Ol Dei blong Neva Fogetem

Ol dia brata mo sista blong mi, histri blong Jos Ia blong Jisas Kraes blong Ol Lata-dei Sent long dispensesen ia, i wan naesfala tabu eksperiens we i soemaot olsem wanem Lod i lidim Jos ia blong Hem. I gat wan ten yia long histri blong Jos, we i taem ia we i nambawan tumas bitim ol nara taem—ten yia blong 1820 kasem 1830. Stat wetem eksperiens blong Profet Josef Smit long Tabu Bus, long springtaem blong 1820, taem hem i luk God, Papa mo Pikinini blong Hem, Jisas Kraes, mo i gohed olsem kasem 6 Epril, 1830, ten yia taem ia, i no olsem ol narafala taem.

!Tingting long ol naesfala taem ia! !Yang profet ia we i toktok wetem enjel Moronae, i bin transletem ol buk we oli wokem wetem gol, mo printim Buk blong Momon! !Hem i tul ia we tru long hem, Aronik mo Melkesedek Prishud i bin kambak, mo afta, !hem i oganaesem Jos! Oliva Kaodri i tokbaot ol taem ia olsem: “!Ol dei ia, oli dei we bae mi neva fogetem!.” Ol merikel we i stap hapen, oli gohed blong hapen kasem dei ia.

Bae mi talem wetem strong tingting se, long yia ia, yumi statem wan ten yia we i wan pruf, olsem wan spesel taem olsem eni narawan we i bin folem taem ia we Jos i stat, kolosap tu handred yia i pas.

Bae mi eksplenem: Bitwin long 2024, mo 2034, bae yumi eksperiensem ol taem we bae oli hapen olsem risal blong ol gudfala janis blong givim seves, blong kam wan wetem ol memba mo ol fren, mo blong tokbaot Jos Ia blong Jisas Kraes blong ol Lata-dei Sent i go long moa pipol bitim bifo.

Yumi jes witnesem paoa blong wan tru taem blong histri, taem yumi selebretem wetem ten blong ol milian pipol, 100 betdei blong Presiden Russell M. Nelson.

Olsem ripot blong betdei blong Presiden Nelson, Newsweek i bin raetem wan hedlaen olsem, “Wan Wol Olfala Lida blong Relijin I Kasem 100 Yia blong Hem.” Mo afta, oli mekem lis blong 10 olfala lida blong ol jos long wol—wetem Presiden Nelson, we i faswan long lis, wetem Pop Francis mo Dalai Lama.

Stetmen ia we i kam long atikol blong New York Times i soemaot wanem raon wol i luk: “Long wan [kantri] we i gat eleksen blong ol presiden sistem we i help blong mekem wanwan man i lukluk moa dip long yia blong man, mo lidasip, Mista Nelson. Impoten taem ia blong hem, long jos blong hem, wan yia we i gat tri namba betdei, i no spesel from hamas hem i kam olfala. Hem i stap olsem wan popula man long medel blong ol memba blong jos, we oli lukluk long presiden blong olgeta olsem wan ‘profet, sia, mo reveleta.’”

Yumi glad tumas se spesel dei blong Presiden Nelson i givim wan janis long yumi blong soemaot wan profet blong God long ol pipol raon long wol, wan selebresen we bae yumi neva fogetem.

Eli long springtaem ia, wan visita senta long Tempol Skwea we oli stap mekemgud—i gat ol intanasonol flag we i stap ripresentem ol kantri we Jos i stap long hem—i bin open. Long fored blong visita senta ia, oli putum wan ston memori wetem ol toktok blong profet we i se: “Olgeta, i gat taem i stap kam we hil ya we haos blong mi i stap long hem bambae i kam hae moa bitim ol narafala hil. Mo ol man blong ol narafala kantri bambae oli save wokbaot blong kam long hem.”

I tru, memori samting we bae i hapen long nekis 10 yia, bae i pat blong wan samting we bae i hapen olsem we profesi blong Aesea we i kam tru.

Tingting long namba blong open haos blong tempol we bae i hapen yet, mo ol dedikesen we i stap long plan blong hapen afta long ten yia, iven ol 164 tempol mo sam moa. Traem tingbaot, ten blong ol milian long yufala mo ol fren blong yu i stap wokbaot i go tru long wan haos blong Lod. Bigfala samting we bae i hapen long taem ia, i blong dediketem bakegen Sol Lek Tempol mo ol aktiviti we i go wetem. Hemia i tru, bae i ol dei we bae yumi neva fogetem.

Yia 2030, bae i tekem ol janis i kam raon long wol blong selebretem tu handred yia blong oganaesesen blong Jos. Nomata se i eli tumas blong talem hao Jos bae i luksave impoten taem ia, hemia tu bae i letem yumi blong invaetem famli, ol fren, olgeta we yumi wok wetem, mo ol defren ges blong “kam mo luk” mo blong andastanem gud, paoa blong jenis we Jos i bin mekem long laef blong ol memba blong Jos.

Long 2034, taosen long ol impoten pipol, ol visita, mo ol atlet raon long wol bae oli fulumap ol rod blong Sol Lek Siti, stej blong Ol Winta Olimpik Gem. Ating i no gat wan bigfala taem olsem we i soemaot wol yuniti bitim hemia long Ol Olimpik Gem. Ol ae blong wol bae i stap long Jos mo ol memba blong hem, we oli save gat janis blong stap ol volontia, blong givim seves, mo serem gud nius tru ol aksen blong kaen—wan taem we bae oli neva fogetem.

Bae ol samting we oli hapen ia, bae oli ol taem we i givim plante janis long ol memba blong Jos long evri ples blong serem ol gud nius blong gospel blong Jisas Kraes tru toktok mo aksen, wan ten yia we bae oli neva fogetem.

Long wan miting sam wik bifo long betdei blong hem, Presiden Nelson i serem from wanem i laekem tumas toktok ia “gud nius.” Antap, hem i mekem not se, toktok ia i karem glad mo hapines i kam. Be “gud nius” i minim moa bitim hemia. Hem i eksplenem se toktok ia i kamaot long olfala lanwis blong Hibrus we i yuangelion, we i minim stret “gud nius” o “gospel.” Oltaem hapines mo glad long laef ia mo nekis laef, i joen wetem gospel blong Jisas Kraes. From hemia, toktok ia “gud nius,” i givim dabol mining ia long wan naesfala wei.

“Ol man [mo woman] oli stap, blong oli save gat glad.” Papa long Heven i givim plan ia blong stap hapi, we i mekem yumi glad tru long ol blesing blong Hem. Hemia i tekem tu, stap tugeta wetem ol famli blong taem we i no save finis. Atonmen blong Jisas Kraes i stamba long plan ia blong God blong pemaot yumi. Blong kasem laef we i no save finis, yumi mas kam long Kraes. Taem yumi mekem olsem “mo stap helpem ol narawan blong oli mekem semmak, yumi stap tekpat long wok ia blong God blong fasin blong sevem man, mo blong kam olsem wan god.”

Mesej ia blong gud nius blong gospel blong Jisas Kraes i wan mesej we i moa impoten tumas long wol ia. Mo hem i ples ia nao we ol yut mo yang adalt blong Jos oli kam insaed.

Nomata se maet ol fas ten yia we i stap kam,i fulap wetem ol dei we bae evri memba blong Jos oli neva fogetem hemia i tru tu, speseli blong yufala ol jeneresen we i stap kam antap. Yu stap long wol ia naoia from oli bin jusum yu blong stap ia naoia. Yufala i gat paoa blong kam ol disaepol blong Kraes long wei we yufala i no save yet.

Presiden George Q. Cannon i tijim: “God i bin holemtaet ol spirit blong dispensesen ia we oli gat strong paoa long tingting mo strong tingting blong fesem wol, mo evri paoa blong ivel [mo blong] … bildimap Saeon blong God mo no fraet blong fesem ol risal we bae i kam afta.”

From hemia, mi wantem blong toktok long yufala abaot ol jeneresen we i stap kam antap, blong invaetem yufala blong tingting long hamas ten yia taem ia bae i gud tumas, wan we bae yufala i neva fogetem, we i save blong yu. Mo tu, mi givim sam simpol toktok blong kaonsel mo blong leftemap tingting se maet i save givim paoa long yufala long taem blong ten yia we i stap kam.

Olsem plante long yufala, mi gat wan smat fon, we wanwan taem bae i open wetem ol sot vidio long sosol media we i stap soem wanem mi stap mekem long ol defren dei. Oltaem i wan sapraes blong stap luk hamas ol samting oli bin jenis blong mi mo famli blong mi afta sam yia nomo.

!Pikjarem ol foto blong yu we fon bae i sevem i stap kasem 10 yia stat naoia i go! Maet yu save luk yuwan we bae yu stap graduet long hae skul o kolej, stap kasem endaomen blong yu, stap go long wan misin, stap mared mo gat fas pikinini blong yu. Blong yuwan, hemia bae i wan ten yia taem we bae yu neva fogetem. Be bae i dabol nomo sapos yu gohed blong traehad blong kam wan laet long wol long hao gud nius blong gospel blong Jisas Kraes i no mekem laef blong yu i kam moa gud nomo, be tu, olgeta long famli blong yu, ol fren mo olgeta we oli folem yu long sosol media.

Maet yu stap tingting se, olsem wanem blong mekem hemia.

Ol profet blong God oli bin tijim hemia long yumi, se hemia i hapen tru long fo simpol aktiviti, we oli singaotem, ol tabu responsabiliti we oli givim long yumi: faswan, laef folem gospel blong Jisas Kraes; nambatu, kea long olgeta we oli stap long nid, namba tri stap invaetem evriwan blong harem gospel; mo nambafo, mekem famli i kam wan blong taem we i no save finis. I gud tumas se, wanwan i save mekem long ol nomol wei.

Mi promesem yufala se, hemia bae i stap wan ten yia we bae yufala i neva fogetem we i blong yufala sapos yufala i holemtaet ol tabu responsabiliti we oli givim long yufala. Bae yumi tingting long wanem hemia we bae i kam.

Faswan, laef folem gospel blong Jisas Kraes. Stadi long ol toktok blong ol profet, mo lanem blong lavem Papa blong yu long Heven. Givim hat blong yufala long Hem, mo traehad blong folem rod blong Hem. Stap glad tru long “tras long kavenan”we Elda Soares i bin tokbaot. Tras ia i kam tru taem yu mekem ol kavenan blong folem Jisas Kraes wetem save ia se bae Sevya i sapotem mo mekem yu kam strong moa.

Letem ol fren blong yu oli luk glad ia we yu filim taem yu laef folem gospel mo bae yu stap olsem nambawan mesej blong gospel we oli neva bin kasem bifo.

Nambatu, givhan wetem lav mo sore blong kea long olgeta we oli gat nid. Jeneresen blong yufala,oli ting nating long olgeta we oli no gat samting. Taem i gat disasta, ol memba blong Jos oli hariap blong help kliarem ol toti mo givim kamfot long olgeta we oli stap long nid, mo i luk olsem plante we oli stap werem T set blong “Ol Han blong Help” oli ol yangfala mo oli gat 20 yia olsem. Hemia i fasin blong yu “blong karem ol hevi samting blong wanwan long yufala” mo “leftemap tingting blong olgeta we oli nidim fasin blong leftemap tingting.” Taem yumi mekem hemia, yumi “mekem wanem, loa blong Kraes i talem.”

Evan, wan yang Praemeri boe i plan blong spenem skul holidei blong hem blong kolektem ol saplae blong pinat bata mo jeli sanwij blong donetem i go long wan oganaesesen we i stap saplaem kakae. Hem i faenem projek ia long JustServe websaet. Yangfala Evan i mekem lis blong ful klas blong hem long skul blong kolektem !700 botel blong jam! Letem ol pipol we yu givim seves long olgeta, oli save se wari blong yu long olgeta i hang strong long lav we yu gat long God mo from yu wantem tumas blong tritim neba blong yu olsem yuwan.

Nambatri, Invaetem evriwan blong kasem gospel. Yia ia yumi bin openem 36 niu misin raon long wol, blong tekem evriwan wei wantem go long wan fultaem misin. Long wan taem olsem tedei taem plante yut blong wan spesel taem i no tekpat long aktiviti blong jos, hemia i wan sapraes mo i soemaot fasin blong testemoni blong yufala. Nomata yu go long wan fultaem misin o no, plis luksave bigfala paoa blong yu blong jenisim ol fren blong yu taem yu lavem, serem mo invaetem olgeta blong save moa abaot gospel blong Jisas Kraes.

Nambafo, mekem ol famli i kam tugeta blong taem we i no save finis. Taem mi visitim ol tempol raon long wol, mi sapraes blong luk ol yut oli fulap insaed long rum blong stap wet blong mekem baptaes mo bigfala namba blong ol yang adalt we oli wok olsem ol odinens woka. I no longtaem i pas, wan grup blong ol yut, ova long 600, blong Skotlan mo Ireland oli travel i go long Preston Inglan Tempol, blong mekem ova long 4,000 odinens, we plante i blong ol memba blong famli blong olgetawan we oli ded finis! Mi askem strong long yufala blong spendem taem long famli histri, blong stap insaed long tempol, mo rere gud long yuwan blong kam kaen man o woman ia we i rere blong maredem wan kompanion we i klin inaf, insaed long tempol. Statem wan paten long laef blong yu naoia blong mekem tempol wan evri dei pat blong laef blong yufala.

Ol brata mo sista blong mi we mi lavem tumas, ol dia yang fren blong mi, bae i gat ol hadtaem blong wanwan long yumi long ol dei we i stap kam. Be, taem yumi go insaed long ten yia we i stap kam, bae yumi serem ol gud nius tru ol simpol aktiviti blong stap laef, stap kea, stap invaetem mo stap kam wan. Taem yumi mekem olsem, bae Lod i blesem yumi wetem ol eksperiens we bae yumi neva fogetem.

Mi testifae se olgeta we oli kam kolosap long Lod wetem wan tru hat mo tru tingting blong wantem save, long olgeta we oli tokbaot nem blong Sevya mo gat Tabu Spirit long sol blong olgeta, long olgeta we bae oli statem bigfala mo naesfala tabu wok ia, bae oli faenemaot mo eksperiensem plante selestial blesing mo kasem wan witnes se God i harem yu, save yu mo lavem yu. Bae yu eksperiensem ol dei we bae yu neva fogetem. Long nem blong Jisas Kraes, amen.