I No Afta Plante Yia

Rekod blong Hileman mo ol boe blong hem i tokbaot wan pipol we i luk fored long taem we Jisas Kraes bae i bon i kam long wol. 50 yia we oli rekodem insaed long skripja i tokbaot fasin blong jenis mo stret mo gud fasin blong Ol Man blong Leman mo ol fasin nogud, apostasi, mo rabis sin blong Ol Man blong Nifae.

I gat sam pat we oli semmak mo oli defren bitwin Ol Man blong Nifae mo Ol Man blong Leman long ol rekod blong bifo ia we yumi save lanem bigfala samting aot long hem tedei.

“Ol Man blong Leman, bigfala pat blong olgeta, oli kam wan stret mo gud pipol, inaf blong mekem se stret mo gud fasin blong olgeta i bitim hemia blong Ol Man blong Nifae, from fasin blong olgeta blong stanap strong mo stap strong long fet.

“[Mo] i bin gat plante long Ol Man blong Nifae we oli kam stronghed mo oli no wantem sakem sin mo oli nogud bigwan, inaf blong mekem se oli sakemaot toktok blong God mo evri prijing mo profesi we i bin kam long medel blong olgeta.”

“Mo olsem ia nao yumi luk se Ol Man blong Nifae oli stat blong kam slak from oli lusum bilif, mo gro long fasin nogud mo ol rabis sin, taem we Ol Man blong Leman oli stat blong gro bigwan tumas long save long saed blong God blong olgeta; yes, oli stat blong holem ol loa mo ol komanmen blong hem, mo blong wokbaot folem trutok mo stret fasin long fored blong hem.

“Mo olsem ia nao yumi luk se Spirit blong Lod i stat blong kamaot long Ol Man blong Nifae, from ol fasin nogud mo strong hat blong olgeta.

“Mo olsem ia nao yumi luk se Lod i stat blong kapsaetem Spirit blong hem long Ol Man blong Leman, from fasin blong olgeta we i isi mo oli wantem blong biliv long ol toktok blong hem.”

Ating pat we i moa sapraes mo series we i lid i go long apostasi blong Ol Man blong Nifae, i tru pat ia se “i no afta plante yia, evri rabis fasin ia i kam long olgeta.”

?Hao nao wan stret mo gud pipol olsem oli kam had mo nogud long wan sot taem olsem? ?Hao nao pipol i save fogetem kwik God we i no stop blong blesem olgeta?

Nogud eksampol blong Ol Man blong Nifae i wan lesen blong yumi tedei, long wan wei we i gat moa paoa mo i dip.

“Hae tingting … i stat blong go … insaed long ol hat blong pipol we oli stap talemaot se oli blong jos ia blong God … from ol rij samting blong olgeta we oli bigwan tumas mo oli kam antap gud long graon.”

“[Oli] putum hat blong [olgeta] long ol rij samting mo ol samting blong wol we oli blong nating” from hae tingting we oli letem blong kam insaed long hat blong [olgeta] …, we … i leftemap [olgeta] bitim samting we i gud from ol rij samting blong [olgeta] we i bigfala tumas!”

Ol voes blong bifo oli krae wetem yumi tedei blong lanem lesen ia we i no gat en se blong gat sakses mo gat fulap samting, tugeta ol samting ia i save lidim olgeta we oli stret mo gud blong oli drink posen long saed blong spirit we i hae tingting.

Blong letem hae tingting i go insaed long ol hat blong yumi i save mekem yumi jikim wanem we i tabu; yumi no biliv long spirit blong profesi mo revelesen; purumbut antap long ol komanmen blong God; tanem baksaed long tok blong God; sakemaot, stap jik, mo agensem ol profet; mo fogetem Lod God blong yumi mo “no wantem se Lod God blong [yumi], we i bin mekem [yumi], i rulum mo i moa hae long [yumi].”

From hemia, sapos yumi no fetful mo no obei, yumi save jenisim blesing i kam wan panismen blong hae tingting we i save tanem tingting blong yumi aot long trutok we i no save finis mo ol fas samting long saed blong spirit we oli moa impoten. Oltaem yumi mas rere gud agensem fasin blong hae tingting mo ting se yu yu moa gud, we i wan rong wei blong talem se yu yu oraet, mo lukluk long wanem yu wantem bitim blong givim seves long narawan.

Taem yumi luk moa wetem hae tingting long yumiwan, yumi tu yumi blaen long saed blong spirit mo mestem plante samting, o ating evri samting we i stap hapen raon long yumi. Yumi no save lukluk long mo luk moa long Jisas Kraes sapos yumi stap lukluk yumiwan nomo.

Blong blaen long saed blong spirit i save mekem yumi go aot long stret mo gud fasin, foldaon long ol rod we i no blong folem, mo go lus. Taem yumi blaen mo “tanem yumi i go long ol rod blong yumiwan” mo folem ol rod we i spolem yumi, i mekem yumi stap dipen long save blong yumiwan, mo tokflas long paoa blong yumiwan, mo dipen long save blong yumiwan.

Samuel Man blong Leman i mekem i klia taem hem i tokbaot long sot wei fasin blong Ol Man blong Nifae we oli go longwe long God: “Yufala i bin lukaot, long evri dei blong laef blong yufala, long samting ia we yu no save kasem, mo blong stap hapi taem yufala i mekem ol nogud fasin, we i agensem fasin we i stret mo gud we i stap insaed long Lida blong yumi we i Hae mo I No Save Finis.”

Profet Momon i luk, “Bigfala pat blong ol pipol oli stap yet long ol hae tingting blong olgeta mo fasin nogud, mo smol pat i wokbaot sloslo long fored blong God.”

Long Buk blong Hileman, stret mo gud fasin blong Ol Man blong Leman i kam antap moa mo i defren long hao Ol Man blong Nifae i foldaon kwik long saed blong spirit.

Ol Man blong Leman oli lukluk long God mo oli bin kam blong save trutok taem oli biliv long ol tijing insaed long ol skripja mo ol profet, stap gat fet long Lod Jisas Kraes, sakem sin blong olgeta, mo gat wan bigfala jenis long hat.

“From hemia, olgeta we oli bin kam long samting ia, yufalawan bakegen i save, olgeta ia oli strong gud mo stanap strong long fet, mo long samting we i bin mekem olgeta oli kam fri.”

“Yufala i luk se bigfala pat blong [Ol Man blong Leman] i stap long rod blong stret wok mo oli stap wokbaot sloslo long fes blong God, mo oli wokhad blong obei ol komanmen blong hem mo ol loa blong hem mo ol jajmen blong hem. …

“… Oli no taed blong traehad oltaem, blong save tekem ol narafala brata blong olgeta we oli stap, blong kam long save blong trutok.”

Olsem wan ansa, “stret mo gud fasin [blong Ol Man Leman] i bitim hemia blong Ol Man blong Nifae, from fasin blong olgeta blong stanap strong mo fasin blong olgeta blong stap strong long fet.”

Moronae i bin talem: “Luk, Lod i bin soem long mi, ol bigfala mo gudfala samting long saed blong wanem we i mas kam i no longtaem, long dei ia, taem we ol samting ia bae oli kamaot long medel blong yufala.

“Luk, mi toktok long yufala olsem se yufala i stap long ples ia, be yufala i no stap yet. Be luk, Jisas Kraes i bin soem yufala long mi, mo mi save ol wok blong yufala.”

Plis tingbaot se Buk blong Momon i lukluk i go long fiuja mo insaed i gat ol impoten prinsipol, woning, mo ol lesen we i go wetem ol situesen mo ol jalenj blong dei blong yumi.tedei.

Apostasi i save hapen long tu simpol level—long wan oganaesesen mo wanwan man. Long level blong oganaesesen, Jos Ia blong Jisas Kraes blong Ol Lata-dei Sent bae i no save lus tru long apostasi o bae i no save kamaot long wol.

Profet Josef Smit i talemaot: “Standet blong trutok we oli bin putum tugeta we i no gat wan han we i no klin i save stopem wok ia blong stap gro… ; trutok blong God bae i gohed i go nomo, i klia, i stanap stret, i indipenden, kasem taem we bae i gotru long evri graon, i visitim evri kaen weta, i swipim evri kantri, mo i ring long evri sora, kasem taem ol stamba tingting blong God oli kamtru, mo Hae Jehova bae i talem se wok ia i finis.”

Long level blong wanwan man, wanwan long yumi i mas, “lukaot long hae tingting, nogud bae [yumi] kam olsem Ol Man blong Nifae blong bifo.”

Bae mi givim wan tingting se sapos mi o yu i biliv se yumitu strong inaf mo save mekem blong winim fasin blong hae tingting, ating naoia yumitu stap safa finis long sik ia we i kilim spirit. Long simpol wei, sapos mi o yu i no bilivim se hae tingting i save spolem yumi, i mekem se yumi no sef mo stap long denja long saed blong spirit. I no afta plante dei, wik, manis, o yia, bae yumi save lego ol promes blesing from wan samting we i no nidim nating.

Be sapos mi o yu i bilivim se hae tingting i save spolem yumi, bae yumi save gohed blong mekem smol mo simpol samting we bae i protektem mo helpem yumi kam “olsem wan pikinini, we i lisin, i no flas, i putum tingting i stap daon, i save wet longtaem, i gat lav, i glad blong folem tingting blong Lod blong [yumi].” “Olgeta we oli putum tingting i stap daon, we oli no fosem olgeta, oli kasem blesing.”

Taem yumi folem kaonsel blong Presiden Benson mo askem yumiwan from wanem Lod i givim insperesen long Momon blong putum smol stori, komanmen, mo woning blong buk blong Hileman insaed ia, mi promes se bae yumi save hao blong yusum ol tijing ia long wanwan laef blong yumi mo famli tedei folem situesen blong yumi. Taem yumi stadi mo tingting hevi long tabu rekod ia, bae yumi kasem blesing blong ol ae we i save luk, sora we i harem, ol maen mo hat we oli save andastanem ol lesen we yumi mas lanem blong “lukaot long fasin blong gat hae tingting, sapos no bae [yumi] foldaon long temtesen.”

Wetem glad, mi witnes se God Papa we I No Save Finis i Papa blong yumi. Jisas Kraes, Hem I Wan Stret Pikinini Ia Nomo blong God, mo Hem I Pikinini we God I Lavem Hem Tumas. Hem i Sevya blong yumi. Mo mi testifae se taem yumi wokbaot wetem fasin blong no stap flas we i kam long spirit blong [Lod], bae yumi stap longwe mo winim hae tingting mo gat pis long Hem. Hem i witnes blong mi long tabu nem blong Lod Jisas Kraes, amen.