Stretem Wanem Yumi Wantem wetem Wanem Hem I Wantem.

Long wan taem, Jisas i tokbaot wan bisnisman we i stap lukaotem ol “gudfala perel.” Long taem we bisnisman ia i stap lukaotem perel ia, hem i bin faenem wan “blong bigfala praes.” Be, blong kasem naesfala perel ia, man ia i mas salem evri samting we hem i gat, mo hem i mekem wetem glad.

Tru long sot parabol ia, Sevya i bin tijim se kingdom blong heven i olsem wan perel we i no gat praes long hem, wan tresa we i naes tumas we man i nid blong wantem moa bitim ol nara samting. Bisnisman ia we i bin salem kwiktaem evri samting we hem i gat blong save pemaot perel ia blong bigfala praes, i stap soemaot klia nomo se yumi nid blong stretem maen blong yumi mo wanem yumi wantem, wetem tingting blong Lod, mo wantem blong mekem evri samting we yumi save mekem truaot long laef ia blong kasem ol blesing we i no save finis long kingdom blong God.

Blong stap klin inaf from bigfala riwod ia, aot long ol nara samting, i tru, yumi nidim blong givim gudfala wok blong yumi blong putum long saed evri samting we yumi stap wantem tumas mo lego eni samting we i stap holembak yumi blong komitim yumi fulwan long Lod mo ol wei blong Hem we i hae mo i tabu. Aposol Pol i stap tokbaot ol tabu wei ia olsem “blong stap gat tingting blong Kraes.” Olsem Jisas Kraes i bin soemaot tru long eksampol, hemia i minim “[blong stap mekem] ol samting we i mekem [Lod] i glad oltaem” long laef blong yumi, o olsem we sam pipol i talem long dei blong yumi tedei, i “blong mekem wanem Lod i wantem.”

Folem save blong gospel, “blong [mekem] ol samting we i mekem [Lod] i glad oltaem” i go wetem blong letem tingting blong yumi wetem tingting blong Lod . Sevya i bin tijim hamas prinsipol ia i impoten taem Hem i stap givim instraksen long ol disaepol blong Hem:

“From we mi mi no kamaot long heven blong mekem ol samting we mi nomo mi wantem. Mi kam blong mekem ol samting we Papa blong mi we i sanem mi mi kam, hem i wantem.

“Mo hem i wantem we bambae mi mi no lusum wan man long olgeta ya we hem i givim long mi. Hem i wantem we bambae long Lasdei, mi mi mekem olgeta ya oli laef bakegen.

“Yes, Papa blong mi i wantem we olgeta we oli luk mi mo oli bilif long mi, mi Pikinini blong hem, bambae oli gat laef we i no save finis. Hem i wantem we bambae long lasdei mi mi mekem olgeta ya oli laef bakegen.”

Sevya i folem wan stret mo tabu wei blong givim Hemwan long Papa tru long fasin blong letem wanem Hem i wantem i draon long wanem we Papa i wantem. Hem i bin talem long wan taem, “Mo hem i sendem mi mi kam, mo hem i stap wetem mi: Papa i no lego mi mi stap miwan, from we oltaem, mi stap mekem ol samting we hem i wantem.” Taem Sevya i stap tijim Profet Josef Smit abaot harem nogud blong Atonmen long saed blong tingting mo bodi, Hem i talem:

“From luk, mi God, mi bin safa evri samting ia blong evriwan, blong oli no save safa sapos oli sakem sin; …

“We safaring ia i mekem mi, we mi God, we mi hae long evriwan, mi seksek from soa long bodi, mo blad blong mi i ronaot long evri hol blong skin blong mi, mo mi safa tugeta long bodi mo long spirit—mo mi no wantem dring kap ia we i konkon, mo mi wantem holemtaet mi—

“Be, glori i go long Papa, mo mi dring mo mi finisim wok blong mi blong mekem rere evri samting blong gud blong ol pikinini blong man.”

Long taem blong laef blong yumi long wol ia, oltaem yumi faet wetem wanem yumi ting se yumi save, save se i gud, mo ting se i wok gud blong yumi, we i defren long wanem we Papa long Heven i save stret, we i moa gud blong taem we i no save finis mo i wok gud blong ol pikinini blong hem long plan ia blong Hem. Bigfala faet ia i save gat plante pat, speseli tingting long ol profesi we i stap long ol skripja blong dei blong yumi: “Yu mas save samting ia tu, long taem ia we bambae i kolosap long ol las dei … bambae ol man oli save tingbaot olgeta nomo, … oli wantem tumas ol samting we oli stap harem gud long hem, i winim we oli stap lavem God.”

Wan saen we i soem se profesi ia i hapen i wanem we i gro bigwan long wol tedei, plante pipol oli mekem mo folem kaen laef ia mo oltaem oli stap talem, “Nomata hao mi laef, bae mi folem wanem mi save se i tru mo i wok gud blong mi.” Olsem Aposol Pol i talem, oli stap “tingbaot ol wok blong olgeta nomo, be oli no save tingbaot wok blong Jisas Kraes.” Kaen tingting olsem ia oltaem olgeta we oli stap tingbaot olgetawan mo wanem oli wantem, o oli wantem faet from sam kaen fasin we i no go wetem plan blong God we i gat lav mo wanem we Hem i wantem blong olgeta. Spos yumi letem hat mo maen blong yumi i folem tingting olsem, yumi save krietem ol strong wol we bae i blokem yumi blong no save kasem perel ia we i mane i no save pem, we God i rere long hem wetem lav blong ol pikinini blong Hem—laef we i no save finis.

Nomata we i tru se wanwan long yumi i wokabaot blong kam wan disaepol long kavenan rod mo yumi traehad blong kipim maen mo hat blong yumi i lukluk nomo long Jisas Kraes, yumi nidim blong stap kea gud mo no foldaon long temtesen blong folem ol kaen tijing blong wol ia long laef blong yumi. Elda Quentin L. Cook i talem se “blong stap tru long ol fasin we i olsem blong Kraes i wan gol we i moa impoten bitim blong stap defren.”

Ol dia fren blong mi, taem yumi jusum blong letem God i gat moa paoa long laef blong yumi bitim ol samting we yumi wantem blong yumiwan, yumi save gro olsem wan disaepol mo gat moa paoa blong maen mo hat blong yumi i wan wetem Sevya. Be taem yumi no letem wei blong God i win long laef blong yumi, yumi stap yumiwan, mo insperesen blong Lod i no lidim yumi, mo yumi save faet from rong blong yumi. Yumi save mekem eskius tu blong yumiwan taem yumi mekem samting long wei blong yumi, mo stap talem, “mi stap mekem samting long wei blong mi nomo.”

Long wan taem, taem Sevya i stap talemaot doktrin blong Hem, sam pipol, speseli ol Farisi we oli stap tekem olgeta olsem ol stret mo gud man, oli sakemaot mesej blong Hem mo no fraet blong talemaot se oli ol pikinini blong Abraham, we i minim se blad laen blong olgeta i givim spesel janis long olgeta long ae blong God. Kaen tingting ia i lidim olgeta blong dipen long save blong olgetawan mo blong no bilivim wanem Sevya i bin tijim. Fasin we ol Farisi oli bin mekem, i soemaot klia se oli no gat ples blong toktok blong Sevya mo wei blong God long hat blong olgeta. Jisas i ansa wetem waes mo toktok blong leftemap tingting se, sapos oli ol tru kavenan pikinini blong Abraham, bae oli mekem ol wok blong Abraham, speseli wetem tingting ia se “God blong Abraham” i stap stanap long fored blong olgeta mo stap tijim olgeta trutok long stret taem ia.

Ol brata mo sista, olsem yu save luk, blong wok long tingting ia long “wanem i wok blong mi” wetem “wanem i wok gud oltaem blong Lod” i no wan niu fasin we i stret.long dei blong yumi. I wan olfala tingting blong plante handred yia mo oltaem i mekem olgeta we oli ting se oli waes oli blaen blong luksave trutok mo i mekem plante long ol pikinini blong God oli konfius mo nogat paoa. Kaen tingting ia, i wan olfala tingting blong Setan; i wan rod blong trikim ol pikinini blong God oli go lus, blong no save folem kavenan rod we i tru mo fetful. Taem ol situesen blong laef olsem helt, ples, mo ol jalenj long saed blong bodi mo maen i afektem laef blong yumi long ol samting we oli moa impoten we i mekem se yumi fri blong jusum blong folem o no folem paten we Lod i bin rere long hem blong laef blong yumi. I tru, “Hem nao i makem rod mo lidim yumi long rod, mo soemaot evri samting blong mekem.”

Olsem ol disaepol blong Kraes, yumi wantem blong wokbaot long rod we Hem i makem blong yumi long taem blong ministri blong Hem long laef ia. Yumi no wantem blong mekem wanem we Hem i wantem nomo mo evri samting we bae Hem i glad long hem, be tu yumi lukaotem blong kam moa olsem Hem. Taem yumi traehad blong stap tru long evri kavenan we yumi mekem mo laef folem “evri toktok we God i talem,” bae yumi kasem proteksen blong no save foldaon long ol sin mo mistek blong wol ia—ol giaman tijing mo doktrin we bae i lidim yumi go longwe long ol gudgudfala perel ia we oli naes tumas.

Mi bin kasem insperesen blong luk hamas laef blong ol fetful disaepol blong Kraes we oli givim olgeta long saed blong spirit i go long God, taem oli jusum blong mekem ol samting we i wok blong Lod mo mekem wanem i gud long ae blong Hem. Mi save wan yang man we i faenem i had blong go long wan misin be i kasem insperesen taem i lisin long wan bigfala lida blong Jos i serem testemoni blong hemwan mo tabu eksperiens blong hem taem i bin givim seves olsem wan misinari.

Long toktok blong hemwan, yang man ia, naoia olsem wan misinari we i finisim misin blong hem, i talem: “Taem mi lisin long testemoni blong wan Aposol blong Sevya Jisas Kraes, mi save filim se God i lavem mi, mo mi wantem blong serem lav ia wetem ol narawan. Long taem ia mi filim se mi mas go long wan misin, nomata mi fraet, mi gat tu tingting, mo ol wari. Mi gat ful tras long ol blesing mo ol promes blong God blong ol pikinini blong Hem. Tedei, mi wan niu man; mi gat wan testemoni se gospel ia i tru mo we Jos Ia blong Jisas Kraes i bin kambak long wol. Yang man ia i jusum wei blong Lod mo i kam wan eksampol blong wan tru disaepol long ful laef.blong hem.

Wan fetful yang woman i jusum blong no jenisim ol standet blong hem taem oli askem hem blong dresap long wan standet we i no stret folem kampani we hem i wok long hem. Wetem save ia se bodi blong hem i wan tabu presen we i kam long Papa long Heven mo wan ples we Spirit i save stap, hem i wantem blong laef folem wan standet we i moa hae long standet blong wol ia. Hem i no winim tras blong olgeta nomo we oli luk hem i stap laef folem trutok blong gospel blong Jisas Kraes, be tu i holemtaet wok blong hem, we kolosap nomo hem i lusum. Fasin blong hem blong mekem wanem i gud long ae blong Lod, bitim wanem i wok blong wol ia, i bildim tras blong hem long kavenan long taem we i had blong mekem ol joes.

Ol brata mo sista, yumi stap fesem ol semmak joes ia long evri dei laef blong yumi. I tekem strong paoa long tingting mo wan hat blong mekem samting blong stop mo stap ones blong luklukbak long yumiwan mo luksave ol samting we yumi no strong long hem we i stap stopem yumi blong jusum wei blong Hem be i no wei blong yumi. Bigfala tes blong stap wan disaepol i stap long hamas yumi wantem lego olfala fasin blong yumi, mo givim hat mo sol blong yumi fulwan long God blong mekem tingting blong Hem i kam hemia blong yumi.

!Wan long ol gudfala taem long laef ia i taem yumi kasem glad ia we i kam evri taem yumi “mekem wanem we Lod i wantem” mo “wanem i wok gud blong yumi” i kam wan mo i semmak! Blong kam wan tru disaepol blong Lod bae i no mas gat wan samting blong stopem yu blong mekem tingting blong Lod i kam tingting blong yuwan. Long gudfala taem ia, yumi kam tabu long Lod, mo yumi givim evri samting we yumi wantem i go long Lod. Blong givim yumi olsem long saed blong spirit, i naes tumas, i gat paoa, mo i jenisim yumi.

Mi testifae long yufala se blong folem tingting blong Lod long laef blong yumi, bae i mekem yumi save faenem naesfala perel ia long wol—kingdom blong heven. Mi prea se wanwan long yumi, long taem blong yumi, bae yumi save talemaot, wetem tras blong kavenan, long Papa blong yumi long Heven mo Sevya Jisas Kraes se “wanem i wok blong Yu, i wok blong mi.” Mi talem ol samting ia long tabu nem blong Jisas Kraes, amen.