Susan H. Porter

“Usa ka butang nga misantop sa among hunahuna sa milabayng tuig mao, unsaon man nato paglig-on ang kabataan sa espirituhanong paagi?” miingon si Sister Susan H. Porter. “Kon maghisgot kita mahitungod sa pagpalig-on sa hugot nga pagtuo sa bag-o nga henerasyon, kana kinahanglang magsugod diha sa Primary.”

Si Sister Porter nakakita sa mga panalangin nga moabot ngadto sa nabunyagan nga kabataan samtang sila moapil isip mga miyembro sa pakigsaad diha sa Simbahan.

“Kasagaran pinaagi kini sa pagbuhat ug pagserbisyo nga ang atong mga pagpamatuod molambo,” siya mipasabot. “Ang kabataan makakat-on sa pagtinguha og inspirasyon gikan sa langit.”

Sa wala pa siya matawag isip Kinatibuk-ang Presidente sa Primary, si Presidente Porter nakaserbisyo isip Unang Magtatambag sa Kinatibuk-ang Kapangulohan sa Primary sulod sa usa ka tuig.

Siya miingon nga daghang kabataan ang dili makaapil sa Primary atol sa COVID-19 nga pandemya. Siya usab nakakita, ug nasayod, sa mga hagit nga giatubang sa nag-inusara nga kababayen-an. Ang iyang bana, si Elder Bruce D. Porter sa Seventy, namatay niadtong 2016.

“Adunay daghang Dominggo nga ako walay sakramento,” siya miingon.

Samtang gipaambit niya ang iyang mga kasinatian, ang ubang kababayen-an miingon niya, “Ang kamatuoran nga ikaw nagserbisyo sa Simbahan nakahatag nako og mas maayong panglantaw nga ang Simbahan nanginahanglan usab nako.”

Si Susan Elizabeth Holland Porter natawo niadtong Hulyo 31, 1955, sa Siyudad sa Ponca, Oklahoma, USA, ngadto nila ni Hans J. ug Charlene Coleman Holland ug nagdako sa New York, USA.

Naminyo siya ni Elder Porter niadtong Pebrero 2, 1977, sa Washington D.C. Temple. Sila mipadako sa ilang upat ka anak sa silangang bahin sa Estados Unidos, Germany, ug Utah ug mituman sa mga buluhaton sa Simbahan didto sa Europe East Area.

Si Sister Porter migradwar sa bachelor’s degree sa chemistry sa Brigham Young University. Nagtrabaho siya isip kaabag sa laboratoryo alang sa Massachusetts Institute of Technology ug isip usa ka magtutudlo sa math. Siya miboluntaryo usab sa nagkalainlaing mga organisasyon sa komunidad ug katilingban.

Si Sister Porter nakaserbisyo sa Relief Society general advisory council, ug ang iyang kanhi nga mga calling naglakip sa pagkahimong magtatambag sa kapangulohan sa Relief Society sa stake, presidente sa Relief Society ug Young Women sa ward, magtutudlo sa Doktrina sa Ebanghelyo, ug lider sa musika sa Primary.