spid hariap wetem ol smosmol leg blong mi kasem haos, mo plis long mama blong mi blong klinim sam klos blong mi, blong mekem se bae mi klin gud mo rere taem Sevya bae i kam long nekis dei. Nomata, mama blong mi i gat kwestin abaot Sevya ia we bae kam i no longtaem, hem i stil wasem ol bes klos blong mi.

Long nekis moning, mi putum klos blong mi ia we i hafhaf wetwet yet mo mi wet wetem glad blong oli anaonsem Sevya we bae i kam. Dei i stap go mo i no bin gat eni samting i hapen, mekem se mi disaed blong go long jos. Mi bin harem nogud bigwan blong faenemaot se jos i emti mo Sevya i no bin kam. Yu save pikjarem ol filing blong mi taem mi wokbaot sloslo i go long haos.

Plante yia i pas, taem mi stap tekem ol lesen wetem ol misinari blong rere blong joenem Jos Ia blong Jisas Kraes blong Ol Lata-Dei Sent, mi ridim toktok ia: “Mo i no gat wan samting we i no klin we i save go insaed long kingdom blong hem; from hemia, i no gat eni samting we i go insaed long kingdom blong hem, be olgeta ia nomo we oli bin wasem ol klos blong olgeta long blad blong mi, from long fet blong olgeta mo oli sakem evri sin blong olgeta, mo oli stap fetful kasem en.”

Klia eksplenesen we mi bin kasem long taem ia, i helpem mi blong andastanem impoten trutok ia we mi no bin andastanem taem mi smol plante yia i pas. Mesej blong prija ia i abaot hamas hem i impotenblong stap klin long saed blong spirit. Hem i askem strong long kongrekesen blong sakem sin, mekem ol jenis long laef blong olgeta, mo tanem olgeta i go long Sevya blong i pemaot olgeta.

Papa blong yumi long Heven i andastanem laef blong yumi long wol mo i save se wanwan long yumi bae i foldaon long sin, long laef ia. Mi glad tumas se Hem i givim wan Sevya blong i pemaot yumi from fasin blong yumi blong brekem loa. Tru long sakrifaes blong Sevya blong pemaot man, wanwan long yumi i save sakem sin mo kasem fogivnes mo kam klin aot long ol sin blong yumi. Fasin blong sakem sin, i wan stampa prinsipol blong gopsel, we yumi nidim blong gro long saed blong spirit mo i mekem yumi stap strong taem yumi stap go tru long ol jalenj blong laef.

Long taem blong Eprel 2022 jeneral konfrens, Presiden Russell M. Nelson i bin invaetem ol memba blong Jos blong sakem sin evridei mo stap glad from. Hem i talem:

“Plis, no fraet o pusum bak dei blong stap sakem sin. Setan i gladtaem yu harem nogud. Stopem hemia. !Sakem paoa blong hem aot long laef blong yu! Stat tedei, blong gat glad ia blong kamaot long ol fasin blong wol. Oltaem Sevya i lavem yumi speseli taem yumi sakem sin. …

“Sapos yu filim se yu aot long kavenan rod ia i go longwe tumas, o blong longtaem tumas, mo yu no gat rod blong kambak, hemia i no tru.”

Sapos i gat wan samting we i mekem yufala i no bin sakem sin fulwan, mi askem strong long yufala blong harem toktok blong Presiden Nelson blong no pusumbak taem blong sakem sin blong yufala. Hemia i nidim blong gat strong paoa long tingting blong stap pat long rod ia; yet, mi save promesem yu se glad ia we bae i kam from tru fasin blong sakem sin i bitim wanem we man i save andastanem. Tru long fasin blong sakem sin, ol harem nogud blong yumi we i hevi ia bae i nomo hevi mo bae pis mo kwaet bae i tekem ples. Taem yumi sakem sin wetem tru tingting, yumi kam klin tru long blad blong Sevya, i mekem yumi filim moa ol filing mo paoa blong Tabu Spirit.

Kompanion blong mi blong taem we i no save finis i bon wetem ol sorae we i fas, mekem se, hem i mas putum ol smol lektronik divaes blong mekem hem i save harem. Das mo swet i save spolem wok blong ol smol divaes ia, mo evri moning mi stap luk hem i mas klinim gud ol smol tiub ia bifo hem i werem olgeta. Hem i simpol be i nid blong mekem evri dei blong klinimaot ol toti, wota, wetwet, blong mekem se hem i save harem save mo toktok wetem ol naraman. Taem hem i no klinim gud ol divaes ia olsem evritaem, bae hem i no save lisin gud truaot long dei; sloslo ol toktok bae oli go lus kasem taem hem i nomo harem wan samting. Olsem ol smol divaes blong hem we hem i klinim evri dei we i letem hem blong save harem klia samting, fasin blong sakem sin evri dei i letem yumi blong luksave olsem wanem Lod i lidim yumi tru long Tabu Spirit.

Kolosap en blong ministri blong Lod long wol ia mo bifo Hem i go long Getsemane, Hem i bin mekem ol disaepol blong Hem i rere blong fesem ol hadtaem we i stap kam. Hem i promesem olgeta, se: “Mo Spirit ya blong Givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting, mo i save mekem yufala i tingbaot olgeta samting ya bakegen, we mi mi stap talem long yufala.”

Wan long olgeta wok blong Tabu Spirit we yumi nidim, i blong givim woning, lidim, mo stap wan gaed blong evri man o woman we oli lisin long smol voes ia blong Hem. Olsem ol toti we i blokem tiub blong smol divaes ia we i help blong save harem ol toktok, bae i nomo save wok gud, fasin blong yumi blong lisin long Papa long Heven bae i no klia mo bae i lidim yumi long denja blong no save andastanem o blong nomo save folem olgeta kaonsel blong Hem. Naoia we i gat intanet, i mekem ol infomesen oli kam moa isi bitim bifo. Hemia i save lidim yumi blong lukaotem ol samting blong wol bitim hemia blong God. Presiden Russell M. Nelson i bin tijim: “Be, long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.”

Mi glad tumas, se wanwan long yumi i save kasem presen ia we i Tabu Spirit long taem blong konfemsen blong yumi. Be, Presiden Dallin H. Oaks, i givim woning se “ol blesing we yumi kasem tru long presen blong Tabu Spirit oli kam nomo sapos yumi stap klin inaf [mo] ‘Spirit blong Lod i no stap long ol tempol we i no tabu’ [Hileman 4:24].”

Taem yumi jusum blong folem ol profet mo ol aposol olsem ol gaed blong yumi wetem tru tingting, paoa blong yumi blong gat kampani blong Tabu Spirit oltaem wetem yumi bae i gro. Tabu Spirit i save mekem i klia ol disesen we yumi mekem, Hem i toktok long tingting mo filing we i go stret wetem tingting blong Papa long Heven. Hem i impoten blong gat kampani blong Tabu Spirit oltaem wetem yu blong yu save gro long saed blong spirit.

I no longatem i pas, oli bin givim wok long mi blong prisaed ova wan stek konfrens long Salt Lake Granger West Stake long Utah. Long taem ia, mi mitim wan stek presiden we i gat fasin blong wok strong wetem strong tingtingblong developem paoa blong hem blong harem save smol voes blong Tabu Spirit blong stap laef long stret mo gud fasin mo sakem sin evri dei. Olsem pat blong wok blong givhan blong mifala, mifala i plan blong visitim 3 haos. Long en blong visit blong mifala, mifala i faenemaot se mifala i gat 30 minit i stap bifo nekis miting blong mifala. Taem mifala stap gobak long stek senta, Presiden Chesnut i kasem wan strong filing blong visitim wan moa famli. Mitufala i agri blong folem strong filing ia.

Mitufala i go blong visitim famli Jones, ples ia mitufala i faenemaot se Sista Jones i stap slip nomo long bed from i sik. Mo i luk olsem we hem i nidim wan prishud blesing. Hem i akseptem blong mifala i givim hem wan blesing. Taem mitufala i stap rere blong aot, Sista Jones i askem olsem wanem nao mitufala i save se hem i nidim tumas wan blesing. Trutok se, mitufala i no bin save. Be, Papa blong yumi long Heven, we i save olgeta nid blong yumi, i save mo i givim insperesen long Presiden Chesnut blong visitim haos blong hem. Taem yumi harem mo folem gaed blong smol voes ia, bae yumi rere gud blong mekem gud wok blong givhan long olgeta we i stap long nid.

Mi testifae abaot kaen fasin blong Papa long Heven ia we i gat lav. Jisas Kraes i Sevya mo Ridima blong wol. Mi testifae se Atonmen blong Jisas Kraes i tru mo taem yumi lanem blong folem gaed blong Tabu Spirit, Hem bae i lidim yumi blong sakem sin mo yusum paoa blong Atonmen blong Sevya long laef blong yumi. Presiden Russell M. Nelson i tru profet blong Lod we i laef, wetem evri ki blong prishud long wol tedei. Long nem blong Jisas Kraes, amen.